Bol hasyl yhlasa bagly

Daşoguz welaýatynyň ekerançylary soňky ýyllarda beýleki oba hojalyk önümleri bilen bir hatarda, ýeralmanyň ýetişdirilýän möçberini artdyrmak ugrunda hem derwaýys işleri durmuşa geçirýärler. Munuň özi hormatly Prezidentimiziň halkymyzyň bu önüme bolan isleginiň doly kanagatlandyrylmagyny gazanmak babatda öňde goýýan wezipeleriniň üstünlikli ýerine ýetirilmegini üpjün etmek boýunça alnyp barylýan işlere mynasyp goşantdyr. 

Halkara parahatçylyk we ynanyşmak ýylynda-da bu gymmatly önümiň bol hasylyny ýetişdirmek ugrundaky aladalar welaýatyň dürli ýerlerinde turuwbaşdan giň gerim aldy. Şeýlelikde, oňat sürlüp, tekizlenilen, suwdan gandyrylan meýdanlarda ýeralmanyň ekişine badalga berildi. Häzirki wagtda bolsa bu çäräniň depgini günsaýyn ýokarlanýar.

Bu babatda Akdepe etrabynyň ekerançylarynyň hem öndürijilikli iş alyp barýandyklaryny bellemeli. Çünki olar şu möwsümde 3440 gektar meýdanda ýeralmanyň ekişini geçirmegi maksat edinmek bilen, bu babatda derwaýys çäreleriň ýokary hilli ýerine ýetirilmegine ähli gujur-gaýratlaryny sarp edýärler. Şonuň netijesinde etrabyň daýhan birleşikleriniň, daýhan hojalyklarynyň ekin meýdanlarynda ýeralma ekişi talabalaýyk alnyp barylýar.

Etrabyň N.Andalyp adyndaky geňeşliginiň çäginde hereket edýän «Zehin açary» daýhan hojalygy ýeralma ýetişdirmeklige ýöriteleşdirilendir. Bu ýerde şu ýyl 626 gektar meýdanda bu önümiň bol hasylyny ýetişdirmek meýilleşdirilýär. Häzirki günlerde hojalygyň agzalary ýeralma ekişini guramaçylykly dowam etdirýärler.

Hojalykda ýeralma ýetişdirmegiň ýol-ýodalaryny birkemsiz ele alan tejribeli daýhanlaryň onlarçasy zähmet çekýär. Olaryň hatarynda Durdymyrat Kerimow, Döwran Öwezgeldiýew, Tirkeş Orazow we beýlekiler bar. Şeýle başarjaň daýhanlar her ýyl bereketli hasyly ýetişdirmekde, ýygnap almakda köplere görelde bolýarlar.