Dost-doganlygyň we parahatçylygyň waspçysy

Berkarar döwletiň täze eýýamynyň Galkynyşy döwründe Bitarap Türkmenistanyň medeni diplomatiýasy has-da rowaçlanýar. Türkmen halkynyň Milli Lideri Gahryman Arkadagymyz «Parahatçylyk sazy, dostluk, doganlyk sazy» atly kitabynda Şükür bagşynyň keşbiniň üsti bilen sazyň gudratynyň neneňsi beýikdigini ýene-de bir gezek açyp görkezýär. Şükür bagşynyň kyn meseleleri sazyň kömegi bilen ýeňip geçmeginde bolsa halkymyzyň parahatçylyga bolan beýik garaýşy jemlenendir. Sazyň gudraty bilen parahatçylygy, ynanyşmagy wagyz etmek, Şükür bagşynyň keşbiniň mysalynda ýaş nesillerde parahatçylyk medeniýetini kemala getirmek maksady bilen, Türkmenistanyň Demokratik partiýasynyň Daşoguz welaýat komitetiniň, Beki Seýtäkow adyndaky mugallymçylyk mekdebiniň, Daşoguz şäheriniň bagşylar muzeýiniň we Magtymguly Garlyýew adyndaky ýörite sungat mekdebiniň bilelikde guramagynda «Şükür bagşy — dost-doganlygyň we parahatçylygyň waspçysy» atly dabaraly maslahat geçirildi.

Beki Seýtäkow adyndaky mugallymçylyk mekdebinde geçirilen dabaraly maslahata mekdebiň mugallymlary, talyp ýaşlar gatnaşdylar. Maslahatyň dowamynda çykyş edenler parahatçylygyň we dost-doganlygyň waspçysy hökmünde Şükür bagşynyň keşbiniň Milli Liderimiziň «Parahatçylyk sazy, dostluk, doganlyk sazy» atly eserinde täsirli suratlandyrylýandygyny bellediler. Şükür bagşy özüniň dutarynda ýerine ýetirýän ajaýyp sazlary bilen parahatçylygy, ynanyşmagy döredip bilen şahsyýetdir. Bu barada çykyşlarda aýratyn durlup geçildi.

Soňra bu ýerde Magtymguly Garlyýew adyndaky ýörite sungat mekdebiniň bagşylar we sazandalar topary tarapyndan halk sazlary we aýdymlary ýerine ýetirildi. Şanly ýylymyzyň waspyny ýetirýän ajaýyp aýdym dabaraly maslahatyň jemlenmesine öwrüldi.