Bag ekmek möwsümine taýýarlyk

Türkmenistanyň  Prezidentiniň «Türkmenistanda 2025-nji ýylda bag ekmek hakynda» kabul eden Karary ençeme ýyllardan bäri dowam edip gelýän asylly ýörelgä eýerilip, ýurdumyzyň bagy-bossanlyga öwrülmegi, mähriban Diýarymyzyň ekologiýa abadançylygynyň gowulandyrylmagy babatdaky möhüm işlere badalga boldy. Şondan ugur almak bilen, şu ýyl Daşoguz welaýatynyň Köneürgenç etraby boýunça 45 müň düýp bag nahallaryny, şol sanda saýaly agaçlaryň 18 müň, pürli agaçlaryň 2 müň, tut agaçlarynyň 16 müň, miweli agaçlarynyň 9 müň düýbüni ekmek meýilleşdirildi. Häzirki wagtda etrabyň çäklerinde bag ekmek möwsümine ykjam taýýarlyk görülýär. Etrapda bagbançylyk işi bilen meşgullanyp, ata-baba kesp-kärlerini mynasyp dowam etdirýän bagbanlaryň köp sanlysy bar. Bu bagbanlar her ýylda bag meýdanlaryny giňeltmek, dürli görnüşli bag nahallarynyň müňlerçe düýbüni taýýarlamak işlerini ýokary guramaçylyk derejesinde alyp barýarlar.