Baky bagtyň binýady

Berkarar döwletiň täze eýýamynyň Galkynyşy döwründe Gahryman Arkadagymyzyň parasatly başlangyçlaryny mynasyp dowam edýän hormatly Prezidentimiziň taýsyz tagallalary bilen baky Bitarap ýurdumyzyň abraý-mertebesi bu günki gün has-da belende göterilýär.

Häzirki döwürde hormatly Prezidentimiziň asylly içeri we daşary syýasaty uly goldawa eýe bolýar. Şunuň netijesinde, hemişelik Bitarap Türkmenistan döwletimiziň parahatçylyk söýüjilik, abadançylyk, hoşniýetlilik ýörelgeleri ösdürilýär, dünýä döwletleriniň arasyndaky dost-doganlyk, goňşuçylyk gatnaşyklaryň, ikitaraplaýyn hyzmatdaşlygyň ýola goýulmagy pugtalandyrylýar.

Mälim bolşy ýaly, Halkara parahatçylyk we ynanyşmak ýylynda hemişelik Bitarap Türkmenistan döwletimiz ägirt uly üstünliklere, taryhy ähmiýetli wakalara beslenýär. Şu ýylyň 21-nji martynda Birleşen Milletler Guramasynyň Baş Assambleýasynyň 79-njy sessiýasynyň 61-nji plenar mejlisinde ýurdumyzyň başlangyjy bilen «Türkmenistanyň hemişelik Bitaraplygy» atly Kararnamanyň üçünji gezek biragyzdan kabul edilmegi ýurdumyzyň halkara derejedäki at-abraýynyň barha ýokarlanýandygynyň, ählumumy parahatçylygy üpjün etmek boýunça tagallalarynyň bütin dünýäde goldanylýandygynyň nobatdaky subutnamasy boldy.

Bitaraplyk bütin dünýäde parahatçylygy ündeýän, halklary dost-doganlyga, agzybirlige, jebislige, hoşniýetli gatnaşyga çagyrýan hem-de ynsanperwerligi wagyz edýän ýörelgelerimizi dünýä ýaýýan beýik taglymatdyr. Bitaraplyk taglymatynyň esasynda Ýer ýüzünde ählumumy parahatçylygy, ynanyşmagy, dost-doganlyk gatnaşyklaryny pugtalandyrýan Arkadagly Gahryman Serdarymyzyň we Gahryman Arkadagymyzyň janlary sag, belent başlary aman bolsun, il- ýurt bähbitli beýik işleri elmydama rowaçlyklara beslensin!