Bank hyzmatlary döwrebaplaşdyrylýar

Berkarar döwletiň täze eýýamynyň Galkynyşy döwründe bagtyýar halkymyzyň ýaşaýyş-durmuş derejesini gowulandyrmak babatda durmuşa geçirilýän ägirt uly işler döwlet syýasatynyň ileri tutulýan ugry hökmünde kesgitlenilýär. Olaryň çäklerinde milli ykdysadyýetimiziň möhüm pudaklarynyň biri bolan bank ulgamyny döwrebaplaşdyrmaga, maliýe-karz hyzmatlaryna sanly tehnologiýalary ornaşdyrmaga uly ähmiýet berilýär.

Bank ulgamynyň kanunçylyk-hukuk, maddy-enjamlaýyn binýady hem yzygiderli kämilleşdirilýär. Ýurdumyzda sanly innowasion tehnologiýalar arkaly ornaşdyrylan nagt däl hasaplaşyklar ilata döwrebap amatlyklary döretmek bilen birlikde, bank amallarynyň sanynyň artdyrylmagyna, geçirilýän tölegleriň howpsuzlygyna we maliýe serişdeleriniň goraglylygyna öz täsirini ýetirýär.

Bank ulgamynda amala aşyrylýan döwrebap özgertmeleriň, durmuşa geçirilýän döwlet maksatnamalaryň çäklerinde «Daýhanbank» döwlet täjirçilik bankynyň Daşoguz welaýat we etrapdyr şäher şahamçalarynda oba hojalyk ulgamyndaky edara-kärhanalara, kärendeçilere, daýhan hojalyklaryna niýetlenen döwrebap bank hyzmatlary hödürlenýär. Häzirki wagtda bank tarapyndan oba hojalyk ulgamynda kiçi we orta telekeçiligi goldamak maksady bilen, ýeňillikli karz serişdelerini bermek boýunça işler giň gerimde alnyp barylýar. Şonda müşderilere, daýhan birleşik bilen içerki kärende şertlerinde işleýän kärendeçilere oba hojalyk hyzmatlary we beýleki çykdajylar üçin ýeňillikli karzlar berilýär.

Häzirki wagtda «Mobil-bank», «Internet-bank» hyzmatlary müşderileri bank hyzmatlarynyň elýeterliligi, amatly şertleri bilen üpjün edýär. Bu hyzmatlaryň üsti bilen, müşderiler islendik ýerde we wagtda öz bank serişdeleriniň hasabyny bilmek, bank-maliýe amallaryny, tölegleri geçirmek mümkinçiligine eýe bolýarlar.