Bol hasyl ugrunda

Boldumsaz etrabynyň «Döwletli» daýhan birleşiginiň zähmetsöýer kärendeçileri häzirki döwrüň her bir gününi netijeli peýdalanyp, geçen ýylyň güýzünde ekiş geçirilip, kadaly gögeriş alnan 520 gektar meýdanda bugdaýyň ideginiň möwsümleýin çärelerini berjaý etmekde gaýratly zähmet çekýärler. Şeýlelikde, olar ýerli dökünleri taýýarlamak, ýöriteleşdirilen tehnikalaryň kömegi bilen atyzlara sepmek, şonuň ýaly-da ösüş suwuny bermek ýaly işleri gyzgalaňly dowam etdirýärler. Daýhan birleşiginiň 1,2,3-nji kärendeçiler toparlarynda işleriň has-da öndürijilikli barýandygyny bellemek bolar. Kärendeçi daýhanlara ýardam bermekde mehanizatorlar Narbaý Hojanepesow, Agajan Amangeldiýew, Nurnepes Çaryýew dagy oňat görelde görkezýärler. Daýhan birleşiginde amala aşyrylýan şeýle giň gerimli işler şu ýyl Watan harmanyna 972 tonna ýokary hilli bugdaý tabşyrmak barada kabul edilen meýilnamanyň üstünlikli ýerine ýetirilmegine oňyn şertleriň döredilýändigine güwä geçýär.