Zähmet çekmäge bolan hukuk her bir raýatyň konstitusion hukugydyr. Türkmenistanyň Konstitusiýasyna laýyklykda, her bir adamyň zähmete, öz islegine görä hünär, kär we iş ýerini saýlap almaga, zähmetiň sagdyn we howpsuz şertlerine hukugy bardyr. Mejbury zähmet we çaga zähmetiniň ýaramaz görnüşleri gadagandyr. Hakyna durup işleýän adamlaryň öz çeken zähmetiniň möçberine we hiline laýyk gelýän hak almaga hukugy bardyr. Ýurdumyzda raýatlaryň zähmet hukuklary Türkmenistanyň Konstitusiýasy, Zähmet kodeksi we gaýry kadalaşdyryjy hukuk namalar arkaly kepillendirilýär. Iş beriji tarapyndan işgäri işe kabul etmek, zähmete hak tölemek, iş ornuny üýtgetmek, zähmet rugsadyny bermek, işden çykarmak we beýleki zähmet gatnaşyklarynyň kanunyň talaplaryna laýyk gelmegi ugrunda yzygiderli tagallalar edilýär. Türkmenistanyň Zähmet kodeksine laýyklykda, ýurdumyzyň zähmet kanunçylygynyň maksatlary raýatlaryň zähmet hukuklarynyň döwlet kepillendirmelerini bellemekden, zähmetiň amatly şertlerini döretmekden, işgärleriň we iş berijileriň hukuklaryny we bähbitlerini goramakdan ybaratdyr. Raýatlaryň zähmete bolan hukugy, olaryň kärini, edýän işini we iş ýerini saýlamaga, zähmetiň sagdyn we howpsuz şertlerine, işsizlikden goranmaga bolan hukugyny hem goşmak bilen, Türkmenistanyň Konstitusiýasy tarapyndan kepillendirilýär. Her bir raýata öndürijilikli we döredijilikli zähmete bolan öz başarnyklaryna ygtyýar etmekde we ýurdumyzyň kanunçylygynda gadagan edilmedik islendik işi amala aşyrmakda aýratyn hukuk degişlidir. Her bir raýatyň iş berijä göni ýüz tutmak arkaly ýa-da iş bilen üpjün ediji döwlet arkaly iş ýerini erkin saýlamaga hukugy bardyr. Zähmet hukuklarynyň goragy döwlet tarapyndan kepillendirilýär. Iş bilen üpjün ediji döwlet edaralary amatly işi seçip almakda we işe ýerleşmekde ilata tölegsiz kömek berýärler. Şeýlelikde, zähmet kanunçylygynyň talaplaryny bozmazdan zähmet gatnaşyklaryna girmek we kanunyň talaplaryny berjaý etmekde jogapkärçiligi duýmak diňe bir döwletiň we jemgyýetiň däl, eýsem, biziň her birimiziň öz bähbidimizdir.

Berkarar döwletiň täze eýýamynyň Galkynyşy döwründe Türkmenistanyň Prezidentiniň: «Geljekde her bir maşgalanyň öýi hem-de jaýy bolar» diýen sözlerine laýyklykda, häzirki wagtda ilatyň ýaşaýyş jaýy bilen üpjünçiligi barha ýokarlanýar. Ýurdumyzda ähli amatlyklary bolan döwrebap ýaşaýyş jaý toplumlary yzygiderli gurulýar. Uzak möhletli we ýeňillikli bank karzlarynyň esasynda gurulýan ýaşaýyş jaýlary adamlar hakynda edilýän uly aladalaryň aýdyň nyşanydyr. Bu bolsa durmuş ugurly döwlet syýasatynyň rowaçlanýandygynyň subutnamasy bolmak bilen, raýatlaryň ýaşaýyş jaýyna bolan hukuklarynyň hem kepili bolup durýar. Türkmenistanyň Prezidentiniň şu ýylyň 5-nji iýunynda Daşoguz welaýatyna amala aşyran iş saparynyň dowamynda Daşoguz şäherinde birbada 8 sany köp öýli döwrebap ýaşaýyş jaýlarynyň açylmagy munuň aýdyň mysalydyr. «Pähim-paýhas ummany Magtymguly Pyragy» ýylynyň uly üstünliklere beslenýän günlerinde akyldar şahyrymyzyň doglan gününiň 300 ýyllygynyň giň gerimde bellenilmegi halkymyzyň baý edebi we medeni mirasyna goýulýan belent hormatyň aýdyň nyşanyna öwrüldi. Bu babatda «Magtymguly Pyragynyň medeni mirasy hakynda» Türkmenistanyň Kanunynyň ähmiýetiniň örän uly bolandygyny buýsanç bilen bellemelidiris. Akyldar şahyrymyzyň doglan gününiň 300 ýyllygy halkara derejede giňden dabaralandyrylýar. Bu şanly sene mynasybetli «Magtymguly Pyragynyň 300 ýyllygyna» atly ýubileý medaly hem döredildi. Bu ýubileý medaly bilen ilkinji gezek Birleşen Milletler Guramasynyň Baş sekretary Antoniu Guterrişiň sylaglanylmagy beýik özgertmeler döwründe ösdürilýän halkara gatnaşyklaryň taryhynda ajaýyp wakalaryň biri boldy. Türkmenistanyň Prezidentiniň ýöredýän döwlet syýasatynda ilatyň durmuş derejesini ýokarlandyrmaga uly ähmiýet berilýär. Şonuň netijesinde, şu ýylyň 6 aýynyň jemlerine bagyşlanyp geçirilen Türkmenistanyň Ministrler Kabinetiniň giňişleýin mejlisinde Türkmenistanyň Prezidentiniň kabul eden 2025-nji ýylyň 1-nji ýanwaryndan zähmet haklarynyň, talyp we diňleýji haklarynyň, döwlet kömek pullarynyň we pensiýalaryň möçberini 10 göterim ýokarlandyrmak hakyndaky taryhy çözgüdi halkymyzyň kalbynda çäksiz hoşallygy döretdi.

Ýurduň raýatlarynyň bilim almaga bolan konstitusion hukugyny üpjün etmek we goramak bilim ulgamynyň hukuk esasynyň kämilligine we berkligine baglydyr. Çünki bilim ulgamyna degişli kanunlary kämilleşdirmek jemgyýetiň ruhy, durmuş-ykdysady we medeni ösüşiniň binýady bolup durýar. Ýurdumyzyň Esasy Kanunynda berkidilen raýatlaryň bilim almaga bolan hukuklarynyň durmuşa geçirilmegi bilim ulgamynyň ösdürilmegine giň mümkinçilik berýär. «Bilim hakynda» Türkmenistanyň Kanunynyň kämilleşdirilmegi ýurdumyzda ýaşlara döwrebap bilim-terbiýe bermek babatynda zerur işleriň amala aşyrylýandygyny aýdyň görkezýär. Bilim babatynda kabul edilen kanunlar, düzgünnamalar we maksatnamalar giň gözýetimli, döwrüň ruhuna laýyk derejede pikirlenýän, döwrebap tehnologiýalardan baş çykarýan, saýlan hünärine yhlasly ýapyşýan türkmen ýaşlaryny terbiýelemäge, bilim işgärleriniň has netijeli işlemekleri üçin uly mümkinçilikleri açýar. Ýurdumyzda durmuşa geçirilýän döwrebap özgertmelere laýyklykda, bilim ulgamyny has-da kämilleşdirmek, bilim edaralarynda berilýän bilimiň hilini dünýä derejesine laýyklykda ýola goýmak, ýokary hilli okuw kitaplaryny we gollanmalary neşir etmek, täze tehnologiýalary, okuw-tehniki enjamlaryny bilim ulgamyna ornaşdyrmak, ýokary tizlikli internet torunyň ähli bilim edaralarynda hereket etmegini guramak boýunça netijeli işler alnyp barylýar. Ýurdumyzda dünýä ülňülerine gabat gelýän çagalar baglary, orta we ýokary okuw mekdepleri, dynç alyş-sagaldyş merkezleri guruldy we ulanmaga berildi. Bu ugurdaky işler güýçli depginde dowam edýär. Häzirki döwürde durmuş göz-açyp ýumasy salymyň içinde ösüp-özgerip barýar. Ýurdumyzyň ykdysadyýeti aýdyň ösüşleri başdan geçirýär. Şunuň bilen baglylykda, ýurdumyzyň ykdysadyýetini, medeniýetini, jemgyýetçilik-durmuş ugurlaryny dolandyrmak üçin, dünýä tejribesiniň ýeten derejelerinden habarly, ökde hünärmenleri taýýarlamak zerurlygy ýüze çykýar. Ýurdumyzyň ösüşi, dünýä bilim giňişligine goşulmagy umumy orta bilimiň has-da kämilleşdirilmegini talap edýär. Bu bolsa mekdep biliminiň maksadynyň, gurluşynyň we mazmunynyň hem-de okatmagyň möhletiniň döwrebaplaşdyrylmagynyň zerurlygyny kesgitleýär. Ýewropa Bileleşiginiň «Türkmenistanda bilim ulgamyna goldaw bermek» taslamasyny durmuşa geçirmegiň birnäçe tapgyrlarynyň çäklerinde, Milli bilim institutynyň binýadynda yzygiderli okuw sagatlary, halkara derejeli bilermenler bilen duşuşyklar, aň-bilim çäreleri geçirilýär. Bilim ulgamyna dünýä standartlaryny yzygiderli ornaşdyrýan Türkmenistan ynsanperwerlik ugry boýunça Birleşen Milletler Guramasy we onuň ýöriteleşdirilen düzümleri (UNISEF, UNFPA, UNDP, UNESKO) bilen özara gatnaşyklary ösdürýär. Ýurdumyzda bilim ulgamynda dünýäniň oňyn tejribesi işjeň öwrenilýär, daşary ýurtlaryň ylym we bilim merkezleri bilen gatnaşyklar yzygiderli giňeldilýär. Türkmenistanly mekdep okuwçylary, talyp ýaşlar dünýä derejesinde geçirilýän ylym-bilim bäsleşiklerinde, olimpiadalarda medallara mynasyp bolup, özleriniň aň-bilim derejeleriniň ýokarydygyny yzygiderli subut edip gelýärler. Çagalar, ýaşlar babatda alnyp barylýan işler halkymyzyň buýsanjyny, watansöýüjilik duýgularyny artdyrýar. Çagalaryň bagtyýar durmuşy, olaryň degişli derejede terbiýelenmegi, döwrebap bilim almagy jemgyýetiň we döwletimiziň ösüşiniň kepilidir.

Daşoguz welaýat häkimliginiň mejlisler zalynda Türkmenistanyň Zenanlar birleşiginiň Daşoguz welaýat bölüminiň hasabat ýygnagy geçirildi hem-de öňde durýan wezipeler kesgitlenildi. Maslahata welaýat zenanlar bölüminiň, şäher we etrap zenanlar guramalarynyň başlyklary, işjeň agzalary, hukuk we jemgyýetçilik guramalarynyň wekilleri, welaýatyň ähli pudaklarynyň ilkinji zenanlar guramalarynyň ýolbaşçylary we işjeň agzalary, bilim, saglygy goraýyş, medeniýet, sport ulgamlarynyň zenan işgärleri, mährem eneler gatnaşdylar. Ýygnagy welaýat häkiminiň orunbasary, TZB-niň welaýat bölüminiň başlygy Ogulaltyn Çerkezowa açdy we döwlet derejesinde zenanlar barada edilýän uly aladalar, oňa welaýatyň zenanlarynyň tutanýerli zähmetleri bilen jogap bermäge çalyşýandyklary, olaryň gazanýan üstünlikleri dogrusynda uly buýsanç bilen belläp geçdi. Soňra şäher, etrap zenanlar guramalarynyň başlyklary edara-kärhanalaryň ilkinji zenanlar guramalarynyň ýolbaşçylary, işjeň agzalary we beýlekiler çykyş edip, hasabat döwründe ýerine ýetirilen işler barada aýtdylar. Olar öz çykyşlarynda welaýatyň bagtyýar zenanlarynyň maşgala mukaddesligini gorap saklamagy, nesil terbiýesine uly üns bermegi, ahlak arassalygyny, edep kadalaryny, milli ýörelgelerimizi, el işlerimizi, däp-dessurlarymyzy yzygiderli wagyz edýändikleri, ýurdumyzda geçirilýän baýramçylyk çärelerine, dürli hünär bäsleşiklerine işjeň gatnaşyp, baýrakly orunlara mynasyp bolýandyklary dogrusynda belläp geçdiler. Maslahatyň dowamynda welaýat, etrap, şäher zenanlar bölümleriniň işjeň agzalaryna, TZB-niň Daşoguz welaýat bölüminiň, TKA-nyň Daşoguz welaýat birleşmesiniň adyndan Hormat hatlary hem-de ýadygärlik sowgatlar gowşuryldy.

Şanly ösüşlere, beýik ýeňişlere beslenýän ata Watanymyzda milli saglygy goraýyş ulgamynyň işi barha kämilleşdirilýär. Türkmen halkynyň Milli Lideri Gahryman Arkadagymyzyň başlangyjy bilen kabul edilen «Saglyk» Döwlet maksatnamasynyň üstünlikli durmuşa geçirilmeginiň çäklerinde, ilatyň saglyk abadançylygy üpjün edilýär. Berkarar döwletiň täze eýýamynyň Galkynyşy döwründe milli saglygy goraýyş ulgamynyň halkara derejede ýola goýulmagy, ulgamyň işiniň döwrebap sanly tehnologiýalar esasynda alnyp barylmagy giň gerimli maksatnamanyň çäklerinde amala aşyrylýan toplumlaýyn özgertmeleriň biridir. Bilşimiz ýaly, häzirki wagtda ýurdumyzda döwrebap hassahanalar, saglyk öýleri, merkezleri gurlup ulanmaga berilýär. Türkmenistanda ilata edilýän lukmançylyk hyzmatlarynyň ýokary derejesini üpjün etmäge, jemgyýetde sagdyn durmuş ýörelgeleriniň ornaşdyrylmagyna amatly şertleri döretmäge gönükdirilen «Saglyk» Döwlet maksatnamasy, 2021 — 2025-nji ýyllar üçin «Sagdyn ene — sagdyn çaga — sagdyn geljek» atly Milli strategiýa we beýleki milli maksatnamalardyr taslamalar üstünlikli durmuşa geçirilýär. 2021-nji ýylyň martynda döredilen Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy lukmançylyk edaralaryna we näsag çagalara hemmetaraplaýyn hemaýat etmek arkaly, bu ugurda uly işleri durmuşa geçirýär. Gaznanyň hasabyna ýurdumyzyň hassahanalarynyň çagalar bölümlerine «Tiz kömek» awtoulaglarynyň sowgat berilmegi sahawatly işleriň giň gerime eýe bolýandygynyň nyşanyna öwrüldi. Şeýle hem gaznanyň hasabyna birnäçe çagalarda çylşyrymly operasiýalaryň geçirilmegi, olaryň saglygynyň dikeldilmegi halkymyzyň ajaýyp döwrümiziň eşretlerine bolan hoşallygyny has-da artdyrdy. Milli saglygy goraýyş ulgamynda amaly lukmançylygyň tejribeleriniň halkara hyzmatdaşlygynyň giňeldilmegi bilen, yzygiderli esasda kämilleşdirilmegi ýurdumyzda çylşyrymly operasiýalaryň üstünlikli ýerine ýetirilmegine ýardam edýär. Şeýle hem «Pähim-paýhas ummany Magtymguly Pyragy» ýylynda ýurdumyzyň beýleki hassahanalary bilen birlikde, Daşoguz welaýat Enäniň we çaganyň saglygyny goraýyş merkezine Germaniýa Federatiw Respublikasynyň «B.Braun» kompaniýasynda öndürilen «Dialog+» kysymly 2 sany gemodializ enjamynyň sowgat berilmegi eneleriň we çagalaryň saglygyny goramakda möhüm ähmiýete eýe boldy. Häzirki wagtda bu enjamlar ilata ýokary hilli lukmançylyk hyzmatlaryny amala aşyrmaga ýardam edýär. «Saglyk» Döwlet maksatnamasynyň  üstünlikli durmuşa geçirilmeginiň çäklerinde, ilatyň saglyk abadançylygyny üpjün etmek maksady bilen, keselleriň öňüni alyş çäreleri hem yzygiderli alnyp barylýar.  Daşoguz welaýat köpugurly we onkologiýa hassahanalarynda döwrebap lukmançylyk enjamlarynyň kömegi bilen dürli keselleriň öňüni almaga ähli mümkinçilikler döredilendir. Şeýle hem bu lukmançylyk enjamlaryna erk edýän hünärmenleriň daşary ýurtlarda kämilleşdiriş okuwlarynda bolandygyny hem aýratyn nygtamak gerek. Ýurdumyzda «Arkadag Medisina Klasteri Menejment» kärhanasynyň işiniň üstünlikli ýola goýulmagy ulgamyň senagat mümkinçilikleriniň barha artýandygyny görkezýär. Döwrebap kärhananyň ilkinji önümleriniň Daşoguz welaýat köpugurly hassahanasyna gelip gowuşmagy şanly ýylyň taryhy wakalarynyň birine öwrüldi. Saglyk bagtly ýaşaýşyň, eşretli durmuşyň kepilidir. Ata-babalarymyzyň «Saglyk bolsa, beglik bolar» diýen dana pähimi her bir ynsanyň durmuş ýörelgesine öwrülendir.

Berkarar döwletiň täze eýýamynyň Galkynyşy döwrüniň belent ösüşlere beslenýän ýyllarynda bolup geçýän özgertmeler döwlet durmuşynyň ähli ugurlarynyň täze döwrüň talabyna laýyk kämilleşdirilmegini şertlendirýär. Şu jähtden her bir ugurda gazanylýan üstünlikleri berkitmek, olaryň hukuk binýadyny kämilleşdirmek işleri giň gerimde durmuşa geçirilýär. Bu babatda öňde goýlan wezipelerden ugur alnyp, golaýda geçirilen Türkmenistanyň Mejlisiniň ýedinji çagyrylyşynyň altynjy maslahatynda dürli ugurlara degişli kanunlary kämilleşdirmek boýunça taslamalar ara alnyp maslahatlaşyldy. Şolaryň hatarynda «Bolgariýa Respublikasynyň, Çehiýa Respublikasynyň, Estoniýa Respublikasynyň, Horwatiýa Respublikasynyň, Kipr Respublikasynyň, Latwiýa Respublikasynyň, Litwa Respublikasynyň, Wengriýanyň, Malta Respublikasynyň, Polşa Respublikasynyň, Rumyniýanyň, Sloweniýa Respublikasynyň we Slowakiýa Respublikasynyň Ýewropa Bileleşigine girendigini göz öňünde tutup, bir tarapdan Türkmenistan bilen we beýleki tarapdan Ýewropa Bileleşiginiň we oňa agza döwletleriň arasyndaky hyzmatdaşlygy döredýän gatnaşyklar we hyzmatdaşlyk hakyndaky Ylalaşyga Teswirnamany tassyklamak hakynda», «Atom energiýasy boýunça halkara agentliginiň Tertipnamasynyň VI maddasyna Üýtgetmäni tassyklamak hakynda», «Ýabany ösümlik we haýwanat dünýäsiniň ýitip gitmek howpy astyndaky görnüşleriniň halkara söwdasy hakynda Konwensiýa goşulmak hakynda», «1994-nji ýylyň 9-njy sentýabryndaky Ýewraziýa Patent Konwensiýasyna degişli Senagat nusgalaryny goramak hakynda Teswirnama goşulmak hakynda», «Türkmenistanyň käbir kanunçylyk namalaryna goşmaçalar we üýtgetmeler girizmek hakynda», «Türkmenistanyň Býujet kodeksini tassyklamak we güýje girizmek hakynda» Türkmenistanyň Kanunyna üýtgetmeler girizmek hakynda», «Türkmenistanyň Ilaty durmuş taýdan goramak hakynda kodeksine üýtgetme girizmek hakynda», «Türkmenistanyň Sanitariýa kodeksine üýtgetmeler girizmek hakynda», «Bedenterbiýe we sport hakynda» Türkmenistanyň Kanunyna üýtgetmeler we goşmaça girizmek hakynda», «Döwlet ylmy-tehniki syýasaty hakynda» Türkmenistanyň Kanunyna üýtgetmeler girizmek hakynda», «Ylmy edaralar hakynda» Türkmenistanyň Kanunyna üýtgetme girizmek hakynda», «Sportda dopinge garşy göreşmek hakynda» Türkmenistanyň Kanunyna üýtgetmeler girizmek hakynda», «Tohumçylyk hakynda» Türkmenistanyň Kanunyna üýtgetmeler we goşmaçalar girizmek hakynda» Türkmenistanyň Kanunlary hem-de Mejlisiň karary ara alnyp maslahatlaşyldy we kabul edildi. Bedenterbiýe we sport ulgamynyň hukuk binýadyny döwrüň talaplaryna hem-de halkara hukugyň umumy ykrar edilen kadalaryna laýyklykda kämilleşdirmek maksady bilen, «Bedenterbiýe we sport hakynda» Türkmenistanyň Kanunyna üýtgetmeler we goşmaça girizmek hakynda» Türkmenistanyň Kanuny kabul edildi. Ýurdumyzda maýyplygy bolan we saglyk mümkinçilikleri çäkli adamlaryň bedenterbiýe we sport bilen meşgullanmagyny has-da höweslendirmek hem-de dünýä tejribesinde kabul edilen kadalara laýyk getirmek maksadynda, bu kanuna «Aziýa Para oýunlary» diýen düşünje goşuldy, türgenleşik geçirilýän fitnes zallary hem-de olarda gurnalýan trenažýorlary tehniki howpsuzlyk kadalaryna laýyk getirmek göz öňünde tutuldy. Şeýle hem bu Kanun bilen fitnes tälimçileriniň tejribesini, ýörite bilimlerini, nazary we usuly taýdan taýýarlyklaryny düzgünleşdirmek maksady bilen, bedenterbiýe we sport bilen bagly hyzmatlary sertifikatlaşdyrmak işini bedenterbiýe we sport babatda ygtyýarly döwlet edarasynyň ygtyýarlylygynda amala aşyrmak bilen bagly goşmaça girizildi, beden terbiýesiniň döwlet toplumy bilen bagly üýtgetmeler girizmek we käbir maddalary güýjüni ýitiren diýip ykrar etmek göz öňünde tutuldy. Ýurdumyzda bedenterbiýäniň we sportuň ösdürilmegine, sagdyn durmuş ýörelgeleriniň ilerlemegine, sportda gazanylýan netijeleriň üstünliklere beslenmegine bu Kanunyň ýardamy örän uly bolar. Beýleki kabul edilen kanunlar hem şol ugurlara degişli meseleler göz öňünde tutulyp, üýtgetmeleriň we goşmaçalaryň hasabyna kämilleşdirildi. Bularyň ählisi ýurdumyzda durmuşa geçirilýän döwlet syýasatynyň her bir ugrunyň hukuk binýadynyň berkidilmegini göz öňünde tutýar hem-de hormatly Prezidentimiziň deputatlaryň öňünde goýýan wezipeleriniň amal edilýändigini görkezýär.

Ýurdumyzda alnyp barylýan döwlet ekologiýa syýasaty halkymyzyň arassa daşky gurşawda ýaşamagyny üpjün etmekden, geljek nesillerimize tebigy baýlyklarymyzy has gözel görnüşde ýetirmekden hem-de bu ugurda sebit we halkara derejede ygtybarly hyzmatdaşlygy alyp barmakdan ybaratdyr. Tebigaty goramagyň hukuk, ykdysady, guramaçylyk esaslaryny kesgitleýän we ekologiýa howpsuzlygyny üpjün etmäge, hojalyk hem-de beýleki işleriň tebigy-ekologik ulgamlara zyýanly täsiriniň öňüni almaga, biologik dürlüligi gorap saklamaga, tebigy serişdeleri rejeli peýdalanmaga gönükdirilen «Tebigaty goramak hakynda» Türkmenistanyň Kanunynda: «Ýer, toprak, ýerasty baýlyklar, ýerüsti we ýerasty suwlar, tokaýlar, ösümlik we haýwanat dünýäsiniň obýektleri, ekologik ulgamlar, atmosfera howasy, klimat we Ýeriň ozon gatlagy ýok edilmekden, ýaramazlaşdyrmakdan, azaltmakdan, zeper ýetirmekden, hapalanmakdan, rejesiz peýdalanmakdan we beýleki ýaramaz täsirlerden goralmaga degişlidir» diýlip bellenilýär. Türkmenistan häzirki wagtda BMG-niň Ösüş maksatnamasy, Daşky gurşaw boýunça maksatnamasy, Bütindünýä ekologiýa gaznasy, Araly halas etmegiň halkara gaznasy, Merkezi Aziýanyň sebitleýin ekologiýa merkezi ýaly abraýly guramalar bilen hyzmatdaşlyk edýär. Biziň ýurdumyz halkara ylalaşyklaryň, taslamalaryň çäklerinde daşky gurşawy goramak boýunça möhüm meseleleri çözmäge işjeň gatnaşýar, ýygy-ýygydan wajyp başlangyçlardyr teklipler bilen çykyş edýär. Türkmenistanyň Prezidenti ekologiýa dahylly meseleler bilen baglanyşykly çykyşlarynda häzirki zamanda adamzat jemgyýetiniň durnukly ösüşini daşky gurşawyň meselelerinden üzňe göz öňüne getirmegiň mümkin däldigini nygtaýar. Ýurdumyzda amala aşyrylýan uly gurluşyklarda hem ekologiýa taýdan bildirilýän düzgünleriň doly ýerine ýetirilmegi üns merkezinde saklanylýar. Bu boýunça talaplaryň berjaý edilişine hemişelik gözegçilik ýola goýuldy. Ösümlik we haýwanat dünýäsini düýpli öwrenmekde, dünýä tanatmakda, goraghana ulgamlaryny halkara ülňülere laýyk getirmekde oňyn tejribeler toplanyldy. Türkmen tebigatynyň täsinlikleri öwrenilýär, bu ugurda halkara we ýurt derejesinde ylmy ekspedisiýalar guralýar, ylmy maslahatlar geçirilýär. Goraghanalarda haýwanat we ösümlik dünýäsiniň seýrek duş gelýän görnüşleri ýüze çykarylyp, olar ýörite gözegçilige alynýar. Ýurdumyzda daşky gurşawa ýaramaz täsirleri azaltmaga mümkinçilik berýän önümçiligiň has rowaçlanyp ugrandygyny hem aýdyň görýäris. Täze innowasion tehnologiýalar daşky gurşawyň kadaly ýagdaýyna oňyn täsirini ýetirýär.

Türkmenistanyň Prezidenti, ýurdumyzyň Ýaragly Güýçleriniň Belent Serkerdebaşysy goşun generaly Serdar Berdimuhamedow Döwlet howpsuzlyk geňeşiniň mejlislerinde Watan gullukçylarynyň arasynda ýaşlaryň watanperwerlik terbiýesini yzygiderli ösdürmek boýunça alnyp barylýan işleri kämil derejede guramagyň zerurdygyna ünsi çekýär. Watana gulluk etmegiň, ony jandan eziz görüp goramagyň we ýurdumyzy gülledip ösdürmek üçin hyzmat etmegiň her bir ynsanyň ömrüniň manysy, mertebeli ýaşaýşynyň özeni, maksat-myrady bolup durýandygyny pent-nesihat edýär. Çünki Watan ogullarynyň — merdana, batyr gerçekleriň watanperwerlik duýgusy her gysym topragyň keramatdygyna uýmakdan, şöhratly geçmişimize, öý-ojagyň mukaddesligine, il-ulsuň, ata-babalaryň çuňňur pähimine hormat-sarpa goýmagy başarmakdan başlanýar. Şöhratly geçmişine sarpa goýýan nesil şu günüň bagtyýarlygyna guwanyp, geljegiň röwşendigine ynanyp, eziz topragyna söýenip ýaşaýar. Biziň Watana bolan söýgimiz ata-babalarymyzyň nesilleriň eşretli durmuşda ýaşamagy üçin görkezen gahrymançylyklarynyň üstümizde ganat gerýän ölmez-ýitmez ruhlary bilen utgaşýar, bir bitewi güýje öwrülýär. Ynsan geçmişiniň beýikligini, köki-damarynyň çuňlugyny, köňlüniň rahatlygyny, şu gününiň bagtyýarlygyny, sarsmaz-synmaz rysgal-döwletliligini diňe öz Watanynyň goýnunda görýär. Göbek ganymyz daman Watan topragy, ony goramak, özgertmek üçin halal zähmet çekip, döken alyn derimiz biziň üçin iň gymmatly mertebedir. Akyldar şahyrymyz Magtymguly Pyragy döwürleriň we nesilleriň aýrylmaz baglanyşygynyň mizemezligini, ynsanperwerligiň beýik gymmatlyklaryny, parahatçylyk we döredijilik ýörelgelerine ygrarlylygy Watana wepalylygyň beýik ruhunda görýär. Döwür bilen deň gadam basýan, gün-günden däl-de, sagatsaýyn ösýän ata Watanymyz biziň her birimiziň köňül buýsanjymyz, başymyzyň täji. Watan — bahasyna ýetip bolmajak gymmatlyk. Şol gymmatlyga düşünmek, ony goramak, söýmek, onuň ösüşlerine öz goşandyňy goşmak biziň her birimiziň mukaddes borjumyz.

«Pähim-paýhas ummany Magtymguly Pyragy» ýylynyň uly üstünliklere beslenýän günlerinde akyldar şahyryň doglan gününiň 300 ýyllygy mynasybetli birnäçe çäreler geçirilýär. Türkmenistanyň Kärdeşler arkalaşyklarynyň Daşoguz welaýat birleşmesiniň «Daşoguz habarlary» gazetiniň redaksiýasy bilen bilelikde guramagynda geçirilen «Magtymguly — halkyň beýik danasy, äleme nusgadyr ähli namasy» atly maslahat hem ýokary ruhubelentlige beslendi. TKA-nyň Daşoguz welaýat birleşmesinde geçirilen maslahata dürli ulgamlarda zähmet çekýän bagtyýar ildeşlerimiz gatnaşdylar. Maslahatda guralan çykyşlarda akyldar şahyryň edebi mirasynyň ähmiýeti hakynda gürrüň etdiler. Mälim bolşy ýaly, Magtymguly Pyragynyň medeni mirasyny dünýä ýaýmakda ýurdumyzda birnäçe işler alnyp barylýar. Şolaryň hatarynda «Magtymguly Pyragynyň medeni mirasy hakynda» Türkmenistanyň Kanunynyň ähmiýeti örän uludyr. Bu kanun beýik söz ussadynyň medeni mirasynyň aýawly saklanmagyna we geljek nesillere ýetirilmegine degişli wezipeleriň hukuk binýadyny berkidýär. Akyldar şahyryň döredijilik mirasy häzirki wagtda halkara derejede uly gyzyklanma eýe bolýar. Çykyş edenler şular barada bellemek bilen, şeýle giň gerimli işleriň şanly ýylyň taryhy ähmiýetli wakalarynyň hatarynda mynasyp orny eýeleýändigini aýtdylar.

Daşoguz welaýatynyň Daşoguz şäher häkimliginiň, TDP-niň Daşoguz welaýat, Daşoguz şäher komitetleriniň hem-de Daşoguz şäher kazyýetiniň bilelikde guramagynda «Arkadagly Gahryman Serdarymyzyň özgertmeler syýasaty — taryhy eýýamyň ganaty» atly maslahat geçirildi. Ýurdumyzda durmuşa geçirilýän özgertmeler syýasatyny ilat arasynda wagyz etmek maksady bilen, şäher häkimliginde geçirilen maslahatda çykyş edenler ata Watanymyzyň taryhyna altyn harplar bilen ýazylýan Berkarar döwletiň täze eýýamynyň Galkynyşy döwrüniň uly rowaçlyklara hem-de ajaýyp ýeňişlere beslenýändigini bellediler. Şeýle hem çykyşlarda Arkadagly Gahryman Serdarymyzyň «Watan diňe halky bilen Watandyr! Döwlet diňe halky bilen döwletdir!» diýen parasatly şygarynyň dabaralanmasyna öwrülen şanly ýyllaryň ýurdumyzyň dürli ugurlarda gazanýan üstünlikleri bilen şöhratlanýandygy nygtaldy. Täze taryhy döwürde hukuk döwletimizde amala aşyrylýan beýik özgertmeler halkyň we ýurduň bähbitlerine gönükdirilen belent maksatly tutumlar bilen rowaçlanýar. Nurana ertirler, asuda säherler hormatly Prezidentimiziň il-ýurt hakyndaky beýik maksatlary hem-de rowaç tutumlary bilen şöhratlanýar. Muny geçilen gysga taryhy döwür hem aýdyň görkezýär. Çykyşlarda bular barada hem aýratyn durlup geçildi.