Ajaýyp üstünlikler, wajyp wezipeler

Türkmenistanyň Bilim ministrligi tarapyndan tassyklanan iş meýilnamasyna laýyklykda, ýurdumyzda her ýylda geçirilýän bilim işgärleriniň awgust aýyndaky usuly-amaly okuwlary ýokary guramaçylykly geçirildi. Ýakynda Daşoguz şäherindäki daşary ýurt dillerine ýöriteleşdirilen 25-nji orta mekdepde hem-de Daşoguz şäher häkimliginiň mejlisler zalynda «Garaşsyz, baky Bitarap Türkmenistan — bedew batly at-myradyň mekany» diýen şygar esasynda Daşoguz şäheriniň we welaýatyň öňdebaryjy bilim işgärleriniň gatnaşmagynda bilim işgärleriniň usuly-amaly maslahatlary geçirildi. Maslahatlaryň öňýanynda myhmanlar bu ýerde guralan sergini synladylar. Daşoguz şäher häkimliginiň mejlisler zalynda guralan sergide welaýatyň mekdep okuwçylarynyň taslama-döredijilik işleri, olaryň gazanan üstünlikleri we ata Watanymyzyň waspyny ýetirýän diwarlyklar görkezildi. Döwlet senasynyň dabaraly ýaňlanmagy bilen başlanan maslahatda, ilki bilen, Daşoguz welaýat häkiminiň orunbasary Ogulaltyn Çerkezowa çykyş edip, oňa gatnaşyjylary ýetip gelýän Bilimler we talyp ýaşlar güni bilen gutlady hem-de täze okuw ýylynda öňde durýan wezipeler barada durup geçdi. Soňra çykyş edenler geçen okuw ýylynda welaýatyň bilim ulgamynda ýetilen sepgitler hakynda buýsançly gürrüň etdiler. Bellenilişi ýaly, 2025-2026-njy okuw ýyly welaýatyň bilim işgärleri tarapyndan üstünlikli jemlenildi. Geçen okuw ýylynda welaýatyň mekdep okuwçylary her ýylda geçirilýän «Altyn asyryň altyn zehinleri» atly ders bäsleşigine gatnaşyp, jemi 67 sany baýrakly orunlary eýelediler. Şeýle hem döwlet Baştutanymyzyň bilim işgärleri üçin döredip berýän giň mümkinçiliklerinden peýdalanyp, umumybilim edaralarynyň mugallymlary we çagalar baglarynyň terbiýeçileri dürli bäsleşiklerde baýrakly orunlara mynasyp boldular. Mukaddes Garaşsyzlygymyzyň 35 ýyllyk şanly toýuna barylýan günlerde badalga alýan täze okuw ýylyna uly ruhubelentlik bilen gadam basýan bilim işgärleri özleri barada edilýän aladalara jogap edip, ähli gujur-gaýratlaryny gaýgyrman zähmet çekjekdikleri barada bellediler, döredilýän giň mümkinçilikler üçin Gahryman Arkadagymyza we hormatly Prezidentimize hoşallyklaryny beýan etdiler. Soňra bu ýerde dabaraly ýagdaýda öňdebaryjy bilim işgärlerine Hormat hatlary we jemgyýetçilik guramalary tarapyndan taýýarlanan sowgatlar gowşuryldy.