Bilimli nesil — kuwwatly Watan

Berkarar döwletiň täze eýýamynyň Galkynyşy döwründe bilim ulgamyny ösdürmeklige aýratyn ähmiýet berilýär. Milli bilim ulgamyny dünýä ölçeglerine laýyk ösdürmek, bilim-terbiýeçilik edaralarynyň işini sanlylaşdyrmak bu ugurda amala aşyrylýan özgertmeleriň esasy maksady bolup durýar.

Bilim ulgamyny kämil derejede ösdürmek, ýokary bilimli hünärmenleri taýýarlamak babatda amala aşyrylýan ägirt uly işlerdir döwrebap özgertmeler «Berkarar döwletiň täze eýýamynyň Galkynyşy: Türkmenistany 2022 — 2052-nji ýyllarda durmuş-ykdysady taýdan ösdürmegiň Milli maksatnamasynda» we «Türkmenistanda sanly bilim ulgamyny ösdürmegiň», «Türkmenistanda tebigy we takyk ylmy ugurlara degişli dersleri okatmagy kämilleşdirmegiň», «Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli» Konsepsiýalarynda kesgitlenen wezipeleriň üstünlikli durmuşa geçirilmeginiň mysalynda has aýdyň şöhlelenýär.

Bilimiň elýeterliligini üpjün etmek, tehnologiýa we tehnika babatda häzirki döwrüň ösen tejribelerini ornaşdyrmak, interaktiw okuw usulyýetini kämilleşdirmek, bilim bermegiň usullarynyň köpdürlüligini ösdürmek, emeli aň arkaly ösüşi seljermek we baha bermek, innowasion bilim modellerini döretmek, bilim ulgamyny dolandyrmagyň netijeliligini ýokarlandyrmak ýurdumyzda durmuşa geçirilýän milli maksatnamalardyr konsepsiýalaryň esasy ileri tutulýan ugurlarydyr. Bilim ulgamynyň sanlylaşdyrylmagy häzirki döwrüň möhüm talabydyr. Ylmyň we tehnikanyň gazananlarynyň, dünýäniň öňdebaryjy tejribeleriniň yzygiderli ornaşdyrylmagy bilen barha döwrebaplaşýan milli bilim ulgamy ata Watanymyzyň ykdysady kuwwatynyň berkemegine, dürli ugurlar babatda gülläp ösmegine şert döredýär.

Bilim ulgamynda amala aşyrylýan döwlet syýasatynyň düýp özeninde «Bilimli nesil — kuwwatly Watan» diýen ýörelge has aýdyň şöhlelenýär. Berkarar döwletiň täze eýýamynyň Galkynyşy döwründe bilimli, sowatly, ylymly ýaş nesli ýetişdirmek arkaly ata Watanymyzyň röwşen geljeginiň binýady goýulýar.