Türkmen halkynyň asyrlara uzaýan şöhratly taryhy bar. Merdana pederlerimiz taryhda edermenligiň, watansöýüjiligiň, il-halka hyzmat etmegiň belent nusgasyny görkezipdirler. Bu asylly ýörelgeler, merdanalyk ýoly nesiller üçin nusgalyk mekdepdir. Halkymyz häzirki wagtda hem nesillerden-nesillere geçirilýän milli ýörelgelerine ygrarlydyr. Gurbansoltan eje adyndaky Daşoguz lukmançylyk okuw mekdebinde hereket edýän «Miras» gurnagynyň we ýaş alymlar geňeşiniň agzalary wirtual görnüşde Aşgabat şäheriniň günorta-günbatarynda ýerleşýän «Watan mukaddesligi» atly muzeýiň miras gymmatlyklarynyň sergisi bilen tanyş boldular. Onda merdana pederlerimiziň nusgalyk ýoly, ilhalar ynsan, watançy esger, halypa mugallym Berdimuhamet Annaýewiň Watan üçin söweşmegiň, nesillere bilim öwretmegiň beýik ýörelgesi barada gymmatly maglumatlar bilen tanyşdylar. Bu wirtual syýahat ata-babalarymyzyň merdanalyk ýoluny öwrenmekde we wagyz etmekde ähmiýetli çäre bolup, ol mekdebiň talyplarynda uly täsir galdyrdy.

Berkarar döwletiň täze eýýamynyň Galkynyşy döwründe «Garaşsyz, baky Bitarap Türkmenistan — bedew batly at-myradyň mekany» ýylynda ahalteke bedewleriniň at-owazasy, şan-şöhraty dünýä ýüzüne dolýar. Ata-babalarymyzyň tälim-terbiýesi bilen asyrlaryň dowamynda kämilleşdirilen ahalteke bedewleri ynsan oglunyň ýakyn ýoldaşy hasaplanýar. Halkymyzyň gymmatly eposy «Görogly» şadessanynda hem Gyratyň waspy öz beýanyny giňden tapyp, dilden düşmeýär. Görogly atasynyň kömegi bilen söweş ýoldaşy, gaçanda gutarýan, kowsa ýetirýän Gyraty ösdürip ýetişdirýär. Görogly öz atyna «gardaşym, janym Gyratym!» diýip ýüzlenýär. Şeýle-de türkmen halky bedew atlaryny altyn-kümüş bilen bezäpdir. Görogly beg öz Gyratyny şeýle taryplaýar: Bedewiň asly behiştden, Berekella, Gyrat saňa! Nalyň tylladan-kümüşden, Berekella, Gyrat saňa! Dessanda Gyrat Göroglynyň başdan-aýak ýakyn hemrasy, halasgäri bolup durýar. Munuň şeýledigi Hüňkar patyşalygyna Göroglynyň Gyraty alyp gaçylanda açyk aýdyň görünýär. Hüňkar patyşa Gyratyň ýyndamlygyna, gözelligine haýran galýar. Hüňkar patyşanyň Japar atly serkerdesi Göroglydan atyna nähili baha berýändigini soranynda, Görogly:   Eýer esbaby bilinde, Taý tapylmaz Rum ilinde, Jylaw Göroglynyň elinde, Däh diýende uçar atym — diýip, Gyratyň Rum ilinde gözelligine, gaýduwsyzlygyna taý ýokdugyny aýdýar. Şundan soň Gyrat Hüňkar patyşanyň galasynyň üstünden uçup geçýär-de, niredesiň Çardagly Çandybil diýip, tozap gaýdyberýär. Görogly Gyratyndan hoşal bolup, oňa guwanýar, buýsanýar. Türkmen ahalteke bedewleriniň ynsanyň durmuşynda tutýan orny diýseň uly. Nusgawy şahyrymyz Annagylyç Mätäji «Bedew» atly goşgusynda: Pelläge barsaň, meger, gyzdan gylykly duruşyň Ýörhä-ýör bolsa ýene, towşan kimindir turuşyň — diýip, gyz gylykly owadan hem görmegeý bedewlerimiziň tarypyny ýetirýär. Söz ussady, dana atamyz Magtymguly Pyragynyň döredijiliginde hem bedew atlar ussatlyk bilen taryplanýar. Şahyryň «Aty gerek» diýen şygrynda: At gazanan goç ýigidiň Owwal bedew aty gerek — diýse, «At ýanynda bellidir» diýen ajaýyp şygrynda bolsa: Bedew diýgeç, hemme bedew deň bolmaz, Çyn bedewler meýdanynda bellidir — diýilýär. Bu gün Berkarar döwletiň täze eýýamynyň Galkynyşy döwründe Milli Liderimiz ahalteke bedewlerine uly üns berýär. Bedew atlary idetmek, köpeltmek üçin ýörite atçylyk toplumlary döredildi. Her ýylyň aprel aýynyň soňky ýekşenbesinde Türkmen bedewiniň baýramy döwlet derejesinde giňden bellenilýär. Bedew baýramynda at çapyşyklary uludan guralýar. At çapyşyklarynda ezber çapyksuwarlar özleriniň ýelden ýyndam bedew atlary bilen öz ussatlyklaryny görkezýärler. Bu baýramçylyk Diýarymyzyň ähli künjeginde uly ruhubelentlige beslenýär.

Hormatly Prezidentimiziň alyp barýan özgertmeler syýasaty bu günki gün halkymyzyň ýaşaýyş-durmuşynda ýokary ösüşi, ruhy galkynyşy berkidýär. Hereket edýän Oba milli maksatnamasynyň çäklerinde ýurdumyzyň ähli ýerlerinde, hatda iň çetki obalarynda hem döwrebap gurşaw kemala gelýär. Munuň şeýledigi döwürden galkynýan obalaryň mysalynda, olarda häzirki wagtda bolup geçýän özgertmeleriň hakykatynda has aýdyň görünýär. Daşoguz welaýatynyň  Şabat etrabynyň Diýar geňeşligini düzýän obalar hem bu babatda gürrüňini etmäge mynasyp bolup durýar. Abdalýap, Aýakketli, Ogşuk hem-de Galkynyş obalarynyň durmuşy bilen gyzyklananyňda, ilatyň ýaşaýyş-durmuş şertleriniň döwür bilen aýakdaş gidýändigine şaýat bolýarsyň. Obalarda 4 sany orta mekdep, 1 sany oba saglyk merkezi, 2 sany oba saglyk öýi, 3 sany dükan, 33 sany hususy söwda nokady hereket edip, olar ösüp barýan ýaşlaryň, ilatyň ýaşaýyş-durmuşynyň talabalaýyk derejede üpjün edilmegine ýardam edýärler. Galkynyş obasynyň çäginde ýerleşýän 1500 orunlyk 2-nji sport desgasynda ilatyň sport işjeňliginiň artmagy, oba ýaşlarynyň sportuň dürli görnüşleri boýunça taýýarlygynyň ýokarlandyrylmagy ugrunda uly tagallalar edilýär. Geçen ýylyň Remezan aýynda ulanmaga berlen Magtymguly Pyragy metjidi ýurdumyzda aňyrdan gelýän milli ýörelgelerimize uly sarpa goýulýandygyny alamatlandyryp, oba ilatynyň milli däp-dessurlarymyzy berjaý etmeklerine mümkinçilikleri döredýär. Obanyň çäginde ýerleşýän, 2023-nji ýylda Türkmenistanyň Senagatçylar we telekeçiler birleşmesiniň agzasy Amanbaý Genjäýew tarapyndan esaslandyrylan «Ýokary hyzmat» hojalyk jemgyýetiniň öndürýän ýokary hilli, döwrebap önümleri diňe bir şu geňeşligiň çägindäki obalaryň ilatyny doly üpjün etmän, eýsem, beýleki welaýatlara, hatda daşary döwletlere-de ugradylyp, ýurdumyzyň ykdysady kuwwatynyň berkemegine mynasyp goşant bolýar. Hojalyk jemgyýetiniň «Amantaý» haryt nyşanly tikin we örme önümleri ilatyň ösen isleglerini doly kanagatlandyrýar. Obalarda tebigy ary balyny öndürýän telekeçiler hem sanardan köp. «Genç» haryt nyşanly ary balyny uzak ýyllardan bäri ilata hödürläp gelýän Yslam Ýakubowyň ýurdumyzda azyk bolçulygynyň üpjün edilmegine goşýan goşandy örän uludyr. Türkmenistanyň Senagatçylar we telekeçiler birleşmesiniň agzasy bolup durýan bu telekeçiniň öndürýän önümi ak bazarlarymyzda islegli harytlaryň hatarynda durýar. Obalaryň çäklerinde amala aşyrylýan köpugurly işleriň ählisi ilatyň bolelin durmuşda ýaşamagyny, ýaşlaryň aglaba böleginiň iş orunlary bilen üpjün edilmegini şertlendirýär. — Hormatly Prezidentimiziň taýsyz tagallalarynyň netijesinde degişli maksatnamanyň esasynda obalarda ilatyň döwrebap ýaşaýşyny üpjün etmek bilen bagly wezipeler durmuşa geçirilýär. Oba ýaşaýjylary asfaltlanan ýollar, tebigy gaz, elektrik energiýasy, arassa agyz suwy bilen üpjün edilip, häzirki zaman ösen durmuşyň hözirini görüp ýaşaýarlar. Obalarda telekeçilik bilen meşgullanýan adamlaryň agdyklyk etmegi bu babatda döredilýän şertleriň we mümkinçilikleriň ýokary netijelerini berýändigini alamatlandyrýar. Bagbançylyk bilen meşgullanýan ildeşlerimiz hem sanardan köp. Üzüm we başga-da dürli miweleriň öndürilişiniň artmagy, bu ugurda köp tejribe toplanmagy netijesinde obalarymyzyň ykdysady durmuşy has-da berkeýär. Bu zatlaryň ählisiniň sakasynda hormatly Prezidentimiziň adam hakdaky aladalarynyň aýdyň hakykaty durandyr — diýip, geňeşligiň Geňeşiniň hünärmeni Sanabar Mätýakubowa uly buýsanç bilen gürrüň berýär. Hakykatdan-da, ir ertirden başlanýan hereket tä giç agşama çenli dowam edip, oba durmuşynda ýokary galkynyşyň emele gelýändigini, halal zähmetiň rehnet bolup ýagýandygyny, adam hakdaky aladalaryň şamçyrag bolup şugla saçýandygyny alamatlandyrýar.

Hormatly Prezidentimiziň Garaşsyz, baky Bitarap ýurdumyzy bagy-bossanlyga öwürmek, ekologiýa abadançylygyny üpjün etmek barada öňde goýýan möhüm wezipelerinden ugur alnyp, her ýyl şäherlerde, obalarda arassaçylyk, abadanlaşdyryş çärelerini geçirmek asylly däbe öwrüldi. Şeýle paýhasly ýörelgeleriň «Garaşsyz, baky Bitarap Türkmenistan — bedew batly at-myradyň mekany» ýylynda hem rowaçlandyrylýandygy örän guwandyryjydyr. Munuň şeýle bolmagyna şu ýylyň 21-nji martynda Arkadagly Gahryman Serdarymyzyň gatnaşmagynda uly dabara bilen ýazky bag ekmek möwsümine badalga berilmegi has-da uly itergi berdi. Ata Watanymyzyň beýleki künjeklerinde bolşy ýaly, Daşoguz  welaýatynda hem şeýle haýyrly işler giňden badalga aldy. Şonuň netijesinde hepdäniň şenbe günleri welaýatyň çäklerindäki şäherdir obalarda, edara-kärhanalaryň, ýokary hem-de orta okuw mekdepleriniň, ýaşaýyş jaý toplumlarynyň töwereklerinde abadanlaşdyryş, arassaçylyk çäreleri geçirilýär. Olaryň dowamynda seýilgählerde, köçeleriň ugrunda, akabalaryň boýlarynda miweli, saýaly, bezeg agaç nahallary oturdylýar, ozaldan bar bolan daragtlara timar bermek, ideg etmek işleri ýerine ýetirilýär. Ata-babalarymyzdan miras  galan şeýle paýhasly ýörelgelere eýerip, bu haýyrly çärelere gatnaşmaga isleg bildirýän ildeşlerimiziň sanynyň barha artýandygyny bellemek ýakymlydyr. Olaryň arasynda ýaşuly nesliň wekilleri-de, dürli ugurda, kärde zähmet çekýän adamlar hem, okuw jaýlarynda bilim alýan, hünär öwrenýän ýaşlar-da bar. Şeýle agzybirlige, ýokary ruhubelentlige ýugrulan çäreler guwandyryjy netijeleri hem berýär. Şonuň netijesinde şäherdir obalaryň görküne görk goşulyp, seýilgähleriň, köçeleriň arassaçylygy has-da gowulanýar. Bu bolsa ildeşlerimiziň arassa, tämiz howadan dem alyp, sagdyn, päkize durmuşda ýaşamagyna, ajaýyp döwrümiziň has-da gülläp ösmegine oňaýly şertleri döredýär.

«Garaşsyz, baky Bitarap Türkmenistan — bedew batly at-myradyň mekany» ýylynyň 29-njy martynda ýurdumyzyň beýleki ýerlerinde bolşy ýaly, Daşoguz welaýatynda hem täze döredilen etraplarda halk maslahatlarynyň agzalarynyň hem-de etrap halk maslahatynyň we Geňeşleriň çykyp giden agzalarynyň ýerine saýlawlar ýokary guramaçylyk derejesinde geçirildi. Çünki saýlaw möwsüminde ýerine ýetirilen taýýarlyk işleri, ilat bilen geçirilen wagyz hem-de duşuşyk çäreleri saýlawlaryň ýokary işjeňlik ýagdaýynda geçmegini üpjün etdi. Saýlawlar etrap halk maslahatlarynyň agzalary boýunça täze döredilen 42 sany saýlaw okrugynda hem-de Geňeşleriň çykyp giden agzalarynyň ýerine saýlawlar boýunça 55 okrugda, 163 sany saýlaw uçastogynda işjeň ýagdaýda geçirildi. Saýlawlar güni syýasy partiýalar we jemgyýetçilik guramalary, raýatlar topary tarapyndan hödürlenip, hasaba alnan 201 sany dalaşgäre Daşoguz welaýaty boýunça 215 480-den gowrak saýlawçy ses bermäge gatnaşdy. Hormatly Prezidentimiziň çözgüdi esasynda welaýatda täze döredilen Gubadag hem-de Garaşsyzlyk etraplarynda we beýleki etraplarda saýlawlar güni toýy ýatladýan ýagdaýlar emele geldi. Ýaşuly hem ýaş nesliň wekilleri, ýerli ýaşaýjylar dabaraly pursatlarda milli demokratiýanyň giňden dabaralanýan ajaýyp ýurdumyzda bagtyýar durmuşyň hözirini görmäge giň mümkinçilikler döredip berýän hormatly Prezidentimiziň adyna çuňňur hoşallyk sözlerini beýan etdiler. Jemgyýetçilik durmuşynda möhüm syýasy wakanyň dabaralanýan gününde ilkinji gezek ses bermäge gatnaşýan ýaşlara welaýatyň jemgyýetçilik guramalary tarapyndan sowgatlar gowşuryldy. Demokratik ýörelgeleriň ähmiýetine çuňňur düşünýän ildeşlerimiz saýlawlara işjeň gatnaşyp, iň mynasyp gören adamlaryna öz seslerini berdiler.

Türkmenistanyň Demokratik partiýasynyň Daşoguz welaýatynyň Köneürgenç etrap komitetiniň ilkinji partiýa guramalaryndaky hasabat-saýlaw ýygnaklarynyň dowamynda hormatly Prezidentimiziň ynsanperwer syýasatyny wagyz etmek, durmuşa geçirmäge kömek-goldaw bermek boýunça TDP-niň ilkinji guramalarynyň alyp barýan işleri barada hasabatlar we Berkarar döwletiň täze eýýamynyň Galkynyşy döwründe öňde durýan wezipeler barada çykyşlar diňlenildi. Hasabatlarda geçen döwürde ýerine ýetirilen işlere seljerme berlip, olarda TDP-niň öňünde goýlan wezipeler, partiýanyň 10-njy gurultaýynyň kararlarynyň, partiýanyň Maksatnamasynyň hem-de Tertipnamasynyň ýerine ýetirilişi, geçirilen syýasy-jemgyýetçilik, wagyz-nesihat işleri barada gürrüň edildi. Çykyşlarda bellenilişi ýaly, hasabat döwründe ilkinji partiýa guramalary öz işlerini ýörite düzülen meýilnama esasynda alyp bardylar. Partiýa guramalarynyň san we hil taýdan ösmegi, partiýanyň hataryna mynasyp täze agzalary kabul etmek we olary syýasy taýdan taplamak, agzalaryň düşünjeliligini we jemgyýetçilik işjeňliligini ýokarlandyrmak, şeýle-de partiýa agzalyk tölegleriniň öz wagtynda tölenmegi baradaky meseleler umumy ýygnaklarda we maslahatlarda yzygiderli ara alnyp maslahatlaşyldy. Ýurdumyzyň syýasy partiýalarynyň we jemgyýetçilik guramalarynyň öňünde goýlan wezipelerden ugur alnyp, 118 sany ilkinji guramany, 4800-den gowrak agzany özünde jemleýän TDP-niň Köneürgenç etrap komiteti we onuň ilkinji partiýa guramalary, syýasy-guramaçylyk, medeni-köpçülik we wagyz-nesihat işlerini alyp barmakda ýurdumyzyň syýasy-jemgyýetçilik durmuşynda bolup geçýän wakalaryň, täzelikleriň jümmüşinde bolup, mundan beýläk-de netijeli işleri durmuşa geçirer.

Türkmen halkynyň uçar ganaty hasaplanylýan ahalteke bedewleriniň owadanlygyna, ýyndamlygyna, eýesine wepadarlygyna, duýgurlygyna ýokary baha berýändigi hemmelere mälimdir. Milli Liderimiziň «Gadamy batly bedew», «Ahalteke bedewi — biziň buýsanjymyz we şöhratymyz», «Atda wepa-da bar, sapa-da» ýaly ajaýyp kitaplarynda olar barada aýdylýan ýakymly sözler, getirilýän maglumatlar munuň şeýledigine aýdyň güwä geçýär. Ata-babalarymyzyň gamyşgulak bedewlerimizi seýislemekde, terbiýelemekde alyp baran işleri, olara belent hormaty şu kitaplarda giňden şöhlelendirilýär. Halkymyzyň gadymy döredijiliginde, baý edebi mirasynda hem bedew atlarymyza uly orun berilýär. Muňa mysal hökmünde onlarça eserleri agzamak bolar. Olardan beýik şahyrymyz Magtymguly Pyragynyň «Atça bolmaz», nusgawy edebiýatymyzyň görnükli wekilleri Gurbanaly Magrupynyň «At ýagşydyr», Seýitnazar Seýdiniň «Üsti bedewiň», Annagylyç Mätäjiniň «Bedew», Misgingylyjyň «Arap at ýagşy», Öweztagan Kätibiniň «At wepadary ýigidiň» ýaly goşgularynda bedew atlarymyzyň tarypy ýetirilýär. Şonuň ýaly-da, geçen asyrda ýaşap geçen türkmen şahyrlarynyň hem bu barada goşgy ýa-da eser döretmedigi ýok diýerlikdir. Garaşsyz, baky Bitarap ýurdumyzda türkmen bedewleriniň şan-şöhratyny belende götermek, waspyny ýetirmek, olary idetmek, kämilleşdirmek ugrunda has-da möhüm çäreleriň amala aşyrylýandygyny aýtmak gerek. Ýurdumyzyň welaýatlarynda, Aşgabat şäherinde döwrebap atçylyk sport toplumlarynyň gurlup ulanmaga berilmegi, Türkmen bedewiniň baýramynyň her ýyl giňden bellenip geçilmegi, olary idetmäge, seýislemäge ähli gujur-gaýratyny sarp edýän atşynaslara, seýislere uly hormat goýulmagy biziň şu aýdanlarymyza anyk mysal bolup biler. Häzirki wagtda türkmen bedewlerine bolan gyzyklanmanyň, olara hormat-sarpanyň bütin dünýäde barha artýandygy aýratyn guwandyryjydyr. Ahalteke bedewlerini köpeltmek ugrunda dostlukly ýurtlarda ýaşaýan köp sanly atşynaslaryň aýratyn alada etmekleri munuň aýdyň nyşanydyr. Şeýle meşhur atşynaslar her ýyl Türkmen bedewiniň baýramy mynasybetli ýurdumyzda geçirilýän çärelere gatnaşyp, öz guwanç-buýsançlaryny beýan edýärler, biziň atşynaslarymyzyň iş tejribesi bilen tanyşýarlar. Şeýlelikde, türkmeniň bedew atlary halklaryň arasyndaky dostlukly gatnaşyklaryň ösmegine, ýygjamlaşmagyna hem uly goşant goşýar diýsek, ýalňyş bolmaz. Bir söz bilen aýdylanda, bu gün dünýäde deňi-taýy bolmadyk bedewlerimiziň abraý-mertebesi gitdigiçe belende göterilýär.

Berkarar döwletimizde halkymyzyň milli ýol-ýörelgeleri has rowaçlanýar. Ýurdumyzda ynsanperwer ýörelgelerimiz täze taryhy döwrüň ruhuna laýyk derejede ösdürilýär. Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň başlangyjy bilen 2021-nji ýylyň mart aýynda döredilen Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň durmuşa geçirýän işleri bütin halkymyzyň kalbynda çäksiz buýsanç döredýär. Gahryman Arkadagymyzyň başlangyjy bilen döredilen bu haýyr-sahawat gaznasy diňe bir ýurdumyzda däl, eýsem, daşary ýurtlarda-da meşhurlyga eýedir. Häzirki wagta çenli gaznanyň hasabyna ýurdumyz boýunça 700-den gowrak çaganyň saglygy dikeldildi. Şeýle hem bolup geçen pajygaly ýagdaýlar sebäpli, dürli ýurtlara gaznanyň serişdeleriniň hasabyna ynsanperwer kömekleri berildi. Bu bolsa halkymyzyň asylly ýörelgeleriniň häzirki wagtda üstünlikli dowam etdirilýändiginiň aýdyň nyşanydyr. Ýeri gelende bellesek, kyn durmuş ýagdaýlaryna düşen adamlara goldaw, kömek bermek ata-babalarymyzdan miras galan asylly ýörelgedir. Ýaş nesilleriň saglygy ata Watanymyzyň röwşen geljeginiň kepilidir. Berkarar döwletiň täze eýýamynyň Galkynyşy döwründe ýurdumyzyň hassahanalaryna Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gazanasynyň serişdeleriniň hasabyna «Tiz kömek» awtoulaglary, «Dialog+» kysymly gemodializ enjamlary sowgat berildi. Sebitde deňi-taýy bolmadyk täsin binagärlik keşbine eýe bolan Arkadag şäherindäki Gurbanguly Berdimuhamedow adyndaky saglygy dikeldiş toplumynda gaznanyň hasabyna bejergi alan çagalaryň saglygyny dikeltmek boýunça işler alnyp barylýar. Şu ýylyň 8-nji martynda Halkara zenanlar gününiň giňden bellenilýän günlerinde Gahryman Arkadagymyzyň bu ýerde bolup, bagtyýar zenanlarymyzy ajaýyp baýramçylyk bilen gutlamagy,  bejergi alýan gyzjagazlara hormatly Prezidentimiziň adyndan pul sowgatlarynyň we beýleki sowgatlaryň gowşurylmagy has-da täsirli boldy. Ýeri gelende bellesek, şu ýyl gaznanyň döredilenine 5 ýyl dolýar. Şu gysga wagtyň dowamynda gaznanyň işi halkara derejede ykrar edildi. Bilşimiz ýaly, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gazanasy bilen halkara guramalaryň hyzmatdaşlygy hem işjeňleşdirilýär. Bu bolsa gaznanyň işiniň giň gerimde ýaýbaňlandyrylmagyna şert döredýär.

Häzirki wagtda tutuş ýurdumyzda täze döredilen etraplaryň halk maslahatlarynyň agzalarynyň hem-de Türkmenistanyň Mejlisiniň möhletinden öň çykyp giden deputatlarynyň we welaýat, etrap, şäher halk maslahatlarynyň hem-de Geňeşleriň çykyp giden agzalarynyň ýerine geçiriljek saýlawlara ýokary derejede taýýarlyk görülýär. Bu ugurda Daşoguz welaýatynda hem degişli işler talabalaýyk alnyp barylýar. Şu mynasybetli golaýda Şabat etrabynyň medeniýet merkezinde ygtyýarlyk möhletinden öň çykyp giden etrap halk maslahatynyň agzalarynyň ýerine hödürlenilen dalaşgärler bilen saýlawçylaryň duşuşygy geçirildi. Duşuşykda etrapda döredilen iki sany okrug boýunça hasaba alnan dört dalaşgär öz maksatnamalary bilen çykyş etdiler. Dalaşgärler ýurdumyzyň döwlet syýasatynyň barha ilerleýändigi, ony mundan beýläk hem pugtalandyrmaga, halkyň abadan we bagtyýar ýaşaýşynyň üpjün edilmegine, döwletimiziň ykdysady kuwwatynyň berkidilmegine gönükdirilen işlere özleriniň önjeýli goşantlaryny goşmakda bilimlerini, tejribelerini, başarnyklaryny gaýgyrman zähmet çekjekdiklerine ynandyrdylar. Ýurdumyzda milli demokratiýanyň hem-de halk häkimiýetiniň dabaralandyrylmagy ugrunda yzygider aladalar edýän Arkadagly Gahryman Serdarymyzyň, Gahryman Arkadagymyzyň adyna tüýs ýürekden alkyş sözlerini aýtdylar. Soňra gün tertibine laýyklykda, dalaşgärler bilen saýlawçylaryň arasynda sowal-jogap alşyldy.

Ýakynda mekdep okuwçylarynyň arasynda yglan edilen «Altyn asyryň altyn nesilleri» atly ders bäsleşiginiň döwlet tapgyry geçirildi. 11—14-nji mart aralygynda geçirilen bäsleşige ýurdumyzyň 11–12-nji synplarda okaýan mekdep okuwçylarynyň 1400-e golaýy gatnaşdy. Bäsleşigiň döwlet tapgyry Aşgabatda we welaýatlarda ýerleşýän ýokary okuw mekdeplerinde geçirildi. Daşoguz şäherindäki Türkmen oba hojalyk institutynda mekdep okuwçylary türkmen dili we edebiýaty dersi boýunça güýç synanyşdylar. Oňa jemi ýurdumyz boýunça 89, Daşoguz welaýaty boýunça 14 okuwçy gatnaşyp, welaýatdan 7 okuwçy baýrakly orunlara mynasyp boldy. Umumy dersler boýunça Daşoguz welaýatyndan 67 okuwçy döwlet bäsleşiginde 1, 2, 3-nji orunlara mynasyp boldular. Ders bäsleşiginiň döwlet tapgyrynda ýeňiji bolan okuwçylara Diplomlar we ýadygärlik sowgatlar gowşuryldy.