Biraýlyk üstünliklere beslendi

Garaşsyz, baky Bitarap ýurdumyzyň beýleki künjeklerinde bolşy ýaly, Daşoguz welaýatynda hem şu ýylyň sentýabr aýynda «Ýol hereketiniň howpsuzlygy — ömrümiziň rahatlygy» atly şygar astynda geçirilen ýol hereketiniň howpsuzlygynyň biraýlygy üstünliklere beslendi. Onuň dowamynda Daşoguz welaýat Polisiýa müdirliginiň polisiýanyň şäher, etrap bölümleriniň polisiýanyň ýol gözegçiligi bölümçeleriniň işgärleriniň jemgyýetçilik guramalarynyň wekilleri bilen bilelikde edara-kärhanalarda, okuw jaýlarynda, orta mekdeplerde, beýleki köpçülik ýerlerinde guran okuw sapaklary, duşuşyklary, söhbetdeşlikleri işjeň ýagdaýda geçip, olara gatnaşyjylaryň ýol hereketiniň düzgün-kadalaryny has çuň öwrenmeklerine, ýola çykanlarynda seresaplylygynyň, hüşgärliginiň ýokarlanmagyna ýardam berdi.

Belli bolşy ýaly, watandaşlarymyzyň saglygy, olaryň öý-ojaklarynyň abadan, asuda bolmagy babatdaky aladalara ýugrulan bu biraýlygyň şeýle netijeleriň gazanylmagynyň üpjün edilmeginde ähmiýeti örän uludyr. Çünki biziň ýurdumyzda iň gymmatly baýlyk ynsandyr, onuň parahat, bagtyýar durmuşda ýaşamagydyr. Munuň üçin bolsa ýol-ulag hadysalarynyň öňüniň alynmagy, her bir ynsanyň öz islän ýerine sag-aman baryp-gelmegi hem zerur bolup durýar. Şonuň üçin hormatly Prezidentimiziň taýsyz tagallalary bilen her ýyl geçirilip gelinýän biraýlygyň bu babatlarda berýän netijeleri aýratyn guwandyryjy bolýar.

Elbetde, ýol hereketiniň howpsuzlygynyň biraýlygynyň tamamlanmagy bu ugurdaky aladalaryň sähelçe-de gowşadylýandygyny aňlatmaýar. Çünki olar il-ýurt bähbitli hemişelik dowam edýän işdir. Goý ýollarymyz mydama parahat, asuda bolsun!