Golaýda Daşoguz şäher häkimliginiň Türkmenistanyň Senagatçylar we telekeçiler partiýasynyň Daşoguz welaýat, Daşoguz şäher komitetleriniň, medeniýet merkeziniň bilelikde guramagynda «Arkadagly Gahryman Serdarymyzyň döwlet ähmiýetli başlangyçlary: bagtyýar durmuş we durnukly ösüş ugrunda» atly dabaraly maslahat geçirildi. Daşoguz şäher häkimliginiň mejlisler eýwanynda bolan maslahata saglygy goraýyş, medeniýet ulgamlarynyň işgärleri gatnaşyp, onda çykyş edenler Berkarar döwletiň täze eýýamynyň Galkynyşy döwründe Garaşsyz, baky Bitarap ýurdumyzyň ähli pudaklarynda, şol sanda saglygy goraýyşda, medeniýetde, sportda uly işleriň amala aşyrylýandygy, olaryň halkymyzyň bagtyýar durmuşda ýaşamagyna, dürli ugurlarda uly üstünlikleriň gazanylmagyna şert döredýändigi guwanç bilen bellenildi. Maslahatyň ahyrynda Daşoguz şäher medeniýet merkeziniň ýaşlar toparynyň agzalary aýdym-sazlary ýerine ýetirdiler.

Türkmen bedewiniň milli baýramy mynasybetli geçen ýekşenbe güni Daşoguz atçylyk sport toplumynda toý dabarasy hem-de at çapyşyklary guraldy. Şol gün bu ýere welaýatyň döwlet we jemgyýetçilik guramalarynyň wekilleri, il sylagly ýaşulularyň, ýaşlaryň, bedew janköýerleriniň köp sanlysy ýygnandy. Olar halkymyzyň milli gymmatlyklarynyň, bedewleriň keşbini şekillendirýän suratlaryň, bezeg şaý-sepleriniň sergilerine syn etdiler. Zehinli aýdymçylaryň, tansçylaryň çykyşlary dabara özboluşly öwüşginleri çaýyp, hemmeleriň ruhuny belende göterdi. Şeýle ýakymly pursatlar soňra toplumyň aýlawynda badalga berlen at çapyşyklary bilen utgaşyp, olara dabara gatnaşyjylar uly höwes bilen tomaşa etdiler. Bedew janköýerleriniň şatlyk-şowhunynyň, el çarpyşmalarynyň goldawy bilen dowam eden at çapyşyklarynda iň ýyndam, çalasyn bedewler ýeňiji boldular. Aýlawyň 1200 metr aralyga geçirilen birinji at çapyşygyna 6 sany at goşuldy. Onda G.Hudaýbergenowyň eýeçiligindäki, A.Garýagdyýewiň seýislän, A.Jumaýewiň çapan Garagunan diýen aty 1-nji orna mynasyp boldy. Ikinji at çapyşygy-da şol aralyk boýunça guralyp, oňa gatnaşan bedewler hem öz ýyndamlyklaryny görkezmegi başardylar. Şunlukda bu bäsleşikde 1-nji orun Ş.Satybaldyýewiň eýeçiligindäki, P.Baýrambaýewiň seýislän, M.Geldiýewiň çapan Atylar diýen dor atyna degişli boldy. Üçünji çapyşykda güýç synanyşmaly aralyk 1800 metre deň bolup, oňa 7 sany bedew goşuldy. Çapyşygyň ahyrynda G.Hudaýbergenowyň eýeçiligindäki, A.Garýagdyýewiň seýislän, A.Jumaýewiň çapan Abadan diýen aty 1-nji bolup pellehanadan geçdi. Bu çapyşyk iň köp atlaryň gatnaşan hem-de örän dartgynly dowam eden aýlawlaryň biri boldy. Dördünji çapyşyga has köp, ýagny 9 sany bedew goşulyp, onda-da aralyk 1800 metrden ybarat boldy. Onuň dowamynda atlaryň orun çalşyp, tomaşaçylary heýjana salan gezekleri az bolmady. Ahyrky netijede T.Ýegşemowyň eýeçiligindäki hem-de onuň özüniň seýislän, B.Çäşemowyň çapan Germaw atly al aty pellehanadan beýlekilerden has öň geçip, 1-nji orna eýe boldy. Dört we uly ýaşar atlar üçin guralan ahyrky  — bäşinji çapyşykda bellenilen aralyk 2 müň metrden ybarat bolup, oňa gatnaşan bedewleriň bäsleşigi boýdan-başa tomaşaçylaryň ünsüni özüne çekdi. Çünki oňa goşulan bedewleriň ählisi diýen ýaly ozal uly baýraklary alyp ýören bedewler bolup çykdy. Şoňa görä-de bedew janköýerlerine aýratyn joşgun beren bu bäsleşikde ýeňijileriň arasynda doly sekunt tapawudy hem bolmady. Şeýlelikde N.Kerimowyň hojalygyna degişli, W.Ýagşybaýewiň seýislän, K.Polaýewiň çapan Süleýmanly diýen dor aty birinji bolup pellehanadan geçdi. Münberi dolduryp oturan tomaşaçylar ony mähirli elçarpyşmalar bilen alkyşladylar. At çapyşyklarynyň ahyrynda olarda ýeňiji bolan bedewlere serpaýlar, çapyksuwarlara gymmat bahaly baýraklar gowşuryldy. Bu olaryň baýramçylyk çäresi hemmelerde ýakymly täsirleri galdyrdy.

Garaşsyz ýurdumyzyň mekdep okuwçylaryndan düzülen ýaş ýangyn söndürijiler toparlarynyň arasynda Türkmenistanyň Içeri işler hem-de Bilim ministrlikleriniň yglan eden bäsleşiginiň döwlet tapgyry geçirildi. Daşoguz şäherindäki «Garaşsyzlyk» sport desgasynda guralan jemleýji tapgyra ozal Aşgabat, Arkadag şäherleriniň, welaýatlaryň derejesindäki bäsleşiklerde üstün çykan toparlar gatnaşdylar. Mälim bolşy ýaly, bu bäsleşik birnäçe ýyl bäri mekdep okuwçylarynyň ýangynyň öňüni alyş çärelerini, ýüze çykan halatynda onuň garşysyna göreşmek babatda zerur ukyp-başarnyklary, ýangynyň çalt öçürilmeginiň tärlerini içgin öwrenmeklerine, sagdyn, berk bedenli bolmaklaryna ýardam bermek maksadynda geçirilip gelinýär. Şeýlelikde, şu gezekki bäsleşigiň döwlet tapgyryna gatnaşan toparlaryň agzalary hem bu babatda örän taýýarlykly bolup, onuň dowamynda öz erjelliklerini, ugurtapyjylyklaryny görkezmäge çalyşdylar. Olar şonda bäsleşigiň şertlerine görä, päsgelçilikli 100 metr, şeýle hem päsgelçilikli 400 metr aralyga estafeta görnüşinde ylgamak, şol aralyklarda bellenen hereketleri ýerine ýetirmek boýunça özara güýç synanyşdylar. Toparlaryň agzalarynyň çalasynlygyna, hereketleriniň dürslügine ýörite eminler anyk baha berdiler. Bäsleşikleriň barşynda ähli görkezijileri hasaba alan eminler toparynyň gelen netijelerine görä, 1-nji orna Daşoguz şäherindäki 24-nji orta mekdebiň, 2-nji orna Ahal welaýatynyň Babadaýhan etrabyndaky 18-nji orta mekdebiň, 3-nji orna hem Mary welaýatynyň Sakarçäge etrabyndaky 17-nji orta mekdebiň ýaş ýangyn söndürijiler toparlary mynasyp boldular. Ýeňijilere Türkmenistanyň Ýangyn amaly-sport Federasiýasynyň göçme Kubogy, degişli derejedäki medallar, şonuň ýaly-da jemgyýetçilik guramalarynyň gymmat bahaly sowgatlary gowşuryldy.

Şeýle at bilen ýakynda Daşoguz welaýat medeniýet müdirligi, Daşoguz welaýat Baş bilim müdirligi hem-de Türkmenistanyň Magtymguly adyndaky Ýaşlar guramasynyň Daşoguz welaýat geňeşiniň we Daşoguz welaýat kitaphanasynyň bilelikde guramagynda mekdep okuwçylarynyň arasynda bäsleşik geçirildi. Ilki bilen, bäsleşige gatnaşyjylar Türkmen bedewiniň milli baýramy mynasybetli, welaýat kitaphanasynyň bölümlerinde guralan «Bedew atym  — ganatym» , «Garaşsyzlykdan galkynan bedewler», «Bedew at ýigidi ýetir myrada» atly sergiler bilen içgin tanyşdylar. Soňra kitaphananyň ülkäni öwreniş we düşündiriş, sorag-jogap bölüminiň okalga zalynda okuwçylar bäsleşigiň şertlerine laýyklykda, özleriniň ukyp-başarnyklaryny görkezdiler. Bäsleşige gatnaşanlar Gahryman Arkadagymyzyň eserlerinde bedewleriň aýratynlygy barada beýan edilýän gyzyldan gymmatly maglumatlary açyp görkezdiler. Bedewlere bolan söýgini, sarpany, olaryň şan-şöhratyny dünýä ýaýmak baradaky aladany döwlet derejesinde ileri tutulýan ugra öwren Gahryman Arkadagymyza we Arkadagly Gahryman Serdarymyza alkyşly sözleri beýan etdiler. Milli buýsanjymyz hasaplanýan ganatly bedewler baradaky çykyşlar eminler topary tarapyndan adalatly bahalandyryldy. Bäsleşigiň jemleri boýunça Daşoguz şäherindäki daşary ýurt dillerine ýöriteleşdirilen 28-nji orta mekdebiň 12-nji synp okuwçysy Gurbanbibi Orazowa 1-nji orna, ýaş fizikleriň we matematikleriň ýöriteleşdirilen 21-nji orta mekdebiniň 11-nji synp okuwçysy Leýli Nazarmedowa 2-nji orna, daşary ýurt dillerine ýöriteleşdirilen 24-nji orta mekdebiň 12-nji synp okuwçysy Leýli Balnyýazowa 3-nji orna mynasyp boldular. Ýeňijiler bäsleşigi guraýjylaryň Hormat hatlarydyr ýadygärlik sowgatlary bilen sylaglanyldy.

Kesellerden goranmagyň ygtybarly usuly Garaşsyz, baky Bitarap Türkmenistan döwletimizde keselleriň öňüni alyş sanjymlarynyň bellenen tertibe laýyklykda geçirilmeginiň netijesinde, howply ýokanç keselleriň öňüni almakda we ýok etmekde ýetilen sepgitler we gazanylan üstünlikler halkara derejesinde ykrar edildi. Her ýylyň aprel aýynyň soňky hepdesinde Bütindünýä immunizasiýa hepdeligi geçirilýär. Immuno-öňüni alyş çäreleri epidemiologiýa abadançylygyny üpjün etmegiň möhüm guralydyr. Ýurdumyzda bu hepdäniň dowamynda giňişleýin wagyz-nesihat çäreleri geçirilýär. Türkmenistanda ilaty ýokanç kesellerden goramak ugrundaky sanjymlar tölegsiz esasda amala aşyrylýar. Döwlet tarapyndan satyn alynýan sanjym serişdeleri ýokary hil derejesinde bolup, Bütindünýä Saglygy Goraýyş Guramasy tarapyndan güwänamalaşdyrylandyr. Öňüni alyş sanjymlaryny almadyk çagalaryň ýokanç kesellere (gyzamyk, gyzylja, täjihoraz we beýlekiler) duçar bolmak ähtimallygy ýokarydyr. Şonuň üçin her bir ata-ene çagalarynyň öz wagtynda keselleriň öňüni alyş sanjymlaryny almagyny gazanmaga borçludyr. Eneler ýaşy dolan çagalaryna keseliň öňüni alyş sanjymlaryny wagtynda almalydyrlar. Bu bolsa kuwwatly döwletimizde sagdyn nesliň kemala gelmeginiň kepilidir. Uzak ýyllaryň dowamynda geçirilen barlaglaryň netijesinde öňüni alyş sanjymlarynyň adam bedeniniň ýokanç kesellere garşy göreşmek ukybyny çagalyk döwründen başlap ýokarlandyrýandygy, geçirilen sanjymlaryň täsiriniň netijesinde çaganyň bedeninde ýokanç kesele garşy antitelalaryň emele gelmegi bilen, immun ulgamynyň pugtalanmagyna ýardam edýändigi anyklanyldy. Öňüni alyş sanjymlary saglyk öýlerinde sagdyn çagalara bellenilen tertip boýunça amala aşyrylýar. Sanjym geçiriljek çaga, ilki bilen, maşgala lukmany we degişli hünärmenler tarapyndan barlagdan geçirilýär we garşylyk alamatlary ýüze çykarylmadyk ýagdaýynda degişli sanjymy geçirmäge rugsat berilýär. Ýurdumyzda çagalarda ýokanç keselleriň öňüni almak boýunça ozalky hereket edýän 11 görnüşli sanjymdan ybarat bolan tertipnama ýene-de täze — rotawirusa, pnewmokokka, adamyň papilloma wirusyna, wirusly gepatitiň A görnüşine garşy sanjymlar goşuldy. Bulardan daşary, möwsümleýin döreýän kesellere garşy sanjymlar töwekgel topardaky raýatlara bellenen tertipde yzygiderli geçirilýär.«Garaşsyz, baky Bitarap Türkmenistan — bedew batly at-myradyň mekany» ýylynda hem ýokanç kesellere garşy geçirilýän öňüni alyş sanjymlary degişli tertipde guramaçylykly dowam etdirilýär.

Kärdeşler arkalaşyklarynyň ilkinji guramalary Berkarar döwletiň täze eýýamynyň Galkynyşy döwründe jemgyýetde jebisligi pugtalandyrmak, sagdyn durmuşy wagyz etmek hem-de zähmetkeşler köpçüligi üçin howpsuz we amatly iş şertlerini döretmäge jemgyýetçilik gözegçiligini artdyrmak, il-ýurt bähbitli işleri üstünlikli durmuşa geçirmek maksady bilen, zähmetiň sagdyn we howpsuz şertlerini döretmek, önümçilikde şikes almagyň öňüni alýan häzirki zaman tehniki howpsuzlyk serişdelerini ornaşdyrmak we howpsuzlygyň talaplaryna jogap berýän zähmet şertlerini üpjün etmek işlerini ýola goýýarlar.  Şu ýylyň 30-njy martyndan 4-nji apreli aralygynda Türkmenistanyň Kärdeşler arkalaşyklarynyň Milli merkeziniň Awazadaky «Daýanç» dynç alyş-sagaldyş merkezinde Türkmenistanyň Gurluşyk we senagat işgärleriniň kärdeşler arkalaşygynyň geňeşiniň guramagynda «Ýurdumyzyň jemgyýetçilik durmuşynda kärdeşler arkalaşyklarynyň mynasyp orny» diýen at bilen okuw maslahaty hem-de pudagyň hasabat-saýlaw konferensiýasy geçirildi. Konferensiýada hasabat döwründe edilen işlere seljerme berildi, degişli kararlar kabul edildi. Okuw maslahatyna KA-nyň ilkinji guramalarynyň başlyklary, komitetiň hem-de derňew toparynyň agzalary, KA-nyň işjeň agzalary gatnaşdylar, biri-birleri bilen tejribe alyşdylar. Ýokary guramaçylykda geçen okuw maslahatynda «Garaşsyz, baky Bitarap Türkmenistan — bedew batly at-myradyň mekany» ýylynda gazanylýan üstünlikler, ýurdumyzyň depginli ösüşini üpjün etmek üçin kabul edilýän maksatnamalaryň üstünlikli durmuşa geçirilýändigi barada çykyşlar diňlenildi.  Kärdeşler arkalaşyklarynyň işleriniň döwrüň talabyna laýyk guralyşy, Türkmenistanyň Zähmet kodeksiniň talaplarynyň, zähmeti goramak we tehniki howpsuzlyk düzgünleriniň berjaý edilişi, şeýle hem sagdyn durmuş ýörelgesini wagyz etmek boýunça kärdeşler arkalaşyklarynyň ilkinji guramalarynyň öňünde durýan wezipeler dogrusynda guralan çykyşlar diýseň täsirli boldy. Okuw maslahatynyň dowamynda gezelençler guraldy, gyzykly dynç alyş çäreleri geçirildi.

Golaýda Türkmenistanyň Medeniýet ministrliginiň, Telewideniýe, radiogepleşikler we kinematografiýa baradaky döwlet komitetiniň, Türkmen döwlet neşirýat gullugynyň, Daşoguz welaýat häkimliginiň bilelikde guramagynda «Bedew batly öňe barýar Garaşsyz Türkmenistan!» atly şygar bilen halypa ýazyjy-şahyrlaryň gatnaşmagynda aýdym-sazly döredijilik duşuşygy geçirildi. Daşoguz welaýatynyň Şabat etrabynyň Altynýol geňeşliginiň Dilewar oba medeniýet öýünde geçirilen bu duşuşygy ýazyjy, «Biznes-reklama» gazetiniň bölüm redaktory, Türkmenistanyň Hormatly il ýaşulusy Gurbannazar Orazgulyýew alyp bardy. Duşuşykda şahyr, Türkmenistanyň at gazanan medeniýet işgäri Akmyrat Rejepow, şahyr, Türkmenistanyň at gazanan žurnalisti Döwrangeldi Agalyýew, Nurmuhammet Andalyp adyndaky döwlet sazly drama teatrynyň artisti, Türkmenistanyň at gazanan artisti Babadurdy Babaýew, şahyr, Türkmenistanyň Prezidentiniň «Türkmeniň Altyn asyry» atly bäsleşiginiň ýeňijisi Dädebaý Nartyýew dagy çykyş etdiler. Olar öz çykyşlarynda häzirki zaman jemgyýetinde edebiýatyň we sungatyň adamyň içki dünýäsini baýlaşdyrmakdaky orny, döredijilik duşuşygynyň diňe bir hünär ussatlygyny görkezmän, eýsem, ýaş döredijiler üçin uly mekdepdigi, halypalaryň döredijilik ýoly bilen tanyşmaga mümkinçilik berýändigi, okyjynyň ýa-da tomaşaçynyň özüni gyzyklandyrýan soraga garaşylmadyk, içgin jogap alyp bilýändigi, galyberse-de, şu uly wakanyň oňa gatnaşanlarda okamaga, öwrenmäge, döretmäge we gözlegde bolmaga höwes döredýändigi dogrusynda gyzykly söhbet etdiler. Duşuşygyň dowamynda şahyrlar Berkarar döwletiň täze eýýamynyň Galkynyşy döwründe hormatly Prezidentimiziň baştutanlygynda ýurdumyzyň gazanýan üstünliklerini, ahalteke bedewlerimiziň şan-şöhratyny, milli gymmatlyklarymyzy wasp edýän şygyrlaryny okap berdiler. Dabarada etrap medeniýet bölüminiň aýdym-saz topary edebiýatyň we sungatyň muşdaklaryna ýatdan çykmajak lezzet paýladylar. *** Halypa ýazyjy-şahyrlaryň gatnaşmagynda şeýle mazmundaky döredijilik duşuşygy welaýatyň Gubadag etrap medeniýet öýünde hem geçirildi. Ýazyjy-şahyrlaryň, sungat ussatlarynyň okyjylar we öz muşdaklary bilen göni aragatnaşygyny üpjün eden bu duşuşyk oňa gatnaşanlarda döredijilik uçgunlaryny oýaryp, kalplaryny ylhamdan doldurdy.

Türkmenistan döwletimiz Berkarar döwletiň täze eýýamynyň Galkynyşy döwründe ulag-logistika ulgamynda dünýä derejeli taslamalary amala aşyrmagyny dowam edýär. Şonuň bilen baglylykda, Aşgabat — Türkmenabat ýokary tizlikli awtomobil ýolunyň gurlup ulanmaga berilmegi ýurdumyzyň ykdysady kuwwatynyň we halkara gatnaşyklardaky ornunyň barha berkeýändiginiň aýdyň subutnamasydyr.  Bu ägirt uly taslama diňe bir ýurdumyzyň içki ulag gatnawyny däl, eýsem, sebitara we halkara ykdysady gatnaşyklar üçin hem möhüm ähmiýete eýedir. Şonuň ýaly-da Beýik Ýüpek ýolunyň ugrundaky goňşy döwletler bilen söwda-ykdysady, medeni-ynsanperwer gatnaşyklary has-da ösdürmäge ýardam berer. Umumy uzynlygy 600 kilometrden ybarat bu awtoban 6 sany hereket zolagyndan ybarat bolup, häzirki zaman inženerçilik kadalaryna doly laýyk gelýär. Bu awtomobil ýoly Aşgabat bilen Türkmenabadyň arasyndaky aralygy has gysga wagtda geçmäge, ýolagçy we ýük gatnawyny çaltlandyrmaga mümkinçilik berer. Bu awtoban Demirgazyk — Günorta we Gündogar — Günbatar halkara ulag geçelgeleriniň möhüm bölegi bolup, Beýik Ýüpek ýolunyň täze görnüşde dikeldilmegine goşant goşar. Awtobanyň gurluşygynda ulanylan tehnologiýalar iň talapkär halkara bilermenlerini hem haýran galdyrýar. Ýoluň ugrunda gurlan döwrebap awtoduralgalar, ýangyç guýulýan beketler sürüjilerdir ýolagçylar üçin oňaýlylygy üpjün edýär. Awtobanyň halkara ülňülerine laýykdygy we gowşurylan abraýly şahadatnamalar ýurdumyzyň ulag ulgamynda dünýäniň öňdebaryjy döwletleri bilen bir hatarda durýandygynyň halkara tassyknamasydyr.  Hormatly Prezidentimiziň baştutanlygynda amala aşyrylan bu taryhy taslama ýurdumyzyň ykdysady ýüreginiň täze urgusydyr. Bu ýoluň ulanylmaga berilmegi bilen, ýurdumyz durnukly ösüşiň täze tizligine badalga berdi.

Türkmenistanyň halk şahyry Durdy Gylyjyň doglan gününiň 140, Türkmenistanyň halk ýazyjysy Kakabaý Ylýasowyň doglan gününiň 90 ýyllygy mynasybetli, Görogly etrabynyň medeniýet merkezinde aýdym-sazly dabara geçirildi. Dabaranyň esasy maksady şahyrlaryň edebi mirasyny ýaş nesillere ýetirmekden we olaryň türkmen edebiýatynyň baýlaşmagyna goşan bahasyna ýetip bolmajak goşantlaryny dabaralandyrmakdan ybarat boldy. Dabarada ýazyjy Gurbannazar Orazgulyýew Türkmenistanyň ilkinji halk şahyrlarynyň biri, ökde dessançy, ertekiçi şahyryň ömür ýoly, döreden ajaýyp eserleri barada çykyş etdi. Soňra gözi görmese-de, dünýäniň gözelligini köňül gözi bilen görüp, wasp eden şahyryň döredijiligine bagyşlanan wideofilm görkezildi. Türkmenistanyň at gazanan medeniýet işgäri Akmyrat Rejepow we Türkmenistanyň at gazanan žurnalisti Döwrangeldi Agalyýew Durdy Gylyjyň we Kakabaý Ylýasowyň döredijiligi dogrusynda çykyş etdiler. Şahyryň ogly, Görogly etrabynyň ýaşaýjysy, pensioner Aşyrgylyç Durdygylyjow şahyryň ömür ýolundan we döredijiliginden ýatlama wakalar esasynda çykyş etdi. Şonuň ýaly-da, zehinli ýazyjy, şahyr, dramaturg Kakabaý Ylýasowyň köptaraply zehini dogrusynda şahyryň agtygy, Daşoguz şäherindäki 2-nji çagalar sungat mekdebiniň direktory Gülnabat Ylýasowa täsirli gürrüň berdi. Dabarada şahyrlaryň meşhur goşgularyndan parçalar okaldy, Durdy Gylyjyň degişme häsiýetli goşgulary dogrusynda söhbet edildi. Çykyş edenleriň belleýşi ýaly, türkmen edebiýatynyň görnükli wekili, ussat şahyr Durdy Gylyç özüniň şahyrana zehini bilen tanalyp, onuň goşgularynda hem nusgawy edebiýatyň äheňlerini, hem halkyň janly diliniň aýratynlyklaryny görmek bolýar. Şygryýet ummanynyň ägirtleriniň ömür ýoly we döredijilik dünýäsi ýaş nesiller üçin uly mekdepdir. Dabarada edilen çykyşlar, okalan goşgular muny ýene bir gezek subut etdi.Halk şahyrlarynyň hatyrasyna geçirilen bu çäre milli medeniýetimize we söz sungatyna goýulýan belent sarpanyň aýdyň beýanyna öwrüldi. Olaryň döredijilik mirasy halkyň egsilmez hazynasy, agzybirliginiň we ruhy bitewüliginiň sarsmaz sütünidir. Soňra dabara gatnaşyjylar Durdy Gylyç şahyryň adyny göterýän 46-njy orta mekdebe baryp gördüler. Olar bu mekdepde şahyryň hormatyna döredilen muzeýe aýlanyp, onuň dürli ýyllarda çap edilen kitaplary, «Durdy Gylyç — halkyň şahyry» atly kitap we golýazma sergisi, şahyryň portretleri, onuň ýaşan döwrüni janlandyrýan suratlar bilen tanyşdylar.

Daşoguz welaýatynyň Daşoguz şäherindäki «Garaşsyzlyk» sport desgasynda Türkmenistanyň Içeri işler hem-de Bilim ministrlikleriniň ýurdumyzyň mekdep okuwçylarynyň ýaş ýangyn söndüriji toparlarynyň arasynda yglan eden bäsleşiginiň welaýat tapgyry geçirildi. Oňa ozal şu bäsleşigiň etrap hem-de şäher tapgyrlarynda ýeňiji bolan toparlaryň 10-sy gatnaşdy. Mekdep okuwçylarynyň ýangyn howpunyň döremeginiň, ýaýramagynyň öňüni almakda, onuň gysga wagtyň dowamynda söndürilmegini gazanmakda zerur bolan ukyp-başarnyklary pugta ele almaklaryna, şeýle gyssagly pursatlarda ulanylýan serişdeleri peýdalanmagyň tärlerini içgin öwrenmeklerine ýardam bermek maksadynda geçirilýän bäsleşigiň şertlerine laýyklykda, bu tapgyra gatnaşan toparlaryň agzalary päsgelçilikli 100 metr aralyga, şonuň ýaly-da päsgelçilikli 400 metr aralyga estafeta görnüşinde ylgamak, bellenilen hereketleri ýerine ýetirmek boýunça özara güýç synanyşdylar. Bäsleşigiň barşynda olaryň her bir hereketine, çalasynlygyna, ugurtapyjylygyna eminler tarapyndan mynasyp bahalar berildi. Bäsleşigiň umumy netijelerine görä, Daşoguz şäherindäki 24-nji orta mekdebiň topary 1-nji, Şabat etrabyndaky 45-nji orta mekdebiň topary 2-nji, Köneürgenç etrabyndaky 59-njy orta mekdebiň topary 3-nji orunlara mynasyp boldy. Bäsleşigiň ýeňijilerine Daşoguz welaýat Polisiýa müdirliginiň ýangyn howpsuzlygy bölüminiň, TMÝG-niň Daşoguz welaýat geňeşiniň, TGÝMJ-niň welaýat bölüminiň Diplomlary, ýadygärlik sowgatlary gowşuryldy hem-de iň ýokary orna eýe bolan topara bäsleşigiň şu ýylyň 22 — 24-nji aprelinde Daşoguz şäherinde geçiriljek döwlet tapgyryna gatnaşmaga hukuk berilýändigi yglan edildi.