Alabaýlara bagyşlanan sergi

Berkarar döwletiň täze eýýamynyň Galkynyşy döwrüniň geçen ýyllarynda bolşy ýaly, Halkara parahatçylyk we ynanyşmak ýylynda hem Garaşsyz, baky Bitarap ýurdumyzda giňden bellenilýän Türkmen alabaýynyň baýramy mynasybetli guralýan dabaralar, çäreler Daşoguz welaýatynda  hem giň gerim aldy. Daşoguz welaýat medeniýet müdirliginiň hem-de welaýat Taryhy we ülkäni öwreniş muzeýiniň bilelikde muzeýiň giň eýwanynda guran sergisi hem örän täsirli boldy.

Sergide ýurdumyzyň belli suratkeşleriniň, Daşoguz şäher çagalar çeperçilik hem-de Gubadag etrap çagalar sungat mekdepleriniň okuwçylarynyň türkmen alabaýlaryna bagyşlap çeken suratlary, heýkeltaraşlyk işleri, şonuň ýaly-da alabaýlaryň dürli pursatlardaky keşbini şekillendirýän fotosuratlar ýerleşdirildi. Olaryň her birinde alabaýlara bolan söýgi, olaryň halkymyza dürli taraplardan ýakynlygy, tebigat gözelligini artdyrmaklyga goşýan goşandy öz beýanyny tapypdyr. Bu babatda ýaşajyk suratkeşler Jasuberk Rejepbaýewiň, Ýoldaş Seýidowyň, Jeren Bekdurdyýewanyň we beýlekileriň çeken suratlary ýakymly täsir galdyrýar. Sergi ajaýyp baýrama bagyşlanylan çäreleriň hatarynda türkmen alabaýlarynyň jadyly keşbini, mähribanlygyny, ynsana hamraklygyny açyp görkezmek bilen, ony synlan adamlarda uly täsir galdyrdy.