Döwrüň rowaçlygy

Halkara parahatçylyk we ynanyşmak ýylynda ýurdumyzyň içeri we daşary syýasatynda alnyp barylýan beýik işleri wagyz etmek maksady bilen, TDP-niň Daşoguz şäher komiteti welaýat kitaphanasy bilen bilelikde «tegelek stoluň» başynda söhbetdeşlik geçirdi. «Arkadagly Gahryman Serdarymyzyň özgertmeler syýasaty — taryhy eýýamyň ganaty» atly şygar bilen geçirilen söhbetdeşligiň dowamynda oňa gatnaşanlar hormatly Prezidentimiziň baştutanlygynda döwlet syýasatynyň ugurlary boýunça gazanylýan ösüşler dogrusynda özara pikir alyşdylar.

Häzirki wagtda taryhy özgertmeleriň esasynda her bir ugurda amal edilýän beýik işler döwletiň hem jemgyýetiň ösüşiň belent menzillerine tarap ynamly öňe barýandygyny görkezýär. Şonuň netijesinde ýurdumyzyň abraýy has-da artýar, halkyň durmuş ýagdaýy döwrebap derejede gowulanýar. Maksatly tutumlara beslenen şeýle özgertmeler döwletimiz bilen dünýä jemgyýetçiliginiň arasyndaky hyzmatdaşlygyň hil taýdan ýokary derejä çykmagyna uly mümkinçilikleri berýär. Bu bolsa diňe bir halkymyzyň däl, eýsem, tutuş adamzadyň ýagty geljeginiň hatyrasyna alnyp barylýan işleriň rowaçlanýandygyna aýdyň kepil bolup durýar.