Ätiýaçlyk şaýlar öndürilýär

Oba hojalyk ulgamynda möhüm möwsümleriň üstünlikli geçirilip, öňde goýlan wezipeleriň öz wagtynda berjaý edilmegine Daşoguz şäherindäki motor abatlaýyş kärhanasynyň işçi-hünärmenleri hem saldamly goşant goşýarlar. Olar möwsümleýin işlerde ulanylýan tehnikalar, iş gurallary üçin zerur bolan ätiýaçlyk şaýlarynyň, beýleki serişdeleriň dürli görnüşlerini öndürip, bellenilen ýerlere bökdençsiz ýetirmegiň hötdesinden gelýärler.

Kärhanada «Garaşsyz, baky Bitarap Türkmenistan — bedew batly at-myradyň mekany» ýylynyň bugdaý ekişi möwsüminde hem bu babatda degerli çäreleri durmuşa geçirmek meýilleşdirilip, häzirki günlerde bu ugurda öndürijilikli iş alnyp barylýar. Mälim bolşy ýaly, bu ýerde ätiýaçlyk şaýlarynyň 50-ä golaý görnüşini öndürmek ýola goýlupdyr. Olaryň arasynda traktorlaryň, ekijileriň, çizelleriň ätiýaçlyk bölekleri bar. Kärhanada kebşirleýiş işlerinde peýdalanylýan tehniki kislorodyň öndürilmegi bolsa ýerlerde oňa bolan islegiňýeterlik kanagatlandyrylmagyna uly ýardam berýär.