Hormatly Prezidentimiziň gol çeken Permanyna laýyklykda, sekiz we şondan köp çagany dünýä indiren hem-de terbiýeläp ýetişdiren eneleriň Türkmenistanyň «Ene mähri» diýen hormatly adyna eýe bolmagy mynasybetli, Daşoguz welaýat häkimliginiň mejlisler zalynda dabara geçirildi. Müňýyllyklardan gözbaş alýan maşgala ojagynyň mizemezligini gorap saklamak däplerini mynasyp dowam etdirýän enelere, gyz-gelinlere mertebe mukaddesligi hökmünde garalyp, olar aýratyn üns-alada bilen gurşalýar. Ýurdumyzyň geljegini gurýan, Watanymyzyň abraý-mertebesini beýgeldýän mynasyp nesli terbiýeläp ýetişdirmekde bitirýän uly hyzmatlary göz öňünde tutulyp, kabul edilen bu çözgüt, enelere goýulýan belent hormatyň dabaralanýandygynyň aýdyň subutnamasyna öwrüldi. Tolgundyryjy pursatlarda Türkmenistanyň «Ene mähri» diýen hormatly adyna mynasyp bolan eneleriň yzly-yzyna sahna çykyp, ter gül çemenlerini, serpaýlaryny maňlaýlaryna sylyp, uly hoşallyk bilen kabul etmekleri dabaranyň mazmunyny has-da baýlaşdyrdy. Şeýle ajaýyp pursatlar eneleriň köňül törlerinden çykýan ak arzuwlara garyp beýan eden ýürek buýsançlary bilen dowam etdi. Ak arzuwlarda kämil nesli kemala getirmek babatdaky aladalaryň eneleriň bagtyýar ýaşaýşy bilen aýrylmaz baglanyşyklydygy, bu babatda ýurdumyzda eneleriň we çagalaryň aýratyn üns bilen gurşalýandygy, olaryň bagtyýar ýaşamagy ugrunda ähli mümkinçilikleriň döredilýändigi barada buýsançly sözleri beýan etdiler. Dabaranyň dowamy welaýatyň medeniýet we sungat ussatlarynyň baýramçylyk mynasybetli taýýarlan çykyşlaryna utgaşdy.

...Ýüz-gözleri hemişe mylaýym ýylgyryp duran bu gelniň ile-güne örän haýyrly käri bar. Ýagny ol her gün Daşoguz şäheriniň merkezi köçeleriniň ugrunda ýerleşen öýlere, edara-kärhanalara hat-habarlary, gazet-žurnallary gowşurýar. Şonuň üçin hem ol ýerlerde onuň gelerine sabyrsyz garaşýan, oňa «Köp sag bol!» diýmäge endik edinen adamlar az däl. Dogry, häzirki wagtda el telefony ýa-da internet arkaly köpler bilen habarlaşmak mümkin. Emma, munuň bilen bu hat gatnadyjy gelniň hyzmatynyň gymmaty sähelçe-de egsilenok. Çünki onuň getirýän hat-habarlarynda olary goýberen ynsanlaryň eliniň-gözüniň yzy, gazet-žurnallarynda agzalan tehnikalardan tapyp bolmajak mähir duýulýar... Biziň bu gürrüňimiz welaýat «Daşoguzpoçta» aragatnaşyk kärhanasynyň Daşoguz şäherindäki 10-njy aragatnaşyk bölüminiň hat gatnadyjysy Berno Matkurbanowa hakynda barýar. Hawa, bu gelniň käri, il arasynda ýörgünli atlandyrylyşy ýaly, poçtalon. Onuň bu kärde yhlas bilen zähmet çekip ýörenine-de indi 18 ýyl bolupdyr. Iliň hyzmatynda geçirilen bu ýyllar ony bölümiň tejribeli işgärleriniň hataryna goşdy. Elbetde, her bir käriň ýeňil bolmadyk aladalary, içgin öwrenmeli ýol-ýörelgeleri bolýar. Bu Bernonyň işinde hem şeýle. Çünki ol öz käri bilen baglanyşykly günde ýüzläp adamlar bilen iş salyşmaly, olara hyzmat etmeli. Şonda olaryň hersiniň öz isleg-talaby, pikir-garaýşy aýratyn. Şoňa görä-de, şol müşderileriň göwnüni tapmak üçin ir-giç diýmän, ylgamaly wagtlary-da az gabat gelenok. Bernonyň öz käriniň şeýle inçe syrlaryny ele almagyna bölümiň tejribeli hünärmenleri Güljemal Kösäýewa, Nurgözel Sopyýewa dagy uly kömek beripdirler. Şonuň üçin ol häzir hem arkalaşyp, agzybirlikli zähmet çekýän bu işdeş ýoldaşlaryny ilkinji halypalary hasaplaýar, olara köp taňryýalkasyn aýdýar. Sebäbi ol öz käriňe jogapkärli çemeleşmegiň, oňa ähli yhlasyňy, gujur-gaýratyňy siňdirmegiň mysalyny halypalarynda görýär.

Golaýda Daşoguz welaýat merkezinde Türkmenistanyň «Ene mähri» diýen hormatly adyna mynasyp bolan eneleriň 2-sine täze öýleriň açarlarynyň gowşurylyş dabarasy boldy. Daşoguz şäheriniň Andalyp köçesiniň ugrunda ýerleşýän täze ýaşaýyş jaýynyň toý döwresini ýadyňa salýan meýdançasynda milli däplerimiziň ýaýbaňlandyrylmagy dabara özboluşly mazmun çaýdy. Bu ýere welaýat, şäher häkimlikleriniň jogapkär işgärleri, jemgyýetçilik guramalaryň wekilleri, il sylagly ýaşulular, mährem eneler, köp çagaly maşgalalar ýygnandylar. Dabaranyň dowamynda çykyş edenler Watanymyzyň gülläp ösmeginiň bähbidine uly tagallalaryň edilýändigi, zenanlaryň ýaşaýyş-durmuş şertleriniň gowulandyrylmagy, olaryň bagtyýar ýaşamagy babatdaky işlere uly ähmiýet berilýändigi barada uly buýsanç bilen gürrüň etdiler. Hormatly Prezidentimiziň Permany bilen, Türkmenistanyň «Ene mähri» diýen hormatly adyna mynasyp bolan enelere täze öýleriň açarlary dabaraly ýagdaýda gowşuryldy. Täze jaýyň açarlaryny maňlaýlaryna sylyp kabul eden eneleriň we olaryň maşgala agzalarynyň ýüzlerindäki Arkadagly Gahryman Serdarymyzyň özlerine ýapan sahawatly bagt peşgeşine hoşallyk, döwrümize buýsanç alamatlary bagtyýarlyk bilen utgaşyp, dabaranyň tolgundyryjy pursatlaryna öwrüldi. Ýurdumyzda ýaşaýşyň dowamaty hasaplanýan eneler baradaky aladalaryň näderejede beýikdigini beýan edýän dabaranyň dowamy welaýatyň aýdym-saz toparynyň çykyşlaryna utgaşdy. Soňra dabara gatnaşan myhmanlar täze ýaşaýyş jaýlaryna aýlanyp gördüler. Ýaşaýyş jaýlarynyň otaglary amatly ýerleşdirilip, täze öýlere göçüp gelen bagtyýar maşgalalaryň eşretli durmuşyň hözirini görüp ýaşamagy üçin ähli şertler döredilipdir. Tanyşlygyň dowamynda milli däplerimize eýerilip, üzärlik tütedildi, täze öýlere göçüp gelen bagtyýar maşgalalara ýagşy arzuw-dilegler edildi. Täze jaýa göçüp gelmek bagty miýesser eden maşgala agzalaryna hormatly Prezidentimiziň adyndan gymmat bahaly sowgatlaryň gowşurylmagy olaryň toý şatlygyny arşa göterdi.

Ýurdumyzda gök çaý içmek örän ýörgünli. Lukmanlaryň tassyklamagyna görä, gök çaý iň peýdaly içgileriň biridir. Gahryman Arkadagymyzyň «Çaý — melhem hem ylham» atly kitabynda çaýyň ilkinji ýurdunyň Çyn–Maçyndygy, şeýle hem çaýyň Ýaponiýa, Gruziýa ýaly ýurtlarda ösdürilip ýetişdirilýändigi barada gyzykly maglumatlar berilýär. Çaýyň taýýarlanylyşy barada-da kitapda gyzykly maglumatlar bar. Çaýyň taýýarlanylyşy dürli-dürli bolýar. Adamlar, esasan, tüňçede gaýnadylan çaýdan uly lezzet alýarlar. «Guşdyrnak» çaý türkmen üçin iň bir lezzetli içgidir. Yssy, gurak howada çaý suwsuzlygyňy gandyrýar. Çölde bir tüňçe gök çaý içersiň welin, saňa suw küýsetmeýär. Garagum sährasynda, meýdanda ojar odunyň howruna gaýnan tüňçä atymlyk gök çaý atyp, biraz demine goýsaň, ysyndan hem, tagamyndan hem doýup bolmaýar. Ol adama güýç-kuwwat, şypa berýär. Tebigata, açyk howa seýrana çykyp, lezzet bilen gök çaý içen adam hemişe ruhubelentdir, onuň süňňi sagatdyr, akyly durudyr. Gahryman Arkadagymyzyň «Türkmenistanyň dermanlyk ösümlikleri» atly köp jiltli ylmy- ensiklopedik kitabynda fitoçaýlar, ýagny türkmen topragynda bitýän ösümliklerden taýýarlanylýan çaýlar barada gymmatly maglumatlar bar.

Şu ýylyň 29-njy martynda geçiriljek saýlawlara Daşoguz welaýatynyň Gubadag etrabynda hem ýokary derejede taýýarlyk görülýär. Bu ugurda jemgyýetçilik guramalarynyň wekilleri halk köpçüliginiň arasynda bolup, ýurdumyzyň ösüşlerine işjeň gatnaşýan raýatlary dalaşgärlige hödürleýärler. Saýlawlary guramaçylykly geçirmek maksady bilen, etrabymyzda saýlaw uçastoklarynyň 51-si döredilip, olaryň ählisi ses berilýän kabinalar we beýleki zerur enjamlar bilen üpjün edildi. Saýlawlar güni öz ýaşaýan ýerinde bolup bilmejek saýlawçylar üçin degişli gutular, saýlawa degişli resminamalaryň doldurylyş yzygiderliligini görkezýän gollanmalar taýýarlanyldy. Her saýlaw uçastogynda saýlawçylary hasaba almak işleri öz wagtynda ýerine ýetirilýär. Saýlawlar güni ses bermäge ilkinji gezek gatnaşjak ýaşlar aýratyn üns merkezinde saklanýar. Olar bilen duşuşyklar geçirilip, ses bermegiň tertibi bilen giňişleýin tanyşdyrylýar. Şeýlelikde, öňde boljak saýlawlar ýurdumyzda üstünlikli durmuşa geçirilýän özgertmeler syýasatynyň binýadyny has-da berkider hem-de demokratik ýörelgeleriň dabaralandyrylýandygynyň nobatdaky subutnamasyna öwrüler.

Golaýda Türkmenistanyň Gyzyl Ýarymaý Milli Jemgyýetiniň döredilmeginiň 100 ýyllygy mynasybetli, «Bir asyrlyk şöhratly ýol — bu ynsanperwerligiň ýeňşi» diýen at bilen dabaraly çäre geçirildi. Daşoguz welaýatynyň Beki Seýtäkow adyndaky Mugallymçylyk mekdebinde geçirilen dabaraly çärede, ilki bilen, bir asyr bäri ynsanperwerligiň, sahawatyň hem-de ýagşylygyň nyşany bolup gelýän TGÝMJ-niň taryhy ýoly, häzirki türkmen jemgyýetindäki orny baradaky wideoroligiň görkezilmegi dabaranyň ähmiýetini has-da artdyrdy. Çärede çykyş edenler guramanyň alyp barýan, ynsanperwerlik ýörelgelerine, adam saglygyny goramaga, howply ýagdaýlarda tiz kömek bermäge hem-de jemgyýetde ynsan mertebesini goramaga gönükdirilen giň gerimli işleri barada aýratyn nygtap geçdiler. Dabaranyň dowamynda ýaňlanan aýdym-sazlar, joşgunly tanslar oňa gatnaşanlarda ýakymly täsirleri galdyrdy.

Daşoguz şäherindäki «Bagt köşgi» toý dabaralary merkezinde «Çaga kalbynyň enä bolan mähir-muhabbetliliginiň owazy» atly aýdym-sazly baýramçylyk çäresi geçirildi. Alabaharyň ajaýyp pursatlarynda geçirilen dabara mähriban eneler bilen bagtly çagalaryň arasyndaky aýrylmaz baglanyşygyň ajaýyp hakykaty bolup, kalplara joşgun eçildi. Dabaralar merkeziniň köpöwüşginli bezeg aýratynlygy özboluşly mazmuna eýe bolup, bagtyýar çagalaryň ýüreklerine galkynyş eçildi. Baýramçylyk sahnasynda belentden ýaňlanan hoş owazly nagmalar bagtyýar çagalygyň mekany hasaplanylýan ajaýyp ýurdumyzda eşretli ýaşaýyş-durmuşyň gaýnap joşýandygyny alamatlandyrdy. Welaýat we Daşoguz şäher çagalar sungat mekdepleriniň okuwçylarynyň hem-de şäherdäki çagalar baglarynda terbiýelenýän körpejeleriň päk kalplaryndan joşup çykýan ak arzuwlarynyň mukamlar bilen sazlaşyp, belent owaz bilen degre-daşa uly şowhun eçilmegi dabaranyň mazmunyny has-da artdyrdy.

Döwletimiziň durmuşynda taryhy ösüşler gazanylýar, belent sepgitlere ýetilýär. Özüniň baş şygaryna mynasyp işleriň durmuşa geçirilýän we berkarar döwletimiziň şan-şöhratyny has-da artdyran şu ýylda hem belent maksatly işlere badalga berlip, oňa işjeň goşulyşmak tutuş halkymyzyň, şol sanda zenanlaryň hem baş maksadyna öwrülýär. Zenanlar jemgyýetimiziň örän aňyrdan gözbaş alyp gaýdýan ahlak we demokratik ýörelgeleriniň giňden dabaralandyrylýan häzirki gülläp ösüş döwrümizde döwlet durmuşynyň dürli ugurlarynda tutanýerli zähmet çekip, gazanylýan üstünliklere öz mynasyp goşantlaryny goşýarlar. Olar maşgala ojaklarynyň abat, abadan bolmagyny üpjün edip, ýurdumyzyň geljegi hasaplanýan ýaş nesli döwrebap terbiýelemekde aýratyn hyzmat bitirýärler. Döwrüň ýaňyna ses goşup, işjeň çykyş edýän zenanlar hormatly Prezidentimiz tarapyndan ýurdumyzda düýpli özgertmeleri amala aşyrmak maksady bilen kabul edilýän maksatnamalaryň ýerine ýetirilmegi ugrunda döredijilikli zähmet çekýärler, taryhy döwrümizi iň ajaýyp işleri bilen bezemäge we baýlaşdyrmaga, beýgeltmäge çalyşýarlar. Ýurdumyzda  alnyp barylýan döwlet syýasatynyň özeninde türkmen zenanlary hakdaky tagallaly tutumlar hem öz beýanyny tapýar. Oňa laýyklykda halal hem tutanýerli işlemäge, bagtyýar ýaşamaga, arkaýyn dynç almaga mynasyp şertleriň döredilýändigi, çaga dogran enelere birwagtlaýyn kömek pulunyň we çagasy üç ýaşa ýetýänçä zähmet rugsadynyň berilýändigi, ýaş çatynjalara durmuşda zerur bolan ilkinji nobatdaky wajyp zatlary satyn almak üçin ýeňillikleriň uly toplumynyň döredilýändigi, Maşgala kodeksiniň hereket edýändigi, ýurdumyzyň ösüşlerini pugtalandyrmaga mynasyp goşant goşýan mährem eneleriň döwlet sylagy bilen sylaglanýandygy, şeýle hem köp çagaly enelere mynasyp atlaryň dakylýandygy, olara ýörite ýeňillikleriň berilýändigi, her ýyl Halkara zenanlar güni mynasybetli kiçi ýaşly gyzjagazlardan başlap, kümüş saçly enelere çenli baýramçylyk pul sylaglarynyň gowşurylýandygy ýaly tutumly işleriň hakykaty zemine zynat berýän zenanlaryň bagtly durmuşynyň üpjün edilýändigini görkezýär. Özleri hakdaky şeýle uly aladalara mähriban zenanlarymyz mynasyp işleri bilen jogap berýärler. Bu günki gün türkmen zenanlarynyň on barmagynyň oýnamyndan çykan nepis işleri ÝUNESKO-nyň maddy däl medeni mirasynyň sanawyndan görnükli orun alyp, tutuş dünýäde giňden öwrenilýär hem wagyz edilýär. Bu bolsa ýurdumyzda işleriň sazlaşykly häsiýetde guralyp, döwrebap ösüş maksadyndaky özgertmeleriň netijeli amala aşyrylýandygynyň, gadymdan gelýän asylly ýörelgelere ygrarlylygyň aýdyň subutnamasydyr.

Daşoguz welaýatynyň «Türkmeniň ak öýi» binasynyň köpçülikleýin dabaralar merkezinde «Dünýäniň durkudyr mährem eneler, bezeýär durmuşy gyz-gelinler» atly aýdym-sazly dabara geçirildi. TZB-niň Daşoguz welaýat, şäher we etrap bölümleriniň guramagynda geçirilen baýramçylyk dabarasyna dürli ugurlarda zähmet çekýän, öňdebaryjy zenanlar gatnaşdylar. Zenanlaryň ýaz ýakymly dünýäsine kybap bezelen baýramçylyk döwresinde welaýatyň teatr, aýdym-saz ussatlarynyň, tans toparlarynyň çykyşlary ýaýbaňlandyryldy. N.Andalyp adyndaky döwlet sazly drama teatrynyň artistleriniň edebi-sazly çykyşy dabaranyň ajaýyp başlangyjy boldy. Sungat ussatlarynyň çykyşlarynda ýurdumyzda eneleriň, zenanlaryň hormat-sarpasynyň näderejede ýokarydygy doly açylyp görkezildi. Soňra welaýatyň tanymal bagşylarynyň, ýaş ýerine ýetirijileriniň baýramçylyk çykyşlaryna giň orun berildi. Hoş owazly nagmalarda ajaýyp baharyň owadan görnüşlerine sazlaşyp gelen şanly senäniň, mährem eneleriň, gyz-gelinleriň, bagtyýar durmuşymyzyň, gülläp ösüşleriň waspy ýetirildi.

Halkara zenanlar güni mynasybetli, Daşoguz welaýat häkimliginiň mejlisler zalynda dabaraly maslahat geçirildi. Oňa häkimligiň jogapkär işgärleri, welaýatyň syýasy-jemgyýetçilik guramalaryň wekilleri, dürli ugurlarda zähmet çekýän işjeň zenanlar, mährem eneler, talyp gyzlar gatnaşdylar. Dabaraly maslahatda çykyş edenler ýurdumyzyň zenanlary hakdaky aladalaryň döwlet syýasatynyň esasy ugurlarynyň biri hökmünde durmuşa geçirilýändigini, zenanlara döredilýän ähli şertleriň ýokary netijelerini berýändigini uly buýsanç bilen belläp geçdiler. Baýramçylyk mynasybetli ýagşy arzuwlar, gutlag sözleri beýan edildi. Soňra dabara gatnaşýan mährem enelere welaýatyň jemgyýetçilik guramalarynyň baýramçylyk sowgatlary, ter gül çemenleri dabaraly ýagdaýda gowşuryldy. Ajaýyp pursatlaryň dowamy welaýatyň medeniýet we sungat ussatlarynyň aýdym-sazly çykyşlaryna utgaşdy. Şeýle mazmundaky baýramçylyk dabarasy Daşoguz şäher häkimliginiň mejlisler zalynda hem geçirildi. Dabarada mährem eneleriň uly toparyna jemgyýetçilik guramalarynyň baýramçylyk mynasybetli taýýarlan sowgatlary gowşuryldy.