Golaýda mekdep okuwçylarynyň arasynda sportuň gandbol görnüşi boýunça Daşoguz welaýat birinjiligi geçirildi. Ony «Türkmenistan» ýaşlar bedenterbiýe-sport guramasynyň Daşoguz welaýat bölümi, welaýat bedenterbiýe we sport baradaky Baş müdirligi, Baş bilim müdirligi, Saglygy goraýyş müdirligi hem-de TMÝG-niň welaýat geňeşi bilelikde guradylar. Ýaryş Daşoguz şäheriniň «Garaşsyzlyk» sport desgasynyň futzal eýwanynda geçirildi. Ýaryş örän gyzykly, çekeleşikli boldy. Ýaryşda öz garşydaşlarynyň hemmesini utan Garaşsyzlyk etrabynyň oglanlar toparyna taý gelen bolmady. Netijede, oglanlaryň arasynda şu etrabyň topary birinji, Daşoguz şäheriniň topary ikinji, Görogly etrabynyň topary üçünji orunlary eýelediler. Gyzlaryň arasynda geçen ýaryşda Daşoguz şäheriniň topary birinji, Garaşsyzlyk etrabynyň topary ikinji, Şabat etrabynyň topary üçünji orunlary eýelediler. Birinji orny eýelän toparlar döwlet derejesindäki ýaryşa gatnaşmaga hukuk gazandylar. Ýeňijiler «Türkmenistan» ýaşlar bedenterbiýe-sport guramasynyň Daşoguz welaýat bölüminiň Hormat hatlary bilen sylaglanyldy.

Watan goragçylarynyň güni mynasybetli, Daşoguz welaýat häkimliginiň, bedenterbiýe we sport baradaky Baş müdirliginiň bilelikde guramaklarynda harby we hukuk goraýjy edaralaryň işgärleriniň, esgerleriň arasynda Daşoguz şäherindäki 10 müň orunlyk sport toplumynda, «Garaşsyzlyk» sport desgasynda hem-de 6-njy sport mekdebinde sportuň futbol, woleýbol, stol tennisi, küşt we şaşka görnüşleri boýunça ýaryşlar geçirildi. Ýaryşlar örän gyzykly we çekeleşikli ýagdaýda geçdi. Futbol boýunça ýaryşda Daşoguz welaýat milli howpsuzlyk gullugynyň ýygyndy topary üstünlikli çykyş edip, birinji orna mynasyp boldy. Daşoguz welaýat Polisiýa müdirliginiň ýygyndy topary ikinji, Daşoguz welaýat Adalat bölüminiň ýygyndy topary üçünji orunlara mynasyp boldular. Esgerleriň arasynda geçirilen ýaryşda bolsa Türkmenistanyň Döwlet Serhet gullugynyň harby bölüminiň ýygyndy topary birinji, Daşoguz garnizonynyň harby bölüminiň ýygyndy topary ikinji ýerleri eýelediler. Woleýbol boýunça ýaryşda Daşoguz welaýat Polisiýa müdirliginiň ýygyndy topary birinji, Daşoguz garnizonynyň harby bölüminiň ýygyndy topary ikinji, Daşoguz welaýat milli howpsuzlyk gullugynyň ýygyndy topary üçünji orunlara mynasyp boldular. Esgerleriň arasynda Daşoguz garnizonynyň harby bölüminiň ýygyndy topary birinji we Türkmenistanyň Döwlet Serhet gullugynyň harby bölüminiň ýygyndy topary ikinji orunlary eýelediler. Stol tennisi boýunça erkekleriň arasyndaky ýaryşda Daşoguz welaýat gümrükhanasynyň harby gullukçysy Guwanç Şiriýew birinji, Daşoguz welaýat Polisiýa müdirliginiň harby gullukçysy Nurýagdy Amangylyjow ikinji, Daşoguz welaýat Adalat bölüminiň harby gullukçysy Nurmämet Klyçmedow üçünji orunlary eýelediler. Aýal-gyzlaryň arasynda Görogly etrabynyň harby wekilliginiň harby gullukçysy Gözel Baýmedowa birinji, Daşoguz welaýat Polisiýa müdirliginiň harby gullukçysy Lýudmila Orunowa ikinji ýerleri eýelemegi başardylar. Küşt boýunça ýaryşda erkekleriň arasynda Daşoguz garnizonynyň harby bölüminiň harby gullukçysy Merdan Almazow birinji, Daşoguz welaýat Polisiýa müdirliginiň harby gullukçysy Zakir Babajanow ikinji, Türkmenistanyň Migrasiýa gullugynyň welaýat boýunça müdirliginiň harby gullukçysy Arslan Nazarow üçünji orunlara mynasyp boldular. Esgerleriň arasyndaky ýaryşda Daşoguz garnizonynyň harby gullukçysy Ulugbek Matnazarow birinji orny eýeledi. Aýal-gyzlaryň arasynda Görogly etrabynyň harby wekilliginiň 4-nji bölümçesiniň serkerdesi maýor Aýnur Atamyradowa birinji orna mynasyp boldy. Şaşka boýunça Daşoguz garnizonynyň harby bölüminiň harby gullukçysy Kadyr Peşliýew birinji ýeri eýeledi. Aýal-gyzlaryň arasyndaky ýaryşda Daşoguz welaýat Polisiýa müdirliginiň harby gullukçysy Lýudmila Orunowa birinji ýere mynasyp boldy. Ýaryşyň ýeňijilerine Daşoguz welaýatynyň jemgyýetçilik guramalary hem-de Daşoguz welaýat bedenterbiýe we sport baradaky Baş müdirligi tarapyndan Hormat hatlary, kuboklar we sowgatlar dabaraly ýagdaýda gowşuryldy.

Ýakynda Aşgabat şäherinde mekdep okuwçylaryň arasynda küşdüň standart, rapid, blitz görnüşleri boýunça Türkmenistanyň birinjiligi geçirildi. Onda Daşoguz welaýatyndan hem doganlar Dilnäz, Dilber we Dawut Hupbyýewler üstünlikli çykyş edip, baýrakly orunlara mynasyp boldular. Daşoguz şäherindäki 4-nji sport mekdebiniň okuwçysy Dilnäz Hupbyýewa 7 ýaşly gyzlaryň arasynda küşdüň standart görnüşi boýunça üçünji, rapid görnüşi boýunça ikinji orunlary eýeledi. Şol mekdebiň okuwçysy Dilber Hupbyýewa 13 ýaşly gyzlaryň arasynda küşdüň standart görnüşi boýunça üçünji orna mynasyp boldy, rapid görnüşi boýunça bolsa Türkmenistanyň çempiony boldy. Dilber blitz görnüşi boýunça üçünji orna mynasyp boldy. Bu ýaryşda doganlaryň körpesi Dawut Hupbyýew küşdüň standart görnüşinden üçünji, rapid we blitz görnüşlerinden ikinji orunlary eýelemegi başardy.

Golaýda Daşoguz welaýatynyň Daşoguz şäherindäki 15-nji orta mekdepde «Türkmenistan — sagdynlygyň we ruhubelentligiň ýurdy» atly XV spartakiadanyň çäklerinde woleýbol boýunça şäherdäki orta mekdepleriň okuwçy oglan-gyzlarynyň arasynda ýaryş geçirildi. Ony welaýatyň bedenterbiýe we sport baradaky Baş müdirligi, welaýat Baş bilim müdirligi, «Türkmenistan» ýaşlar bedenterbiýe-sport guramasynyň welaýat bölümi, TDP-niň Daşoguz şäher komiteti, TMÝG-niň şäher geňeşi bilelikde guradylar. Ýaryşyň jemlerine görä, oglanlaryň arasynda 30-njy orta mekdebiň woleýbolçylary üstünlikli çykyş edip, birinji ýere mynasyp boldular. Şäheriň 15-nji we 14-nji orta mekdepleriniň woleýbolçylary, degişlilikde, ikinji we üçünji ýerleri eýelediler. Gyzlaryň arasynda geçirilen ýaryşda daşary ýurt dillerine ýöriteleşdirilen 24-nji orta mekdebiň woleýbolçy toparyna birinji, daşary ýurt dillerine ýöriteleşdirilen 7-nji orta mekdebiň toparyna ikinji we daşary ýurt dillerine ýöriteleşdirilen 1-nji orta mekdebiň toparyna üçünji orunlar degişli boldy. Ýaryşyň ýeňijileri «Türkmenistan» ýaşlar bedenterbiýe-sport guramasynyň welaýat bölüminiň hem-de welaýat Baş bilim müdirliginiň Hormat hatlary bilen sylaglanyldy.

Golaýda Daşoguz şäherindäki 29-njy orta mekdepde «Türkmenistan — sagdynlygyň we ruhubelentligiň ýurdy» atly XV spartakiadanyň çäklerinde sportuň basketbol görnüşi boýunça şäherdäki orta mekdepleriň okuwçy oglan-gyzlarynyň arasynda örän gyzykly ýaryş geçirildi. Ony Daşoguz welaýat bedenterbiýe we sport baradaky Baş müdirligi, welaýat Baş bilim müdirligi, «Türkmenistan» ýaşlar bedenterbiýe-sport guramasynyň welaýat bölümi, TDP-niň şäher komiteti, TMÝG-niň şäher geňeşi bilelikde guradylar. Ýaryşyň jemlerine görä, oglanlaryň arasynda 6-njy orta mekdebiň basketbolçylary üstünlikli çykyş edip, birinji ýere mynasyp boldular. Daşary ýurt dillerine ýöriteleşdirilen 1-nji hem-de 29-njy orta mekdepleriň basketbolçylary, degişlilikde, ikinji we üçünji ýerleri eýelediler. Gyzlaryň arasynda geçirilen ýaryşda 6-njy orta mekdebiň basketbolçy gyzlar toparyna birinji, 29-njy orta mekdebiň toparyna ikinji we 5-nji orta mekdebiň toparyna üçünji orunlar degişli boldy. Ýaryşyň ýeňijilerine «Türkmenistan» ýaşlar bedenterbiýe-sport guramasynyň Da\oguz welaýat bölümi tarapyndan Hormat hatlar gowşuryldy.

«Türkmenistan — sagdynlygyň we ruhubelentligiň ýurdy» atly XV spartakiadanyň çäklerinde sportuň küşt we şaşka görnüşleri boýunça Daşoguz welaýat birinjiligi geçirildi. Ony Daşoguz welaýat häkimligi, TKA-nyň welaýat birleşmesi, Demokratik partiýasynyň welaýat komiteti, Gyzyl Ýarymaý Milli Jemgyýetiniň welaýat bölümi, «Türkmenistan» ýaşlar bedenterbiýe-sport guramasynyň welaýat bölümi, welaýat bedenterbiýe we sport baradaky Baş müdirligi hem-de TMÝG-niň welaýat geňeşi bilelikde guradylar. Küşt boýunça ýaryş Daşoguz şäherindäki 1-nji sport mekdebiniň küşt eýwanynda geçirildi. Oňa welaýatyň şäherdir etraplaryndan ökde türgenleriň 8 topary gatnaşyp, olar aýlaw esasda bäsleşdiler. Ýaryşyň netijesine görä, Köneürgenç etrabynyň okuwçy oglan-gyzlar topary on ýarym utuk bilen birinji, Daşoguz şäheriniň okuwçy oglan-gyzlar topary on utuk bilen ikinji, Gubadag etrabynyň okuwçy oglan-gyzlar topary dokuz ýarym utuk bilen üçünji orunlary eýelediler. Şaşka boýunça ýaryş Daşoguz şäherindäki 4-nji sport mekdebinde geçirildi. Oňa etrapdyr şäherden 7 topar gatnaşdy. Ýaryşda Saparmyrat Türkmenbaşy etrabynyň okuwçy oglan-gyzlaryna taý gelen bolmady. Olar köp utuk toplap, birinji orny eýelediler. Ikinji orny Görogly etrabynyň, üçünji orny Daşoguz şäheriniň okuwçy oglan-gyzlar toparlary eýelediler. Şeýlelikde, birinji orny eýelän türgenler döwlet derejesindäki ýaryşa gatnaşmaga hukuk gazandylar. Ýeňijiler «Türkmenistan» ýaşlar bedenterbiýe-sport guramasynyň Da\oguz welaýat bölüminiň Hormat hatlary bilen sylaglanyldy.

Golaýda Bahreýnde ýetginjekleriň arasynda geçirilen III Aziýa oýunlaryna Daşoguz welaýatynyň Garaşsyzlyk etrabyndaky 5-nji sport mekdebiň türgeni Saparbaý Atajanow hem gatnaşyp, şowly çykyş etdi. Ildeşimiz bu ýaryşda 94  kilogramdan ýokary agram derejesinde çykyş etmek bilen, ştangany siltäp götermekde 145, itekläp götermekde 175 kilogram agyrlyklaryň hötdesinden geldi. Itekläp götermekdäki görkezen netijesine görä Saparbaý bürünç medala mynasyp boldy. Geljegine uly umyt bildirilýän 17 ýaşly türgeniň bu üstünligi türkmen sportunyň barha rowaçlanýandygyna, yklym we dünýä derejesinde abraýynyň ýokarlanýandygyna şaýatlyk edýär. Ýeri gelende aýdylsa, Saparbaý Atajanowa on ýaşyndan bäri atasy, tejribeli tälimçi Soltan Atajanow halypalyk edip, sportuň bu görnüşiniň abyny-tabyny öwredýär. Irginsiz türgenleşikler, tälimçileriň maslahatlary öz netijesini berip ugraýar. Ol etrap, welaýat, döwlet derejesinde geçirilýän ýaryşlarda öz deň-duşlaryndan mese-mälim saýlanyp, barha taplandy. Ýetginjekleriň we ýaşlaryň arasynda birnäçe gezek welaýatyň, Türkmenistanyň çempiony bolmagy başardy.

Golaýda «Türkmenistan — ruhubelentligiň we sagdynlygyň ýurdy» ady bilen orta mekdepleriň okuwçylarynyň ХV spartakiadasynyň çäklerinde sportuň tennis, suwda ýüzmek görnüşleri boýunça Daşoguz welaýatynyň birinjiligi geçirildi. Ony welaýat häkimligi, «Türkmenistan» ýaşlar bedenterbiýe-sport guramasynyň welaýat bölümi, welaýat bedenterbiýe we sport baradaky Baş müdirligi hem-de jemgyýetçilik guramalary bilelikde guradylar. Daşoguz şäherindäki 10 müň orunlyk sport toplumynda geçirilen spartakiadanyň esasy maksady okuwçylaryň sagdyn durmuşyny üpjün etmekden, sportuň dürli görnüşleri boýunça güýçli türgenleri ýüze çykarmakdan ybaratdyr. Tennis boýunça ýaryşa welaýatyň şäherdir etraplaryndan türgen oglan-gyzlar gatnaşyp, olar özara toparlaýyn aýlaw esasynda bäsleşdiler. Ýaryşyň netijesi boýunça Köneürgenç etrabynyň topary birinji, Daşoguz şäheriniň topary ikinji, Şabat etrabynyň topary üçünji orunlary eýelediler. Suwda ýüzmek boýunça ýaryşa etrapdyr şäherden ýeňiji bolan oglanlar toparlary 50 metr aralyga erkin usulda ýüzmek boýunça gatnaşdylar. Şeýlelikde, Şabat etrabynyň topary birinji orny eýeledi. Ikinji orny Görogly etrabynyň, üçünji orny Gubadag etrabynyň toparlary eýelemegi başardyrlar. Birinji orny eýelän toparlar döwlet derejesindäki ýaryşlara gatnaşmaga hukuk gazandylar. Ýeňijiler «Türkmenistan» ýaşlar bedenterbiýe-sport guramasynyň welaýat bölüminiň Hormat hatlary bilen sylaglandylar.  

Halkara parahatçylyk we ynanyşmak ýyly hem-de baky Bitaraplygymyzyň şanly 30 ýyllygy mynasybetli Daşoguz welaýatynyň Daşoguz şäherindäki «Garaşsyzlyk» sport desgasynda 29-njy sentýabrdan 8-nji oktýabr aralygynda welaýatyň ykdysady pudagynyň edaralarynyň arasynda futzal boýunça Daşoguz welaýatynyň çempionaty geçirildi. Welaýat häkimliginiň ýörite meýilnamasy esasynda guralan ýaryş çekeleşikli häsiýete eýe boldy. Ýaryş ykdysady pudakda zähmet çekýän ýaşlaryň arasynda sagdyn durmuş ýörelgesiniň giňden ýaýbaňlandyrylýandygyny äşgär görkezdi. Onda Daşoguz welaýat Baş maliýe we ykdysadyýet müdirliginiň, Salgyt bölüminiň, «Türkmenstandartlary» döwlet gullugynyň, Statistika müdirliginiň, Pensiýa gaznasynyň, Türkmenistanyň Merkezi bankynyň Daşoguz welaýat şahamçasynyň hem-de welaýatyň çägindäki bank edaralarynyň şahamçalarynyň işgärlerinden düzülen toparlar özara güýç synanyşdylar. Netijede, ýaryşyň jemleri boýunça Daşoguz welaýat «Türkmenstandartlary» döwlet gullugynyň ýygyndy topary birinji orny  eýeläp, welaýatyň ykdysady pudagynyň edaralarynyň arasynda futzal boýunça Daşoguz welaýatynyň çempiony diýen hormatly ada mynasyp boldy. Daşoguz welaýat Salgyt bölüminiň hem-de Baş maliýe we ykdysadyýet müdirliginiň ýygyndy toparlary, degişlilikde, ikinji we üçünji orunlary eýelediler. Toparlaryň oýunçylaryna Türkmenistanyň Magtymguly adyndaky Ýaşlar guramasynyň Daşoguz welaýat geňeşiniň Hormat hatlary we ýadygärlik sowgatlary dabaraly ýagdaýda gowşuryldy.

Berkarar döwletiň täze eýýamynyň Galkynyşy döwründe ýaş nesliň kämil bilim, terbiýe almagy, bedenterbiýe we sport bilen meşgullanmagy we tälimçilerimiziň döwrebap türgenleşik işlerini geçmekleri üçin ähli şertler döredilýär. Türkmen türgenleriniň gazanýan ajaýyp üstünlikleri Watanymyzyň halkara sport giňişligindäki abraýynyň has-da artmagyny şertlendirýär. Şeýle üstünlikleriň hatarynda agyr atletikaçy türgenlerimiziň gazanýan ýeňişleriniň hem bardygy buýsandyrýar. Daşoguz welaýatynyň Akdepe etrabynyň agyr atletika sport mekdebiniň geljekde sportda uly üstünliklere eýe boljagyna umyt bildirilýän ýaş türgenleriniň biri Şahin Hudaýbergenow 9 ýaşyndan bäri sportuň agyr atletika görnüşi boýunça okuw-türgenleşik sapaklaryna gatnaşyp, häzirki wagtda halkara we döwlet derejesinde geçirilýän ýaryşlarda üstünlikli çykyş edip gelýär. Ol şu ýylyň iýun aýynyň 1-4-i aralygynda geçirilen Türkmenistanyň çempionatynda ýaşlaryň we ýetginjekleriň arasyndaky ýaryşda 60 kilogram agram derejesinde çempion diýen ada mynasyp boldy. Bu ýaş türgen mundan başga-da, agyr atletika boýunça ýaşlaryň we ýetginjekleriň arasynda geçirilen ýaryşlaryň ençemesinde I we II orunlara mynasyp boldy. Ol golaýda Özbegistan Respublikasynyň Çirçik şäherinde okuw türgenleşigini geçip, Gazagystan Respublikasynda geçirilen Aziýa çempionatynda çykyş etdi. Häzirki wagtda ol Türkmenistanyň milli ýygyndy toparynyň düzüminde türgenleşik geçýär.