Ebedi dostlugyň dabaralanmagy

ÝUNESKO-nyň işleri barada Türkmenistanyň milli toparynyň hem-de Daşoguz welaýat häkimliginiň bilelikde guramagynda geçirilen «Alpamyş» eposynyň türkmen mirasyndaky orny» atly dabaraly çäre doganlyk halklaryň arasyndaky gatnaşyklaryň giň gerimde ösdürilýändiginiň aýdyň nyşanyna öwrüldi. Dabarada Nurmuhammet Andalyp adyndaky döwlet sazly-drama teatrynyň eýwanynda milli medeniýetimizi, sungatymyzy, kitaphana we muzeý gymmatlyklaryny özünde jemleýän sergi guraldy. Duz-çörekli garşylanan myhmanlar sergini uly gyzyklanma bilen synladylar.

Teatrda geçirilen dabaraly çärä welaýatda ýaşaýan özbek we gazak milletleriniň wekilleri, bagtyýar ildeşlerimiz, talyp ýaşlar gatnaşdylar. Onuň dowamynda çykyş edenler özbek we gazak halklarynyň «Alpamyş» eposyny ÝUNESKO-nyň maddy däl medeni mirasynyň sanawyna girizmek baradaky teklibiniň Bitarap döwletimiziň doly goldaýandygyny bellediler. Bellenilişi ýaly, Alpamyş batyr hem halkymyzyň milli gahrymany Görogly beg ýaly ata Watanyň parahatçylygy, halklaryň asuda, abadan durmuşy ugrunda uly işleri bitiren şahsyýetdir.

Bu ýerde çykyş edenler Halkara parahatçylyk we ynanyşmak ýylynda Bitarap Türkmenistanyň Merkezi Aziýanyň döwletleri bilen netijeli gatnaşyklary alyp barýandygyny,  şunda medeni diplomatiýanyň yzygiderli ösdürilýändigini uly buýsanç bilen nygtadylar.

Welaýatyň medeniýet we sungat ussatlarynyň konserti dabaranyň şowhunyny has-da artdyrdy. Nurmuhammet Andalyp adyndaky döwlet sazly-drama teatrynyň artistleriniň ýerine ýetiren edebi sazly çykyşynda  dost-doganlyk gatnaşyklary buýsançly wasp edildi. Şeýle hem bu ýerde özbek we gazak halklarynyň milli aýdym-sazlary, tanslary, «Görogly» şadessanyndan, «Alpamyş» eposyndan parçalar ýerine ýetirildi.