Ekişiň depgini güýçlenýär

Köneürgenç etrabynyň ekerançylary her ýyl ýeralmanyň, gök önümleriň bol hasylyny ýetişdirmekde ýokary netijeleri gazanýarlar. Halkara parahatçylyk we ynanyşmak ýylynda hem olar bu ugurda gaýratly zähmet çekýärler.

Şu ýyl etrap boýunça 550 gektarda ýeralma, 180 gektarda sogan hasylyny ýetişdirmek göz öňünde tutulýar. Bu ugurda kärendeçileriň ýüzlerçesi daýhan birleşikleri bilen şertnama baglaşyp, olaryň ekişini gyzgalaňly dowam etdirýärler. Ekiş geçirmekde «Täze güýç» daýhan birleşiginiň ekerançylary aýratyn tapawutlanýarlar. Bu daýhan birleşigi boýunça şu ýyl 50 gektarda ýeralma, 13 gektarda sogan ekişini geçirmeklik meýilleşdirilýär. Daýhan birleşiginiň tejribeli kärendeçileri Haldurdy Annaýew 6,9, Parahat Tontaýew 5,5, gektar ýerde ýeralmanyň, Arazgeldi Akgaýew 3,7, Meretbaý Amanow 3,2 gektar ýerde soganyň ekişini irki möhletlerde geçirdiler. Etrabyň «Akgala», «Bereket» daýhan birleşiklerinde hem ýeralmanyň, soganyň ekişi guramaçylykly dowam edýär.