Berkarar döwletiň täze eýýamynyň Galkynyşy döwründe ýurdumyzyň oba hojalyk pudagynyň esasy ugurlarynyň biri bolan maldarçylygy ösdürmek barada öňde goýlan wezipeleriň üstünlikli ýerine ýetirilmegi boýunça giň gerimli işler amala aşyrylýar. Şonda ymgyr Garagumuň jümmüşinde bakylýan dowar, düýe sürüleriniň suw bilen ýeterlik üpjün edilmegi baradaky aladalar uly orny eýeleýär. Häzirki döwürde Daşoguz welaýatynyň maldarçylyk hojalyklarynda hem mallar Garagumuň aňyrsyna-bärsine göz ýetmeýän ýaýlalarynda idedilýär. Olaryň suw üpjünçiliginiň talabalaýyk bolmagy esasy meseleleriň birine öwrülýär. «Daşoguzörisuw» bejeriş-gurluşyk kärhanasynyň işçi-hünärmenleri hem bu meseläniň ygtybarly çözülmegine goşant goşmakda yhlasly zähmet çekýärler. Munuň şeýledigini geçen ýylda kärhananyň suw gurluşykçylarynyň ýerine ýetiren işleriniň mysalynda-da görmek mümkin. Çünki olar geçen ýylyň dowamynda jemi 10-a golaý täze guýulary gazyp ýa-da olaryň öňden bar bolanlaryny doly abatlap, çopan-çoluklaryň ygtyýaryna berdiler. Ýeri gelende bellesek, şol guýular Görogly etrabyndaky «Garagum» hem-de Şabat etrabyndaky «Dowardarçylyk» maldarçylyk hojalyklaryna degişli öri meýdanlarynda ýerleşýär. Geçen ýylda «Garagum» maldarçylyk hojalygynyň Gamyşly, Ajyguýy hem-de «Dowardarçylyk» maldarçylyk hojalygynyň Baleýşem, Gyzyljaburun, Gündogar sözenli ýaýlalarynda täze guýular ulanylmaga berildi. Guýularyň çuňlugy 22 metrden 50 metre çenli bolýar. Bu olary gurmak üçin köp zähmet çekmeli bolýandygyny aňladýar. Mundan başga-da, kärhananyň suw gurluşykçylary kaklaryň çäginde sardobalary gurmak boýunça hem iş alyp barýarlar. Kärhanada tejribeli, öz işine örän jogapkärçilikli çemeleşýän guýy ussalarynyň onlarçasy zähmet çekýär. Olardan Rahman Garlyýewiň, Gurbannazar Gutlyýewiň, Röwşen Annamämmedowyň, Dörtguly Babaýewiň atlaryny tutmak bolar. Şonuň ýaly-da, olara uly kömek berýän ulag sürüjiler Hudaýnazar Haljanowyň, Sadylla Ýusupowyň bitirýän hyzmatlary aýratyn bellenmäge mynasypdyr. «Pähim-paýhas ummany Magtymguly Pyragy» ýylynda kärhananyň işçi-hünärmenleriniň öňünde has-da jogapkärli wezipeleriň durandygyny bellemeli. Kärhananyň şu ýyl üçin kabul eden meýilnamasynda Garagumuň uzak ýaýlalarynda ýene-de onlarça guýyny gazmak, abatlamak göz öňünde tutulýar. Bu işleri ýokary derejede amala aşyrmak, guýulary bellenen möhletlerde ulanmaga bermek olaryň esasy aladasy bolmagynda galýar. Nesip bolsa, bu ýyl hem kärhananyň zähmetkeşleri öz borçlaryny birkemsiz ýerine ýetirmek üçin gaýratly zähmet çekerler.

Dil öwrenmek jemgyýetçilik gatnaşyklaryny gowulandyrmakda we adamlaryň arasyndaky baglanyşygy işjeňleşdirmekde möhüm ähmiýete eýedir. Ýurdumyzda daşary ýurt dillerini ýaşlara öwretmek maksady bilen, birnäçe işler amala aşyrylýar. Bu babatda «Türkmenistanda daşary ýurt dillerini okatmagy kämilleşdirmegiň Konsepsiýasynyň» kabul edilmegi aýratyn uly orna eýe boldy. Ýurdumyzda ýaşlaryň dil başarnyklaryny ösdürmek, ukyplaryny kämilleşdirmek üçin döwletimiz tarapyndan ähli mümkinçilikler döredilýär. Ata Watanymyzyň dürli künjeginde hereket edýän umumy bilim edaralarynda dünýä dilleriniň birnäçesi öwredilýär. Ýaş nesilleriň dil öwrenmäge bolan ýokary islegini kanagatlandyrmakda, olaryň dil başarnyklaryny kämilleşdirmekde bu alnyp barylýan işleriň ähmiýeti örän uludyr. Daşary ýurt dillerini okatmagyň konsepsiýasyna laýyklykda, umumy bilim edaralarynda dilleri öwretmegiň dürli usulyýet esaslary işlenip düzüldi. Bu babatda sanly tehnologiýalaryň bilim ulgamyna giňden ornaşdyrylmagy has-da amatly şertleri üpjün etdi. Bilim işgärleri daşary ýurt dilleri sapaklarynda dürli tehniki serişdelerden, slaýdlardan hem-de elektron görkezme esbaplaryndan ýerlikli peýdalanyp, okuwçylara döwrebap bilim berýärler. Ylmyň ösmegi bilen dil öwretmegiň has ygtybarly we netijeli usullary işlenip, tejribä ornaşdyryldy. Bu bolsa bilim işgärleri hem-de okuwçylar üçin dürli ýeňillikleri döredýär, dil öwrenmäge sarp edýän wagtyňy tygşytlamaga ýardam edýär. Daşary ýurt dilini öwretmekde kämilleşdiriş okuwlarynyň yzygiderli guralmagy daşary ýurt dillerini okatmakda täze tejribeleri we usulyýet esaslaryny ylmy önümçilige ornaşdyrmaga kömek berýär. Berkarar döwletiň täze eýýamynyň Galkynyşy döwründe bilim ulgamynda daşary ýurt dillerini öwretmek boýunça giň gerimli işler rowaçlanýar. Bu bolsa ýaş nesilleriň dil başarnyklarynyň has-da ösdürilmegine özüniň oňyn täsirini ýetirýär.

Türkmen halky päklige beslenip gelen Oraza aýyny ruhubelentlik bilen garşylaýar. Mukaddes aýyň gelmegine köpler sabyrsyzlyk bilen garaşýar. Halkymyz täze dogan Aýy ýüzüne sylyp, ýagşy dilegler edýär. Oraza aýynda edilýän dilegler ynsany päklige, sagdynlyga, ynsanperwerlige ruhlandyrýar. Mukaddes Remezan aýy agzybirligiň, jebisligiň, asudalygyň, hoşniýetliligiň, ýagşy gylyk-häsiýetli, arassa ahlakly, göreldeli bolmak hakyndaky ýagşy doga-dilegleriň kabul bolýan aýydyr. Mukaddes Remezan aýynda Oraza tutmak bolsa adam bedeniniň ähli ulgamyny sagdynlaşdyrýar. Adatça, yzygider işleýän iýmit siňdiriş ulgamy agyz beklän adamda birneme dynçlykda bolýar. Şeýlelikde, beden agzalarynyň zeperlenen ýeri bar bolsa, azda-kände bitişmäge mümkinçilik bolýar. Oraza adamyň ýürek-gan aýlanyş, iýmit siňdiriş ulgamyna özüniň oňaýly täsirini ýetirýär. Adam bedeniniň degna ulgamyna has köp agram düşýär. Beýnidäki dokumalar we öýjükler endamyň iň näzik, şol bir wagtyň özünde-de gurluş taýdan has ösen bölegidir. Bu dokumalar we öýjükler tutuş bedeniň nerwleri bilen baglanyşyklydyr. Her bir öýjük aýratyn wezipäni ýerine ýetirýär. Köp işleýän merkezi degna ulgamy gany köp talap edýär. Iýmit siňdiriş agzalary nahardan doly bolanda, ganyň aglaba bölegi şol tarapa gönügýär. Netijede, beýnä barýan gan azalýar, gan ýetmedik beýniniň işjeňligi peselýär. Beýni öz funksiýasyny ýerine ýetirip bilmeýändigi üçin çenden aşa nahardan doýan adam ukuçyl bolýar, kän bir hereket edesi gelmeýär. Agzyny bekleýän adamyň bolsa degna ulgamy dynç alýar, munuň özi ony köp dertden goraýar. Ýürege damar gatama keseli, degna ulgamynyň bozulmagy hem-de aşgazanyň hemişe hereketlenip durmasy zyýan ýetirýär. Agyz beklemek gan aýlanyşyny hem kadalaşdyrýar. Oraza tutan adamyň ganynyň düzüminde holesteriniň derejesiniň peselýändigi hem anyklanyldy. Gan damarlarynyň iç ýüzünde ýygnanan holesterin bölejikleri hem ganyň akymyna garyşyp, gan damarynyň gatama keselini ýok edýär. Nahary köp iýmek keseliň başy hasaplanylýar we adam üçin zyýanlydyr, berhiz bolsa bejerginiň başydyr. Oraza tutmak bagry sagdynlaşdyrýar. Iýmiti siňdirmekden başlap, tutuş bedendäki himiki hadysalaryň aglabasy bagyrda bolup geçýär. Bagra agram düşdügiçe, onuň işjeňligi peselýär. Agyz beklän adamyň bagry bolsa birneme rahat bolup, ganyň düzümindäki zyýanly maddalaryň ençemesini zyýansyzlandyrmaga ukyply bolýar. Oraza bedeniň açlyga hem suwsuzlyga durnuklylygyny ýokarlandyrýar, adamyň ömrüni uzaldýar, sagdyn durmuş ýörelgeleriniň kada öwrülmegine ýardam edýär. Ymam Gazaly nesihatlarynda: «Oraza tutmaklyk jan üçin zekat, beden üçin taplanyş, ýagşylyga çakylykdyr» diýipdir. Oraza tutulan ilkinji günden başlap, dürs iýmitlenmek üçin üns berilmeli zatlar, ýagny ertirlik nahary oňat kabul edilse, bedene gerek bolan energiýa ýeterlik bolýar, kaloriýalarynyň mukdary azrak bolan süýtli tagamlara köpräk üns berjek bolmaly. Iýmit siňdiriş ulgamyny sagdynlaşdyrýan gök önümleri we ter miweleri, gowrulan däl-de, gaýnadylan ýa-da buglanan naharlary köpräk iýmeli, süýji şokolad we hamyrly kökeleri azaltmaly. Fiziki maşklary ýerine ýetirip, pyýada gezelenç etmeli. Sagdyn hereket içegäniň işleýşini kadalaşdyrýar, ganyň düzümindäki şekeriň we holesteriniň mukdaryny azaldýar.

Kalby haýyrly işlere yhlasdan, ýagşy niýet-pälden doly merdana halkymyz ýene-de bir aýy — mukaddes Oraza aýyny garşy alýar. Aýlaryň serweri hasaplanýan bu mukaddes aýyň gelendigini buşlap, şadyýan çagalaryň ýürek buýsançlaryna garyp aýdýan ýaremezanlary her bir türkmen ojagyna bagtyň şuglasyny, ruhy galkynyş eçilýär. Remezan aýynda adamlar oraza tutmak bilen ybadaty berjaý edýärler, kalplaryny arassalaýarlar, ýaramaz endiklerden saklanýarlar, nebsine buýurmaga, gep-gybatlardan, erbet işlerden daşda durmaga çalyşýarlar. Adamlar agyz beklemek bilen, beden saglygyny gazanýarlar. Mukaddes aýyň dowamynda agzaçar sadakalary berlip, ýagşy doga-dilegler edilýär, adamlar bir-birege has ýakynlaşyp, köňül maksatlarynyň bitewüligini gazanýarlar. Bu mukaddes aýyň soňky günlerinde keramatly Gadyr gijesiniň bolmagy, birek-birege ýagşydan-ýagşy arzuw-dilegler aýdylyp, ruhy päkligiň gazanylmagy aýyň özboluşly aýratynlyklarynyň biri bolup durýar. Mukaddes Oraza aýynda etjek ýagşy doga-dilegleriňiz kabul bolsun, mähriban ildeşler!

Baharyň göwünlere galkynyş, tebigata özgeriş getirýän ajaýyp pursatlarynda giňden bellenilýän Halkara zenanlar güni mynasybetli geçirilýän dabaralar gülden görkli gelin-gyzlarymyzyň taryhy döwürde sarpasynyň has-da belent tutulýandygyny alamatlandyrýar. Nurana baýramçylyk mynasybetli «Daşoguz habarlary» gazetiniň redaksiýasynyň Türkmenistanyň Kärdeşler arkalaşyklarynyň welaýat birleşmesi hem-de Daşoguz şäher medeniýet merkezi bilen bilelikde guramagynda «Zenanlar — berkarar Watanymyzyň mertebe tugy» ady bilen baýramçylyk dabarasy geçirildi. TKA-nyň welaýat birleşmesiniň uly mejlisler jaýynda geçirilen dabara dürli ulgamlarda zähmet çekýän bagtyýar gelin-gyzlar gatnaşdylar. Dabarada çykyş edenler täze taryhy döwürde zenanlara goýulýan belent hormat-sarpa hakynda buýsançly gürrüň etdiler. Çykyşlarda jemgyýetimizde zenanlaryň tutýan ornunyň uludygyny, olaryň netijeli işlemegi üçin ähli mümkinçilikleriň döredilendigini bellediler. Baýramçylyk çäresiniň dowamy şäher medeniýet merkeziniň aýdymçylarynyň hem-de çeper höwesjeňleriniň aýdym-sazly çykyşlary bilen utgaşdy.

Pähim-paýhas ummany Magtymguly Pyragy ýylymyzda gül-lälelere beslenip gelen bahar paslynyň dowam edýän ajaýyp günlerinde Halkara zenanlar güni – 8-nji mart baýramçylygyny uludan bellemeklik her bir ynsanyň kalbyny heýjana salýar. Diýarymyzyň çar künjeginde bu ajaýyp bahar baýramy mynasybetli dürli çäreler barha dabaralanýar. Döwlet derejesinde edilýän şeýle tagallalar mährem enelerimiziň, mähriban gelin-gyzlarymyzyň göwünlerini galkyndyryp, ýüreklerini has-da joşdurýar. Parasatly türkmen zenanlary taryhyň islendik döwürlerinde maşgala ojagynyň sarsmaz sütüni, edep-terbiýe, ahlak gözelliginiň ajaýyp nusgasy şeýle hem öýüniň nury, ýaraşygy bolupdyr. Olar tebigatyň adamzada bagyş eden iň asylly häsiýetleri özlerinde jemläp, ony eýýamlardan eýýamlara geçirýärler. Türkmen halky öz zenanlaryny, mähek daşyna deňelýän kümüş saçly eneleri hemişe ýokary mertebelerde goýup, arzylaýan halk. Berkarar döwletiň täze eýýamynyň Galkynyşy döwründe olary “Zenan kalby” ordeni bilen sylaglap,  Halkara zenanlar güni mynasybetli köp çagaly enelere “Ene mähri” diýen hormatly atlar dakylýar. 8-nji mart baýramçylygynyň bellenilýän toýly günlerinde eneleriň, türkmen zenanlarynyň waspy şahyrana şygyrlarda, hoş owazly aýdym-sazlarda, surat eserlerinde mahlasy tutuş adamzadyň dilinde belentden belent ýaňlanýar.        Nazaket HASANOWA, Lebap welaýatynyň Çärjew etrabynyň 48-nji orta mekdebiniň mugallymy.

Taryhy mejlisiň ähmiýetine bagyşlandy Türkmenistanyň Halk Maslahatynyň Prezidiumynyň mejlisinde öňde goýlan wezipeleriň ähmiýetini açyp görkezmek maksady bilen, welaýat häkimliginiň mejlisler zalynda «Türkmenistanyň Prezidenti Arkadagly Gahryman Serdarymyzyň ösüş maksatnamalaryny durmuşa geçirmekde döwletiň we jemgyýetiň bilelikdäki tagallalarynyň ähmiýeti» atly dabaraly maslahat geçirildi. Maslahatda çykyş edenler şu ýyl üçin kesgitlenen maýa goýum Maksatnamasynda öňde goýlan wezipelerden we maksatlardan gelip çykýan aýratynlyklar barada durup geçmeginiň ýylymyzy rowaçlandyrmakda uly wezipeleri öňde goýýandygyny nygtadylar. Maksatnamany durmuşa geçirmek boýunça ýerine ýetirilmeli işleriň we geçirilmeli çäreleriň Meýilnamasynyň Halk Maslahatynyň Prezidiumynyň Karary esasynda kabul edilmeginiň taryhy ýylymyzda bellenen sepgitlere, maksatlara ýetmekde uly çelgi bolup durýandygy barada buýsanç bilen aýdyldy. Soňra welaýatymyzyň medeniýet we sungat ussatlarynyň taýýarlan aýdym-sazly çykyşlaryna giň orun berildi.

Gündogaryň akyldary we nusgawy şahyry Magtymguly Pyragynyň doglan gününiň 300 ýyllygy mynasybetli Beki Seýtäkow adyndaky Mugallymçylyk mekdebinde «Arzuwlan eýýamyň geldi, Pyragy!» atly döredijilik bäsleşigi geçirildi. Mekdebiň türkmen dili we edebiýat birleşmesiniň guramagynda geçirilen bäsleşikde talyplar Magtymguly Pyragynyň goşgusyny labyzly okamak, şahyryň döredijiligine degişli sowallara jogap bermek, söz ussadynyň şygyrlaryny many taýdan derňäp gürrüň bermek we sergi taýýarlamak ýaly şertler esasynda bäsleşdiler. Bäsleşige 6 sany talyp gatnaşyp, özleriniň ukyp-başarnyklaryny açyp görkezdiler. Bäsleşigiň netijesine görä, ýeňijiler kesgitlenip, olara  TDP-niň welaýat komitetiniň sowgatlary we Hormat hatlary gowşuryldy

Halkara zenanlar güni mynasybetli welaýat Saglygy goraýyş müdirliginiň hem-de saglygy goraýyş işgärleriniň kärdeşler arkalaşyklarynyň Daşoguz şäher geňeşiniň bilelikde guramagynda baýramçylyk dabarasy geçirildi. «Saglyk» Döwlet maksatnamasyny üstünlikli durmuşa geçirmekde, ilatyň saglygyny goramakda, dürli keselleriň öňüni almakda saglygy goraýyş işgärleriniň hem mynasyp goşandy bardyr. Ulgamda zähmet çekýän eli ýeňil lukman gelin-gyzlaryň netijeli zähmetini Halkara zenanlar gününiň uly dabaralara beslenýän günlerinde sarpalamak maksady bilen, welaýat köpugurly hassahanasynyň mejlisler jaýynda geçirilen baýramçylyk maslahatynda öňdebaryjy saglygy goraýyş işgärleriniň birnäçesine Türkmenistanyň Saglygy goraýyş we derman senagaty ministrliginiň Hormat hatlary we saglygy goraýyş işgärleriniň KA-nyň Daşoguz şäher geňeşiniň ýadygärlik sowgatlary dabaraly ýagdaýda gowşuryldy.

Ajaýyp bahar paslynyň ilkinji günlerinde bellenilýän Halkara zenanlar gününiň öňüsyrasynda hormatly Prezidentimiziň gol çeken Buýrugyna laýyklykda, bagtyýar zenanlara pul sowgatlaryny gowşurmak dabaralary welaýatymyzda guramaçylykly geçirildi. Edara-kärhanalarda zähmet çekýän zenanlara, mekdebe çenli çagalar edaralarynda terbiýelenýän şadyýan gyzjagazlara, orta mekdeplerde, ýokary we orta hünär okuw mekdeplerinde bilim alýan gyzlara nurana baýramçylyk mynasybetli pul sowgatlarynyň gowşurylyş dabaralarynda çykyş edenler berkarar döwletimizde zenanlara goýulýan sarpa hakynda buýsançly gürrüň etdiler.