Ekişe ykjam taýýarlyk

Garaşsyzlyk etrabynyň N.Andalyp adyndaky daýhan birleşiginiň gallaçylary ýylyň-ýylyna ak bugdaýyň bereketli hasylyny ýetişdirip gelýärler. Olar geçen orak möwsüminde hem bu babatda ýokary netijeleri gazandylar.

Birleşikde öňde duran güýzlük bugdaý ekişi möwsümine oňat taýýarlyk görüldi. Bu ýerde şu döwürde 1 müň gektar meýdanda bu çäräni ýokary hilli geçirmek göz öňünde tutulyp, şu wagta çenli olaryň esasy böleginde sürüm, tekizleme, çil çekmek ýaly zerur çäreleriň bellenen möhletlerde ýerine ýetirilmegi üpjün edildi. Şonda daýhan birleşigi boýunça gallaçylyk bilen meşgullanýan kärendeçiler işjeňlik görkezdiler.

— Biziň toparymyzyň çäginde 200 gektardan gowrak bugdaý meýdanlary bolup, olara tejribeli kärendeçileriň 120-ä golaýy gözegçilik edýär. Olar geçen orak möwsüminde gazanan üstünliklerini has-da berkitmegi maksat edinip, şu ýylyň bugdaý ekişi möwsümine hemmetaraplaýyn taýýarlykly geldiler. Nesip bolsa, bu çäräni bellenen möhletlerde doly amala aşyryp, geljek ýylyň bol hasylynyň binýadyny ykjam tutarys — diýip, daýhan birleşiginiň1-nji kärendeçiler toparynyň ýolbaşçysy Şakasym Ibragimow gürrüň berýär.