Baş baýramyň şanyna

Döwlet berkararlygymyzyň şanly senesi mynasybetli,  Daşoguz şäheriniň «Bagtyýar zaman» medeniýet öýünde şäher medeniýet merkeziniň guramagynda «Ýaşyl tugum buýsanç bilen parlaýar, Watan Garaşsyzlyk toýun toýlaýar!» atly şygar bilen baýramçylyk dabarasy geçirildi.

Berkarar döwletiň täze eýýamynyň Galkynyşy döwründe, «Pähim-paýhas ummany Magtymguly Pyragy» ýylynda giňden bellenilýän mukaddes Garaşsyzlygymyzyň 33 ýyllygyny dabaralandyrmak, sungat ussatlarynyň ýürek joşgunlaryny giňden ýaýmak maksady bilen geçirilen dabarada Magtymguly Garlyýew adyndaky ýörite sungat mekdebiniň talyplaryndan düzülen sazandalar toparynyň sazandarlyk etmeginde şäher medeniýet merkeziniň döredijilik toparynyň aýdym-sazly çykyşlary belentden ýaňlandy.  «Garaşsyzlyk bir suprada jemlenen, halkyň jebisliginiň synmaz sütüni» atly edebi sazly kompozisiýada ýurdumyzyň özbaşdak döwlet hökmünde tutuş dünýäde belende galan abraý-mertebesi uly joşgun bilen beýan edildi.  «Garaşsyzlyk toýumyz» atly aýdyma «Dostluk çemeni» tans toparynyň utgaşykly ýerine ýetiren owadan tansy, «Oguzabat»  folklor döredijilik toparynyň üme çykyşy baýramçylyk joşgunyna milli öwüşgin çaýdy. Çagalar we ýetginjekler tans gurnagynyň höwesjeňleriniň ýerine ýetiren «Watanymda toý bu gün» atly aýdymy bolsa bagtyýar çagalygyň ýurdy bolan Garaşsyz Watanymyzda gaýnap joşýan döwranly durmuşyň  hoş owazly nagmalardaky waspyna öwrüldi.

«Garaşsyz Türkmenistanym», «Garaşsyz ýurdum»,  «Garaşsyz Diýarym, Türkmenistanym!», «Garaşsyz Türkmenistan» ýaly aýdymlar kalplary berkarar döwletimize bolan uly buýsançdan doly sungat ussatlarynyň ýürek hoşallyklary bolup belentden ýaňlandy.  «Oguzabat» folklor döredijilik toparynyň ýerine ýetiren «Küştdepdi» tansy uly toýuň dabarasynyň mazmunyny açyp görkezdi.