Bagtyýar durmuşa buýsançly ýaşlar

«Parahat Watanyň ylhamly ýaşlary» atly döredijilik bäsleşiginiň jemi jemlendi

Daşoguz welaýat kitaphanasynda «Daşoguz habarlary» gazetiniň redaksiýasynyň Türkmenistanyň Magtymguly adyndaky Ýaşlar guramasynyň Daşoguz welaýat geňeşi bilen bilelikde yglan eden «Parahat Watanyň ylhamly ýaşlary» atly döredijilik bäsleşiginiň ýeňijilerini sylaglamak dabarasy geçirildi. Bäsleşik ata Watanymyzyň baky Bitaraplygynyň 30 ýyllyk şanly senesini, Halkara parahatçylyk we ynanyşmak ýylyny dabaralandyrmak, täze taryhy döwürde ýurdumyzda gazanylýan üstünlikleri, ýetilýän belent sepgitleri metbugatda giňden şöhlelendirmek, zehinli ýaşlary ýüze çykarmak maksady bilen yglan edildi.

Dabaranyň dowamynda oňa gatnaşyjylar ata Watanymyzyň, asuda asmanymyzyň, parahat zeminimiziň tarypy ýetirilýän şygyrlary bilen çykyş etdiler, söýgi, dostluk, agzybirlik, ene-ata hormat goýmak ýaly durmuşy mowzuklara ýüzlenip döreden eserleri bilen tanyşdyrdylar.

Şunlukda, goşgy ýazmak ugry boýunça, Daşoguz şäher ýylylyk müdirliginiň energetik inženeri Ylham Gurbanalyýew birinji, Akdepe etrabynyň ýaşaýjysy Söhbet Orazmuhammedow ikinji, Saparmyrat Türkmenbaşy etrabyndaky 5-nji orta mekdebiň okuwçysy Güneş Agamädowa üçünji orunlary eýelediler. Köneürgenç etrabyndaky 47-nji orta mekdebiň mugallymy Ahmet Arazow, Magtymguly adyndaky Türkmen döwlet uniwersitetiniň talyby Bahar Aýdogdyýewa bu ugur boýunça höweslendiriji baýraklara mynasyp boldular.

Oýlanma ýazmak ugry boýunça Akdepe etrabyndaky 95-nji orta mekdebiň okuwçysy Alişer Matýakubow birinji, Saparmyrat Türkmenbaşy etrabyndaky 72-nji orta mekdebiň okuwçysy Berdimuhammet Kazakbaýew ikinji, Türkmen oba hojalyk institutynyň talyby Altyn Hojamowa üçünji orunlary eýelediler. Saparmyrat Türkmenbaşy etrabyndaky 44-nji orta mekdebiň okuwçysy Durdymyrat Amanmyradow bilen şol mekdebiň mugallymy Annagözel Gurbanowa höweslendiriji baýraklar bilen sylaglanyldy.

Ýeňijilere bäsleşigi guraýjylar tarapyndan gymmat bahaly sowgatlar we Hormat hatlary gowşuryldy.