Garaşsyz, baky Bitarap ýurdumyzyň beýleki künjeklerinde bolşy ýaly, Daşoguz welaýatynyň çäklerinde hem Halkara parahatçylyk we ynanyşmak ýylynda ýetişdirilen bereketli pagta hasylyny ýitgisiz ýygnamak ugrundaky çäreler giň gerimde amala aşyrylýar. Şonuň netijesinde şu günler kärendeçi daýhanlaryň, olaryň kömekçileriniň ýadawsyz zähmeti bilen kabul ediş bölümlerine ugradylýan «ak altynyň» möçberi barha artyp, harmanlaryň beýgelmegi üpjün edilýär. Munuň özi ezber pagtaçylarymyzyň öňde goýlan belent sepgitlere tarap ynamly gadam urýandyklaryny aýdyň görkezýär. Şu ýyl Watan harmanyna pagta tabşyrmak baradaky meýilnamalaryny üstünlikli berjaý edip, daýhan birleşiklerinde, etraplarda gazanylýan öňegidişliklere mynasyp goşant goşýan zähmetsöýer kärendeçileriň barha köpelýändigi örän guwandyryjydyr. Olardan Köneürgenç etrabynyň «Täze güýç» daýhan birleşiginiň kärendeçisi Maksat Meredow 12 gektar meýdandan 25,  şu etrabyň «Hakykat» daýhan birleşiginiň kärendeçisi Garýagdy Hojamedow 3,1 gektardan 9,9, Gubadag etrabynyň «Döwletli» daýhan birleşiginiň kärendeçileri Akmyrat Ataýew 2 gektardan 5, Aýgözel Hojaýewa 1 gektar ýerden 2,6, Mamagül Kakajanowa şonça meýdandan 2,5, Görogly etrabynyň «Berkarar» daýhan birleşiginiň kärendeçileri Jeren Haýydowa 1 gektardan 4,7, Saparbaý Eminow şonça ýerden 2,9, Akmeňli Gullaýewa 1 gektar ýerden 2,7 tonna «ak altyn» ýygnap, köplere görelde boldular. Bu guwandyryjy netijeler kärendeçileriň «ak altynyň» bol hasylyny ýetişdirmekde ýylyň başyndan bäri yhlasly zähmet çekendikleriniň alamatydyr. Welaýatyň gowaça meýdanlarynda entek hasyl köp. Ony gysga wagtyň dowamynda yrýasyz ýygnap, harmana goşmak esasy wezipe bolup durýar. Jemgyýetçilik guramalarynyň wekilleri, medeniýet işgärleri hem pagtaçylaryň «armasyny» ýetirmek boýunça möhüm işleri alyp barýarlar. Bu bolsa daýhanlary uly üstünliklere ruhlandyrýar.    

Güýz paslynyň häzirki günlerinde, ýurdumyzyň ähli künjeklerinde bolşy ýaly, Daşoguz welaýatynyň Şabat etrabynyň Sadulla Rozmetow adyndaky oba hojalyk paýdarlar jemgyýetiniň pagtaçy daýhanlary hem Halkara parahatçylyk we ynanyşmak ýylynda köp yhlas siňdirip ýetişdiren «ak altyn» hasylyny çalt hem-de ýitgisiz ýygnap, Watan harmanyna tabşyrmak maksady bilen, ak hanalara beslenen giň pellerde joşgunly zähmet çekýärler. Munuň şeýledigini olaryň bu babatda gazanýan netijeleri aýdyň görkezýär.  Şu şanly ýylda, ýurdumyzda pagtaçylygy ösdürmek ugrunda amala aşyrylýan  taýsyz tagallalar bilen ruhlanan kärendeçi daýhanlar bereketli hasyly kemala getirdiler. Şeýlelikde, olar pagta ýygymyna öňdäkileriň hatarynda girişdiler. Häzirki wagta bu baradaky aladalaryň ähli kärendeçiler toparlarynda hem giňden ýaýbaňlandyrylandygyny, olaryň iş depgininiň günsaýyn ýokarlanýandygyny aýdyp bolar. Hojalygyň «Nowruz» diýlip atlandyrylýan 2-nji kärendeçiler toparynyň pagta meýdanlarynda ýygymyň barşy gyzgalaňly barýar. Bu topara tejribeli pagtaçy, Türkmenistanyň «Watana bolan söýgüsi üçin» medalynyň eýesi Bahram Täjimyradowyň ençeme ýyl bäri ýolbaşçylyk edýändigini hem bellemek gerek. Şu geçen döwürde bu topar pagta öndürmek baradaky ýyllyk meýilnamasyny yzygiderli ýerine ýetirip gelýär.  Topar ýolbaşçysynyň şu ýylda hem bu babatda uly üstünliklere eýe boljakdygyna berk ynamy bar. Sebäbi atyzlarda hasyl diýseň köp. Gowaçalaryň her düýbünde ýetişen körekler, açylan gozalar az däl. Bu kärendeçi daýhanlaryň, mehanizatorlaryň ýylyň başyndan bäri çeken ýadawsyz zähmetleriniň netijesi diýsek dogry bolar. Çünki olar gowaça ekişine taýýarlykdan başlap, ondan soňraky ideg çäreleriniň ählisini ýokary guramaçylyk derejesinde alyp bardylar. Şonda işleriň öndürijiligi bilen birlikde, olaryň hiline-de aýratyn üns berlendigini bellemek zerur bolup durýar. Şu ýyl toparyň 110 sany agzasy jemi 296 gektar meýdanda pagtanyň bol hasylyny ýetişdirmek ugrundaky aladalar bilen meşgul bolupdyr. Şu kärendeçi daýhanlaryň aglaba köpüsiniň öz kärinde uly tejribelere eýedigi işde öňegidişlikleriň gazanylmagyna düýpli ýardam beripdir. Şeýle başarjaň pagtaçylaryň hatarynda her biri 3,4 gektar meýdana gözegçilik edýän Muhabbet Seýidowa, Inabat Sapýazowa, Reýhan Babanyýazowa we beýlekiler bar. Ondan başgada, pagta ýygymynda saýlanýan kärendeçiler örän köp. Olardan Gülüstan Babajanowa 1,4 gektar ýerden 4,5, Gülnar Saparbaýewa 1 gektardan 2,5, Daniýar Rozmetow 2,5 gektardan 5, Jemile Mädrahymowa 2 gektar meýdandan 4,5 tonna pagtany harmana goşdy. Munuň pagta ýygymynyň ilkinji günlerinde şeýle bolandygyny aýtmak gerek. Entek kärendeçileriň atyzlarynda,  pagta örän köp. Görnüşi ýaly, paýdarlar jemgyýetiniň pagtaçylary häzirki amatly günleriň her pursadyndan ýerlikli peýdalanyp, hasyl ýygymyna ähli gujur-gaýratlaryny gönükdirýärler. Olaryň köp sanlysynyň Watan harmanyna pagta tabşyrmak baradaky ýyllyk meýilnamalaryny ýakyn günlerde ýerine ýetirmäge mümkinçilikleriniň bardygyny aýtmak bolar.

Golaýda TAP-nyň Daşoguz welaýat komitetiniň Türkmen oba hojalyk instituty bilen bilelikde guramagynda şu institutyň mugallymlarynyň, talyp ýaşlarynyň welaýatyň Şabat etrabynyň Sadulla Rozmetow adyndaky oba hojalyk paýdarlar jemgyýetiniň başlygy, Türkmenistanyň Hormatly il ýaşulusy Kamil Rozmetow bilen duşuşygy boldy.   Duşuşykda Türkmenistanyň  Prezidentiniň Permanyna laýyklykda, mukaddes Garaşsyzlygymyzyň 34 ýyllyk şanly baýramynyň öň ýanynda «Türkmenistanyň Hormatly il ýaşulusy» diýen belent ada mynasyp bolan Kamil Rozmetow öz durmuş hem-de zähmet ýoly, ýolbaşçylyk edýän paýdarlar jemgyýetinde ýurdumyzyň oba hojalyk pudagyny ösdürmek babatda öňde durýan wezipeleriň üstünlikli ýerine ýetirilmegine mynasyp goşant goşmak ugrunda alnyp barylýan işler, gazanylýan üstünlikler hakynda giňişleýin gürrüň berdi. Duşuşygyň dowamynda institutyň talyplary Kamil Rozmetow bilen özlerini gyzyklandyrýan ugurlar boýunça sowal-jogap alyşdylar. Şeýlelikde, bu duşuşyk oňa gatnaşanlarda ýakymly täsirleri galdyrdy.

Halkara parahatçylyk we ynanyşmak ýylynyň bugdaý oragy döwründe Watan harmanyna galla tabşyrmak baradaky meýilnamany Daşoguz welaýatynda ilkinjileriň hatarynda üstünlikli berjaý edip, uly abraýa eýe bolan Boldumsaz etrabynyň «Döwletli» daýhan birleşiginiň ezber kärendeçileri şu ýylyň güýzki bugdaý ekiş möwsümine hem ykjam taýýarlyk gördüler. Şeýlelikde, olar welaýatda bugdaý ekişine dabaraly ýagdaýda badalga berilmeginiň yzysüre bu möhüm çärä agzybirlik bilen girişip, onuň depginini bada-bat ýokarlandyrdylar.  Geçen orak möwsüminde ýetilen belent sepgitler gallaçylary has-da gaýratly zähmet çekmäge ruhlandyrdy. Şunlukda, şu ýylyň güýzünde bugdaý ekilmegi göz öňünde tutulýan 480 gektar meýdanyň ählisinde sürüm, tekizleme işleri öz wagtynda amala aşyryldy. Bu bolsa ýerleri suwdan gandyrmaga, olaryň talabalaýyk taba gelmegine şert döretdi. Şunuň netijesinde häzirki günlerde bugdaý ekişini öndürijilikli alnyp barylýar. Belli bolşy ýaly, daýhan birleşiginde kärendeçileriň 210-sy galla hasylyny ýetişdirmek barada şertnama baglaşypdyr. Olaryň köpüsiniň bu babatda uly iş tejribeleriniň bolmagy her bir möwsümde öňegidişlikleriň gazanylmagyna ýardam berýär. Häzirki dowam edýän bugdaý ekişinde-de munuň şeýle bolýandygyny aýtmak gerek. Bu ýerde bugdaý ekişiniň şeýle öndürijilikli alnyp barylmagynda Nurnepes Çaryýew, Agamyrat Gazakow, Öregeldi Barlyýew ýaly mehanizatorlaryň uly goşantlarynyň bardygyny bellemek zerur bolup durýar. Sebäbi olar özlerine berkidilen traktorlara ökdelik bilen erk edip, her bir çäräni göwnejaý ýerine ýetirmegiň hötdesinden gelýärler. Munuň özi gündelik onlarça gektar meýdanda ýokary hilli ekiş geçirilmegine mümkinçilik berýär. Irki ekiş geçirilen meýdanlarda bugdaýlar kadaly gögerip, atyzlara görk berip ugrady. Nesip bolsa, olaryň idegine hem aýratyn üns bererler. Bu hem kärendeçi daýhanlaryň geljek ýylda has hem belent harmanlary döretmeklerini üpjün eder.

Halkara parahatçylyk we ynanyşmak ýylynyň ýygym möwsümine ýokary ruhubelentlik bilen girişen Daşoguz welaýatynyň pagtaçy daýhanlary giň meýdanlarda kemala getirilen bereketli hasyly çalt hem-de ýitgisiz ýygnap, Watan harmanyna tabşyrmak ugrundaky aladalary barha giňden ýaýbaňlandyrýarlar. Mälim bolşy ýaly, şu möwsümde jemi 140 müň gektarda bu işi amala aşyrmak wezipesi durýar. Şoňa görä-de, zähmetsöýer pagtaçylar häzirki günleriň amatly pursatlaryndan ýerlikli peýdalanyp, ýokary netijeleri gazanýarlar. Bu hem pagta harmanlarynyň günsaýyn belende galmagyna ýardam berýär. Bu babatda aýdylanda, Akdepe etrabynda hem giň gerimli çäreleriň durmuşa geçirilýändigini bellemek bolar. Munuň şeýledigini etrabyň Rejepguly Ataýew adyndaky daýhan birleşiginiň pagtaçylarynyň alyp barýan işleri-de aýdyň tassyklaýar. Bu daýhan birleşiginiň agzalary şu ýyl 1,5 müň gektar meýdanda bol hasyl ýetişdirip, ony ýygnamaklyga öňdäkileriň hatarynda girişdiler. Şonda bu ugurda iş alyp barýan 760-dan gowrak kärendeçiniň ählisi ilkinji günlerden ýygymyň depginini ýokarlandyrdylar. Olaryň hatarynda Guwanç Nuryýew, Ogulnabat Meredalyýewa, Umyt Meredow we beýlekiler bar. Şeýlelikde, birleşigiň pagtaçy daýhanlarynyň şan-şöhrata beslenýän ýylda uly üstünliklere eýe boljakdyklaryna ynam döredýär.

Halkara parahatçylyk we ynanyşmak ýylynda edermen babadaýhanlarymyzyň kemala getiren bereketli pagta hasylyny öz wagtynda ýygnap, Watan harmanyna tabşyrmak esasy wezipeleriň biri bolup durýar. Türkmenistanyň Prezidenti şu ýylyň 5-nji sentýabrynda sanly ulgam arkaly geçirilen Türkmenistanyň Ministrler Kabinetiniň nobatdaky mejlisinde bu barada aýtmak bilen, ýurdumyzyň welaýatlarynda bu möhüm çärä 10-njy sentýabrda girişmäge ak pata berdi hem-de il sylagly ýaşululardan «Bismilla» bilen başlap bermegi haýyş etdi. Şu mynasybetli Daşoguz welaýat häkimliginiň mejlisler eýwanynda welaýatyň ýolbaşçylarynyň, jemgyýetçilik guramalarynyň wekilleriniň, il sylagly ýaşulularyň, oba hojalyk işgärleriniň gatnaşmaklarynda maslahat geçirildi. Maslahatda welaýatyň häkimi Döwletgeldi Babaýew çykyş edip, yhlasly zähmet siňdirilip ýetişdirilen «ak altyny» ýygnamak ugrundaky işlere badalga berilmegine bagyşlanan dabara bilen hemmeleri gutlady, hormatly Prezidentimiz Arkadagly Gahryman Serdarymyza pagta ýygymyna başlamaga beren ak patasy, pagtaçy daýhanlaryň yhlasly zähmet çekmekleri, ýokary netijeleri gazanmaklaryna döredýän oňaýly mümkinçilikleri üçin tüýs ýürekden hoşallyk sözlerini aýtdy. Soňra çykyş edenler möwsümde öňde durýan möhüm wezipeler barada belläp, hasyl ussatlarymyza üstünlikleriň hemra bolmagyny arzuw etdiler. Çykyşlardan görnüşi ýaly, şu möwsümde welaýat boýunça 140 müň gektar meýdanda ýetişdirilen bereketli  hasyly ýitgisiz ýygnap alyp, 275 müň tonna pagtany döwlete tabşyrmak meýilleşdirilýär. Bu wezipäniň üstünlikli ýerine ýetirilmegi üçin ähli zerur şertler döredildi. Pagta ýygýan kombaýnlar, hasyly harmana daşamakda ulanyljak ulaglar öz wagtynda abatlanylyp, kabul ediş nokatlary gerekli enjamlar bilen üpjün edildi. Şeýlelikde, möwsümiň dowamynda işleriň bökdençsiz alnyp barylmagyna ýeterlik şert döredildi. Welaýatda pagta ýygymyna girişilmegi mynasybetli, welaýat Taryhy we ülkäni öwreniş muzeýinde, Türkmen oba hojalyk institutynda, pagta arassalaýjy kärhanasynda guralan çäreler hem gatnaşyjylarda uly gyzyklanma döredip, ýakymly täsirleri galdyrdy. Olarda halkymyzyň taryhy barada maglumatlar berlip, ýaşlara hünär öwretmekde, önümçilikde ýetilen derejeler şöhlelendirildi. Şeýle uly ähmiýetli waka bilen baglanyşykly dabaralaryň yzy Şabat etrabynyň S.Rozmetow adyndaky oba hojalyk paýdarlar jemgyýetiniň pagta meýdanynda dowam etdi. Bitgin gowaça düýplerindäki ak hanalar Gün nuruna öwşün atýan bu giň atyzyň töweregi toý görnüşleri bilen bezelipdir. Bu ýerde bezemen sahna, ak öýler, pagta ýygnaýan, daşaýan tehnikalaryň, ulaglaryň uzyn hatarlary halkymyzyň milli gymmatlyklarynyň, oba hojalyk, dokma pudaklarynda öndürilen önümleriň, olarda ulanylýan serişdeleriň sergileri bu ýere ýygnananlaryň ünsüni çekdi. Garaşylýan pursadyň gelip ýetmegi bilen, il sylagly ýaşulular welaýatymyzda pagta ýygymynda işleriň şowly, gadamlaryň batly bolmagyny dileg edip,  «Bismilla» bilen atyza girip, pagta hanalaryny ýygyp başlaýarlar. Olaryň ýagşy arzuw-dileglerine goşulan dabara gatnaşyjylar el çarpyşmalar bilen öz buýsançlaryny, guwançlaryny beýan edýärler. «Ak altyndan» kemsiz ýüklenen bezemen ulag kerweni ýola düşüp, gadymy Köneürgenç şäherindäki döwrebap pagta arassalaýjy kärhanasynyň derwezesinden girýär. Şunuň bilen baglylykda bu ýerdäki dabaranyň hem şowhuny belende galýar, kärhananyň giň howlusyna ýygnanan toý märekesi olaryň hereketine uly guwanç bilen syn edýär. Öňden gelýän ulag ilkinji bolup terezä münensoň, onuň getiren pagtasynyň agramy ölçenilýär. Soňra onuň öz ýüküni bellenilen ýere düşürmegi bilen peýda bolan bereketli harmanyň ýanyna gelen il sylagly ýaşulular ak hanalary ýüzlerine sylyp, ýagşy arzuwlary dile getirýärler.  Şeýle şatlyk-şowhuna, toý ruhuna beslenen dabaralar bilen welaýatlarda badalga berlen pagta ýygymy möwsüminde zähmetsöýer babadaýhanlarymyza uly üstünlikler ýar bolsun!      

Pagta hasylynyň ýygnalýan, daşalýan hem-de gaýtadan işlenilýän döwründe ýangyn howpunyň döremeginiň öňüni almak maksady bilen, welaýat Polisiýa müdirliginiň ýangyn howpsuzlygy bölümi şulary ýatladýar. Pagta ýygymyna gatnaşjak tehnikalaryň ýangyn howpsuzlyk düzgünlerine, ýangyna garşy göreş çäreleriniň geçirilmegine jogapkär adamlar sürüjileriň arasynda düşündiriş işlerini geçirmeli, tehnikalary hökmany ýagdaýda keçe, pil, çarşak, ot söndüriji enjamlar, olaryň tüsseçykarlaryny uçgun söndüriş enjamlary bilen göwnejaý üpjün etmeli. Tehnikalaryň sürtülýän, çendenaşa gyzýan ýerlerine pagta übtükleriniň düşmezligi üçin, olara mehanizatorlaryň öz wagtynda gözegçilik etmekleri zerurdyr. Pagta açyk meýdançalarda, buntlarda saklanmaly. Buntlaryň ýangyna garşy araçäkleri otuz metr bolmaly. Pagta buntlaryna on metrden az bolan araçäkde mehanizasiýa enjamlaryny ýerleşdirmek, pagta harmanlarynyň çäginde awtoulag serişdelerine çalgy ýagyny, ýangyç guýmak, pagta ýükleýjileri näsaz ýagdaýda ulanmak, uçgun söndüriş enjamlary bolmadyk awtoulaglary harmanlaryň çägine goýbermek gadagan edilýär. Awtoulaglaryň, traktorlaryň nowalarynyň üstüne ýüklenen pagtany syk dokalan mata bilen örtmezden daşamak, awtoulaglary, traktorlary uçgun söndüriş enjamy ýok halatynda ulanmak, üç sany tirkegden köp daşamak talabalaýyk däldir. Pagta saklanylýan ýerler ýangyna garşy suw çeşmeleri, ýangyn söndüriji awtoulaglar, suw sorujylar, ýangyn-tehniki serişdeler bilen doly üpjün bolmaly. Ýangyna garşy suw çeşmeleri hereket edýän kadalaşdyryjy düzgünnamanyň talaplaryna laýyk bolmaly. Suw çeşmeleriniň göwrümi ýangyn söndürilmegi üçin dyngysyz suw berilmegini üç sagatdan az bolmadyk wagtda üpjün etmäge laýyk gelmelidir.  

Ýurdumyzyň ähli ýerinde bolşy ýaly, Daşoguz welaýatynda hem bugdaý ekişine badalga berildi Türkmenistanyň Prezidentiniň şu ýylyň 29-njy awgustynda Türkmenistanyň Ministrler Kabinetiniň sanly ulgam arkaly geçirilen nobatdaky mejlisinde Halkara parahatçylyk we ynanyşmak ýylynyň güýzki bugdaý ekiş möwsümine dabaraly ýagdaýda girişmek hem-de ony guramaçylykly dowam etdirmek barada beren tabşyryklaryndan ugur alnyp,welaýatlarda bu möhüm çärelere ykjam taýýarlyk görüldi. Daşoguz welaýatynda bugdaý ekişine badalga berilmegine bagyşlanan dabaralar giňden ýaýbaňlandyryldy. Şu waka mynasybetli, welaýat häkimliginiň mejlisler eýwanynda guralan maslahata welaýat, etrap häkimlikleriniň ýolbaşçylary, jemgyýetçilik guramalarynyň wekilleri, edara-kärhanalaryň, daýhan birleşikleriniň hünärmenleri, gallaçy daýhanlary, il sylagly ýaşulular gatnaşdylar. Maslahatda ýaýbaňlandyrylan çykyşlarda bellenilişi ýaly, öňde duran möwsümde welaýat boýunça 145 müň gektara bugdaý ekmek meýilleşdirilip, bu wezipäniň üstünlikli berjaý edilmegi üçin ähli zerur çäreler görüldi. Şeýlelikde, ekişde peýdalanyljak tehnikalar, olaryň gurallary bir hatar gözden geçirilip, doly abatlanyldy, tohum, dökün serişdeleri ýeterlik möçberlerde taýýar edildi. Şonuň ýaly-da tehnikalara, mehanizatorlara iş üstünde hyzmat etmek boýunça derwaýys çäreler bellenildi. Munuň özi bugdaý ekişiniň bökdençsiz hem-de talabalaýyk dowam etdirilmegine mümkinçilik berer. Bugdaý ekişi möwsümine badalga berilmegi mynasybetli welaýat Taryhy we ülkäni öwreniş muzeýinde, Türkmen oba hojalyk institutynda, galla önümleri, tohum taýýarlaýyş kärhanalarynda geçirilen çäreler hem olara gatnaşyjylarda uly täsir galdyrdy. Olar halkymyzyň gymmatly mirasyny synlap, hünär öwrenmek üçin döredilen şertler, önümçilik işleriniň barşy bilen tanyş boldular. Dabaralara gatnaşyjylar soňra welaýatyň bugdaý ekişine girişilmegi mynasybetli toý çäresiniň guralýan ýeri bolan Boldumsaz etrabynyň «Türkmenistan» daýhan birleşiginiň ekin meýdanyna geldiler. Birkemsiz sürlüp, tekizlenilip, ekişe doly taýýar edilen giň meýdanyň töweregi baýramçylyk ruhunda bezelipdir. Owadan, belent sahna, bezemen ak öýleriň, hormatly Prezidentimiziň daşary ýurtlardan satyn alyp beren kuwwatly traktorlarynyň, olaryň iş gurallarynyň görnükli hatarlary, şonuň ýaly-da milli gymmatlyklarymyzyň, oba hojalygynda ulanylýan serişdeleriň, bu pudakda öndürilen önümleriň sergileri ünsi çekip, ýakymly duýgulary döretdi. Welaýatyň sungat ussatlarynyň, bagşy-sazandalarynyň, tans toparlarynyň ata Watanymyzy, halkymyzy, Arkadagly Gahryman Serdarymyzyň durmuşa geçirýän beýik işlerini wasp edýän şirin aýdym-sazlary, joşgunly tanslary hemmeleriň göwünlerini galkyndyrdy. Garaşylan pursadyň gelip ýetmegi bilen, gallaçy daýhanlarymyzyň bugdaý ekişinde işleriniň öňe ilerlemegini, halal zähmetleriniň ýerine düşmegini dileg edip, il sylagly ýaşulular «Bismilla» bilen ilkinji bugdaý tohumlaryny meýdana sepdiler. Soňra atyzyň bir çetinde taýýar bolup duran, yzyna ekiji gurallar tirkelen kuwwatly traktorlar hatar gurap, öňe tarap sazlaşykly hereket edip başladylar. Şeýlelikde, welaýatda şanly ýylyň güýzki bugdaý ekişi möwsümine uly ruhubelentlik, belent maksatlar bilen badalga berildi. Bugdaý ekişine guramaçylykly girişilmegi mynasybetli welaýat merkezindäki «Şalykär» metjidinde toý sadakasy berildi.  

Garaşsyz, baky Bitarap ýurdumyzyň beýleki künjeklerinde bolşy ýaly, Daşoguz welaýatynda hem pagtaçy, gallaçy daýhanlar üçin has aýgytly, iş-aladalaryň köpelýän döwri geldi. Uzak wagtyň dowamynda ene topraga maňlaý derini siňdirip ýetişdiren «ak altyn» hasylyny ýitgisiz ýygnamaklyga ykjam taýýarlyk görmeli hem-de ýakyn günlerde bu işe ähli gujur-gaýratyny gönükdirmeli, golaýlap gelen güýzki bugdaý ekişine girişmegiň öň ýanynda öz mümkinçiliklerini ýene-de bir sapar gözden geçirip, ony bada-bat ýokary depgine götermegiň aladasyny etmeli. Şunlukda, häzirki günlerde islendik etrabyň, daýhan birleşiginiň, daýhan hojalygynyň ekin meýdanlarynda bu ugurlardaky işleriň gyzgalaňly barýandygyny görmek mümkin. Belli bolşy ýaly, şu ýylyň güýz paslynyň dowamynda welaýat boýunça 145 müň gektar meýdanda bugdaý ekişini geçirmek, 140 müň gektar ýerde kemala getirilen pagta hasylyny zaýasyz ýygnap almak wezipesi öňde goýulýar. Türkmenistanyň Prezidentiniň Ministrler Kabinetiniň sanly ulgam arkaly geçirilýän mejlislerinde, şonuň ýaly-da iş maslahatlarynda berýän tabşyryklaryndan, görkezmelerinden ugur alnyp, häzirki wagta çenli welaýatyň ähli ýerlerinde bu jogapkärli möwsümlere birkemsiz taýýarlyk bilen barmak boýunça degişli çäreler giň gerimde alnyp baryldy hem-de olaryň göwnejaý netijeleri gazanyldy. Şeýlelikde, şu ýyl bugdaý ekişi geçirilmegi meýilleşdirilýän meýdanlarda sürüm, tekizleme, çil çekmek işleri ýokary hilli ýerine ýetirildi. Şonuň ýaly-da etraplaryň «Obahyzmat» önümçilik kärhanalarynyň, daýhan birleşikleriniň hasabynda bar bolan kuwwatly traktorlar, olaryň iş gurallary, borona-malalar bir hatar gözden geçirilip taýýarlyk hataryna çykaryldy. Mundan başga-da, ýetişdirilen pagta hasylyny ýygnap almakda ulanyljak kombaýnlary, traktorlary, olaryň tirkeglerini hem öz wagtynda abatlamak, pagta kabul ediş bölümlerinde, harmanhanalarda enjamlaşdyrmak, derwaýys serişdeler bilen üpjün etmek babatda zerur çäreler amala aşyryldy. Bugdaý ekişine taýýarlyk görmekde welaýatyň Saparmyrat Türkmenbaşy, Köneürgenç, Boldumsaz we beýleki etraplaryň gallaçy kärendeçileriniň aýratyn yhlaslylyk görkezýändikleri örän guwandyryjydyr. Olaryň şeýle janypkeşlikli zähmetleri bilen bu ugurdaky möhüm ähmiýetli işleriň irki möhletlerde berjaý edilmegi gazanyldy. Şonda Saparmyrat Türkmenbaşy etrabynyň «Ýalkym», Köneürgenç etrabynyň «Bereket», Boldumsaz etrabynyň «Döwletli», Akdepe etrabynyň «Aşgabat», Görogly etrabynyň B.Öwezow adyndaky daýhan birleşikleriniň, Şabat etrabynyň S.Rozmetow adyndaky oba hojalyk paýdarlar jemgyýetiniň başarjaň gallaçylarynyň has-da oňat görelde görkezýändikleri bellenilmäge mynasypdyr.  Boldumsaz etrabynyň «Gubadag» daýhan birleşigi boýunça 630 gektar meýdanda bugdaý ekmek meýilleşdirilýär. Häzirki wagtda munuň üçin niýetlenilen ýerlerde ähli zerur çäreler berjaý edildi. Hojalygyň gallaçylarynyň, nesip bolsa, bugdaý ekişine bellenilen möhletde girişip, ony bökdençsiz amala aşyrarjakdyklaryna tamalary uly. Akdepe etrabynyň «Obahyzmat» önümçilik kärhanasynyň baş inženeri Jelaleddin Nasrallaýewiň aýtmagyna görä,  kärhananyň bugdaý ekişinde peýdalanyljak tehnikalarynyň ählisi öňde duran möwsüme göwnejaý taýýarlanylyp, beýleki zerur çäreler talabalaýyk geçirilipdir.Şeýlelikde,  etrap boýunça göz öňünde tutulýan 35 müň gektarda ekişiň depgininiň ýokary bolmagyna goşant goşmaga mümkinçilikleriniň bardygy mälim. Häzirki döwürde zähmetsöýer daýhanlarymyzyň, mehanizatorlarymyzyň esasy aladalarynyň biri gowaça meýdanlarynda kemala getirilen bereketli hasyly ýitgisiz ýygnap, Watan harmanyna goşmaklyga taýýarlyk işleri bilen baglanyşyklydyr. Elbetde, şu ýyl hormatly Prezidentimiziň çäksiz goldawlary bilen ruhlanyp, has-da gaýratly zähmet çeken welaýatyň pagtaçy daýhanlarynyň yhlasynyň ýokary netijeleri berendigini häzirki döwürde olaryň garamagyndaky atyz-meýdanlarda kemala gelen «ak altyn» hasyly anyk tassyklaýar. Indi bolsa öňde duran esasy wezipe ony öz wagtynda ýygnap almakdan ybarat. Belläp geçişimiz ýaly, pagtaçylarymyz bu işe ykjam taýýarlyk gördüler. Bu barada aýdylanda, Boldumsaz etrabynyň pagtaçylarynyň hem geçen döwürde guramaçylykly iş alyp barandyklaryny bellemek möhümdir. Ýeri gelende bu etrabyň babadaýhanlarynyň şu ýyl 22500 gektar meýdana gowaça ekip, onuň kadaly gögerişini gazanyp, ideg çärelerini talabalaýyk berjaý etmek bilen, ekinleriň bol hasyl toplamagyna şert döredendiklerini aýtmaly. Bu ugurda etrabyň «10 ýyl abadanlyk» daýhan birleşiginde 1600, «Zähmetkeş» daýhan birleşiginde 1400, «Bereket» daýhan birleşiginde 1000 gektar meýdanda kärendeçi daýhanlaryň çeken zähmeti görelde alarlykdyr. Munuň şeýledigini şu günlerde olaryň pagta meýdanlarynda emele gelen ajaýyp görnüşler doly subut edýär. Görnüşi ýaly, Daşoguz welaýatynyň babadaýhanlary altyn güýzüň öň ýanyndaky iş-aladalara ýugrulan günleri başdan geçirmek bilen, belent sepgitlere, guwandyryjy netijelere tarap ugur alýarlar. Şeýlelikde, ýakyn günlerde olaryň kimsi döwlete pagta tabşyrmak baradaky meýilnamasyny artygy bilen ýerine ýetirip, öz belent harmanyna guwansa, kimsi ene topraga atan bugdaý tohumynyň yrýasyz gögerip, ýaşyl maýsalaryň atyz-meýdanyna berýän bezegini synlap, çäksiz lezzet alar. Oňa çenli hem ýene-de köp zähmet, ýadawsyzlyk talap edilýär. Elbetde, gallaçy, pagtaçy daýhanlarymyzyň olara hötde gelmäge mümkinçilikleri bar.    

Daşoguz welaýatynyň pagtaçy daýhanlary tomsuň ahyrky aýynyň her bir gününiň gowaçanyň bereketli hasylyny kemala getirmekde uly ähmiýetiniň bardygyndan ugur alyp, häzirki wagtda özleriniň gözegçilik edýän meýdanlarynda derwaýys bejergi işlerini ýokary depginlerde dowam etdirýärler. Şonuň bilen birlikde-de, olar Halkara parahatçylyk we ynanyşmak ýylynyň pagta ýygym möwsümine ykjam taýýarlyk görmek bilen baglanyşykly çäreleri giňden ýaýbaňlandyryp, ýetişdirilen hasyly çalt hem-de ýitgisiz ýygnap almaga doly şert döretmäge çalyşýarlar. Şeýlelikde, zähmetsöýer kärendeçileriň, daýhan hojalyklarynyň agzalarynyň häzirki döwrüň gymmatly pursatlaryndan ýerlikli peýdalanyp, gazanýan netijeleri aýratyn guwandyrýar. Bu barada gürrüň edilende, welaýatyň Görogly etrabynyň «Ýagtylyk» daýhan birleşiginiň kärendeçileriniň amala aşyrýan işleri hem hormat bilen bellenilmäge mynasypdyr. Çünki olar  şan-şöhrata beslenýän şu ýylymyzda ene toprakdan saldamly «ak altyn» hasylyny öndürmegi maksat edinip, joşgunly zähmet çekýärler. Şeýle agzybirlikli, arkalaşykly aladalaryň berýän netijeleri bolsa, olaryň gül-gunçalary, ýetişen körekleri bilen ünsi çekýän bitgin gowaçaly meýdanlarynda aýdyň görünýär. — Şu ýylyň baharynda birleşigimiz boýunça 1780 gektar meýdana gowaça ekildi — diýip, daýhan birleşiginiň baş agronomy Gulmyrat Taýlyýew aýdýar: — Şunlukda, olarda kadaly gögeriş gazanylyp, bejergi işlerine hem öz wagtynda girişildi. Şonuň netijesinde, ýekeleme, otag işleri, olardan soňky çäreler bellenilen möhletlerde ýerine ýetirilip, gowaçalaryň göwnejaý ösüşi üpjün edildi. Bu hem olaryň bol hasyl toplamagyna ýol açyp, meýdanlarymyzyň häzirki görnüşe gelmegine mümkinçilik berdi. Belli bolşy ýaly, daýhan birleşiginde 18 sany kärendeçiler topary hereket edip, olar 800-den gowrak pagtaçyny özlerine birleşdirýär. Bu toparlara Bilbil Gurbanowa, Güýçgeldi Ataýew we oba hojalyk işlerinde ýeterlik tejribesi bolan beýleki adamlar ýolbaşçylyk edýärler. Soňa görä-de, her bir toparda gowaça ekişine taýýarlykdan başlap, ähli işleriň guramaçylykly alnyp barylmagy bilen, şeýle oňat netijeler gazanylýar. Çünki gowaçanyň bereketli hasylyny ýetişdirmek derwaýys çäreleriň sazlaşykly, utgaşykly alnyp barylmagyny talap edýär. Bu hem köp derejede guramaçylyga bagly bolup durýar. Ýokarda aýdyşymyz ýaly, birleşikde pagtaçy kärendeçileriň uly topary zähmet çekýär. Olaryň ençemesiniň gowaçalara ideg etmekde, kemala getirilen hasyly öz wagtynda ýygnap, Watan harmanyna goşmakda ýylyň-ýylyna köplere görelde bolmagy başarýandyklaryny-da bellemek gerek. Şeýle ezber pagtaçylaryň hatarynda Ogulsoltan Gylyçnepesowanyň, Agamyrat Baýjanowyň, Aýna Gummanowanyň, Serdar Baýlakowyň atlaryny tutmak bolar. Sebäbi olaryň öz gowaça meýdanlaryndan şu ýylyň güýzünde hem bereketli hasyly ýygnap, uly üstünliklere eýe boljakdyklaryna ynamy bar. Muny olaryň häzirki döwürde boýdan-başa hasyla duran gowaçalary tassyklaýar. Elbetde, gowaçalaryň hatar arasyny ýumşatmak, olary iýmitlendirmek babatda mehanizatorlaryň bitirýän hyzmatlarynyň ähmiýeti uludyr. Şonuň üçin hem bu daýhan birleşiginde-de olara aýratyn bil baglanylmagy ýöne ýere däl. Şeýle ynamy ödemäge çalyşmak bilen, kärendeçi daýhanlaryň hoşallygyna mynasyp bolýan mehanizatorlardan Amandurdy Amanmedow, Daýanç Kösäýew, Nurýagdy Böriýew dagy barada öwgüli sözler aýdylýar. Çünki olar her bir işiň diňe bir öndürijiligine däl, eýsem, onuň hiline-de uly üns berip, şeýle uly abraý-hormata eýe bolýarlar.    Hormatly Prezidentimiziň ýurdumyzda pagtanyň öndürilişini artdyrmak barada öňde goýýan wezipeleri, olaryň üstünlikli ýerine ýetirilmegine döredýän şertleri hojalygyň  kärendeçi daýhanlaryny hem gaýratly zähmet çekmäge, belent sepgitlere ýetmäge ruhlandyrýar. Olaryň yhlasly zähmeti bilen şu ýyl has-da ýokary hasyl kemala getirilýär. Indi atyzlardaky pagta hasylyny ýygnap almaga girişilmeli günler hem ýetip geldi. Birleşikde öňde duran bu jogapkärli möwsüme hemmetaraplaýyn taýýarlykly gelmek ugrunda ähli zerur çäreler durmuşa geçirilýär.