Goşa mukaddesligiň şanyna

Goşa mukaddesligiň şanly toýuna bagyşlanyp, Daşoguz welaýatynyň Daşoguz şäher häkimliginiň, TDP-niň Daşoguz şäher komitetiniň, Daşoguz şäher medeniýet merkeziniň bilelikde guramagynda häkimligiň mejlisler zalynda aýdym-sazly dabara geçirildi. «Parahatlyk nyşany parla ýaşyl Baýdagym!» atly şygar bilen geçirilen dabara il sylagly ýaşulular, mährem eneler, bilim, saglygy goraýyş, medeniýet, sport ulgamlarynda zähmet çekýän adamlar gatnaşdylar.

Berkarar döwletiň täze eýýamynyň Galkynyşy döwrüniň Halkara parahatçylyk we ynanyşmak ýylynyň şanly wakalarynyň, seneleriniň, baýramçylyklarynyň üstini ýetirýän goşa mukaddesligiň — Türkmenistanyň Konstitusiýasynyň we Döwlet baýdagynyň toýy ýurdumyzyň binýadynyň berkliginiň, merdana halkymyzyň agzybirliginiň, jebisliginiň, demokratik, hukuk, dünýewi döwlet, adalatly raýat jemgyýeti baradaky milli düşünjeleri özünde jemleýän gymmatlygyň dabaralanmasydyr. Hormatly Prezidentimiz Arkadagly Gahryman Serdarymyzyň we Gahryman Arkadagymyzyň ähli tutumly işleriniň özeninde adam hakdaky alada öz beýanyny tapýar. Bu ýörelge Konstitusiýamyzda hem berkidilmek bilen, bu günki gün döwletimizde emele gelýän ýokary derejeli ýaşaýyş-durmuşyň, öňegidişlikleriň buýsanjy ýaşyl Tugumyzyň pasyrdysynda ýakymly owaz bolup, tutuş barlyga ýaýraýar. Mazmuny boýunça döwletiň hem halkyň ykbalynyň gowulyklarynyň nyşany bolan goşa mukaddesligiň raýatlarymyzyň her biriniň buýsanjyna öwrülendigi ykrar edilen hakykatdyr. Ol bolsa her bir zähmet adamynyň maksatlarynyň myrada ýetmegine, şeýlelikde, döwletimiziň kuwwatynyň artmagyna ylham hem itergi berýän güýçdir. Şular dogrusynda çykyşlarda uly buýsanç bilen gürrüň edildi.

Dabaranyň dowamy şäher medeniýet merkeziniň aýdym-saz toparynyň baýramçylyk mynasybetli taýýarlan çykyşlaryna utgaşdy.