Goşa toýuň şanyna

Daşoguz welaýatynyň Şabat etrabynyň  Altyn ýol geňeşligindäki Dilewar oba medeniýet öýünde Medeniýet we sungat işgärleriniň hem-de Magtymguly Pyragynyň şygryýet güni mynasybetli medeni çäre geçirildi.

Türkmenistanyň Magtymguly adyndaky Ýaşlar guramasynyň welaýat geňeşiniň, Tebigaty goramak jemgyýetiniň welaýat bölüminiň hem-de Daşoguz agrosenagat orta hünär okuw mekdebiniň bilelikde guramagynda geçirilen çärä talyp ýaşlar, mugallymlar gatnaşdylar.

Çärede çykyş edenler ynsan kalbynyň ruhy joşgunyna deňelýän milli medeniýetimiziň, sungatymyzyň häzirki ajaýyp döwrümizde belent sepgitlere eýe bolýandygy hem-de Gündogaryň görnükli söz ussady Magtymguly atamyzyň çuňňur pähim-paýhasa ýugrulan many-mazmunly goşgularynyň ähmiýeti dogrusynda giňişleýin gürrüň etdiler. Şeýle hem dana şahyrymyzyň şygyrlarynyň ösüp gelýän ýaş nesli watansöýüjilik, ynsanperwerlik ruhunda terbiýelemekde uly ähmiýete eýe bolup durýandygy babatda buýsanç bilen belläp geçdiler.