Baýramçylyga bagyşlandy

TMÝG-niň Daşoguz şäher geňeşiniň, Daşoguz welaýat kitaphanasynyň, welaýat Taryhy we ülkäni öwreniş muzeýiniň, welaýat bagşylar muzeýiniň, M.Garlyýew adyndaky ýörite sungat mekdebiniň hem-de Türkmenistanyň Goranmak ministrliginiň territorial goranyş müdirliginiň tabynlygyndaky maýor Şöhrat Muhyýewiň serkerdelik edýän harby bölüminiň bilelikde guramagynda, şu harby bölümiň harby gullukçylarynyň gatnaşmagynda mukaddes Garaşsyzlygymyzyň 34 ýyllygyny dabaralandyrmak hem-de territorial goranyş müdirliginiň döredilen güni mynasybetli baýramçylyk dabarasy geçirildi. «Garaşsyzlyk ganat bolup göterdi, arşy nazarlady ýollaryň Watan!» atly şygar bilen geçirilen dabarada baýramçylyklar mynasybetli buýsançly sözler beýan edildi. Şeýle hem aýdym-sazly çykyşlar guralyp, belentden ýaňlanan owazlarda döwlet berkararlygymyzyň, ajaýyp durmuşyň, gülläp ösüşleriň waspy ýetirildi.

TMÝG-niň Daşoguz şäher geňeşi tarapyndan harby gullukçylara baýramçylyk sowgatlary gowşuryldy. Harby gullukçylar welaýat kitaphanasynyň, welaýat Taryhy we ülkäni öwreniş muzeýiniň, welaýat bagşylar muzeýiniň şu ýerde guralan göçme sergilerine syn etdiler.