Dalaşgärleriň resminamalary kabul edilýär

Türkmenistanyň Prezidentiniň 2024-nji ýylda ýurdumyzyň ýokary we orta hünär okuw mekdeplerine okuwa kabul etmegiň meýilnamasyny tassyklamak hakyndaky Buýrugyna laýyklykda, 15-nji iýuldan ýokary we orta hünär okuw mekdeplerine dalaşgärlerden resminamalary kabul etmek möwsümi başlandy.

Bu işlere Daşoguz welaýatynda hem guramaçylykly badalga berildi. Möwsümiň dowamynda bagtyýar ýaşlar öz saýlan hünärleri boýunça ýokary we orta hünär okuw mekdeplerine resminamalaryny tabşyrarlar. Resminamalary kabul etmek 15 — 28-nji iýuly aralygynda geçiriler. 

2024-nji ýylda ýurdumyzyň ýokary we orta hünär okuw mekdeplerine okuwa kabul etmegiň Tertibine laýyklykda, Daşoguz şäherindäki 7-25-28-nji orta mekdeplerde, welaýat Maliýe-ykdysady orta hünär okuw mekdebinde, Türkmen oba hojalyk institutynda ýurdumyzyň ýokary okuw jaýlaryna resminamalary kabul etmek işleri geçirilýär. Möwsümi guramaçylykly geçirmek üçin bu ýerlerde ähli şertler we mümkinçilikler döredildi.