Döwrebap merkezde okuw sapagy

Geçen ýyl, Halkara Bitaraplyk gününiň öň ýanynda Daşoguz welaýatynyň Daşoguz şäheriniň günorta-günbatar künjeginde ýaşaýyş jaý we desgalar toplumy bilen bir wagtda «KAMAZ» okuw-hyzmat ediş merkeziniň dabaraly ýagdaýda açylyp ulanmaga berilmegi welaýatyň durmuşynda uly waka öwrüldi. Bu merkez häzirki döwrüň ýokary talaplaryna laýyk öndürilýän «KAMAZ» kysymly awtoulaglara tehniki hyzmat etmeklige niýetlenendir. Bu awtoulaglaryň köp sanlysynyň satyn alnyp, ýurdumyza, şol sanda welaýata getirilendigi, olaryň gurluşyk, oba hojalyk pudaklarynda giňden ulanylýandygy mälimdir.

Bu merkeziň welaýatyň awtoulag kärhanalarynyň sürüjileriniň hünärini kämilleşdirmeklige, ýokary we orta hünär okuw mekdeplerinde degişli hünärmenleri taýýarlamak ugrunda alnyp barylýan işlere hem ýakyndan ýardam berýändigini bellemek gerek. Ýakynda Türkmen oba hojalyk institutynyň talyplary hem merkeziň ýörite abzallaşdyrylan otaglarynda okuw sapaklaryny geçdiler. Bu olaryň nazary bilimlerini amalyýetde has çuňlaşdyrmaklaryna şert döretdi.