Bugdaý maýsalary iýmitlendirilýär

Daşoguz welaýatynyň Köneürgenç etrabynyň gallaçy kärendeçileri gyş paslynyň şu günlerinde bugdaý maýsalarynyň idegini ýetirýärler. Geçen ýylyň güýz aýlarynda ekiş geçirilen 17 müň 500 gektar ýerde kadaly gögeriş gazanan gallaçy kärendeçiler häzirki wagtda bugdaý maýsalaryny goşmaça mineral dökünler bilen iýmitlendirmek, ösüş suwuny tutmak işlerini ýokary depginlerde dowam etdirýärler. Bugdaý maýsalaryny iýmitlendirmek boýunça daýhan birleşikleriniň tehnikalaryndan ybarat bolan ýörite topar döredilip, bu topar tehnikalaryň 25-sini özünde jemleýär. Olaryň kömegi bilen her günde 500 gektara golaý bugdaý meýdanlaryna karbamid döküni talabalaýyk berilýär. Etrabyň «Şabende», «Magrupy» daýhan birleşikleriniň bugdaý meýdanlaryna dökün bermek işi doly tamamlanyp, häzirki wagtda bu iş «Watan», «Kyrkgyz» daýhan birleşiklerinde dowam edýär. Kärendeçi daýhanlar hem özleriniň garamagyndaky bugdaý ýerleriniň daş-töwereklerinde, çillerde, akabalarda arassaçylyk işlerini geçirýärler. Olar şu ýylda hem bol hasyl öndürmek ugrunda iş depginlerini barha ýokarlandyrýarlar.