Baý mazmunly söhbetdeşlik

Halkara parahatçylyk we ynanyşmak ýyly mynasybetli, Türkmenistanyň Demokratik partiýasynyň Daşoguz şäher komitetiniň Daşoguz welaýat kitaphanasy bilen bilelikde guramagynda söhbetdeşlik geçirildi.

«Türkmenistanyň parahatçylyk we ynanyşmak taglymaty — abadan durmuşyň binýady» atly şygar bilen geçirilen söhbetdeşlikde ýurdumyzyň hemişelik Bitaraplyk derejesiniň ykrar edilmegi bilen, geçen 30 ýylyň dowamynda döwletimiz bilen tutuş dünýäniň arasyndaky dürli ugurly gatnaşyklary pugtalandyrmakda, halklaryň dost-doganlygyny berkitmekde, Ýer ýüzünde parahatçylyk söýüjilikli taglymaty giňden ýaýmakda durmuşa geçirilen beýik işler barada täsirli gürrüň edildi. Buýsançly şygar bilen dabaralandyrylýan şu ýylyň täze taryhy döwrümize şan berjek beýik işlere baýlygy bilen aýratyn tapawutlanjakdygy dogrusynda nygtalyp geçildi.

Baý mazmunly söhbetdeşlikde döwletimiziň abraý-mertebesini mundan beýläk hem beýgeltmek babatda öňde goýlan belent wezipeleriň durmuşa geçirilmegine her bir raýatyň işjeň gatnaşygyny pugtalandyrmaga tagallalaryň ediljekdigi uly ynam bilen aýdyldy.