Bäsleşigiň şäher tapgyry

TMÝG-niň Daşoguz şäher geňeşiniň guramagynda Halkara Bitaraplyk güni mynasybetli Türkmenistanyň Bilim ministrligi, Parahatçylyk gaznasynyň müdiriýeti, Magtymguly adyndaky Ýaşlar guramasynyň Merkezi geňeşi hem-de «Güneş» žurnalynyň redaksiýasy tarapyndan ýurdumyzyň umumybilim berýän mekdepleriniň 4 — 12-nji synplarynda okaýan okuwçylarynyň arasynda yglan edilen «Parahatçylyk: çagalaryň sesi» atly döredijilik bäsleşiginiň Daşoguz şäher tapgyry geçirildi.

Onda Daşoguz şäherindäki orta mekdeplerde bilim alýan okuwçylar «Dünýä dursun parahat!» diýen temadan düzme ýazmak, surat çekmek we maket ýasamak şertleri boýunça bäsleşdiler. Bäsleşigiň düzme ýazmak şerti boýunça Daşoguz şäherindäki daşary ýurt dillerine ýöriteleşdirilen 25-nji orta mekdebiň okuwçysy Muhammetnur Tirkeşow birinji, 7-nji orta mekdebiň okuwçysy Miwe Mämmedowa ikinji, 32-nji orta mekdebiň okuwçysy Merjen Töräýewa üçünji orunlary eýelediler. Surat çekmek ugry boýunça geçirilen bäsleşikde 19-njy orta mekdebiň okuwçysy Gunça Saparowa birinji, 2-nji orta mekdebiň okuwçysy Elmira Umarowa ikinji, 7-nji orta mekdebiň okuwçysy Dilber Hupbyýewa hem-de 2-nji orta mekdebiň okuwçysy Nurman Nurmanow üçünji, maket ýasamak boýunça 2-nji orta mekdebiň okuwçysy Meňli Ödebaýewa birinji, 18-nji orta mekdebiň okuwçysy Dostan Alymow ikinji we 27-nji orta mekdebiň okuwçysy Sewinçaý Allabergenowa üçünji orunlara mynasyp boldular. Ýeňiş gazanan okuwçylar TMÝG-niň Daşoguz şäher geňeşiniň sowgatlary hem-de Hormat hatlary bilen sylaglanyldy.