12-nji iýun — Ylymlar güni

Kämilligiň binýady

Berkarar döwletiň täze eýýamynyň Galkynyşy döwründe «Türkmenistany 2019 — 2025-nji ýyllarda durmuş-ykdysady taýdan ösdürmegiň Milli maksatnamasynda» we beýleki milli maksatnamalarda bilim ulgamyny kämil derejede ösdürmek, ýokary bilimli hünärmenleri taýýarlamak ugrunda kesgitlenen wezipeler üstünlikli durmuşa geçirilýär.

Sanly bilim ulgamyny ösdürmegiň, daşary ýurt dillerini, tebigy we takyk ylma degişli dersleri okatmagy kämilleşdirmegiň konsepsiýalaryna laýyklykda, bilim ulgamyny dünýä ölçegleriniň derejesine çykarmak boýunça degişli işler durmuşa geçirilýär, sanly bilim ösdürilýär. Bu ulgamy kämilleşdirmek üçin anyk maksatlar we wezipeler kesgitlenildi hem-de olary amala aşyrmak üçin uly mümkinçilikler döredildi. Ýurdumyzda bilim we ylym ulgamyndaky özgertmeler ata Watanymyzyň gülläp ösmeginiň, dünýädäki abraý-mertebesiniň has-da ýokarlanmagynyň ygtybarly kepili bolup durýar.

Zehinli ýaşlary ýüze çykarmak, olary goldamak we höweslendirmek, ýaşlarda raýatlyk, watançylyk, ruhy-ahlak duýgularyny terbiýelemek we hukuk medeniýetini ýokarlandyrmak ileri tutulýan wezipeleriň hatarynda durýar. Hormatly Prezidentimiziň «Ýaşlar — Watanyň daýanjy» atly kitabynda: «Biz ýaşlara eziz Watanymyzyň geljegini gurujylar hökmünde garaýarys. Belent maksatlara ýetmekde ýurdumyzyň ýaş nesillerine aýratyn bil baglaýarys». «Okamak — bereket, ýazmak — kuwwat, döretmek — döwletdir. Terbiýe we tejribe — ynsan ykbalynyň goşa ganaty» diýip bellenilýär. Gahryman Arkadagymyzyň «Ýokary okuw mekdeplerinde döredijilik prosesleriniň üçüsiniň — okuw, ylym we terbiýeçilik prosesiniň — birleşdirilmegi okuw işine täze bilimleriň çalt aralaşmagyna we jemgyýetiň ýokary hünärli, ylmy we tehniki oý-pikiriň öňdebaryjy gazananlary bilen tanyş hünärmenlere bolan islegini kanagatlandyrmaga ýardam edýär» diýip aýdanlaryndan ugur alnyp, talyplara bilimi tejribe bilen baglanyşdyryp öwretmek usuly Türkmen oba hojalyk institutynda hem giň gerimde ulanylýar.

Milli ýörelgelere we dünýäniň ösen tejribesine laýyklykda, bu ýokary okuw mekdebinde hem okuw işiniň mazmuny we ylmy usulyýet ugurlary kämilleşdirilýär. «Biziň ýaşlarymyz bu gün pederlerimiziň ylym dünýäsindäki beýik açyşlaryna buýsanmaga haklydyr. Şonuň bilen birlikde, olar adamzadyň ylymda hem-de tehnologiýada gazanan üstünliklerini barha düýpli özleşdirýärler» diýip, Gahryman Arkadagymyz ýaşlar   bilen duşuşygyndaky çykyşynda belläp geçdi.