Beýik işlere buýsanç

«Arkadagly Gahryman Serdarymyzyň özgertmeler syýasaty — taryhy eýýamyň ganaty» atly şygar bilen, Türkmenistanyň Demokratik partiýasynyň Daşoguz welaýat hem şäher komitetleriniň, welaýat kitaphanasynyň bilelikde guramagynda söhbetdeşlik geçirildi. Welaýat kitaphanasynda geçirilen söhbetdeşlige şäheriň edara-kärhanalarynda zähmet çekýän adamlaryň uly topary gatnaşdy.

Onuň dowamynda çykyş edenler milli hem dünýä derejesinde «Halkara parahatçylyk we ynanyşmak ýyly» atly şygar bilen geçýän şu ýylymyzda gazanylýan syýasy üstünlikler dogrusynda giňişleýin gürrüň etdiler. Ýurdumyzda amala aşyrylýan özgertmeler syýasatynyň bu günki gün diňe bir halkymyz üçin däl, eýsem, dünýä jemgyýetçiligi üçin hem beýik ýaşaýyş-durmuşyň gazanylmagynyň nusgasyny görkezýändigi uly buýsanç bilen nygtaldy.

Gün tertibiniň meselesi boýunça sowal-jogap alyşmalar has-da täsirli boldy. Çünki halkyň syýasy sowatlylygynyň artmagy, günübirin durmuşa geçirilýän beýik özgertmeleriň ähmiýetiniň giňden ýaýylmagy jemgyýetdäki durnukly ýagdaýy pugtalandyrýar hem-de halk bilen döwletiň bitewüligini berkidýär.