Bitaraplyk — parahatçylygyň binýady

Bütin dünýäde belent ykrara eýe Bitaraplyk taglymaty berkarar döwletimiziň hoşniýetli daşary syýasatynyň binýady bolup, onuň syýasy ýörelgeleri dünýä diplomatiýasynyň esasy ugurlaryny kesgitleýär. Türkmen halkynyň Milli Lideri Gahryman Arkadagymyzyň «Dialog — parahatçylygyň kepili» atly baş ýörelgesinden ugur alnyp, dünýä döwletleri bilen hoşniýetli gatnaşyklar ýola goýulýar. Berkarar döwletimiziň daşary syýasaty dünýäde parahatçylygy, ynanyşmagy we dost-doganlygy pugtalandyrmaga uly goşant goşýar.

Häzirki wagtda türkmen Bitaraplygy döwletara hyzmatdaşlygynda jebisleşdiriji, halklaryň arasyndaky ynanyşmagy pugtalandyryjy güýje öwrülýär. 1995-nji ýylyň 12-nji dekabrynda BMG-niň Baş Assambleýasynyň 50-nji ýubileý mejlisinde «Türkmenistanyň hemişelik Bitaraplygy» atly Kararnamanyň kabul edilmegi dünýäniň syýasy giňişliginde parahatçylyk söýüjilikli täze taglymatyň dörändigini äleme äşgär etdi. Häzirki wagta çenli bu Kararnamanyň üçünji gezek kabul edilmegi hem Türkmenistanyň Bitaraplyk hukuk derejesiniň umumadamzat ähmiýetini aýdyň görkezýär. BMG-niň Baş Assambleýasynyň mejlisinde kabul edilen ýörite Kararnamanyň esasynda 12-nji dekabryň «Halkara Bitaraplyk güni» diýlip yglan edilendigini hem aýratyn nygtamak zerur.

Geçen otuz ýylyň dowamynda Türkmenistan Bitaraplyk hukuk ýagdaýyndan gelip çykýan borçlara doly eýerýän ýurt hökmünde halkara giňişliginde uly abraýa mynasyp boldy. Berkarar döwletimiz tarapyndan öňe sürlen başlangyçlaryň ençemesiniň bütin dünýäde uly goldawa we ykrara eýe bolmagy hem sözümize aýdyň şaýatlyk edýär.