Halkara parahatçylyk we ynanyşmak ýylynda ýurdumyzyň milli bilim ulgamyny kämilleşdirmäge, ýaşlaryň saýlan hünäriniň eýesi bolmagyny gazanmaga aýratyn uly üns berilýär. Türkmenistanyň  Prezidentiniň şu ýylyň 27-nji iýunynda sanly ulgam arkaly geçirilen Ministrler Kabinetiniň mejlisinde gol çeken Permanyna laýyklykda, Halkara senagatçylar we telekeçiler uniwersitetiniň döredilmegi bagtyýar ýaşlar bilen birlikde, tutuş halkymyzyň buýsanjyny, şatlygyny artdyrdy. Berkarar döwletiň täze eýýamynyň Galkynyşy döwründe ýurdumyzda ýaşlaryň döwrebap bilim almagy üçin ähli mümkinçilikler döredilýär. Täze hünärleriň açylmagy, dürli ugurly ýokary okuw jaýlarynyň döredilmegi ýaşlaryň saýlan hünärini ele almagy üçin amatly şertleriň biridir. Hususy telekeçilik babatda ýurdumyzda milli kanunçylyk ulgamy hem has berkidilýär. Muňa mysal hökmünde «Kiçi we orta telekeçiligi döwlet tarapyndan goldamak hakynda» Türkmenistanyň Kanunyny aýdyp bileris. Bu Kanunda kiçi we orta telekeçiligiň hukuk binýady kesgitlenilýär. Halkara Senagatçylar we telekeçiler uniwersitetiniň döredilmegi bazar ykdysadyýeti şertlerine geçilýän döwürde aýratyn ähmiýetlidir. Ýaşlaryň bazar gatnaşyklarynyň we telekeçiligiň ylmy esaslaryny hünär derejesi hökmünde ele almagy täze ýeňişlere, belent sepgitlere badalga bolar. Innowasiýalaryň we tehnologiýalaryň durmuşymyza giňden ornaşýan taryhy döwrümizde bäsdeşlige ukyply hususy pudagyň ösdürilmegi aýratyn ähmiýete eýedir. Garaşsyz, hemişelik Bitarap Türkmenistan döwletimizde Halkara senagatçylar we telekeçiler uniwersitetiniň döredilmegi taryhy wakalaryň birine öwrüldi. Häzirki wagtda bu ýokary okuw mekdebine giriş synaglary guramaçylykly geçirildi. Telekeçilik işini çuňlaşdyryp öwretmekde bu ýokary okuw mekdebiniň ähmiýeti örän uly bolar.

Taryhy wakalara beslenýän Halkara parahatçylyk we ynanyşmak ýylynyň güýzlük bugdaý ekiş möwsümi günsaýyn golaýlaýar. Onuň bellenilen möhletlerde, talabalaýyk amala aşyrylmagy bu çärä ýokary derejede taýýarlyk görülmegine bagly bolup durýar. Şuny nazarda tutmak bilen, Daşoguz welaýatynyň degişli edara-kärhanalary derwaýys çäreleri durmuşa geçirýärler. Bu babatda ekişde ulanyljak tehnikalaryň birkemsiz abatlanylyp, möwsüme taýýar edilmeginiň uly ähmiýetiniň bardygyny aýtmak gerek. Şoňa görä-de, Daşoguz welaýat «Obahyzmat» önümçilik birleşiginiň etraplardaky önümçilik kärhanalarynyň işçi-hünärmenleriniň bitirýän işleri örän möhümdir. Çünki olaryň yhlasly zähmetleri bilen ekişiň bökdençsiz geçirilmegi üpjün edilýär. Akdepe etrap «Obahyzmat» önümçilik kärhanasynyň abatlaýjy ussalarynyň, mehanizatorlarynyň bu ugurdaky agzybirlikli zähmetiniň hem oňat netijeleri berýändigini nygtamak bolar. Munuň şeýledigini kärhananyň çäginde häzirki wagta çenli gözden geçirilip, ýokary hilli abatlanylyp, taýýarlyk hatarynda goýlan tirkeg gurallary, ekijiler, boronalar hem tassyklaýar. Olara nazar aýlanyňda, ezber ussalaryň öz işlerine örän jogapkärli çemeleşendiklerini görmek bolýar. Kärhananyň baş inženeri Jelaleddin Nasrallaýewiň aýtmagyna görä, bu ýerde öňde duran bugdaý ekişine taýýarlyk çärelerine has ir girişilipdir. Munuň özi onda peýdalanylmagy göz öňünde tutulýan tehnikalaryň, olaryň tirkeg gurallarynyň, boronalaryň esasy böleginiň talabalaýyk abatlanylmagyna şert döredipdir. Bu hakda aýdylanda, şu möwsümde kärhana boýunça jemi 100-den gowrak dürli kysymly, kuwwatly traktorlaryň ekişe gatnaşdyrylmagynyň meýilleşdirilýändigini bellemek zerurdyr. Olaryň 50-ä golaýy sürüm, 40 sanysy ekiji, 20-si bolsa bejergi traktorlarydyr. Şonuň ýaly-da, çizelleriň, ekiji gurallaryň hem ýeterlik möçberi bugdaý ekişine gönükdiriler. Kärhanada tejribeli abatlaýjy ussalaryň onlarçasy zähmet çekýär. Olardan Şeripbaý Mätkurbanow, Şöhrat Islamow, Ýaşnar Hemraýew dagy has-da tapawutlanýarlar. Sebäbi olar öz kärlerine yhlasly çemeleşip, tabşyrylan işi kemçiliksiz ýerine ýetirmegi başarýarlar. Şonda olaryň şägirtleriniň hem işeňňirlik görkezýändiklerini aýratyn bellemek gerek. Bugdaý ekişinde ulanyljak traktorlar bu babatda ýeterlik iş tejribesi bolan mehanizatorlara berkidilipdir. Olaryň arasynda Orazmyrat Kakabaýew, Allanazar Hanjyýew, Maksat Töräýew dagy bar. Kärhanada ekiş döwründe tehnikalara zerur hyzmatlary iş üstünde guramak barada hem degişli meýilnamalar düzülýär. Olar boýunça ýörite toparlar döredilip, hyzmatlary ýerine ýetirjek adamlar bellenildi. Mysal üçin, şu döwürde traktorlary iş üstünde ýangyç bilen üpjün etmek tejribeli sürüjiler Atabek Atahanowyň, Merdan Toýlyýewiň üstüne ýüklenilýär. Mundan başga-da, abatlaýjy, kebşirleýji ussalary hem bu babatda köp ýyllyk tejribä eýe. Şoňa görä-de, olaryň öz öňlerinde goýulýan wezipelere birkemsiz hötde geljekdiklerine ynanýarys.

Häzirki döwürde Diýarymyzyň çäklerinde 9 sany döwlet-tebigy goraghanalary hereket edýär. Olaryň hatarynda 2023-nji ýylda ÝUNESKO-nyň degişli komitetiniň Karary bilen guramanyň Bütindünýä mirasynyň sanawyna girizilen «Repetek» döwlet biosfera goraghanasy hem bar. Lebap welaýatynyň günorta künjeginde, ymgyr Garagum çölüniň jümmüşinde ýerleşýän bu goraghanada hem Garaşsyz ýurdumyzyň gözel tebigatynyň ösümlik, haýwanat, guşlar dünýäsini goramak, baýlaşdyrmak ugrunda uly işler amala aşyrylýar. Belli bolşy ýaly, bu goraghana ata Watanymyzyň sähra-meýdanlarynda ilkinji döredilen goraghanalaryň biri bolup, irki wagtlardan, has anygy, 1927-nji ýyldan bäri iş alyp barýar. Onuň 1979-njy ýylda ÝUNESKO-nyň «Adam we biosfera» halkara sazlaşdyryjy geňeşiniň Karary bilen halkara biosfera goraghanalarynyň hataryna goşulandygyny hem aýtmak gerek. Şonda bu çözgüdiň biragyzdan kabul edilmegi goraghanada berjaý edilýän çäreleriň dünýä derejesinde ähmiýetiniň uludygyny tassyklaýar. Häzirki wagtda goraghananyň çäkleriniň dünýäniň ekoulgamlarynyň esasylarynyň hatarynda durýandygyny ýokarda agzalan çözgüt doly äşgär edýär. Goraghananyň umumy meýdany 35 müň gektara golaý bolup, onuň çäklerinde «Repetek sährasy», «Çarlak tokaýy», «Demirgazyk jülgesi», «Ýaman tokaý», «Günorta jülgesi» diýlip atlandyrylýan ýerler bar. Olaryň ösümlik, haýwanat, guşlar dünýäsi örän baýdyr. Bu barada aýdylanda, bir zady aýratyn bellemek gerek. Ol hem goraghananyň çäklerinde kömelekleriň 200-e, gülli ösümlikleriň 125-e, suwotularyň 70-e golaý görnüşleriniň gabat gelýändigidir. Olaryň sanynyň başga ýerlerdäkä garanyňda has köpdügi ünsi çekýär. Şonuň ýaly-da, bu ýerde Tebigaty Goramagyň Halkara Birleşiginiň Gyzyl sanawynda hem-de Türkmenistanyň Gyzyl kitabynda hasaba alnan ösümlikleri, haýwanlary, guşlary goramak, olaryň sanyny artdyrmak boýunça aýratyn uly işler durmuşa geçirilýär. Olardan keýik, garagulak, oklukirpi, zemzen, kepjebaş, ýylançy gyrgy, togdary, hüwi we beýlekiler bar. Goraghananyň çäkleriniň başga ýerlerde gabat gelmeýän görnüşleri, özboluşly gurluşy olaryň doly bahaly ýaşaýşyny üpjün edýär.

Tebigatyň gözelligini artdyrýan guşlar hakynda köp maglumatlar bar. Geçirilen barlaglaryň netijesinde olaryň döreýiş, ýaşaýyş, özlerini alyp baryş, hereketleniş we beýleki aýratynlyklary anyklanylypdyr. Şondan mälim bolşuna görä, dünýäde guşlaryň 8600-den gowrak görnüşi bolup, biziň ýurdumyzda olaryň 422-siniň gabat gelýändigi aýdylýar. Guşlaryň has köp görnüşiniň Merkezi we Günorta Amerika ýurtlarynda ýaşaýandyklaryny-da bellemek gerek. Guşlaryň daş keşbiniň nähilidigini hemmeler bilýändir. Şonuň üçin hem bu barada aýtmak zerur bolmasa-da, olaryň bedeniniň gyzgynlygynyň ynsanyňkydan has ýokarydygyny, ýagny 42 — 45 derejä barabardygyny nygtamak gerek. Sebäbi bu, guşlaryň köptaraply täsinlikleriniň biridir. Olaryň ganatlary uçmak, guýruklary howada öwrüm etmek üçin ähmiýetlidir. Guşlaryň ýerde gowy hereket edýänleri, suwda ökde ýüzýänleri, oňa çuň çümüp bilýänleri bar. Ýöne olaryň esasy aýratynlyklarynyň biri hem howada uçýandyklarydyr. Özem olaryň käbiri muny örän çalt ýerine ýetirýär. Meselem, bize tanyş bolan garasarlar sagatda 80, gazlar sagatda 90 kilometre çenli tizlik bilen uçmagy başarýarlar. Guşlaryň uçýan belentlikleri-de dürli-dürlüdir. Bu barada aýdylanda, bir zady nygtamak ýerlikli. Ýagny olar güýze garanyňda ýazda, gündizlerine seredeniňde gijelerine has ýokardan uçýarlar. Häzirki wagtda ösen tehnologiýalaryň kömegi bilen guşlaryň ençemesiniň 2,5-3 kilometr belentlikde uçmagyň hötdesinden gelýändikleri kesgitlenildi. Olaryň arasynda ýurdumyzyň tebigatynda duşýan jok-jokylar hem bar. Guşlaryň ýaşaýan ýerleri bilen baglanyşyklylykda beden gurluşlarynda tapawutlaryň peýda bolýandygy-da bellenilýär. Mysal üçin, olaryň tokaýda ýaşaýanlarynyň dyrnaklary, guýruklary has güýçlüdir. Şeýle hem dag guşlarynyň çüňkleri berk bolsa, suwda ýüzýänleriniň, çümýänleriniň injigi gysga, ýelekleri dykyzdyr. Uly gara ördek suwuň aşagyna 7,2 metre çenli çümüp hem-de şol ýerde 3 minuda çenli saklanyp bilýär. Umuman, guşlaryň ýaşaýşynda täsinlikler örän köp.  

Şu günler gowaçalara ideg etmek işleri Daşoguz welaýatynyň Saparmyrat Türkmenbaşy etrabynyň B.Taganow adyndaky daýhan birleşiginde güýçli depginde alnyp barylýar. Hojalygyň babadaýhanlary Halklara parahatçylyk we ynanyşmak ýylynda 600 gektar meýdanda gowaça ekişini geçirdiler. Ekiş geçirilen meýdanlarda oňat gögeriş gazanyldy. Şu günler barha boý alyp, hasyla duran gowaçalara ideg etmek işleri hojalygyň Parahat Rejepow, Gurbangeldi Hajyýew, Baýramgeldi Jumageldiýew dagynyň ýolbaşçylyk edýän 1,2,3-nji kärendeçiler toparlarynda has-da guramaçylykly alnyp barylýar. Bejergi döwründe ekinleri goşmaça mineral dökünler bilen iýmitlendirmäge aýratyn üns berilýär. Gowaçalaryň hatarara bejergisinde Merdan Seýitmyradow, Merdan Şiljäýew ýaly mehanizatorlar ýokary işjeňlik görkezýärler. Pagtaçy kärendeçiler şu günler gowaçalara suw tutmak işlerini hem giňden ýaýbaňlandyrýarlar. Bu işler gije-gündiziň dowamynda şerbet usulynda alnyp barylýar. Bu bolsa suwy tygşytly ulanmaga hem-de gowaçalaryň kadaly suwarylmagyna mümkinçilik berýär. Hojalykda köp ýyllaryň dowamynda pagtaçylyk bilen iş salyşýan birnäçe tejribeli kärendeçileriň bolmagy guwandyryjydyr. Olar indi ençeme ýyllardan bäri gowaçanyň bol hasylyny ýetişdirip, köplere görelde bolýarlar. Baý iş tejribelerini ýaş kärendeçilere-de ýadawsyz öwredýärler. Olardan Sähragözel Bazarowa, Öremät Gazakow, Amangül Durdyýewa, Sapargül Orazowa, Saparbibi Poşşyýewa dagynyň atlaryny guwanç bilen agzap geçmek bolar. Pagtaçy kärendeçileriň yhlasly hem-de ýadawsyz zähmeti bilen kemsiz idegi ýetirilýän gowaçalar kadaly boý alýarlar. Daýhanlaryň şu günler gowaça meýdanlarynda alyp barýan ýokary öndürijilikli işlerini synlanyňda, olaryň öňlerinde goýan belent wezipeleriniň abraý bilen hötdesinden geljekdiklerine bolan ynamyň artýar.  

Gök hem-de bakja önümleriniň bazar bolçulygyny döredip, halkymyzyň olara bolan islegleriniň doly kanagatlandyrylmagyny üpjün etmek hormatly Prezidentimiziň häzirki döwürde ýurdumyzyň ekerançylarynyň öňünde goýýan esasy wezipesi bolup durýar. Onuň üstünlikli ýerine ýetirilmegine goşant goşmak ugrunda Daşoguz  welaýatynyň çäklerinde-de giň gerimli işler alnyp barylýar. Şonuň netijesinde, bu önümleriň bol hasyly kemala getirilip, ildeşlerimiziň mukaddes saçaklarynyň berekedi artdyrylýar. Bu babatda welaýatyň Şabat etrabynyň gök ekerançylarynyň, bakjaçy daýhanlarynyň uly işleri bitirýändigi hemmelere mälimdir. Çünki olar ýylyň-ýylyna öz kärende meýdanlarynda gök önümleriň, gawun-garpyzlaryň dürli görnüşlerini ýetişdirip hem-de öz wagtynda ýygnap, belent harmanlary döretmek bilen, ýokary netijeleri gazanyp gelýärler. Etrabyň gök ekerançylary Halkara parahatçylyk we ynanyşmak ýylynda hem bu ugurda derwaýys çäreleri amala aşyrýarlar. Has takygy, olar şu ýylyň baharynda 1 müň gektardan gowrak meýdana gök hem-de bakja ekinlerini ekip, kadaly gögeriş almak bilen, bereketli hasylyň kemala getirilmegine gönükdirilen ideg işlerini utgaşykly dowam etdirdiler. Şeýlelikde, häzirki wagtda etrapda pomidoryň, soganyň, hyýardyr kelemiň, irki gawun-garpyzyň birkemsiz ýetişen hasylyny ýygnap hyrydarlara ýetirmek işi guramaçylykly alnyp barylýar. Gök hem-de bakja önümleriniň ýokary hasylyny kemala getirmekde etrabyň «Nowruz» daýhan birleşiginiň ekerançylarynyň hem ýadawsyz zähmet çekip, guwandyryjy netijeleri gazanýandyklaryny aýtmak zerur bolup durýar. Sebäbi olar özleriniň bu babatda bar bolan köpýyllyk tejribelerine daýanmak bilen, bellenilen çäreleri öz wagtynda berjaý edip, uly üstünliklere eýe bolýarlar. Daýhan birleşiginde jemi 60-dan gowrak gök ekerançy hem-de bakjaçy kärendeçiler zähmet çekýär. Häzirki wagtda olaryň gözegçiligindäki 60 gektar sogan, 10 gektar pomidor, 20 gektar bakja ekin meýdanlarynda oňat hasyl kemala geldi we bu önümler ýygnalyp, bellenilen ýerlere ýetirilýär. Görnüşi ýaly, daýhan birleşiginiň gök ekerançylarynyň, bakjaçylarynyň her biri öz kärende meýdanyndan bol önüm öndürip, ile-güne ýetirmegiň aladasynda gaýratly zähmet çekýär. Bu bolsa şeýle zerur önümleriň bolçulygyny artdyrmakda uly haýyr getirýär.

Berkarar döwletiň täze eýýamynyň Galkynyşy döwründe ýurdumyzyň telekeçilik ulgamy milli ykdysadyýetimiziň möhüm bölegine öwrülip, onuň ösmegine saldamly goşant goşýar. Munuň özi onuň dürli ugurlarda, şol sanda, gurluşyk pudagynda amala aşyrýan giň möçberli işleriniň netijesidir. Bu babatda uly üstünliklere eýe bolýan telekeçilik kärhanalary Daşoguz welaýatynda-da az däl. Türkmenistanyň Senagatçylar we telekeçiler birleşmesiniň agzasy bolan «Hydyrly Bina» hususy kärhanasy hem olaryň biridir. Ýakynda şu kärhananyň ýolbaşçysy Orazgeldi Hydyrow hususy kärhananyň alyp barýan işleri barada şeýle gürrüň berdi: —Kärhanamyz 7 ýyldan gowrak wagt bäri Daşoguz welaýatynyň dürli ýerlerinde gurluşyk işlerine gatnaşyp gelýär. Has anygyny aýtsak, bu kärhana  2018-nji ýylda açyldy. Şondan soňra, geçen döwrüň dowamynda ýaşaýyş jaýlarynyň ençemesini gurup, ildeşlerimiziň ygtyýaryna berdik. Häzirki wagtda olaryň şol binalaryň amatly şertleriniň hözirini görüp, bagtyýar durmuşda ýaşaýandyklaryna çäksiz guwanýarys. Biziň ilki işe başlan ýerimiz Daşoguz şäheriniň «Gülüstan» ýaşaýyş toplumy boldy. Şonda onuň çäginde 1 gatly, 3-4 otagly öýleriň 10-a golaýyny gurmak barada şertnama baglaşdyk. Şunlukda, olaryň gurluşygyny öz wagtynda tamamlap, eýelerini begendirdik. Ondan soňra Daşoguz şäheriniň günorta-günbatar künjeginde geçen ýyl açylyp ulanmaga berlen ýaşaýyş jaý we desgalar toplumynda iş alyp bardyk. Bu ýerde 4 sany köp gatly ýaşaýyş jaýlaryny gurduk. Anygyny aýtsak, olaryň 3 sanysy 4 gatly, her biri 24 öýli, 1 sanysy 4 gatly, 16 öýli ýaşaýyş jaýlarydyr. Olaryň gurluşygyny öz wagtynda tamamlap, abraý gazanmagymyz, şonuň bilen birlikde-de, şeýle döwrebap toplumyň döredilmeginde öz goşandymyzyň bolmagy bizi has hem gaýratly işlemäge ruhlandyrdy. Şeýlelikde, ýene-de täze ýaşaýyş jaýlarynyň gurluşygyna başladyk. Häzirki wagtda olaryň gurluşygyny depginli dowam etdirýäris. Şu günlerde welaýatyň çäginde, ýagny Daşoguz şäheriniň «Gülüstan» ýaşaýyş toplumynda 1 gatly öýleriň 2 sanysynyň gurluşygyny alyp barýarys. Olardan başga-da, ýurdumyzyň Ahal welaýatynyň Ak bugdaý etrabynda jemi 40 sany 1 gatly, 4-5 otagly öýleri gurmak barada şertnama baglaşdyk. Häzirki wagtda olaryň 5 sanysynyň gurluşygy gidip dur. Nesip bolsa, bu toplumyň gurluşygyny-da bellenilen möhletde tamamlarys diýen tamamyz bar. Umuman, kärhanamyzda jemi 100-e golaý işçi-hünärmenler zähmet çekýän bolsa, olaryň ählisiniň hem öz borjuna düşünip, oňat görelde görkezýändikleri bizi guwandyrýar. Nesip bolsa, geljekde-de hemmämiz agzybirlikli zähmet çekip, täze-täze ymaratlary, ýaşaýyş jaýlaryny gurup, Gahryman Arkadagymyzyň we Arkadagly Gahryman Serdarymyzyň biz — telekeçilere bildirýän uly ynamyny ödemäge çalşarys.

Häzirki tomus günlerinde Daşoguz welaýatynyň çar tarapynda zähmetsöýer daýhanlaryň uly yhlasy bilen gurşalyp, idegi ýetirilýän, barha boý alyp, gül-gunçalara beslenýän gowaçaly meýdanlarda zerur işler bilen meşgullanýan adamlara, bejergi geçirýän kuwwatly traktorlara gabat gelmek bolýar. Olaryň janypkeşlikli, sazlaşykly hereketleriniň döredýän özboluşly, ýakymly görnüşlerini synlap, bar üns-aladalarynyň şeýle jogapkärli, gymmatly pursatlardan ýerlikli peýdalanyp, bereketli pagta hasylyny ýetişdirmeklige gönükdirilendigine göz ýetirýärsiň. Diňe bir Şabat etrabynda däl, eýsem, welaýatda öňdebaryjy hojalyklaryň hatarynda tanalýan S.Rozmetow adyndaky oba hojalyk paýdarlar jemgyýetiniň kärendeçi daýhanlarynyň hem bu babatdaky tagallalary hakyky zähmet joşguny bilen tapawutlanýar diýsek, ýalňyş bolmaz. Çünki olar geçen ýyllarda bolşy ýaly, Halkara parahatçylyk we ynanyşmak ýylynda-da ene toprakdan «ak altyn» öndürmekde öz öňlerinde belent maksatlary goýmak bilen, ähli gujur-gaýratlaryny gözegçilik edýän meýdanlaryndaky gowaçalaryň göwnejaý ösmegini, hasyl düwünçeklerini emele getirmegini gazanmak ugrundaky gaýragoýulmasyz aladalara siňdirýärler. Şeýlelikde, paýdarlar jemgyýetiniň jemi 7,5 müň gektardan ybarat gowaça meýdanynyň her birinde ideg çäreleriniň talabalaýyk amala aşyrylmagy üpjün edilýär. Şonda gowaçalary iýmitlendirmek, haşal otlardan arassalamak, hatar aralaryny ýumşatmak, ösüş suwuny tutmak ýaly çäreleriň öz wagtynda, ýokary hilli ýerine ýetirilmeginiň örän oňat netijeleri berýändigini olaryň gapdalyndan geçeniňde hem bilip bolýar. Sebäbi meýdanlarda endigan ösýän gowaçalaryň göni hem-de berdaşly hatarlary bu barada anyk «gürrüň» berýär. Belli bolşy ýaly, bu ýerde tejribeli topar ýolbaşçylarynyň, öz işini birkemsiz bilýän kärendeçi daýhanlaryň köp sanlysy zähmet çekýär. Şoňa görä-de, olaryň haýsy biri bilen söhbetdeş bolsaň, bereketli pagta hasylyny kemala getirmekligiň öz esasy wezipesi bolup durýandygyna oňat düşünýändigi mälim bolýar. Bu bolsa olaryň gazanýan ýokary netijeleriniň, guwandyryjy üstünlikleriniň girewi hasaplanylýar. Paýdarlar jemgyýetiniň «Gülüstan» diýlip atlandyrylýan kärendeçiler toparynda şu ýyl 215 gektar meýdana gowaça ekilip, onuň kadaly gögerişi gazanylypdyr. Tejribeli daýhan Ahmet Ýoldaşowyň ýolbaşçylyk edýän bu toparynda jemi 80 sany kärendeçi pagta hasylyny ýetişdirmekde iş alyp barýar. Olaryň köpüsiniň ýylyň-ýylyna bu ugurda uly üstünliklere eýe bolýandyklaryny hem aýdyp geçmek zerurdyr. Şeýle başarjaň kärendeçileriň hatarynda Göwher Kerimowanyň, Merdan Allaýarowyň, Ikram Nurmetowyň, Mädýar Hudaýarowyň, Adalat Abdyllaýewanyň we beýlekileriň atlaryny tutmak bolar. Topar ýolbaşçysynyň aýtmagyna görä, şu mahala çenli bu ýerde gowaçalar birnäçe sapar iýmitlendirilip, olara iki sapar suw berlipdir, hatar aralary ýumşadylypdyr. Häzirki döwürde bolsa olara üçünji ösüş suwuny tutmak öndürijilikli dowam etdirilýär. Bu ugurda ýokarda ady agzalan, şonuň ýaly-da olaryň göreldesine eýerýän kärendeçi daýhanlaryň ençemesi ýadawsyzlyk görkezýärler. Paýdarlar jemgyýetiniň pagtaçy daýhanlary şu şöhratly ýylymyzda Watan harmanyna «ak altyn» goşmak babatda özleri üçin has hem belent sepgitleri nazarlaýarlar. Olaryň sözüniň işden aýra çykmaýandygyny bolsa geçen ýyllaryň netijeleri hem tassyklap gelýär. Ýöne olaryň bu ýyl bol hasyla ynamlary has-da berk diýsek, dogry bolar. Sebäbi muny ussat pagtaçylaryň şu günlerdäki iş depginleri öz-özünden aýdyp dur.

Hormatly Prezidentimiz sanly ulgam arkaly geçirýän iş maslahatlarynda Halkara parahatçylyk we ynanyşmak ýylynda beýleki ekinler bilen bir hatarda, gowaçanyň bol hasylyny kemala getirmek ugrunda alnyp barylýan möwsümleýin çäreleriň depginini ýokarlandyrmak barada möhüm tabşyryklary berýär. Olaryň öz wagtynda berjaý edilmegine gönükdirilen aladalar Daşoguz  welaýatynyň hem ähli künjeklerinde giňden ýaýbaňlandyrylýar. Şonuň netijesinde häzirki jogapkärli döwürde gowaçalaryň ideg işleri öndürijilikli barýar. Häzirki günlerde gowaça bejergisini talabalaýyk dowam etdirýän Görogly etrabynyň pagtaçy daýhanlarynyň hem çekýän agzybirlikli zähmetiniň oňat netijeleri berýändigini olaryň garamagyndaky meýdanlara nazar aýlanyňda anyk görmek mümkin. Çünki olaryň ýadawsyz yhlaslary bilen idegi ýetirilýän gowaçalar günsaýyn boý alyp, irki hasyl düwünçeklerini, gül-gunçalary emele getirýärler. Munuň özi altyn güýzdäki bereketli hasylyň güwäsi hökmünde diňe bir pagtaçy daýhanlary däl, eýsem, hemmeleri guwandyrýar. Etrabyň Hüdük Myradow adyndaky daýhan birleşiginiň kärendeçi daýhanlary hem häzirki günlerde gowaçalary haşal otlardan arassalamak, iýmitlendirmek, suwarmak, olaryň hatar arasyny ýumşatmak ýaly derwaýys çäreleri amala aşyrmakda öňe saýlanýarlar. Bu bolsa olaryň ekin meýdanlarynda ir ertirden giç agşama çenli joşgunly zähmetiň möwç urýandygyny görkezýär. Belli bolşy ýaly, şu ýylyň baharynda daýhan birleşigi boýunça jemi 950 gektar meýdanda gowaça ekişi geçirilip, kadaly gögeriş gazanylypdyr. Şeýlelikde, öz meýdanlaryndaky ýaşajyk düýpleri daýhan yhlasy bilen gurşap alan kärendeçiler olaryň çalt hem gyradeň ösüşini üpjün edipdirler. Tomus paslynyň häzirki günlerinde-de olar bu babatdaky aladalaryny guramaçylykly alyp barmak bilen, bereketli hasylyň binýadyny goýýarlar. Daýhan birleşiginiň Arazbaý Kakajanow tarapyndan ýolbaşçylyk edilýän 1-nji kärendeçiler toparynyň agzalary şu ýyl 193 gektar meýdanda ak pagtanyň bol hasylyny kemala getirmegi maksat edinip, öz işlerini şoňa laýyk alyp barýarlar. Şunlukda, olar öz kärende meýdanlaryndaky gowaçalary birnäçe gezek haşal otlardan arassalap, iýmitlendirip, olara ösüş suwuny beripdirler. Şonuň netijesinde toparyň ähli meýdanlarynda gül-gunçalaryny artdyrýan berdaşly gowaça düýpleriniň uzyn hatarlary ünsi çekýär. Ýeri gelende aýtsak, bu toparda Sähetmyrat Aşyrow, Arazgeldi Pirjikow, Gülhan Annaýewa ýaly öz işine ökde kärendeçiler her ýyl hem öz kärende meýdanlaryndan ýokary hasyl almagy başarýarlar. Olaryň häzirki dowam edýän ýylymyzda bolsa bu babatda öz öňlerinde has-da belent sepgitleri goýýandyklaryny bellemek gerek. Sebäbi toparyň her bir agzasy şu günlerde gowaça meýdanlarynda geçirilen bejergi çäreleriniň bol hasyl ýetişdirmekde örän uly ähmiýetiniň bardygyna oňat düşünýär. Munuň özi ideg işleriniň talabalaýyk bolmagynyň esasy şertleriniň biridir. Bu kärendeçiler toparynyň ýolbaşçysy Arazbaý Kakajanowyň daýhançylykda 45 ýyldan gowrak tejribesi bar. Ol şu döwrüň esasy böleginde häzirki kärinde, ýagny topar ýolbaşçysynyň wezipesinde zähmet çekip gelýär. Bu hem toparda ýylyň-ýylyna ene toprakdan bereketli «ak altyn» hasylynyň ýygnalmagyna öz düýpli täsirini ýetirýär. Çünki toparyň agzalaryny gowaça meýdanlarynda ýylyň dowamynda alnyp barylýan derwaýys işlere öz wagtynda gönükdirmek, şonda her bir çäräniň oňat netijeleri bermegini gazanmak bu tejribeli daýhanyň ukyp-başarnygyna bagly bolýar. Bu toparyň, şonuň bilen birlikde, daýhan birleşiginiň ähli pagtaçy daýhanlarynyň şu ajaýyp ýylymyzda belent maksatlary bar. Ol hem bolsa ene toprakdan bol hasyl öndürip, ata Watanymyzyň uly harmanyna saldamly goşant goşmakdan ybarat. Zähmetsöýer adamlaryň häzirki günlerdäki iş-aladalary munuň şeýle boljakdygyndan habar berýär.

Halkara parahatçylyk we ynanyşmak ýylynyň bereketli bugdaý hasylynyň ýygnalan meýdanlarynda Daşoguz welaýat «Obahyzmat» önümçilik birleşiginiň etraplardaky önümçilik kärhanalarynyň mehanizatorlary sürüm işlerini geçirýärler. Bu babatda Şabat etrabynda alnyp barylýan işler hem ýokary öndürijiligi bilen tapawutlanýar. Etrabyň «Obahyzmat» önümçilik kärhanasynyň kuwwatly traktorlarynyň 20-den gowragynyň güýjünden öndürijilikli peýdalanylyp, her gün ýüzlerçe gektar meýdanda bu çäre agrotehniki talaplara laýyklykda geçirilýär. Sürümiň ýokary depginde dowam etdirilmegine kärhananyň tejribeli mehanizatorlaryndan Şahruh Reýimbaýew, Haýrulla Allamow, Allaberen Ýoldaşow, Jöwlan Täjimow we beýlekiler has-da uly goşant goşýarlar. Şeýlelikde, şu mahala çenli etrabyň «Gülüstan», «Dostluk», «Medeniýet» daýhan birleşikleriniň, S.Rozmetow adyndaky oba hojalyk paýdarlar jemgyýetiniň ekin meýdanlarynyň köp böleginde sürüm işiniň göwnejaý guralyp, oňat netijeleriň gazanylandygyny aýtmak bolar. Bu möhüm çäräniň talabalaýyk alnyp barylmagynda traktorlara hem-de olaryň iş gurallaryna ýangyç-tehniki hyzmatlaryň iş üstünde ýola goýulmagy, mehanizatorlar üçin oňaýly dynç alyş şertleriniň döredilmegi öndürijiligi artdyryp, oňat netijeleri berýär. Şunlukda, etrapda galla meýdanlaryny güýzki bugdaý ekişi möwsümine birkemsiz taýýarlamakda esasy çäreleriň biri hasaplanylýan şüdügär sürümini bellenilen möhletlerde tamamlamaga mümkinçilik bar. Bu bolsa soňraky çärelere irki döwürlerde girişmäge ýol açar.