Bilim işgärleriniň usuly-amaly okuwlary

Bilim ulgamyny ösdürmek we bilim-terbiýeçilik işiniň usulyýetine innowasiýalary, sanly ulgamyň mümkinçiliklerini we öňdebaryjy tejribeleri ornaşdyrmak döwrüň talabydyr. Şu nukdaýnazardan, bilim işgärleriniň her okuw ýylynyň başlanmagynyň öňüsyrasynda geçirilmegi däbe öwrülen usuly-amaly okuwlary möhüm ähmiýetlidir. Şu hepdäniň başynda Daşoguz welaýatynyň etrap merkezlerindäki we Daşoguz şäherindäki mekdeplerde bilim işgärleriniň usuly-amaly okuwlary geçirildi. Bilim-terbiýeçilik edaralarynda zähmet çekýän ähli bilim işgärleriniň gatnaşmagynda geçen usuly-amaly okuwlar 2024-2025-nji okuw ýylynyň jemini jemlemekde we täze, 2025-2026-njy okuw ýylynda öňde durýan wezipeleri ara alyp maslahatlaşmakda möhüm ähmiýete eýe boldy.

Usuly-amaly okuwlar geçýän mekdeplerde döredijilikli işleýän mugallymlaryň iş tejribeleri boýunça sergiler guraldy. Okuwlar «Bilim hakynda» Türkmenistanyň Kanunyna, «Türkmenistanda umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýasyna» we ony amala aşyrmak boýunça ýerine ýetirmeli işleriň Meýilnamasyna, bilim ulgamyna degişli kabul edilen beýleki konsepsiýalara, Türkmenistanyň Bilim ministrliginiň bilim işini dolandyrmaga degişli kadalaşdyryjy iş meýilnamalaryna laýyklykda guralyp, onda okuw-terbiýeçilik işlerini döwrebap guramak boýunça alnyp barylýan işler ara alnyp maslahatlaşyldy. Şeýle hem öňdebaryjy bilim işgärleriniň ýaş nesli terbiýelemegiň esasy ugurlary, sapaklarda sanly ulgamyň mümkinçiliklerinden, okatmagyň häzirki zaman usullaryndan, okuw-görkezme esbaplardan netijeli peýdalanyşlary hakyndaky çykyşlarynyň üsti bilen özara pikir we tejribe alşyldy.