Ganatly bedewleriň waspy

Daşoguz şäherindäki «Bagt köşgi» toý dabaralar merkezinde TMÝG-niň Daşoguz  welaýat geňeşiniň we Daşoguzyň Magtymguly Garlyýew adyndaky ýörite sungat mekdebiniň Türkmen bedewiniň milli baýramy mynasybetli guran çäresi «Şan-şöhraty dünýä dolan bedewim» diýlip atlandyryldy.

Çäräniň dowamynda tanymal atşynaslaryň, seýisleriň birnäçesi ata Watanymyzda atçylygy ösdürmek barada alnyp barylýan işlere öz ýürek buýsançlaryny beýan etdiler. Şonuň ýaly-da Daşoguzyň Magtymguly Garlyýew adyndaky ýörite sungat mekdebiniň talyp ýaşlarynyň ýerine ýetirmeklerinde ýelden ýyndam bedewlerimiziň, ajaýyp durmuşymyzyň waspyny edýän aýdym-sazlar belentden ýaňlanyp, joşgunly tanslar ýygnananlarda uly täsir galdyrdy. Şeýlelikde, bu çäre häzirki günlerde türkmen halkynyň milli baýlygy hasaplanylýan, dünýäde deňi-taýy bolmadyk gamyşgulak bedewlerimiziň şanyna çäksiz şatlyk-şowhun bilen dowam edýän dabaralaryň birine öwrülip, hemmeleriň göwnüni galkyndyrdy.