Her ýylyň 18-nji maýynda uludan bellenilýän, halkymyzyň agzybirliginiň, döwletimiziň mizemezliginiň binýadyna öwrülen Türkmenistanyň Konstitusiýasynyň we Türkmenistanyň Döwlet baýdagynyň güni döwrümiziň belent döredijilik ruhuny, ýurdumyzyň bedew batly ösüşlerini, döwürleriň we nesilleriň taryhy arabaglanyşygyny şöhlelendirýär. Al-asmanda parlaýan ýaşyl Tugumyz millet hökmünde mertebelenmegimizi şertlendirýän milli buýsanjymyzdyr. 1992-nji ýylyň 18-nji maýynda kabul edilen Türkmenistanyň Konstitusiýasynda halkymyzyň kalbynda beslän isleg-arzuwlary, Magtymguly Pyragynyň arzuwlan berkarar döwleti öz beýanyny tapýar. Garaşsyzlyk ýyllarynda Konstitusiýamyz birnäçe gezek kämilleşdirildi. Türkmenistanyň Konstitusiýasyna üýtgetmeleri we goşmaçalary girizmeklige bildirilýän ýörite talaplar, ilkinji nobatda, Esasy Kanunymyzyň uzak möhletleýin durnuklylygyny üpjün etmeklige gönükdirilýär. Türkmenistanyň Konstitusiýasynyň esasy aýratynlygy, onuň agramly böleginiň adamyň tebigy we mizemez hukuklarynyň kanun taýdan kepillendirilmeginden ybaratdyr. Şahsyýet, onuň hukuklary we erkinligi biziň jemgyýetimiziň baş gymmatlygydyr. Bu hakykat döwletimiziň gurluşynyň esasy ýörelgesidir. Esasy Kanunymyzda «Türkmenistanda jemgyýetiň we döwletiň iň ýokary gymmatlygy adamdyr» diýlip bellenilendir. Esasy Kanunymyza laýyklykda, her bir adamyň şahsy, syýasy-jemgyýetçilik, sosial-ykdysady konstitusion hukuklaryny we azatlyklaryny goramaga bolan hukuklary bardyr. Hukuklar bilen bir hatarda, onuň jemgyýetiň we döwletiň öňündäki borçlary hem kesgitlenýär: «Türkmenistanyň çäginde ýaşaýan ýa-da wagtlaýyn bolýan her bir adam Türkmenistanyň Konstitusiýasyny, kanunlaryny berjaý etmäge we milli däp-dessurlaryny hormatlamaga borçludyr». Her bir milletiň, her bir döwletiň jemgyýetçilik aňyna, ruhuna täsir edýän aýratyn tapawutly alamatlary bolşy ýaly, Döwlet baýdagymyz hem halkymyzyň ruhuny ganatlandyrýan nyşandyr. Ol Türkmenistanyň Garaşsyzlygyny, asudalygyny we halkymyzyň öz ýurduna bolan buýsanjyny, mertebesini şöhlelendirýär. Her bir halkyň milli baýdagynda saýlanyp alnan we ýerleşdirilen şekillerdir reňkler şol milletiň milliligini, milli aňyýetini, ynanjyny, däp-dessurlaryny aňladýar.         Döwlet baýdagymyz Türkmenistanyň Konstitusiýasy we kanunlary tarapyndan goralýandyr. Konstitusiýamyzyň, kanunlarymyzyň gyşarnyksyz ýerine ýetirilmegi döwletimiz tarapyndan üns merkezinde saklanylýar. Kanunlaryň berk berjaý edilýän ýerinde bolsa, üstünliklere we rowaçlyklara giň ýol açylýar. Konstitusiýamyzyň, kanunlarymyzyň kämilleşdirilmegi döwrebaplaşdyrylmagy jemgyýetimizi gurşap alýan özgertmeler bilen utgaşyp, ata Watanymyzyň gülläp ösmegine getirýär, häzirki we geljekki nesillere baky bagtyýarlygyň binýadyny üpjün edýär. «Türkmenistanyň Zähmet kodeksine üýtgetme girizmek hakynda» Türkmenistanyň Kanunyna girizilen üýtgetmelere we goşmaçalara laýyklykda, 2018-nji ýyldan bäri her ýylyň 18-nji maýynda Türkmenistanyň Konstitusiýasynyň we Türkmenistanyň Döwlet Baýdagynyň güni utgaşykly bellenilip geçilýär. Bu goşa mukaddeslikleriň baýramynyň bilelikde bellenilmegi döwletlilikden we bagtyýarlykdan nyşandyr.

Aýratyn üns-alada bilen gurşalyp, bagtyýar döwürde bilim alýan ýaşlar özleri hakynda edilýän aladalara mynasyp jogap bermäge çalyşýarlar. Kämil jemgyýeti kemala getirmegiň esasy görkezijisi bolup durýan şeýle sazlaşyk döwletimiziň ösüşleriniň bedew badyna eýe bolmagyna esas döredýär. Munuň şeýledigi olaryň kämillik ýaşyna ýetmegi bilen, degişli kanunçylyga laýyklykda, raýatlyk pasportynyň gowşurylmagynda hem çuňňur beýanyny tapýar. Häzirki günlerde ýurdumyzyň 16 ýaşy dolan ýaş raýatlaryna raýatlyk pasportlarynyň gowşurylyş dabaralary giňden ýaýbaňlandyrylýar. Şeýle dabaralaryň biri Daşoguz şäher häkimliginiň mejlisler zalynda geçirildi. Oňa şäherdir etrap polisiýa bölümleriniň ilaty pasportlaşdyrmak we hasaba almak bölümçeleriniň işgärleri, TMÝG-niň Daşoguz şäher geňeşiniň, ýaşuly nesliň wekilleri hem-de kämillik ýaşy dolan ýaşlar gatnaşdylar. Dabara Döwlet senamyzyň ýaňlanmagy bilen başlandy. Dabaranyň dowamynda çykyş edenler ýaşlaryň kämil derejede kemala gelmegi babatda hormatly Prezidentimiziň baştutanlygynda ýurdumyzda amala aşyrylýan beýik işler barada nygtaldy. Ýaşlaryň öz gezeginde watansöýüjilik, zähmetsöýerlik bilen bu aladalara mynasyp jogap bermekleri ündeldi. Ýaşlara Türkmenistanyň raýatlyk pasportlarynyň gowşurylyşy dabaranyň şatlykly hem tolgundyryjy pursadyna öwrüldi. Soňra raýatlyk pasportyny alan ýaşlaryň birnäçesi ýürek buýsançlaryny beýan etdiler. Dabaranyň dowamy aýdym-sazly çykyşlar bilen utgaşdy. Olarda hormatly Prezidentimiziň belent tutumlary bilen beýgelýän eziz Diýarymyzyň waspy ýetirildi.  

Hormatly Prezidentimiziň baştutanlygynda ösüşlere beslenýän ýurdumyzda  döwlet syýasatynyň esasy ugurlarynyň biri ýaşlara döwrebap bilim bermekdir. Bu ugurda daşary ýurt dillerini okatmak döwlet derejesinde üns merkezinde saklanylýar. Daşary ýurt dillerini öwretmekde häzirki zaman pedagogik usullaryň, sanly tehnologiýalaryň we interaktiw okuw gurallarynyň peýdalanylmagy bilim bermegiň netijeliligini ýokarlandyrýar. Okuwçylara çuňňur hem-de hemmetaraplaýyn, sazlaşykly bilim we terbiýe bermekde sapakdan daşary geçirilýän okuw- terbiýeçilik çäreleriniň ähmiýeti uludyr. Daşoguz şäherindäki iňlis dili, himiýa we biologiýa dersleri çuňlaşdyrylyp öwredilýän ýöriteleşdirilen 26-njy orta mekdebi ÝUNESKO-nyň assosirlenen mekdepler torunyň agzasydyr. Türkmenistanyň ÝUNESKO-nyň assosirlenen mekdepleriniň torunyň çäginde ÝUNESKO-nyň ýörelgelerini, parahatçylygy, medeni dürlüligi, durnukly ösüşi we ynsanperwerligi wagyz edýär. Garaşsyz, hemişelik Bitarap Türkmenistan bilen Birleşen Milletler Guramasynyň bilim, ylym we medeniýet boýunça guramasynyň (ÝUNESKO) arasynda ýola goýlan hyzmatdaşlygyň çäklerinde geçirilýän medeni çärelere, ylmy-amaly maslahatlara, bäsleşiklere işjeň gatnaşýar. Milli mirasymyzy, taryhy we tebigy ýadygärliklerimizi ylmy esasda öwrenmäge, gorap saklamaga, ylym-bilim ulgamyndaky hyzmatdaşlygy ösdürmäge goşant goşýar. Türkmenistanyň umumybilim maksatnamalary boýunça okatmagyň usulyýetini kämilleşdirmegiň 2028-nji ýyla çenli Konsepsiýasyny talaba laýyk durmuşa geçirmek üçin mekdepde dürli çäreler geçirilýär. Okuwçylaryň sözleýiş endiklerini ösdürmek maksady bilen, ýörite «Speaking, Writing, Reading» klublary, gurnaklary hereket edýär. Bu gurnaklarda belli bir temada maglumat berilýär we dürli sorag-jogap, pikir alyşmalar guralýar. Bu geçirilýän işler okuwçylaryň sapakda alan bilimini çuňlaşdyrmakda, dil baýlygyny ösdürmekde, dünýägaraýşyny giňeltmekde, olarda ylma höwes döretmekde we hünäre ugrukdyrmakda möhüm ähmiýete eýedir.

Halkymyzda arzyly myhmana, esasan, palaw hödürlenilýär, başga-da dürli tagamlar taýýarlanylýar. Ony has irki döwürlerden bäri türkmen tebipleri kesel bejermekde-de peýdalanyp gelipdirler. Ol halk lukmançylygynda häzirlerem ulanylýar. Tüwiniň melhemlik häsiýetleri barada näme aýdyp bolýar? Taryhy maglumatlara görä, Gippokrat Olimpiýa oýunlaryna gatnaşyjylary tüwüden taýýarlanylan tagamlary iýmäge mejbur edipdir. Bu tagam ýaryşdan ozal we soň berilýän eken. Şol tagamyň düzümine dürli däneleriň ýarmasy, suw, bal garylypdyr. Şular ýaly tagamlardan häzirki wagtda hem türgenler ýaryşlardan öň peýdalanýarlar. Bu ýöne ýerden däl. Alymlar tüwiniň adam bedenine zerur bolan ýokumlaryň we minerallaryň köpüsini özünde jemleýändigini tassyklaýarlar. Meselem, 100 gram bişirilmedik tüwüde 4.1 gram belok, beýleki däneleriň islendigi bilen deňeşdirilende köp mukdarda krahmal bar. Ol «B» ýokumlarynyň köp görnüşlerini özünde jemleýär. Bu ýokumlar bolsa degna ulgamyny berkidýär we deriniň, saçyň, dyrnaklaryň sagdynlygyna peýdalydyr. Tüwüde kalsiniň, demriň, kaliniň, marganesiň, fosforyň, magniniň, sinkiň bardygyny hem barlaglar görkezýär. Gadymy Gresiýada has irki döwürlerde hem tüwi derman hasaplanylypdyr we ysgynsyz, gartaşan adamlara, çagalara iýmek maslahat berlipdir. Bulardan başga-da, holesteriniň möçberini azaltmak isleýänlere tüwi kömek edip biler. Çünki tüwi ýaglaryň özüni däl-de, diňe onuň käbir zerur böleklerini özünde jemleýär. Şoňa görä-de, tüwüli tagamlaryň köpräk taýýarlanylmagy maslahat berilýär.

Weteranlary sylaglamak dabarasy taryha bolan hormatyň, parahatçylyga bolan sarpanyň belent dabaralanmasydyr. Halkymyzyň parahat durmuşy, asuda asmany ugrunda janyny aýaman söweşen gahrymanlaryny sarpalamak biziň mukaddes borjumyzdyr. Ýakynda jemgyýetçilik guramalaryň wekilleri uruş weterany Daşoguz welaýatynyň Gubadag etrabynyň ýaşaýjysy Köşek Soltanmyradowyň mukaddes ojagynda bolup, oňa beýik Ýeňşiň 81 ýyllygy mynasybetli ýadygärlik sowgatlary gowşurdylar. Bu sowgatlar ýöne bir sowgat bolman, eýsem bütin bir halkyň pederlerimize bolan çuňňur tagzymydyr.

«Zergärçilik sungatym — miras daragtym» diýen at bilen Türkmenistanyň Zenanlar birleşiginiň Merkezi geňeşiniň, Kärdeşler arkalaşyklarynyň Milli Merkeziniň, ÝUNESKO-nyň işleri barada Türkmenistanyň Milli toparynyň sekretariatynyň bilelikde yglan eden bäsleşiginiň Daşoguz welaýat tapgyry ýokary guramaçylyk derejesinde geçirildi. Daşoguz şäherindäki «Laçyn» toý mekanynda geçirilen bäsleşigiň bu tapgyryna onuň deslapky tapgyrynda ýeňiji bolanlar gatnaşdylar. Sünnäli işiň ussatlary bäsleşigiň şertlerine laýyklykda, özleriniň aýratyn ukyp-başarnyklaryny, zehinini ezberlik bilen açyp görkezdiler. Olar bäsleşigiň «Zerim bar, zergärim bar, bagtyýar zamanam bar» diýen şerti boýunça öz saýlap alan hünäriniň, kesp-käriniň ähmiýetini, öňünde goýan maksadyny, halkymyzyň milli gymmatlyklaryna bolan buýsançlaryny çeper sözleri bilen wasp etdiler. «Syrly sungat» şerti boýunça bolsa, öz ýaşaýan welaýaty, şäheri, etraby bilen bagly gadymy milli şaý-sepleri, olaryň ulanyş aýratynlyklary, gaşlaryň aňladýan manysy dogrusynda gürrüň bermek hem-de gülýaka, gupba, tumar, ýüzük ýaly şaý-sepleri ýasamak arkaly öz ussatlygyny görkezdiler. Bäsleşige gatnaşyjylar «Altyn-kümüş gudraty, zergärleriň sungaty» şertinde milli mirasymyza goýulýan belent sarpany goşgudyr gazallaryň, aýdymlaryň üsti bilen beýan etdiler. Özleriniň zehin-ussatlyklary bilen aýratyn tapawutlanan Daşoguz şäherinden Çemen Käbeýewa, Şamuhammet Atageldiýew birinji orna mynasyp bolup, bu bäsleşigiň döwlet tapgyryna gatnaşmaga hukuk gazandylar. Şabat etrabyndan Aýbibi Öwezmyradowa, Yhlas Abdyreýimow ikinji, Garaşsyzlyk etrabyndan Amandursun Hojaýewa, Bekmyrat Nepesow üçünji orunlara eýe bolmagy başardylar. Ýeňijilere we gatnaşyjylara TKA-nyň Daşoguz welaýat birleşmesiniň ýadygärlik sowgatlary dabaraly ýagdaýda gowşuryldy.

Ýaňy-ýakynda kabul edilen kanunlaryň talaplaryny halk köpçüliginiň arasynda düşündirmek maksady bilen, Daşoguz şäher häkimliginiň mejlisler zalynda maslahat geçirildi. Ony Daşoguz şäher häkimligi, şäher prokuraturasy, şäher polisiýa bölümi, TSTP-niň şäher komiteti, TMÝG-niň şäher geňeşi bilelikde guradylar. Maslahata Mejlisiň deputatlary, hukuk goraýjy edaralaryň işgärleri, jemgyýetçilik guramalarynyň wekilleri, dürli ugurlarda zähmet çekýän adamlar gatnaşdylar. Maslahatyň dowamynda çykyş edenler ýurdumyzyň ösüşleriniň kanunçylyk binýadynyň has-da pugtalandyrylýandygy, munuň halkymyzyň abadan we bagtly ýaşaýşyny üpjün edýändigi dogrusynda uly buýsanç bilen gürrüň etdiler. Ýaňy-ýakynda milli parlament tarapyndan birnäçe kanunlara degişli üýtgetmeleriň we goşmaçalaryň girizilmegi bilen, kanunçylyk namalarynyň kämilleşdirilendigi, oňa laýyklykda, birnäçe hukuk özgertmeleriniň beýan edilendigi barada giňişleýin durlup geçildi. Hususan-da, Administratiw hukuk bozulmalary hakynda kodekse girizilen üýtgetmeleriň we goşmaçalaryň netijesinde administratiw-hukuk gatnaşyklarynyň kämilleşdirilendigi barada giňişleýin düşündirildi, kanunda beýan edilen kadalaryň talaplary wagyz edildi.

Bakja-baglarda oýunlaryň dogry guralmagy çaganyň diňe bir fiziki däl, eýsem, akyl we ruhy ösüşiniň hem binýadyny berkidýär. Çagalar bilen geçirilýän döredijilikli oýunlar olarda özbaşdaklygy, pikirlenmek, daş-töwerege, jemgyýete uýgunlaşmak ukybyny kemala getirýär. Şonda her bir oýun çaganyň ýaş aýratynlygyna we ukybyna görä saýlanylýar. Oýunda esasy maksat, çaganyň oýundan täze bir zat öwrenmegini gazanmakdyr. Çagalar «Maşgala», «Lukman», «Dükan», «Mekdep» ýaly oýunlarynda ulularyň durmuşyny nusga alýarlar. Şeýle oýunlar olaryň söz baýlygyny artdyrýar. Kubiklerden, legolardan ýa-da tebigy serişdelerden, ýagny gumdan, daşdan, agaçdan dürli binalary gurmak çaganyň giňişlik baradaky düşünjesini artdyrýar, elleriniň hereketini ösdürýär. Sahna oýunlary bolsa, ýagny ertekileriň gahrymanlaryna öýkünip oýnamaklary çagalaryň ýatkeşligini artdyrýar, duýgy dünýäsini baýlaşdyrýar. «Sagdyn bedende — sagdyn ruh» diýen ýörelgeden ugur alnyp, çagalaryň arasynda dürli päsgelçiliklerden geçmäge türgenleşdirmek, bedenlerini taplamak üçin açyk asmanyň astynda arassa howada geçirilýän maşklar geljegimiz bolan körpeleriň berk bedenli, sagdyn dünýägaraýyşly, kämil nesiller bolup ýetişmeginiň hamyrmaýasydyr.

Golaýda «Awaza» milli syýahatçylyk zolagynyň «Daýanç» sagaldyş merkezinde Türkmenistanyň Kärdeşler arkalaşyklarynyň Milli merkeziniň guramagynda ýurdumyzyň saglygy goraýyş ulgamynyň kärdeşler arkalaşyklarynyň wekilleriniň, işewürleriniň gatnaşmaklarynda TKA-nyň alyp barýan işleriniň gerimini giňeltmek, kärdeşler arkalaşyklarynyň ilkinji guramalarynyň işini kämilleşdirmek, döwrebaplaşdyrmak, sagdyn durmuş ýörelgeleri dogrusynda alyp barýan wagyz-nesihat işleriniň netijeliligini gazanmak maksady bilen, «Kärdeşler arkalaşyklarynyň işiniň esasy ýörelgeleri» atly okuw maslahaty we hasabat-saýlaw konferensiýasy geçirildi. Okuw maslahaty we hasabat-saýlaw konferensiýasy örän işjeň ýagdaýda geçdi. Okuw maslahatynyň dowamynda guralan çykyşlar, dürli sport çäreleri, saglyk we medeni hyzmatlar, dynç almaga döredilen mümkinçilikler maslahata gatnaşanlarda ýatdan çykmajak täsirler galdyrdy.

Magtymguly Pyragynyň başlangyç ylym-bilimi kyblasy Döwletmämmet Azadydan öwrenendigi, diňe munuň bilen çäklenmän, Halaçdaky «Idris baba», Buharadaky «Gögeldaş», Hywadaky «Şirgazy» medreselerinde hem okap, ylym-bilimini artdyrandygy, elbetde, hemmämize mälimdir. Beýik şahyra Azadydan alan tälim-terbiýesi uly täsir edýär. Şahyryň aglaba goşgularynda («Azadym kany?», «Haky çün», «Atamyň»...) kyblasy Döwletmämmet Azada minnetdarlyk duýgularynyň beýany giňişleýin häsiýetdedir. Magtymgulynyň şeýle beýik şahsyýet bolup ýetişmeginde Azadynyň orny bijaý uludyr. Gahryman Arkadagymyz «Ömrümiň manysynyň dowamaty» atly ajaýyp kitabynda: «Ata-babalarymyzda öz bilenini özgelere-de öwretmek, ýörite ussatlary ýetişdirmek parz saýylypdyr. Halypa hormaty peder sarpasy deýin belent tutulypdyr. Şägirt, okuwçy öz perzendiň deýin eý görlüpdir. Şeýdibem halypa-şägirtligiň durmuş mekdebi döredilipdir. Şol ugur, usul, akaba biziň şu günlerimizde hem dowam edýär. Ösmek, barha kämilleşmek üçin halypa howa deýin zerur. «Yhlas bilen bir kämilge gol beren, //Ýeter bir menzile ýetmeýen galmaz» diýýän Magtymguly şahyr müň mertebe mamla» diýip ýazýar. Azadynyň Magtymgula ýapan ylym-bilim «serpaýy» has hem uludyr. Halypanyň orny, oňa uýmalydygy barada şahyr şeýle tekrarlaýar: Kämil tapsaň, goý ýolunda başyňny, Är yzynda gezseň, är dek bolar sen. Magtymguly ylymdan ýüki ýeten ynsan bolmak bilen birlikde, kiçigöwünli, pespäl şahsyýet bolan. Ylymly adam ylym-bilim dünýäsine näçe aralaşdygyça henizem köp zatlara akyl ýetirip bilmeýändigine, öwrenmeli zatlarynyň juda köpdügine düşünýär. Ylmyň çarkandakly ýollarynda dogry ugur almaga ussat — halypa agtarýar. Şahyr aýdyşyklardan hem özüne kämil ussatlyk mekdebini agtarypdyr. Çünki ol dünýäde ylym-bilime ussatsyz ýetip bolmajakdygyna has ir göz ýetiripdir: Ýagşylar ýanynda ýörgül sen özüň, Dür bolsun daýyma, sözlegen sözüň, Alymlara uýsaň, açylar gözüň, Jahyllara uýsaň, kör dek bolar sen. Magtymguly Pyragy goşgularynda ady getirilýän Ylýas ibn Ýusup ibn Mugaýýat, Nyzamy Genjewi, Nyzameddin Alyşir Nowaýy, Kyýaseddin Omar ibn Ybrahym Nişapury, Muhammet ibn Ýusup Fizuly Baýatly, Hoja Ahmet Ýasawy, Nureddin Abdyrahman Jamy ýaly Gündogaryň beýik ussatlaryny, alymlaryny öz halypasy hasaplapdyr, olara uly sarpa goýupdyr. Abu Sagyt, Omar Haýýam, Hemedany, Firdöwsi, Nyzamy, Hafyz perwany, Jelaleddin Rumy, «Jame ul-many», Alarnyň jaýynda men hem san bolsam — diýen setirlerinde Magtymguly dünýä edebiýatynyň dürdäneleri bilen tanyş bolandygyny göçme manyda beýan edýär. Şahyra Gündogar halklarynyň dessanlarynyň hem elýeterli bolandygyny «Söýmüşem seni» atly goşgusyndan duýmak bolýar. Bu goşguda ady dessana öwrülen ondan gowrak aşyk-magşugyň ady tutulýar. Öňem birnäçe çeşmelerde agzalyp geçilişi ýaly, şygyr äleminiň soltanyna hasam «Ýusup-Züleýha» dessany uly täsir edipdir. Şahyryň onlarça goşgularynda («Arap tilli söwdügim», «Şalyk bile», «Atly ýaranlar», «Ýusup diýe-diýe»...) Ýusubyň we Züleýhanyň ady uly hormat bilen tutulýar. Magtymgulynyň şägirt, talyp hökmünde diňe medreselerde okamak bilen çäklenmän, eýsem, öz ylym-bilim goruny yzygiderli doldurandygyny, öz ussatlaryna hormat goýýandygyny duýmak bolýar. Onuň özüne halypa saýan beýik şahsyýetleriniň sany, ýokarda belläp geçişimiz ýaly, ençemedir. Şahyryň dünýewi halypalarynyň eserlerini tapyp okamagy, olardan degerli netije çykaryp, şygyrlarynda pikir-duýgularyny beýan edip bilmegi onuň döredijilik dünýäsiniň doly öwrenilmedik çuňluklarynyň biridir. Magtymgulynyň şeýle beýik şahsyýet bolup ýetişmeginde oňa täsir eden dünýä edebiýatynyň dürdäneleriniň elýeterli bolmagy, öz-özüni yzygiderli taplamagy halypa gözlegleriniň dowamlylygydyr. Şahyr ýöne ýere «Kitap okan gullar magnydan dokdur» diýip tekrarlamandyr. Magtymguly Pyragy ussada gol bermegiň, ussatdan tälim almagyň dünýäde iň bir ajaýyp, iň bir ezýetli, şol bir wagtyň özünde iň bir lezzetli işdigini ir duýan we bu işde sabyr-kanagatly bolup, öz maksadyňa ýetip bilmekde nusgalyk göreldäniň bir ömür öwrenilmeli uly mekdebini galdyryp giden şahyrdyr: ...Eý agalar, bir gün bolar, paý alar, Gulluk edip gezen ussada, belli! Akyldar şahyrymyz Magtymguly Pyragynyň gyzyldan gymmatly setirleriniň ýyl geçdigiçe, asyrlar aýlandygyça gadyr-gymmaty artyp barýar.