Berkarar döwletiň täze eýýamynyň Galkynyşy döwründe hormatly Prezidentimiziň baştutanlygynda ata Watanymyzyň tebigatyny goramakda, suw gorlaryny artdyrmakda, ene topragymyzy, giň sähralarymyzy lälezarlyga, berekediň mekanyna öwürmekde derwaýys işler durmuşa geçirilýär. Hormatly Prezidentimiz ýurdumyzda daşky gurşawy goramak, ekologiýa howpsuzlygyny üpjün etmek, ilatyň ýaşaýşy üçin arassa, sagdyn we amatly daşky gurşawy döretmek baradaky aladany döwlet syýasatynyň ileri tutulýan ugurlarynyň biri hökmünde kesgitlemek bilen, ekologiýany we tebigaty goramaklygy häzirki döwrüň möhüm meseleleriniň hatarynda goýýar. Tebigaty goramak ulgamyndaky netijeli işleriň aýdyň mysaly hökmünde Arkadagly Gahryman Serdarymyzyň taýsyz tagallalary bilen paýtagtymyzda we ýurdumyzyň welaýatlarynda ählihalk bag ekmek dabaralarynyň yzygiderli geçirilýändigini görkezmek bolar. Ekologiýa kanunçylygynda binýatlaýyn häsiýete eýe bolan «Tebigaty goramak hakynda» Türkmenistanyň Kanuny tebigaty goramagyň hukuk, ykdysady, guramaçylyk esaslaryny kesgitleýär hem-de ekologiýa howpsuzlygyny üpjün etmäge, hojalyk we beýleki işleriň tebigata, ekologiýa ulgamyna zyýanly täsiriniň öňüni almaga, biologik dürlüligi gorap saklamaga, tebigy serişdeleri rejeli peýdalanmaga gönükdirilendir. Ýurdumyzda hereket edýän «Ekologiýa howpsuzlygy hakynda» Türkmenistanyň Kanuny bolsa ýuridik hem-de fiziki şahslar tarapyndan hojalyk ýa-da beýleki işler amala aşyrylan mahalynda ekologiýa howpsuzlygy babatdaky gatnaşyklary düzgünleşdirýär, adamyň we jemgyýetiň ýaşaýşynyň möhüm bähbitlerini goraýar. «Tebigaty goramak hakynda», «Aýratyn goralýan tebigy ýerler hakynda», «Ösümlik dünýäsi hakynda», «Ekologiýa howpsuzlygy hakynda», «Ekologiýa seljermesi hakynda», «Ekologiýa auditi hakynda», «Ekologiýa maglumaty hakynda» Türkmenistanyň Kanunlary hem-de Ýer hakynda, Tokaý, Howa, Suw kodeksleri ýurdumyzda ekologiýa howpsuzlygyny üpjün etmegiň wajyp meseleleriniň çözülmeginde ýüze çykýan hukuk gatnaşyklary kadalaşdyrýar.

«Garaşsyz, baky Bitarap Türkmenistan — bedew batly at-myradyň mekany» ýylynda ata Watanymyz ägirt uly ösüşler, taryhy wakalar, döwletli tutumlar bilen öňe barýar. Berkarar döwletiň täze eýýamynyň Galkynyşy döwrüniň her bir güni milletiň ruhy galkynyşyndan, köňül joşgunyndan, parahat durmuşyndan habar berýär. Garaşsyzlyk ýyllary içinde Türkmenistan diňe bir dünýäniň syýasy kartasynda özbaşdak döwlet hökmünde kemala gelmek bilen çäklenmän, eýsem, halkara giňişliginde parahatçylygyň, dostlugyň we durnukly ösüşiň täsirli merkezine öwrüldi. Eşretli zamananyň her güni üstünliklerden, belent tutumlardan doly. Agzybir halkymyzyň ýürek buýsanjynda parahat ýaşaýyş, asuda geljek baradaky süýji arzuwlar möwç urýar. Garaşsyzlygymyzyň 35 ýyllygyna barýan günlerimizde şu geçen döwürde ýetilen sepgitler, gazanylan üstünlikler buýsançly başymyzy göge ýetirýär. Ýurdumyzyň Garaşsyzlygynyň esaslary, Bitaraplyk ýörelgeleri yzygiderli pugtalandyrylýar. Täzeçil başlangyçlar öňe sürülýär. Ýurdumyzy durmuş-ykdysady taýdan ösdürmek ugrunda oňyn özgertmeleri durmuşa geçirmegiň anyk ýollary kesgitlenýär. Döwletlilik, demokratik ýörelgeler ilerledilýär. Sebitde we dünýäde parahatçylygy, dost-doganlygy, netijeli hyzmatdaşlygy, ösüşi üpjün etmek işine uly goşant goşulýar. Dünýä ýüzünde halkymyzyň we ýurdumyzyň abraý-mertebesi belende göterilýär. Netijede, ata Watanymyz belent tutumlary bilen taryhy döwürde täze belentliklere tarap ynamly öňe barýar. Gurmak we döretmek asyrlardan gözbaş alyp gaýdan türkmen ruhunyň sarsmaz sütünidir. Pederlerimizden miras galan «At-myrat», «At agynan ýerde toý bolar», «Aty baryň ganaty bar» ýaly pähim-paýhaslar bu günki belent tutumlarymyzyň we döredijiligimiziň ruhy badydyr. «Garaşsyz, baky Bitarap Türkmenistan — bedew batly at-myradyň mekany» diýlip yglan edilen ýylda gazanýan her bir üstünligimiz türkmen bedewiniň okgunlylygy we täsin gözelligi bilen utgaşyp, dünýä ýaň salýar. Bu gün ýurdumyzyň çar künjeginde gurlup ulanmaga berilýän zawod-fabrikler, häzirki zaman önümçilik toplumlary milli ykdysadyýetimiziň diwersifikasiýa ýoly bilen ösýändiginiň aýdyň mysalydyr. Durmuşa geçirilýän her bir taslamanyň özeninde maksatly ýörelgeler öz beýanyny tapýar. Halkymyzyň hal-ýagdaýynyň yzygiderli ýokarlanmagy, ýurdumyzda täze obalaryň, şäherçeleriň, sanly ulgam bilen enjamlaşdyrylan döwrebap ýaşaýyş şertleriniň döredilmegi mukaddes Garaşsyzlygymyzyň datly miweleridir. Ýurdumyzda maksatnamalaýyn çäreler üstünlikli durmuşa geçirilýär. Jemi içerki önümiň durnukly ösüşi üpjün edilýär. Senagatda, gurluşykda, ulag we aragatnaşykda, söwdada, oba hojalygynda, hyzmatlar ulgamynda gazanylan netijeler röwşen geljege ynam döredýär. Ykdysadyýetiň pudaklarynda kadaly önümçilik netijeleri gazanylýar. Ata Watanymyzyň görküne görk goşýan önümçilik desgalary, medeni-durmuş maksatly binalar, döwrebap ýollar, ýerüsti hem ýerasty geçelgeler il-ulsumyzyň eşretli durmuşyna, rahat ýaşaýşyna gönükdirilýär. Eziz Diýarymyzdan dünýä uzaýan halkara howa gatnawlary, demir ýollar, gara ýollar dost-doganlygyň menzilleridir. «Garaşsyz, baky Bitarap Türkmenistan — bedew batly at-myradyň mekany» ýyly has tutumly wezipeleri öňde goýýar. Ýurdumyzda döwlet maksatnamalaryna we meýilnamalaryna laýyklykda, ulanmaga beriljek ýaşaýyş jaýlarynyň umumy meýdanyny 900 müň inedördül metrden hem geçirmek göz öňünde tutulýar. Bu bolsa durmuş üpjünçilik ulgamynyň geriminiň has-da giňelýändigini tassyklaýar. Şeýle hem ýaş nesliň döwrebap bilim almagy üçin 3 müň 380 orunlyk mekdepleriň we 1 müň 80 orunlyk çagalar baglarynyň gurluşygynyň hakykaty hormatly Prezidentimiziň «Watan diňe halky bilen Watandyr! Döwlet diňe halky bilen döwletdir!» diýen şygarynyň iş ýüzünde üstünlikli durmuşa geçýändiginiň aýdyň mysallarydyr. Mukaddes Garaşsyzlygymyzyň şanly 35 ýyllyk baýramy bilen utgaşýan bu maksatnamalar we meýilnamalar okgunly ösüşleriň sazlaşyklylygyny üpjün edip, ata Watanymyzyň halkara abraýyny täze belentliklere göterýär. Garaşsyzlygymyzyň 35 ýyllyk şanly toýuna barýan günlerimizde daşary syýasatda köp taraplaýyn hyzmatdaşlyga aýratyn üns berilmeginde Garaşsyzlygymyzyň, hemişelik Bitaraplygymyzyň uly ähmiýetiniň bardygyny aýratyn bellemelidiris. «Bitarap Türkmenistanyň daşary syýasat ugrunyň 2022 — 2028-nji ýyllar üçin Konsepsiýasy» yzygiderli durmuşa geçirilýär, ikitaraplaýyn we köptaraplaýyn görnüşde, abraýly sebit, halkara guramalaryň çäklerinde netijeli hyzmatdaşlyk ösdürilýär. Bitarap Türkmenistan dünýäde parahatçylygy, durnuklylygy, ösüşi pugtalandyrmaga uly goşant goşýan ygtybarly hyzmatdaş ýurt hökmünde tanalýar. Döwletimiziň Bitaraplyk syýasaty onuň içerki gurluşynyň berk ahlak sütünlerine daýanýar. Çünki hormatly Prezidentimiz halkyň bähbidine bitirýän ähli beýik işlerinde milli ýörelgelere esaslanýar. Halka daýanyp, halkyň bähbidine beýik işleri amala aşyrýan Arkadagly Gahryman Serdarymyzyň tagallalary esasynda bu günki gün Garaşsyz, hemişelik Bitarap Watanymyz dünýäniň iň ösen döwletleri bilen deňhukukly hyzmatdaşlygy has-da giňeltmek ugrunda örän ähmiýetli işleri alyp barýar. Hormatly Prezidentimiziň baştutanlygynda ýurdumyzyň ählumumy parahatçylyk babatda belent maksadynyň myrat tapmagy ugrundaky ählumumy hereketiň öň hatarlarynda orun alýandygy halkymyzy buýsandyrýar.

Ýakynda paýtagtymyzda geçirilen «Hyzmatdaşlyk we ösüş» atly halkara sergi ýurdumyzyň ykdysady kuwwatyny görkezmek bilen bir hatarda, daşary ýurtly hyzmatdaşlar bilen gatnaşyklary berkitmekde täze gözýetimleri açýar. Bu giň gerimli forum Türkmenistanyň dünýäniň ykdysady giňişligine işjeň goşulýandygynyň aýdyň subutnamasydyr. Sergi meýdanlarynda ýurdumyzyň halk hojalygynyň dürli pudaklarynda — senagatda, oba hojalygynda, gurluşykda, energetikada we tehnologiýalar ulgamynda gazanylan üstünlikler giňden şöhlelendirildi. Sergä dünýäniň onlarça döwletinden öňdebaryjy kompaniýalar, halkara guramalaryň wekilleri we telekeçileri gatnaşdylar. Onda sanly ykdysadyýete geçmek ugrunda alnyp barylýan işler, «akylly» tehnologiýalaryň önümçilige ornaşdyrylyşy, ýurdumyzda öndürilýän gurluşyk önümleriniň nusgalary, iri taslamalar, önüm öndürijileriň dünýä bazaryna çykaryp biljek bäsdeşlige ukyply önümleri, bilim, saglygy goraýyş we syýahatçylyk ulgamynda hyzmatdaşlygyň geljegi öz beýanyny tapdy. Serginiň çäklerinde geçirilen duşuşyklar, biznes-forumlar bu ugurlarda geljegi uly ilerlemelere ýol açýar. Bu bolsa diňe bir ykdysady taýdan bähbitli bolman, eýsem, halklaryň arasyndaky dostlukly gatnaşyklaryň hem berkemegine hyzmat eder. Bu sergi hormatly Prezidentimiziň öňdengörüjilikli döwlet syýasatynyň netijesinde ýurdumyzyň durnukly ösüşini we halkara abraýynyň artýandygyny nobatdaky gezek tassyklady.

Türkmen halkynyň köpasyrlyk taryhy diňe bir edebiýat we medeniýet bilen däl, eýsem, bedenterbiýe, sport däpleri bilen hem berk baglanyşyklydyr. Gadymy döwürlerden bäri sport türkmen durmuşynyň aýrylmaz bölegi bolup, pälwanlaryň edermenligini, çapyksuwarlaryň ussatlygyny, ýigitleriň çalasynlygyny kämilleşdiripdir. Milli sport oýunlary öz köküni müňýyllyklaryň jümmüşinden alyp gaýdýar. Halkymyzyň kemala gelmeginde we goranmak ukybynyň artmagynda sport oýunlarynyň, ýaryşlarynyň ähmiýeti örän uly bolupdyr. Gadymy sport görnüşleri, köplenç, toý-baýramlaryň, dabaralaryň bezegi bolup, halkyň agzybirligini we ruhubelentligini şöhlelendiripdir. Göreş — türkmen milli sportunyň iň gadymy we iň meşhur görnüşi. Ol pälwanlaryň güýjüni, ukybyny, durnuklylygyny synamaga mümkinçilik berýär. Göreşde pälwanlar guşakdan tutup, tutluşýarlar. Şonda esasy maksat garşydaşyňy ýykyp, onuň ýagyrnysyny ýere degirmekdir. Göreş diňe bir fiziki güýji taplaman, eýsem, mertlik, garşydaşyňa sarpa goýmak ýaly asylly häsiýetleri hem terbiýeleýär. At çapyşygy — gadymy däpleriň biri bolup, ol bedewiň ýyndamlygyny we çapyksuwaryň ussatlygyny görkezýär. Çowgan oýny  — häzirki zaman «atly polo» oýnunyň gadymy görnüşidir. Bu oýunda atlylar ýörite taýaklar bilen topy garşydaşynyň derwezesine salmaga çalyşýarlar. Çilik — hekgal oýny kiçijik taýajygy (çiligi) uly taýak bilen urup oýnaýarlar. Bu oýun çalasynlygy, tijenmegi we strategik pikirlenmegi ösdürýär. Ýaglyga towusmak — esasan, toýlarda we dabaralarda geçirilýär. Ol belent agaçdan asylan ýaglygy (dürli sowgatlary) böküp almak bäsleşigidir. Düzzüm — akyl-paýhasy, pikirlenmegi ösdürýän gadymy sport oýnudyr. Nyşana atyşmak — mergenlik sungatyny kämilleşdirmekde örän ähmiýetlidir. Arkan çekişme — toparlaýyn güýç we agzybirlik synagydyr. Türkmen milli sportunyň gadymy görnüşleri diňe bir güýmenje däl, eýsem, halkyň taryhy ýoly, harby sungaty we terbiýeçilik mekdebidir. Häzirki wagtda Türkmenistanda bu gadymy däpler täzeçe öwüşgin alyp, döwrebap sport desgalarynda we halkara ýaryşlarda dowam etdirilýär. Milli göreş sungaty bolsa halkara sport derejesine çykarylyp, dünýäniň dürli künjeklerinde uly gyzyklanma döredýär. Milli sportumyzy ösdürmek geljekki nesillere ruhy we fiziki sagdynlygy miras galdyrmakdyr.

Berkarar döwletiň täze eýýamynyň Galkynyşy döwri ýurdumyzyň dürli ugurlarynda gazanylýan üstünlikleriň, ýetilýän belent sepgitleriň netijesinde barha rowaçlanýar. Ähli ösüş-özgertmeleriň gözbaşynda adam hakdaky aladalar öz beýanyny tapýar. Şeýle bolansoň, jemgyýetde sazlaşykly we durnukly ýagdaýyň emele gelmegi gazanylýar. Özleri hakdaky yzygider aladalara mynasyp iş bilen jogap berýän agzybir halkymyz her bir tutumyň netijeli bolmagy ugrunda işjeňlik görkezip, oňa mynasyp goşantlaryny goşýar. Bu işlerde ýurdumyzyň mähriban zenanlarynyň hem tagallalarynyň uludygyny aýratyn belläp geçmek ýerliklidir. Zenanlar diňe bir maşgala ojagynyň eýesi bolman, eýsem, olar nesil terbiýeleýjiler hökmünde hem arzylydyrlar. Ata Watanymyza, mähriban halkymyza wepaly, ilhalar, arassa ahlakly, kämil nesli terbiýeläp ýetişdirmek bilen bir hatarda, olar jemgyýetçilik durmuşynda hem işjeň orun eýeleýärler. Dürli pudaklarda yhlasly hem önjeýli zähmet çekmek bilen, göreldäniň ajaýyp nusgasyny görkezýärler. Zenanlaryň döwrümizi beýgeltmekdäki mynasyp goşantlary döwlet tarapyndan hem uly üns merkezinde saklanýar. Olar üçin döredilýän giň şertler we mümkinçilikler, durmuş ýeňillikleri zenanlaryň ornuny has-da pugtalandyrýar we halkymyzyň gadymdan gelýän gymmatly ýörelgeleriniň mynasyp derejede dowam etdirilýändiginiň beýanyna öwrülýär. Ýurdumyzda zenanlaryň hukuklaryny üpjün etmek babatda alnyp barylýan işler hem olaryň durmuşyna nuranalyk eçilýär. Hormatly Prezidentimiziň berýän maslahatlaryndan we öňde goýýan wezipelerinden ugur alnyp, Türkmenistanyň Mejlisi tarapyndan giň gerimli işler durmuşa geçirilýär. Kabul edilen kanunlarda we kadalaşdyryjy hukuk namalarynda zenanlaryň durmuş abadançylygyny pugtalandyrýan kadalar öz beýanyny tapýar. Türkmenistanyň Ilaty durmuş taýdan goramak hakynda kodeksi, Maşgala kodeksi, «Aýallaryň we erkekleriň deň hukuklarynyň, deň mümkinçilikleriniň üpjün edilmeginiň döwlet kepillikleri hakynda», «Türkmenistanyň «Ene mähri» diýen hormatly adyny döretmek hakynda» Türkmenistanyň Kanunlary maşgala gatnaşyklaryny goramagyň, her bir maşgalanyň binýadyny pugtalandyrmagyň, zenanlaryň durmuş işjeňligini artdyrmagyň kadalaryny özünde jemleýär. Ýurdumyzyň Garaşsyzlygynyň we baky Bitaraplygynyň gymmatyny halk köpçüliginiň arasynda giňden wagyz etmekde, ösüp barýan ýaş nesle nusgalyk görelde görkezmekde bitirýän hyzmatlary, köpýyllyk iş tejribesi göz öňünde tutulyp, mährem eneleriň köp sanlysynyň her ýyl «Zenan kalby» ordeni bilen sylaglanmagy, zähmetde tapawutlanan zenanlaryň uly toparyna döwlet sylaglarynyň, her ýyl Halkara zenanlar güni mynasybetli körpeje gyzjagazlardan başlap, kümüş saçly enelere çenli pul sylaglarynyň gowşurylmagy zenanlaryň döwlet durmuşyndaky çuňňur ornunyň uly hormat bilen sarpalanýandygyny, mertebeleriniň belende göterilýändigini doly açyp görkezýär. Bu sazlaşyk mähriban zenanlaryň döwre gatnaşygyny has-da pugtalandyrýar, olary yhlasy hem tutanýerli zähmetleri bilen her bir ajaýyp tutuma mynasyp goşantlaryny goşmaga ruhlandyrýar.

Şu ýylyň «Garaşsyz, baky Bitarap Türkmenistan — bedew batly at-myradyň mekany» ýyly diýlip yglan edilmegi döwlet derejesinde ösüşleriň ak ýolunyň, maksada okgunlylygyň nyşanyna öwrülen türkmen bedewleriniň gözelligine, ýyndamlygyna goýulýan uly hormatyň alamatydyr. 2023-nji ýylda «Ahalteke atçylyk sungaty we atlary bezemek däpleri» ÝUNESKO-nyň adamzadyň maddy däl medeni mirasynyň görnükli nusgalarynyň sanawyna hem girizildi. 2007-nji ýylda häzirki wagta çenli ençeme halkara baýraklaryna mynasyp bolan «Galkynyş» milli at üstündäki oýunlar topary döredildi. 2009-njy ýyldan başlap, iň owadan ahalteke atlarynyň arasynda her ýyl «Gözellik bäsleşiginiň» geçirilmegi halkymyzyň buýsanjyny artdyrýar. 2011-nji ýylyň 24-nji aprelinde Türkmen bedewiniň milli baýramynda uly dabara bilen Balkan, Daşoguz, Mary we Lebap welaýatlarynda gurlan häzirkizaman atçylyk sport toplumlarynyň, şol ýylyň 29-njy oktýabrynda Köpetdagyň eteginde bina edilen, meýdany 100 gektara golaýlaýan Halkara atçylyk sport toplumynyň täze binalaryny ulanmaga ak pata berildi. Ýurdumyzda atçylygy we atçylyk sportuny ösdürmegiň hukuk, ykdysady we guramaçylyk esaslaryny, berkitmek, nesil çeşmesini gorap saklamak, atlary ösdürip ýetişdirmekde, köpeltmekde ýüze çykýan meseleleri düzgünleşdirmek maksady bilen, «Weterinariýa işi hakynda», «Haýwanat dünýäsi hakynda», ,«Sirk we sirk sungaty hakynda», «Atçylyk we atly sport hakynda» we beýleki kadalaşdyryjy resminamalaryň, kanunlaryň birnäçesiniň kabul edilmegi türkmen bedewleriniň şöhratyny, gymmatyny hukuk taýdan arşa galdyrýar. «Atlaryň döwlet tohumçylyk kitabynyň» neşirlerinde soňky 125 ýyla golaý döwrüň içinde halkara, milli çapuw ýodalarynda dürli aralyklarda birinjiligi eýeleýän, aýlawlary ýeňiş bilen baglan, saýlantgy bedewleriň 200-e golaýynyň atlarynyň, ykballarynyň, olary seýisläp ýetişdiren ussatlaryň köptaraply zähmetleriniň beýan edilmegi aýratyn guwandyryjydyr. 2023-nji ýylda Aba Annaýew adyndaky Halkara atçylyk akademiýasynyň, Görogly adyndaky Döwlet atçylyk sirkiniň döredilmegi türkmen halk seçgisi arkaly köp asyrlaryň dowamynda döredilen arassa ganly tohum atlary köpeltmek, ösdürip ýetişdirmek, atly sportuň dürli görnüşleri, weterinar lukmanlary, atçylyk hünärleri boýunça ýokary bilimli hünärmenleri taýýarlamak, atçylyk pudagyna degişli ylmy işleri alyp barmak we önümçilige ornaşdyrmak işleriniň döwrebaplaşmagyna, kämilleşmegine uly badalgalary berdi. Atşynas hünärmenleriň mertebesine sarpa goýmak, abraýyny belende galdyrmak maksady bilen, atçylygy ösdürmekde ýokary netijeliligi gazanan seýislere her ýyl «Türkmenistanyň at gazanan atşynasy», «Türkmenistanyň ussat halypa çapyksuwary», «Türkmenistanyň ussat halypa seýsi», «Türkmenistanyň halk atşynasy» diýen hormatly atlaryň dakylmagy, döwlet sylaglarynyň gowşurylmagy halkara jemgyýetçiliginde hem gyzgyn goldaw tapýar. Gahryman Arkadagymyzyň jöwher paýhasyndan dörän «Ahalteke bedewi — biziň buýsanjymyz we şöhratymyz»,  «Gadamy batly bedew», «Atda wepa–da bar, sapa-da», «Mertler Watany beýgeldýär», «Döwlet guşy» atly eserlerinde türkmen atlary barada ajaýyp çeper tymsallaryň, taryhy hakykatlaryň, täze ylmy gözýetimleriň, täsin, gyzykly maglumatlaryň beýan edilmegi, ýylymyzyň nyşanynda owadan, ýyndam bedew atyň keşbiniň orun almagy her birimiziň göwnümizi ganatlandyrýar.

Türkmen halky hemişe ylma, bilime, kitaba aýratyn sarpa goýup gelipdir. Hakykatdan hem adama gymmatly baýraklaryň dördüsi — iman, akyl, ylym we sahawatlylyk sowgat berlenmiş. Bular ynsan tebigatynyň bezegi saýylýar. Akyldar şahyrymyz Magtymguly Pyragy: «Alymlara uýsaň, açylar gözüň» diýip, örän jaýdar belläp geçýär. Gahryman Arkadagymyz «Güýçli döwletde ylym esasy orny eýeleýär» diýip nygtaýar. Halkyň ruhy mirasynda «Bilegi güýçli birini ýykar, bilimi güýçli müňüni», «Ylym — bagtyň çyragy» diýen çuňňur paýhasly jümleler bar. Ylym halk hazynasynyň nurly aýnasy bolup ýalkym saçýar. Asyrlar aşýar, ylmy pikirler, özgerişler, gazanyşlar has kämil esasda döwrüň ilerlemeleriniň badalgasyna öwrülýär. Ylym-bilim, edebiýat we sungat adamlary biri-birine ýakynlaşdyrýan, biri-birine mähriban edýän, nesillerde iň oňat häsiýetleri döredýän, iň ajaýyp duýgulary oýarýan güýçdür. Ylym giňişliginde abraý alan danalaryň ady hemişe ýatlanylýar. Bu babatda söz ussady Nyzamy Genjewi: «Hünär öwren, çünki hünärdäki syr ýapyk gapylary açar birme-bir» diýse, Rudaky: «Adamyň aklynyň çyragy — bilim, //Beladan saklaýan ýaragy — bilim» diýip belläpdir. Akyldar Magtymguly Pyragyny terbiýeläp ýetişdiren Döwletmämmet Azady: «Älem-jahanda Günüň, Ýeriň, suwuň, oduň zerurlygy ýaly, adamzat durmuşynda-da ylym derwaýysdyr» diýipdir. «Ömrümiň manysynyň dowamaty» atly kitabynda «Terbiýe iň gymmatly baýlykdyr, bilim we ylym bolsa terbiýäniň sütünidir» diýip belleýän Gahryman Arkadagymyzyň nesil terbiýesindäki nusgalyk ýoluna eýerip, Watana wepaly ýaşlary terbiýelemekde döwrebap ýörelgelerden ugur almak bilen, talabalaýyk zähmet çekmek her bir bilim işgäriniň, şol sanda çaga terbiýesi bilen meşgullanýanlaryň mukaddes borjudyr.

Ynsanperwerlik ýörelgeleri halkymyzyň müňýyllyklaryň dowamynda kemala getiren iň belent ruhy gymmatlyklarynyň biridir. Bu ugurda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy eýýam bäş ýyldan bäri netijeli işläp gelýär. 2021-nji ýylyň 29-njy martynda döredilen bu gazna gysga wagtyň içinde onlarça ojaklara umyt, mähir, nur çaýdy. Gaznanyň esasy maksady howandarlyga mätäç çagalaryň saglygyny dikeltmek, olaryň döwrebap bilim almagyna, jemgyýetde ornuny tapmagyna ýardam bermek bolup durýar. Bu bäş ýyllyk menzil diňe bir sanlaryň däl, eýsem, halas edilen ömürleriň ýyl ýazgysydyr. Geçen bäş ýylyň içinde gaznanyň hasabyna çagalaryň ýürek-damar, süňk-bogun kemçiliklerini we beýleki agyr kesellerini bejermek boýunça 200-den gowrak çylşyrymly operasiýalar amala aşyryldy. Ýurdumyzyň ähli welaýatlaryndaky çagalar hassahanalaryna gaznanyň adyndan döwrebap enjamlaşdyrylan «Tiz kömek» awtoulaglary yzygiderli gowşuryldy. Gazna özüniň ynsanperwer işleri bilen halkara ykrarnama eýe boldy. Onuň ynsanperwer asylly işleri dünýäniň iri guramalary tarapyndan nusgalyk hökmünde bellenilýär. Howandarlyga mätäç çagalara kömek bermek boýunça haýyr-sahawat gaznasy diňe bir operasiýalary maliýeleşdirmän, eýsem, çagalar hassahanalarynyň iň täze lukmançylyk sarp ediş serişdeleri bilen üpjün edilmegine hem uly goşant goşýar. Arkadag şäherinde Çagalar sagaldyş-dikeldiş merkeziniň döredilmegi bu ugurda gazanylan iň belent sepgitleriň biridir. Gaznanyň bank hasaplaryna döwlet tarapyndan we meýletin raýatlar, kärhanalar tarapyndan yzygiderli geçýän serişdeler her bir çaganyň döwletimiziň üns merkezindediginiň subutnamasydyr. Häzirki wagtda bu gazna öz mähir we howandarlyk gurşawyny giňeldýär. Sebäbi çagalar biziň kalbymyzyň buýsanjy, geljegimiziň eýeleridir. Olaryň gülküsinde bolsa parahatçylygyň we rowaçlygyň täze sahypalary ýazylýar.

Daşoguz welaýat medeniýet müdirliginiň, «Daşoguz habarlary» gazetiniň, Türkmenistanyň Agrar partiýasynyň Daşoguz welaýat komitetiniň bilelikde guramagynda welaýat kitaphanasynyň eýwanynda «Ýylymyzyň şygary — ruhubelentligiň we ösüşiň gözbaşy» atly söhbetdeşlik geçirildi. Oňa welaýat kitaphanasynyň işgärleri hem gatnaşdylar. Söhbetdeşlikde welaýat kitaphanasynyň direktory Ogulhan Mätdurdyýewa, «Daşoguz habarlary» gazetiniň döredijilik işgärleri Gözel Seýidowa, Zebo Babajanowa, TAP-nyň Daşoguz şäher komitetiniň esasy hünärmeni Gurbangül Baýramkulyýewa we beýlekiler çykyş etdiler. Olar çykyşlarynda mukaddes Garaşsyzlygymyzyň şanly 35 ýyllygynyň uludan toýlanyljak  ýylyna «Garaşsyz, baky Bitarap Türkmenistan — bedew batly at-myradyň mekany» diýlip at berilmeginiň aýratyn çuň many-mazmuna eýedigini hem-de ata Watanymyzda bedew batly ösüşleriň, özgerişleriň gazanylýandygyny, halkymyzyň bagtyýar, abadan durmuşda ýaşamagy ugrunda uly işleriň durmuşa geçirilýändigini uly buýsanç bilen nygtadylar.

«Daşoguz» şypahanasynyň öňündäki meýdançada geçirilen aýdym-sazly dabara ýokary ruhubelentlige beslendi. Daşoguz welaýat häkimliginiň, welaýat saglygy goraýyş, medeniýet müdirlikleriniň bilelikde guramagynda geçirilen aýdym-sazly dabara jemgyýetçilik guramalarynyň ýolbaşçylary, ýaşuly nesliň wekilleri, saglygy goraýyş ulgamynyň işgärleri gatnaşdylar. Dabarada çykyş edenler ajaýyp döwrümizde milli saglygy goraýyş ulgamynda durmuşa geçirilýän uly işler, halkyň saglygy hakynda edilýän bimöçber aladalar hem-de bu ulgamda gazanylýan üstünlikler barada uly buýsanç bilen belläp geçdiler. Dabaranyň dowamynda saglygy goraýyş ulgamynyň göreldeli zähmet çekýän işgärlerine welaýat saglygy goraýyş müdirliginiň Hormat hatlary we saglygy goraýyş işgärleriniň KA-nyň Daşoguz şäher geňeşiniň sowgatlary gowşuryldy. Soňra köňülleri joşa getiren aýdym-sazly çykyşlara giň orun berildi.