Ýer sorandaky dilegi kabul bolan Nalaç baba ony suwarmagyň aladasyny edip başlapdyr. Gyryň düýbünden diýen ýaly akyp ýatan derýanyň suwuny bolsa eňilip seredeniňde zordan görüp bolýar. Her näme-de bolsa, şondan başga suw ýok. Nalaç baba özüniň akyl-parasady bilen kyrk jykyr arkaly maksada ýetip boljakdygyny hasaplap çykarypdyr. Şol işiň gurluşygyna hem başlapdyr. Her jykyra digerleri berkidip-daňyp başlapdyr. Taýýarlan başga zatlary ýeterlik bolsa-da, diger daňylýan ýüp gutaryp galypdyr. Şonda Nalaç baba: — Allajan, özüňden medet! Indi nä alaç ederin? — diýip zeýrenip durka, «Suw boýunda biten garaja tal» diýen ses eşidilipdir. Nalaç baba akar suwuň boýunda biten gara söwüdiň talyny kesip alyp, gabygyny aýran dessine onuň bilen digerleri daňsa, ýüp bilen daňandan hem ileri boljakdygyna aň ýetiripdir. Şeýle hem edipdir.

Berkarar döwletiň täze eýýamynyň Galkynyşy döwründe ýurdumyzda kitaphana ulgamy barha ösýär we döwrebaplaşýar. Welaýatdyr etraplardaky hem-de obalardaky kitaphanalaryň gaznasynyň gorlary täze neşirler bilen baýlaşdyrylýar. Şonuň netijesinde beýleki kitaphanalar bilen bir hatarda, Daşoguz welaýat kitaphanasy hem okyjylaryň köp barýan mesgenine öwrüldi. Kitaphananyň bölüm müdiri, bu ugurdan baý iş tejribeli Bahargül Amanowa bu babatda şeýle gürrüň berýär: — «Garaşsyz, baky Bitarap Türkmenistan — bedew batly at-myradyň mekany» atly şanly ýylymyz hem taryhyň täze sahypalaryny açyp, ynamly öňe barýar. Mukaddes Garaşsyzlygymyzyň 35 ýyllyk toýunyň uludan tutuljak ýyly ýakymly, ýatdagalyjy ýyllaryň birine öwrüler. Ynha, täze ýylyň ilkinji günlerinden mekdep okuwçylaryndan başlap, uly ýaşly okyjylarymyz isleg bildirýän, göwünsöýen kitaplaryny, çeper eserlerini okamaga gelýärler. Dürli kärdäki, dürli ýaşdaky okyjylarymyzyň türkmen halkynyň Milli Lideri Gahryman Arkadagymyzyň hem-de Arkadagly Gahryman Serdarymyzyň peşgeş beren kitaplaryna bolan islegleriniň juda uludygyny belläsim gelýär. Kitaphana işgärleri okyjylaryň isleg bildirýän kitaplaryny, gollanmalaryny hem-de olara kitaplaryň elektron görnüşini ýetirmekde yhlasly zähmet çekýärler. Kitaphananyň gaznasynyň üsti «Galkynyş» kitap merkezinden gelýän täze neşirler bilen yzygiderli doldurylýar. Bu hem giň okyjylar köpçüliginiň isleglerini kanagatlandyrmak bilen, biziň işimiziň öňe gitmegine uly goltgy berýär. Sebäbi her bir okyjy bize gelende, ilki bilen: «Täze kitap geldimi?» diýen sowal bilen ýüzlenýär. «Hawa» diýip jogap berenimizde ol okyjynyň ýüzi ýagtylyp, begenjinden ýaňa ýylgyryp durýar. Okyjylarymyzy begendiren türkmen döwlet neşirýat gullugy tarapyndan neşir edilen kitaplaryň birnäçesi ýakyn günlerde geldi. Olardan türkmen edebiýatynyň görnükli wekilleri, Türkmenistanyň halk ýazyjylary Berdi Kerbabaýewiň, Aman Kekilowyň, Berdinazar Hudaýnazarowyň, Gara Seýitliýewiň, Kerim Gurbannepesowyň, Gurbannazar Ezizowyň eserleri okyjylarymyza gowuşdy. Kitaphanamyz neşirleri toplamak we işlemek, hyzmat ediş, sungat, ülkäni öwreniş we düşündiriş, sorag-jogap, syýasy-jemgyýetçilik edebiýatlary, kitaphanaara abonement, neşirleri saklamak bölümlerinden ybarat bolup, elmydama okyjylaryň hyzmatynda hereket edýär. Şeýle hem welaýatymyzyň çäginde geçirilýän dürli mazmunly medeni, syýasy çärelerdir baýramçylyklara kitap sergilerimiz bilen gatnaşýarys. Galyberse-de, kitaphanamyzyň işgärleri jemgyýetçilik guramalary bilen bilelikde täze neşirleriň tanyşdyrylyş dabaralaryny, şanly-seneler mynasybetli çäreleri yzygiderli guraýarlar. Kitap bilimleriň çeşmesidir. Şonuň üçinem, aýratynda, ýaş nesli mundan beýläk hem kitap okamaga höweslendirmek üçin «Ýylyň okyjysy» bäsleşigi yzygiderli geçirilýär. Bu hem okyjylarda, aýratyn hem, ýaşlarda kitaplar dünýäsine bolan gyzyklanma, uly höwes döredýär.

Berkarar döwletiň täze eýýamynyň Galkynyşy döwründe şatlyk-şowhuna beslenip gelýän her bir ýyla mynasyp at berlip, onuň şan-şöhraty belende galdyrylýar. Şeýle paýhasly ýörelgä eýermek bilen, şu ýylyň «Garaşsyz, baky Bitarap Türkmenistan — bedew batly at-myradyň mekany» ýyly diýlip atlandyrylmagy hem hemmeleriň göwünlerini galkyndyrýar. Golaýda TDP-niň Daşoguz welaýat hem-de Daşoguz şäher komitetleriniň welaýatyň ykdysady ulgamyna degişli edaralary bilen bilelikde guran maslahatynda hem bu aýdyň ýüze çykdy. Daşoguz welaýat salgyt bölüminde geçirilen maslahata bu ulgamda zähmet çekýän adamlaryň uly topary gatnaşdy. Maslahatda çykyş edenler barha rowaçlanýan döwrümizde şu ýyla şeýle ajaýyp adyň berilmeginiň çuň manysynyň bardygyny, çünki ata Watanymyzda bedew batly özgerişleriň amala aşyrylýandygyny, uly ösüşleriň gazanylýandygyny, halkymyzyň arzuw-islegleriniň amala aşyp, maksatlarynyň myrat tapýandygyny uly guwanç bilen bellediler. Munuň anyk mysallaryny welaýatyň çäklerinde-de ýakyndan görmek bolýar. Şäherdir obalarda gurlup ulanmaga berilýän binalar, desgalar, ýaşaýyş jaýlary bagtyýar döwrümiziň nyşanyna öwrülip, halkymyza uly mümkinçilikleri, eşretli durmuşy bagyşlaýar.

Golaýda Daşoguz şäheriniň jemgyýetçilik guramalarynyň wekilleriniň, il sylagly ýaşulularyň we harby bölümiň şahsy düzüminiň gatnaşmagynda Daşoguz welaýat kitaphanasynda 2026-njy ýylyň «Garaşsyz, baky Bitarap Türkmenistan – bedew batly at-myradyň mekany» ýyly diýlip yglan edilmegi mynasybetli dabaraly maslahat geçirildi. Maslahatda guralan çykyşlarda 2026-njy ýylyň bedew nyşanynyň astynda geçmegi hem-de şygaryň ýylboýy maksatnamalaýyn edilmeli işleriň mazmunyna özboluşly many çaýýandygyny, ýurdumyzda bedew batly başlangyçlaryň netijesinde tutan her bir maksatlaryň myrat tapýandygyny bellediler.

Edep salamdan başlanýar. Salamlaşmak ynsana mahsus bolan ajaýyp häsiýet bolup, adamlary biri-birine ýakynlaşdyrýar, ysnyşdyrýar, doganlaşdyrýar. Salamlaşmagyň manysy birek-birege parahatçylyk, dynçlyk arzuw etmekdir. Ata-babalarymyzdan nesilme-nesil geçip gelen, hiç bir kanunda ýazylmadyk gowy ýol-ýörelgelerimiz bar. Ýaşy kiçi ýaşy ula, atly barýan pyýada, myhman öý eýesine salam berýär. Görüşmegiň hem öz düzgünleri bar. Märekä baranyňda saňa iň ýakyn adamdan — ataňdan, kakaňdan, agaňdan başlap, eger olar ýok bolsa, ýaşuludan, ylymly adamdan başlap görüşilýär. Diňe şunuň özi hem milletimiziň ýaşululara, ylymly adamlara goýýan aýratyn hormatynyň nyşanydyr. Görüşilende iki eliň uzadylýar. Syn edýän bolsaňyz, ýaşulularymyz görşende, eli bilen başam barmagy gysýandyrlar. Çünki halk arasynda «Hydyr atanyň başam barmagynyň süňki ýokmuş» diýen düşünje bar. Hydyr ata duşsaň ähli dilegleriň kabul bolarmyş. Owaldan gelýän däbimize görä, zenanlar bilen salamlaşylanda, onuň ýanýoldaşynyň hatyrasy belent tutulýar. Ýaşy kiçi zenanyň ýanýoldaşy uly bolsa, ýaşy uly aýal ýaşy kiçi zenana salam berýär. Agzy ýaşmakly gelniň uly adamlara salam berende, iki elini döşünde goýup, başyny egýän pursatlary-da bar. Zenanlar biri-biri bilen görşende, ýaşy kiçi ýaşy uly zenanyň öňünde başyny egýär, ýaşy uly zenan onuň egnine iki eli bilen kakýar. Ata-babalarymyzyň aýdan parasatly sözleri, döreden nakyllary, ertekileri, tymsallary, olaryň geçen durmuş ýollary biziň üçin mekdepdir. Ana, şol mekdepden öwrenýänlerimiz bolsa, biziň her birimiziň abraýymyzyň, ömrümiziň hiç wagt solmajak bezegidir.

Berkarar döwletiň täze eýýamynyň Galkynyşy döwründe ýurdumyzyň ähli ösüşleri bedew badyna beslenýär. Munuň şeýledigine geçen Halkara parahatçylyk we ynanyşmak ýylymyzyň ýokary zähmet ýeňişleriniň, baý taryhy wakalaryň ýyly bolandygy hem şaýatlyk edýär. Agzybir halkymyz ýene bir şanly ýyly — «Garaşsyz, baky Bitarap Türkmenistan — bedew batly at-myradyň mekany» ýylyny uly ruhubelentlik bilen garşy aldy. Üstümizdäki ýylyň şeýle şygar bilen atlandyrylmagy çuňňur many-mazmun gymmatlygyna eýedir. «At — myrat» diýen paýhasa eýerýän halkymyz bedew atlary asyrlarboýy özüniň ýakyn ýoldaşy, syrdaşy hasaplap gelipdir. Aslynda, türkmen halkyny bedew atsyz göz öňüne getirmek mümkin däl. Geçmiş taryhymyza ser salanymyzda, edermen türkmen ýigitlerimiz mukaddes topragy, ata Watany goramak üçin dal bedewe atlanypdyrlar. Şol sebäpden halk döredijiliginiň ähli görnüşlerinde, şeýle hem nusgawy edebiýatymyzda bedew atlarymyz bilen baglanyşykly çeper eserlere, gymmatly maglumatlara yzygiderli gabat gelmek bolýar. Türkmen edebiýatynda çuňňur yz goýan nusgawy şahyrlarymyz Magtymgulynyň, Seýdiniň, Magrupynyň, Mätäjiniň eserlerinde hem bedew atlaryň waspyny görmek bolýar. Nusgawy edebiýatymyzyň kerwenbaşysy Magtymguly Pyragynyň: «Bedew atlar ynsan ýaly syzýar» diýip örän jaýdar belleýşi ýaly, häsiýetli bedewlerimiz ynsan duýgularyna, adamyň begenjine, gynanjyna düşünip bilýän seýrek jandarlaryň biridir. Bedewlerimiz baradaky «At ady bilen, ýigit ody bilen», «At toýnagyny taý basar», «At üstüne müneni tanar», «At ýaryşda, är söweşde», «At agynan ýerde toý bolar», «At saklamak — han saklamak», «At rysgaly alnynda» ýaly nakyllardyr atalar sözleri halkymyzyň gamyşgulak bedewlerimize bolan söýgüsiniň beýanydyr. Ahalteke bedewleriniň gadyr-gymmatyna oňat düşünýän Gahryman Arkadagymyzyň «Gadamy batly bedew», «Ahalteke bedewi — biziň buýsanjymyz we şöhratymyz», «Atda wepa-da bar, sapa-da», «Ganatly bedewler» ýaly ajaýyp kitaplarynda ahalteke bedewlerimize mynasyp baha berilýär. Ahalteke atlary özüniň güýçlüligi, ýyndamlygy, owadanlygy bilen dünýäde meşhurlyk gazanypdyr. XX asyr türkmen şygryýetinde öçmez yz galdyran Gurbannazar Ezizow:     — Şat günüňde şatdyr ol, Toýda şöhratyň bolar. Magşar güni aglanlaň Birisi atyň bolar — diýse, Türkmenistanyň halk ýazyjysy Kerim Gurbannepesow:   — Gözüňe söwdügim şeýle bir bedew: Alkymy-daglaryň alkymy ýaly, Ýakymy-bägüliň ýakymy ýaly, Ýallary-hüýr gyzlaň çokuly ýaly, Guýrugy-maýsanyň tolkuny ýaly, Akyly-dananyň akyly ýaly —   diýip, bedew atlarymyzyň tarypyny örän sazlaşykly şekilde beýan edýärler. Häzirki wagtda behişdi bedewlerimiz diňe bir toý-baýramlarymyzyň bezegi bolman, eýsem, dünýä derejesinde buýsanç nyşanyna öwrülýär. Bu günki günde sagdynlygyň we gözelligiň nusgasy bolan ahalteke bedewlerimiziň şan-şöhraty dünýä dolýar.

Şu ýylyň «Garaşsyz, baky Bitarap Türkmenistan — bedew batly at-myradyň mekany» ýyly diýlip yglan edilmegi ata Watanymyzyň, halkymyzyň durmuşynda şatlykly-guwançly waka boldy. Oňa bagyşlanan çärelere badalga berilmegi mynasybetli Daşoguz şäher häkimliginiň, TDP-niň, TAP-nyň şäher komitetleriniň, TMÝG-niň şäher geňeşiniň bilelikde guran dabaraly maslahaty örän işjeň ýagdaýda geçdi. Maslahatda guralan çykyşlardan görnüşi ýaly, Garaşsyz, baky Bitarap ýurdumyzda her ýyla mynasyp atlary dakmak ýakymly däbe öwrüldi. Munuň özi halkymyzyň bagtyýarlygynyň, agzybirliginiň alamaty bolup, her bir ynsanyň göwnüni galkyndyrýar, ony yhlasly zähmet çekmäge, bilim almaga, döretmäge, gurmaga ruhlandyrýar. Ýakynda gadam goýan ýylymyzyň hem öz adyna mynasyp bolup, şan-şöhrata beslenjekdigine berk ynam bar. Dabaranyň ahyrynda medeniýet işgärleriniň aýdym-sazly çykyşlary guraldy.

Berkarar döwletiň täze eýýamynyň Galkynyşy döwründe her bir döwletli, sahawatly ýyly şygara beslemek asylly däbe öwrüldi. Türkmenistanyň Mejlisiniň Karary bilen 2026-njy ýylyň «Garaşsyz, baky Bitarap Türkmenistan — bedew batly at-myradyň mekany» ýyly diýlip yglan edilmegi bagtyýar halkymyz tarapyndan uly buýsanç, çäksiz hoşallyk bilen kabul edildi. Sebäbi ýylyň şygary ýurdumyzyň Garaşsyzlygynyň 35 ýyllyk şanly senesiniň tutuş ýylyň dowamynda uly dabara bilen belleniljekdiginiň, ata Watanymyzyň obadyr şäherleriniň toý ruhubelentligi bilen gurşaljakdygynyň aýdyň güwäsidir. Berkarar döwletimizde toýlar-toýa ulaşýar, ösüşlerdir özgerişler bolsa biri-birine sepleşip, ata Watanymyzyň röwşen geljeginiň binýadyny berkidýär. «Garaşsyz, baky Bitarap Türkmenistan — bedew batly at-myradyň mekany» ýyly ýurdumyzyň uzak geljegi nazarlaýan tutumlaryny, öňde goýlan belent maksatlaryny myradyna gowşurjak, bedew batly ösüşlere beslejek ýyllaryň biri bolar. Ýylyň şygaryndaky «bedew bady» diýen ajaýyp jümle ata Watanymyzyň dürli ugurlarda gazanýan üstünliklerini, belent sepgitlerini alamatlandyrmak bilen, täze taryhy döwrüň ruhy galkynyşynyň hem aýdyň beýanydyr. Çünki gözellikde, ýyndamlykda dünýäde deňi-taýy bolmadyk türkmen bedewleri halkymyzyň milli buýsanjydyr. Pederlerimiz bedew atlaryny maksat-myradyna ýöne ýere deňän däl bolsalar gerek. Bu gadymy pähimiň şanly ýylyň şygarynda özboluşly beýan edilmegi tutuş ýylyň dowamynda durmuşa geçiriljek tagallalaryň ata Watanymyzy ösüşleriň rowaç ýolunda bellenilen menzillere, arzyly sepgitlere ýetirjekdigi, dürli ugurlar boýunça milli maksatnamalarda göz öňünde tutulan il-ýurt bähbitli işleriň üstünlikli durmuşa geçiriljekdigi hakyndaky hakykat aýdyň şöhlelenýär.

Golaýda TKA-nyň Daşoguz welaýat birleşmesiniň mejlisler zalynda 2026-njy ýylyň «Garaşsyz baky Bitarap Türkmenistan — bedew batly at-myradyň mekany» ýyly diýlip atlandyrylmagy mynasybetli, «Ak ýollaryň röwşen bolsun, bedew batly şanly ýyl!» ady bilen dabaraly maslahat geçirildi. Ony TKA-nyň welaýat birleşmesi, welaýat gümrükhanasy hem-de Türkmenistanyň döwlet migrasiýa gullugynyň welaýat boýunça müdirligi bilelikde guradylar. Dabaraly maslahata TKA-nyň Daşoguz welaýat birleşmesiniň jogapkär işgärleri, KA-nyň ilkinji guramasynyň başlyklary, TDMG-niň welaýat boýunça müdirliginiň hem-de welaýat gümrükhanasynyň harby gullukçylary gatnaşdylar. Maslahatda çykyş edenler «Garaşsyz, baky Bitarap Türkmenistan — bedew batly at-myradyň mekany» ýylynyň şygarynyň ildeşlerimiziň döredijilik ruhuny belende göterýändigini buýsanç bilen bellediler. Şeýle hem ýylyň buýsançly şygarynyň ata Watanymyzyň beýik ösüşleriniň bedew bady bilen belende galjakdygyna, maksatlaryň myrat tapjakdygyna bolan ynamy berkidýändigini nygtadylar.

Daşoguz welaýat häkimliginiň mejlisler eýwanynda halkara derejeli ösüşleri, taryhy wakalary özünde jemlän Halkara parahatçylyk we ynanyşmak ýylynda Türkmenistanyň Zenanlar birleşiginiň Daşoguz welaýat bölümi tarapyndan ýerine ýetirilen işleriň jemlerini, şeýle hem «Garaşsyz, baky Bitarap Türkmenistan — bedew batly at-myradyň mekany» ýylynda guramanyň öňünde durýan wezipeleri ara alyp maslahatlaşmak maksadynda, hasabat ýygnagy geçirildi. Hasabat ýygnagyna welaýat, şäher, etrap zenanlar guramalarynyň başlyklary, işjeň agzalary, Türkmenistanyň Mejlisiniň deputatlary, jemgyýetçilik guramalarynyň wekilleri, welaýatyň ähli pudak edaralarynyň ilkinji zenanlar guramalarynyň işjeň agzalary, bilim, saglygy goraýyş, medeniýet, sport ulgamlarynyň, senagat, ykdysadyýet, gurluşyk hem-de oba hojalyk edaralarynyň işgärleri, ýokary we orta hünär okuw mekdepleriniň mugallymlary, mährem eneler gatnaşdylar. Ýygnakda çykyş edenler hasabat döwründe ýurdumyzda alnyp barylýan  öňdengörüjilikli döwlet syýasatynyň netijesinde amala aşyrylýan beýik işleri, ýurdumyzda halkara derejesinde geçirilýän maslahatlaryň ähmiýetini wagyz etmek, ahlak arassalygyny, maşgala gymmatlygyny, sagdyn durmuş ýörelgelerini, ýaşlarda watana wepalylyk, jogapkärçilik duýgularyny ösdürmegi, olaryň kämil ruhda terbiýelenmegini ündeýän wagyz-nesihat işleriniň ýokary netijeleri berýändigini bellediler. Zenanlar guramalary tarapyndan geçirilýän bäsleşikleriň, çäreleriň gyz-gelinleriň jemgyýet bilen köptaraply gatnaşyklaryny pugtalandyrmak, maşgala ojagynyň binýadyny berkitmek, ene-mamalarymyzyň miras goýan nusgalyk ýol-ýörelgelerini mynasyp dowam etdirmeklerini gazanmak babatda uly ähmiýetiniň bardygyny nygtadylar. Soňra Halkara parahatçylyk we ynanyşmak ýylynda işjeňligi bilen tapawutlanan göreldeli zenanlara TZB-niň Daşoguz welaýat bölüminiň, TKA-nyň Daşoguz welaýat birleşmesiniň Hormat hatlary, ýadygärlik sowgatlary gowşuryldy, «Garaşsyz, baky Bitarap Türkmenistan — bedew batly at-myradyň mekany» ýylynda öňde duran wezipeler boýunça iş meýilnamasy tassyklanyldy.