Garaşsyz ýurdumyzyň oba hojalyk pudagynda telekeçileriň öndürijilikli zähmet çekmekleri üçin döredilýän şertleri wagyz etmek maksadynda, TSTP-niň Daşoguz welaýat komitetiniň TSTB-niň Daşoguz welaýat bölümi hem-de Daşoguz agrosenagat orta hünär okuw mekdebi bilen bilelikde guramagynda maslahat geçirildi. TSTB-niň welaýat bölüminiň mejlisler eýwanynda guralan bu çärä telekeçileriň, şeýle hem agzalan orta hünär okuw mekdebiniň talyplarynyň uly topary gatnaşdy. Maslahatda çykyş edenler ýurdumyzyň oba hojalyk pudagynda alnyp barylýan işlere telekeçileri hem giňden çekmek baradaky başlangyçlaryň üstünlikli durmuşa geçirilýändigini, mundan ýerlikli peýdalanýan telekeçileriň guwandyryjy netijelere eýe bolýandyklaryny, telekeçileriň sanynyň barha artýandygyny bellediler. Şeýlelikde, zähmetsöýer telekeçiler dürli görnüşli oba hojalyk önümlerini öndürip, olaryň bazar bolçulygyna uly goşant goşýarlar.

Daşoguz welaýat Arassaçylyk we keselleriň ýaýramagyna garşy göreşmek gullugynyň, Türkmenistanyň Demokratik partiýasynyň Daşoguz welaýat komitetiniň bilelikde guramagynda «Saglygym — baş baýlygym» ady bilen gullugyň mejlisler zalynda maslahat geçirildi. Oňa welaýat A we KÝGG gullugynyň işgärleri ýokary ruhubelentlik bilen gatnaşdylar. Maslahatda çykyş edenler lukman Arkadagymyzyň hem-de Arkadagly Gahryman Serdarymyzyň tagallalary netijesinde ynsan saglygyny goramakda, sagdyn durmuş ýörelgelerini dabaralandyrmakda, keselleriň öňüni almakda alnyp barylýan işler dogrusynda giňişleýin nygtap geçdiler.

Şeýle at bilen döwlet edaralarynyň işgärleriniň KA-nyň Daşoguz şäher geňeşiniň Daşoguz welaýat maliýe-ykdysady orta hünär okuw mekdebi bilen bilelikde guramagynda dabaraly maslahat geçirildi. Mekdebiň mejlisler zalynda geçirilen çärä mugallymlardyr talyp ýaşlar gatnaşdylar. Onda çykyş edenler geljegimiz bolan ýaş nesliň bilimli, ylymly, edep-terbiýeli, arassa ahlakly, ruhy taýdan kämil, sagat bedenli hem-de sagdyn durmuş ýörelgelerine ygrarly bolmagy babatda durmuşa geçirilýän işler dogrusynda uly buýsanç bilen nygtap geçdiler.

Saglygy goraýyş işgärleriniň KA-nyň Daşoguz şäher geňeşiniň, Gurbansoltan eje adyndaky Daşoguz lukmançylyk orta okuw mekdebiniň bilelikde guramagynda «Saglygym — baş baýlygym» diýen at bilen amaly maslahat geçirildi. Mekdebiň mejlisler zalynda geçirilen maslahata mugallymlardyr talyp ýaşlar ýokary ruhubelentlik bilen gatnaşdylar. Maslahatda çykyş edenler täze taryhy eýýamda ähli zatdan gymmatly ynsan saglygyny goramagyň hormatly Prezidentimiziň döwlet syýasatynyň möhüm ugurlarynyň birine öwrülendigi, sagdyn durmuş ýörelgelerini wagyz etmekde alnyp barylýan işler hem-de Gahryman Arkadagymyzyň ýolbaşçylygynda işlenip düzülen «Saglyk» Döwlet maksatnamasynyň çäklerinde amala aşyrylýan beýik işler dogrusynda uly buýsanç bilen belläp geçdiler.

Geçen ýekşenbe güni Daşoguz şäheriniň atçylyk sport toplumynda welaýatda şu ýylyň ýazky at çapyşyk möwsüminiň açylyşyna bagyşlanylan dabaralar guraldy. Olara bedew janköýerleriniň ýüzlerçesi belent münberden tomaşa edip, her bir çapyşygy joşgunly el çarpyşmalary, goldaw beriji sözleri bilen garşy aldylar. At çapyşyklaryna goşulan 40-dan gowrak bedewler öz ýyndamlygyny, çydamlylygyny görkezmegi başardylar. Aýlawyň 1-nji çapyşygyna 9 at goşulyp, olar 1000 metr aralykda özara güýç synanyşdylar. Gyzykly dowam eden bäsleşikde T.Babaýewiň eýeçiligindäki, D.Babaýewiň seýislän hem-de çapan Şapolat diýen aty 1-nji, S.Orazbaýewiň eýeçiligindäki, P.Çäşemowyň seýislän, S.Çäşemowyň çapan Akpamyk diýen aty 2-nji, Daşoguz welaýat Polisiýa müdirliginiň eýeçiligindäki, W.Ýagşybaýewiň seýislän, P.Jumageldiýewiň çapan Zyýada atly bedewi 3-nji orna mynasyp boldy. 2-nji çapyşyk 1200 metr aralyga guraldy. Oňa gatnaşan atlaryň arasynda 1-nji orny K.Artykbaýewiň eýeçilik edýän, W.Ýagşybaýewiň seýislän, K.Polaýewiň çapan Gallaçy, 2-nji orny S.Satybaldyýewiň eýeçiligindäki, R.Baýrambaýewiň seýislän, S.Maksadowyň çapan Atylar, 3-nji orny Daşoguz Döwlet athanasynyň eýeçiligindäki, P.Ýegşemowyň seýislän, S.Çäşemowyň çapan Şanur atly bedewleri eýelediler. 1400 metr aralyga geçirilen 3-nji çapyşyk hem örän çekeleşikli ýagdaýda dowam etdi. Onda Daşoguz welaýat Polisiýa müdirligine degişli, W.Ýagşybaýewiň seýislän, K.Polaýewiň çapan Daraýy atly aty ilkinji bolup pellehanadan geçdi. Bu çapyşykda 2-nji orna Daşoguz atçylyk sport toplumynyň eýeçiligindäki, P.Ýegşemowyň seýislän, S.Çäşemowyň çapan German, 3-nji orna D.Gurbangeldiýewiň hojalygyna degişli, Ç.Arazmedowyň seýislän. S.Gurbanowyň çapan Armanly atly bedewleri mynasyp boldular. 4-nji çapyşyga bedewleriň 10-sy gatnaşyp, olar 1800 metr aralykda öz ýyndamlygyny subut etmäge çalyşdylar. Şonda pellehanadan 1-nji bolup Daşoguz welaýat Polisiýa müdirliginiň eýeçiligindäki, W.Ýagşybaýewiň seýislän, P.Jumageldiýewiň çapan Gözel, 2-nji bolup Daşoguz Döwlet athanasyna degişli. P.Ýegşemowyň seýislän, B.Çäşemowyň çapan Gyrgözel, 3-nji bolup G.Hudaýbergenowyň hojalygyna degişli, A.Garýagdyýewiň seýislän, A.Jumanowyň çapan Abadan atly atlary geçmegi başardylar. Ahyrky, 5-nji çapyşyk hem 1800 metr aralyga guralyp, ol tomaşaçylaryň arasynda uly gyzyklanma döretdi. Şeýlelikde, onda 1-nji orny «Ýüpek ýoly» hususy kärhanasyna degişli, A.Garýagdyýewiň seýislän, A.Jumaýewiň çapan Dorhan, 2-nji orny A.Ýegşemowyň eýeçiligindäki, P.Ýegşemowyň seýislän, K.Polaýewiň çapan Aýdyňly, 3-nji orny R.Ýegenmyradowyň hojalygyna degişli. P.Baýrambaýewiň seýislän, S.Maksadowyň çapan Dowamat atly bedewleri eýeläp, hemmeleriň göwünlerini galkyndyrdylar. Çapyşyklarda üstün çykan bedewlere gymmat bahaly serpaýlar ýapyldy.

Gupba şaý-sepleriň arasynda iň gadymy we ähmiýetli nusgalaryň biridir. Ol diňe bir bezeg däl, eýsem, gorag manysyna hem eýedir. Gupba sözi, aslynda, gümmez, belentlik diýen ýaly manyny aňladýar. Onuň görnüşi gümmeze meňzeş bolup, asman gümmezini alamatlandyrýar. Gupba tahýanyň üstüne berkidilýär we gyzyň başyny has belent, boýuny syratly görkezýär. Gupbaly tahýany durmuşa çykmadyk gyzlar dakynypdyrlar. Gupbanyň ýüzüne, esasan, hakyk gaşlar oturdylypdyr. Ol saglygy, berkligi we gowulygy aňladypdyr. Gupba arassalygyň we durnuklylygyň nyşany bolan kümüşden ýasalýar. Gupbanyň taryhy örän gadymy döwürlere çenli uzap gidýär. Ol diňe bir zergärçilik önümi bolman, eýsem, türkmen halkynyň etnogenezi, dünýägaraýşy we harby taryhy bilen berk baglanyşyklydyr. Gadymy döwürlerde zenanlar erkekler bilen bir hatarda söweşe gatnaşypdyrlar. Şonda gupba gorag guraly bolup, urgudan gorapdyr. Wagtyň geçmegi bilen, parahatçylykly döwürde bu metal gorag serişdesinden kümüşden ýasalýan we dürli gymmat bahaly daşlar bilen bezelýän nepis şaý-sepe öwrülipdir. Arheologik gazuw-agtaryş işleri gupba meňzeş başgaplaryň nusgalarynyň günorta Türkmenistanyň çäklerinde duş gelýändigini görkezýär. Altyndepede we Nusaý ýadygärliklerinde tapylan zenan şekiljiklerinde gümmez şekilli gupba bolupdyr.

Berkarar döwletiň täze eýýamynyň Galkynyşy döwründe sagdyn durmuş ýörelgeleri, köpçülikleýin bedenterbiýe we sport durmuşymyzyň aýrylmaz bölegine öwrüldi. Ýurdumyzda ynsan bähbitlerini nazarlaýan, ilatyň eşretli durmuşda ýaşamagyna gönükdirilen işler jemgyýetde täze garaýyşlary kemala getirýär. Jemgyýetimizde sagdyn durmuş ýörelgelerini pugtalandyrmagyň özeninde halkymyzyň bagtyýarlygy we abadançylygy, beden we ruhy sagdynlygy babatda durmuşa geçirilýän tagallalar öz beýanyny tapýar. Häzirki wagtda ýurdumyzda daşky gurşawy goramak, köpçülikleýin sporty, işjeň dynç alşy ösdürmek, her bir raýatyň şahsy durmuşyna sagdyn ýaşaýyş ýörelgelerini ornaşdyrmak, ruhy-ahlak gymmatlyklaryna hormat goýmak duýgularyny terbiýelemek babatda uly işler alnyp barylýar. Milli saglygy goraýyş ulgamynda uly üstünlikleriň gazanylmagy halkara hyzmatdaşlygyň ýola goýulmagyna hem düýpli ýardam berýär. Ýurdumyzyň saglygy goraýyş ulgamynyň hyzmatdaşlarynyň hatarynda Bütindünýä Saglygy Goraýyş Guramasy, BMG-niň Ösüş maksatnamasy, Adamyň immun ýetmezçilik sindromy boýunça birleşen meýilnamasy, Çagalar gaznasy, Ilat gaznasy we beýleki guramalar bar. Türkmenistan 1992-nji ýylyň 2-nji iýulynda Bütindünýä Saglygy Goraýyş Guramasynyň agzasy boldy. Geçen döwrüň içinde ýurdumyz guramanyň ilatyň saglygyny goramak, oňa howp salýan faktorlary aradan aýyrmak, saglygy goraýyş ulgamyny halkara derejesinde ösdürmek babatda maksatnamalaryny ýerine ýetirmäge işjeň gatnaşyp gelýär. 7-nji aprelde bolsa bütindünýä jemgyýetçiligi bilen bilelikde Bütindünýä saglyk gününi belleýär. Milli senenamamyza girizilen bu baýram jemgyýetimiziň sagdynlygyny, agzybirligini, jebisligini özünde jemleýän baýram hökmünde eziz Diýarymyzda döwlet derejesinde giňden bellenilýär.

Ajaýyp döwrümizde  mähriban Watanymyz sagdynlygyň we ruhubelentligiň mekanyna öwrüldi. Ýurdumyzda ynsan saglygyny goramak, sagdyn durmuş ýörelgelerini dabaralandyrmak döwlet syýasatynyň esasy ugurlarynyň hatarynda durýar. Bu ugurda halkara hyzmatdaşlygyň hem yzygiderli ösdürilýändigi bellenilmäge mynasypdyr. Baky Bitarap döwletimiziň başlangyjy boýunça Birleşen Milletler Guramasynyň degişli Kararnamalary esasynda Bütindünýä welosiped gününiň döredilmegi hem-de welosipediň jemgyýetçilik ulaglarynyň sanawyna goşulmagy bu ugurda öňegidişlikleriň, ösüşleriň barha rowaçlanýandygynyň kepilidir. Häzirki ajaýyp döwrümizde hormatly Prezidentimiziň bimöçber aladalary netijesinde türkmen türgenleri dünýäniň uly sport ýaryşlarynda baýrakly orunlary eýelemek bilen, eziz Diýarymyzyň ýaşyl Baýdagyny al-asmanda parladýarlar.  Türkmen halkynyň Milli Lideri lukman Arkadagymyzyň ýolbaşçylygynda kabul edilen hem-de Arkadagly Gahryman Serdarymyzyň parasatly baştutanlygynda üstünlikli durmuşa geçirilýän «Saglyk» Döwlet maksatnamasynyň çäklerinde saglygy goraýyş ulgamynda beýik işler amala aşyrylýar. Bu babatda taryh üçin uly bolmadyk döwrüň içinde ýurdumyzyň ähli künjeklerinde döwrebap oba saglyk öýleriniň, merkezleriniň, etrap, şäher we welaýat merkezlerinde saglygy goraýyş anyklaýyş merkezleriniň, hassahanalaryň gurlup ulanmaga berilmegi ynsan saglygy ugrunda edilýän aladalaryň güwäsidir. Geçen ýylda Daşoguz welaýatynyň Köneürgenç etrabynyň Täze ýol geňeşliginiň çäginde dabaraly açylan Bitaraplyk şäherçesinde beýleki desgalar bilen bir hatarda, saglyk öýüniň açylyp ulanmaga berilmegi hem muňa şaýatlyk edýär. Ýurdumyzda sagdyn durmuş ýörelgelerine eýermäge we sportuň dürli görnüşleri bilen meşgullanmaga ähli şertler döredilendir. Indi däp bolup gelşi ýaly, ýylyň-ýylyna ýurdumyzda Bütindünýä saglyk güni giňden bellenip geçilýär. «Garaşsyz, baky Bitarap Türkmenistan — bedew batly at-myradyň mekany» ýylynda giň gerime eýe bolýan sport çäreleri ýurdumyzda sagdyn durmuş ýörelgelerini giňden wagyz etmekde uly ähmiýete eýedir.

Ýakynda Daşoguz welaýatynyň orta mekdepleriniň okuwçy oglan-gyzlarynyň arasynda «Sagdyn nesil — bagtyýar durmuş» ady bilen sportuň basketbol görnüşi boýunça welaýatyň birinjiligi ugrunda ýaryş geçirildi. Ony «Türkmenistan» ýaşlar bedenterbiýe-sport guramasynyň welaýat bölümi, welaýat bedenterbiýe we sport baradaky Baş müdirligi, welaýat Baş bilim müdirligi hem-de welaýat Saglygy goraýyş müdirligi bilelikde guradylar. Ýaryş Daşoguz şäherindäki daşary ýurt dillerine ýöriteleşdirilen 28-nji orta mekdebiň basketbol eýwanynda geçirildi. Çekeleşikli geçen ýaryşda oglanlaryň arasynda Daşoguz şäheriniň topary birinji, Görogly etrabynyň topary ikinji, Şabat etrabynyň topary üçünji orny eýelediler. Gyzlaryň arasynda birinji orny Daşoguz şäheriniň, ikinji orny Ruhubelent etrabynyň, üçünji orny Garaşsyzlyk etrabynyň toparlary eýelediler. Ýeňijiler «Türkmenistan» ýaşlar bedenterbiýe-sport guramasynyň welaýat bölüminiň Hormat hatlary bilen sylaglanyldy.

Ýaşuly adamlar bilen az salymlyk söhbet edeniňde hem durmuşda o diýen üns bermeýän zatlaryňa, tebigatyň ynsana eçilen barlyklarynyň gadyr-gymmatyna göz ýetirýärsiň. Galkynyşly döwrümizde oba-kendini, agtyk-çowluklaryny pähim-parasady bilen dogry ýola gönükdirýän ýaşuly nesliň wekilleri tüýs Hakyň hem, halkyň hem halaýan adamlary. Şeýle uzak ýaşly eneleriň biri Daşoguz şäheriniň ýaşaýjysy Şazada Mätýakubowadyr. Ýakynda Şazada ene ömrüniň 105-nji baharyny garşy aldy. Arzyly törüň eýesi Şazada ene özüniň ömür ýoly barada şeýle bir gyzyklandyryp gürrüň berýär welin, ony diňledigiňçe diňläsiň gelýär. Şazada enäniň 4 perzendinden 9 agtygy, 25 çowlugy bar. Bagtyýar enäniň çowluklaryndan ýuwluk görmek baradaky ýagşy dilegleri onuň ýüz-keşbine aýratyn ýakym, mähribanlyk çaýýar. Mährem enäniň töweregine düzülip oturan agtykdyr çowluklary giden obany ýada salýar. Olar Şazada enäniň daşynda kökenek gerýärler. — Şeýle bagtly günleri görmek nesibämiň bardygy üçin özümi bagtly saýýaryn. Öz ýaşlygym kyn döwre gabat gelensoň, neberelerimiň şu döwürde kemala gelýändigine diýseň buýsanýaryn. Watanymyzyň ösüşleri barada agtyk-çowluklarymdan eşidýärin. Ähli zat bol, elýeter. Ýurdumyz asuda, abadan. Munuň üçin Arkadag ogluma-da, Arkadagly Serdar ogluma-da alkyşlarym çäksiz. Ýagşy günlerde, saglyk bilen uzak ömür sürmek hemmelere nesip etsin! Biz hem mährem enä ýene-de uzak ýyllar ömür sürüp, görelde mekdebi bolup ýaşamagyny arzuw edýäris.