Abadan ýollaryň howpsuzlygy – döwrüň möhüm talaby

Ýollar obadyr şäherleri birleşdirýän, alysy ýakynlaşdyrýan, adamlaryň arasyndaky gatnaşyklary ýola goýýan esasy serişdeleriň biridir. Berkarar döwletiň täze eýýamynyň Galkynyşy döwründe gurlup ulanmaga berilýän döwrebap ulag ýollary gözel Diýarymyzyň çar künjüne uzaýar.

Döwrümiziň abadan ýollarynyň howpsuzlygyny üpjün etmeklige döwletimiz tarapyndan uly üns berilýär. Şonuň netijesinde hem, ýurdumyzda ýol hereketiniň howpsuzlygynyň hukuk binýadyny kämilleşdirmek babatynda zerur çäreler durmuşa geçirilýär. Ýol hereketiniň howpsuzlygy çygrynda kabul edilýän kanunçylyk namalary bu ugurda gatnaşyklary düzgünleşdirmäge, ýol-ulag hereketine gatnaşýan raýatlaryň saglygynyň we emläginiň goraglylygyny üpjün etmäge, fiziki we ýuridik taraplaryň hukuklaryny we kanuny bähbitlerini goramaga gönükdirilýär. Ýurdumyzyň hukuk goraýjy edaralary ýol-ulag hadysalarynyň öňüni almak maksady bilen, «Ýol hereketiniň howpsuzlygy — ömrümiziň rahatlygy» atly biraýlygyň çäginde jemgyýetçilik guramalary, ýerli öz-özüňi dolandyryş we bilim-terbiýeçilik edaralary bilen bilelikde zerur işleri utgaşykly alyp barýarlar.