Baş baýramyň şanyna

Mukaddes Garaşsyzlygymyzyň 34 ýyllyk şanly senesine bagyşlanyp, Dünýä türkmenleriniň ynsanperwer birleşiginiň Daşoguz welaýat bölüminiň guramagynda dabaraly maslahat geçirildi. TKA-nyň Daşoguz welaýat birleşmesiniň mejlisler zalynda «Garaşsyzlyk — akyldar şahyrymyz Magtymguly Pyragynyň arzyly arzuwlarynyň wysaly» ady bilen geçirilen dabara ynsanperwer birleşigiň şahsy we köpçülikleýin agzalary, welaýatyň jemgyýetçilik guramalarynyň jogapkär işgärleri, ilkinji guramalarynyň başlyklary we işjeň agzalary gatnaşdylar.

Maslahatyň dowamynda guralan  çykyşlarda mukaddes Garaşsyzlygymyzyň taryhy ýyllary içinde ýurdumyzyň döwlet syýasatynyň ugurlary babatda gazanylan üstünlikler, ýetilen belent sepgitler dogrusynda uly buýsanç bilen söhbet edildi. Özbaşdaklygymyzyň Ýer ýüzündäki türkmenleri bir supranyň başyna jemlemekdäki gymmaty dogrusynda giňişleýin durlup geçildi. Döwrümizi beýgeldýän özgertmeleriň baky berkararlygymyzy pugtalandyrýandygy we döwletimiziň dünýä giňişligindäki ornuny çuňlaşdyrýandygy barada nygtalyp, şeýle döwletli işleriň başynda duran Gahryman Arkadagymyza we Arkadagly Gahryman Serdarymyza hoşallyk sözleri aýdyldy.