Ak ýollaryň asudalygy ugrunda

Her ýylyň sentýabr aýynda geçirilýän ýol hereketiniň howpsuzlygynyň biraýlygynyň ähmiýetiniň örän uludygy hemmelere mälimdir. Çünki ol halkymyzyň asuda, abadan ýaşamagy üçin alnyp barylýan işleriň möhüm ugurlarynyň biri bolup, esasan, ynsan saglygyna, maşgala ojagynyň rahatlygyna gönükdirilýär. Şoňa görä-de, oňa işjeň ýardam bermek biziň her birimiziň borjumyz bolup durýar.

Häzirki wagtda şu biraýlygyň çäklerinde meýilleşdirilen çäreler  giň gerim aldy. Şeýlelikde, ýurdumyzyň ähli ýerinde bolşy ýaly, Daşoguz welaýatynda-da welaýat polisiýa bölüminiň ýol gözegçiligi bölümçesiniň işgärleri jemgyýetçilik guramalarynyň, bilim, saglygy goraýyş we beýleki edaralaryň wekilleri bilen birlikde köpçülik ýerlerinde, orta mekdeplerde, çagalar baglarynda gürrüňdeşlikleri, duşuşyklary geçirýärler, ýol hereketiniň düzgünlerini berjaý etmäge degişli çäreleri guraýarlar. Munuň özi oňat netijeleri-de berýär.