Daşoguz welaýatynyň Köneürgenç etrabyndaky Ösümlik ýag kärhanasynyň ýanyndaky süýt önümleri bölüminiň işçi-hünärmenleriniň birleşen tagallalary bilen önüm öndürmekde ýokary netijeler gazanylýar. Şahsy hojalyklardan satyn alnan süýdüň hasabyna kärhanada «Pähim-paýhas ummany Magtymguly Pyragy» ýylynyň geçen 7 aýynda süýt we süýt önümleri ýokary hilli taýýarlanyp, bellenen meýilnama üstünlikli ýerine ýetirildi. Şonda süýt önümleriniň 165, mesge ýagynyň 38, peýnir-doragyň 4, turşadylan süýdüň 78 tonnasy sarp edijilere ugradyldy. Kärhanada oturdylan enjamlaryň kömegi bilen önümiň ýokary hilli bolmagy üpjün edilip, barlaghanada onuň derejesi kesgitlenýär. Ýazmyrat Melebaýew, Amangül Arazgeldiýewa, Gözel Rejepowa dagyny göreldeli zähmetkeşler hökmünde görkezmek bolar. Bu kärhanada zähmet çekýän işgärleriň özlerine berkidilen işleri ýokary hilli berjaý etmekleri meýilnamanyň aýma-aý ýerine ýetirilmegine mümkinçilik berýär. Bu ýerde taýýarlanan süýt we süýt önümleri, esasan, Köneürgenç, Saparmyrat Türkmenbaşy etraplarynyň çagalar baglaryna, serhet gullugynyň bölümlerine ugradylýar. Önüm bolçulygyny döretmek ugrunda gaýratly zähmet çekýän bölümiň işgärleri iş depginlerini barha batlandyrýarlar.

«Pähim-paýhas ummany Magtymguly Pyragy» ýylynda «ak altynyň» bereketli harmanyny döretmek ugrundaky derwaýys çäreler welaýatymyzyň beýleki ýerlerinde bolşy ýaly, Daşoguz welaýatynyň Akdepe etrabynyň «Agzybirlik» daýhan birleşiginde hem giň gerimde amala aşyrylýar. Birleşigiň pagtaçy kärendeçileri häzirki wagtda 900 gektar meýdanda kadaly boý alyp, hasyl toplap, göwünlerini galkyndyrýan gowaçalaryň ideg işlerine aýratyn üns bermek bilen, oňat netijeleri gazanýarlar. Şonda bu ýerde şu dowam edýän ýylymyzda pagtaçylyk bilen meşgullanýan 560-a golaý kärendeçiniň köpüsi başgalara görelde bolmagy başarýarlar. Şeýlelikde, gowaçalary haşal otlardan arassalamak, suwarmak, zyýankeşlerden goramak bilen birlikde, olaryň ujuny çyrpmak işleri hem ýokary hilli ýerine ýetirilýär. Bu babatda zähmetsöýer kärendeçilerden Maýsa Ataýewanyň, Aýnabat Ballyýewanyň we beýlekileriň has-da tapawutlanýandyklaryny bellemek ýerliklidir. Birleşigiň pagtaçylarynyň şeýle agzybirlikli zähmeti olaryň şu ýyl uly üstünliklere eýe boljakdyklaryndan habar berýär.

Berkarar döwletiň täze eýýamynyň Galkynyşy döwründe ýurdumyzda beýleki ugurlar bilen bir hatarda, gidrogeologiýa ulgamynda hem uly işler amala aşyrylýar. Şonda Türkmenistanyň  Prezidentiniň ulgamyň tehniki-enjamlaýyn binýadyny berkitmek ugrundaky taýsyz tagallalary öz guwandyryjy netijelerini berip, alnyp barylýan gözleg-buraw işleriniň geriminiň giňeldilmegine, bu babatda öňde goýulýan wezipeleriň üstünlikli ýerine ýetirilmegine oňaýly şertleri döredýär. Golaýda «Türkmengeologiýa» döwlet korporasiýasynyň Daşoguz gidrogeologiýa ekspedisiýasyna täze, häzirki döwrüň talaplaryna laýyk ýer burawlaýjy enjamlar bilen üpjün edilen kuwwatly ulaglar gelip gowuşdy. Bu enjamlar ýeri 200 metr çuňluga çenli burawlamaga, şeýlelikde, ýerasty suwlaryň hilini, mukdaryny anyklamakda, topragyň düzümini kesgitlemekde we beýleki maksatlarda uly ýardam bermäge ukyplydyr. Bu ulaglar welaýatyň çäklerinde durmuşa geçirilýän gidrogeologiýa, gözleg-burawlaýyş işleriniň has-da ýokary depginlerde dowam etdirilmegine önjeýli goşant goşar.

Pagtaçy daýhanlar awgust aýyny gowaçalara hyzmat etmekde iň aýgytly, derwaýys döwür hasaplaýarlar. Çünki olar bu döwürde amala aşyrylan her bir çäräniň atyzlarda emele gelýän hasyla hasyl goşup, güýzde harmanlaryň has belent bolmagyna ýardam berýändigini öz tejribelerinden oňat bilýärler. Şonda hatar aralary ýumşadylyp, kadaly iýmitlendirilip, endigan suw berlen gowaça düýpleri gül-gunça, doluşan köreklere basyrynyp, munuň şeýle bolmagyny üpjün edýär. Türkmenistanyň Prezidentiniň oba hojalyk pudagynyň beýleki ugurlary bilen bir hatarda, pagtaçylygy ösdürmek baradaky taýsyz tagallalarynyň netijesinde döredilýän mümkinçiliklerden ýerlikli peýdalanmaga çalyşýan Daşoguz welaýatynyň kärendeçileri, daýhan hojalyklarynyň agzalary, mehanizatorlary şu günleriň gymmatly pursatlaryny gowaçaly meýdanlarda geçirmek bilen, ýadawsyz zähmetiň nusga bolarlyk göreldesini görkezýärler. Şeýlelikde, olaryň agzybirlikli, yhlasly aladalary bilen gurşalan ekinleriň ösmegine, hasyl toplamagyna ýol açylýar. Bu bolsa welaýatyň zähmetsöýer babadaýhanlarynyň häzirki dowam edýän, şan-şöhrata beslenýän «Pähim-paýhas ummany Magtymguly Pyragy» ýylynda 140 müň gektar meýdanda «ak altynyň» bereketli hasylyny ýetişdirip, ata Watanymyzyň belent harmanyna mynasyp goşant goşjakdyklarynyň alamatydyr. Belläp geçişimiz ýaly, häzirki günlerde welaýatyň ähli künjeklerinde esasy üns gowaça meýdanlaryna gönükdirildi. Şonda şeýle öndürijilikli barýan meýdan işlerine gatnaşýan hünärmenleriň, pagtaçy daýhanlaryň haýsy biri bilen söhbetdeş bolsaň hem öz jogapkärçiligine, öňünde goýlan wezipä pugta düşünip, döwrüň talaby bilen deň gadam urmagyň hötdesinden gelýändigine göz ýetirýärsiň. Munuň özi olaryň ählisiniň pikir-hyýalynyň bir maksada jemlenendigini aňladýar. Welaýatyň Şabat etrabynyň S.Rozmetow adyndaky oba hojalyk paýdarlar jemgyýetiniň  kärendeçi daýhanlary şu ýyl 7300 gektar meýdanda gowaçanyň bereketli hasylyny kemala getirmek ugrunda iş alyp barýarlar. Olaryň agzybirlikli zähmetiniň netijesinde, gowaça meýdanlarynda şu wagta çenli bejergi işleriniň köp bölegi talabalaýyk ýerine ýetirildi. Şonda gowaça meýdanlaryna birnäçe gezek ýerli hem mineral dökünler, ösüş suwy berildi. Olar bu işleri hasyl ýygymyna girişilýänçä dowam etdirmegi meýilleşdirýärler. Sebäbi bu üns-alada atyzlardaky berekediň has-da artmagyna düýpli ýardam berýär. Paýdarlar jemgyýetiniň gowaça meýdanlarynda häzirki peýda bolan görnüşler şeýle sazlaşykly, guramaçylykly işleriň hakykatdan hem göwnejaý netijeleri berendigini anyk tassyklaýar. Çünki bu ýerde gyradeň ösüp, saldamly hasyl toplaýan gowaça düýpleri her bir adamyň gözüni dokundyryp, onda yhlasly zähmete aýratyn guwanç döredýär. Boldumsaz etrabynyň Guwanç Atamedow adyndaky daýhan birleşiginiň kärendeçileri hem şu ýyl 1400 gektar meýdanda gowaçanyň kadaly gögerişini gazanmak bilen, häzirki wagta çenli olaryň oňat boý almagyna, hasyl toplamagyna oňaýly şertleri döretmegi başardylar. Munuň şeýle bolmagyna daýhan birleşiginiň çäklerinde gowaça bejergisine ähli güýjüň öz wagtynda gönükdirilmegi ýardam edipdir. Häzirki döwürde pagtaçy daýhanlaryň esasy aladalarynyň biri-de gowaçanyň zyýankeşlerden ygtybarly goragyny üpjün etmekden ybarat bolup durýar. Şonuň üçin hem welaýatyň ähli etraplarynda hereket edýän biokärhanalaryň işçi hünärmenleri gije-gündiziň dowamynda atyzlara gözegçilik edip, zerur bolan bioönümleri öndürip, bu ugurda zerur çäreleri durmuşa geçirýärler. Bu babatda Akdepe, Köneürgenç, Boldumsaz we beýleki etraplarda işleriň has-da guramaçylykly barýandygyny bellemek bolar. Şeýlelikde, hasylyň bereketli bolmagyna olaryň goşýan goşandy hem az däl. Öňde tomsuň ahyrky aýy, ýagny gowaça bejergisiniň möhüm döwri dur. Bu aýyň her bir gününden, pursadyndan öndürijilikli peýdalanylmagy altyn güýze uly umytlar, belent harmanlara bolan berk ynam bilen barmagyň esasy şerti bolup durýar. Şonuň üçin hem bu gün atyz-meýdanlarda ene topraga, has takygy, her düýp gowaça yhlas siňdirýän adamlaryň çekýän ýadawsyz zähmeti belent hormata mynasypdyr.

Halkymyzda «Çekseň zähmet — ýagar rehnet» diýen paýhasly söz bar. «Pähim-paýhas ummany Magtymguly Pyragy» ýylynda Daşoguz welaýatynyň gallaçy daýhanlary üçin bu, hakykatdan hem, şeýle boldy. Olar şu ýyl Watan harmanyna bereketli bugdaý hasylyny tabşyryp, zähmet üstünligini gazandylar. Mälim bolşy ýaly, Türkmenistanyň Prezidenti Türkmenistanyň Ministrler Kabinetiniň şu ýylyň 9-njy fewralynda geçirilen giňişleýin mejlisinde 2024-nji ýylyň hasylyndan başlap bugdaýyň, pagtanyň döwlet satyn alyş nyrhlaryny ýokarlandyrmak hakyndaky Karary kabul etdi. Şonuň netijesinde-de, kärendeçi daýhanlaryň, daýhan hojalyklarynyň agzalarynyň yhlasly zähmet çekip, has-da uly girdeji almaklaryna şert döredildi. Şeýlelikde, gallaçy daýhanlaryň döwlet harmanyna goşan galla hasyly üçin hasaplaşyklar öz wagtynda geçirilýär. Kärendeçileriň gazanan girdejileri kart hasaplaryna yzygiderli geçirilip, bökdençsiz ellerine almaklary üpjün edilýär. Bu hem öz oňat netijelerini berip, işleriň öňe gitmegine ýardam berdi. Häzirki wagtda Türkmenistanyň «Daýhanbank» DTB-niň Daşoguz welaýat we etrap şahamçalary tarapyndan gallaçylar bilen hasaplaşyklary geçirmek işi dowam edýär. Ýadawsyz zähmetleri bilen rysgal-döwlete eýe bolan gallaçy daýhanlar öz halal gazançlaryny ýüzlerine sylýarlar.

Berkarar döwletiň täze eýýamynyň Galkynyşy döwründe Garaşsyz ýurdumyzda tebigaty, daşky gurşawy goramak, ekologiýa abadançylygyny üpjün etmek ugrunda giň gerimli işler amala aşyrylýar. Bu işleriň kanuny esaslaryny düşündirmek, ýaşlaryň garaýyşlaryny kämilleşdirmek bilen baglanyşykly çärelere, syýasy-jemgyýetçilik, medeni-durmuş wakalaryna aýratyn ähmiýet berilýär. Ýaňy-ýakynda Türkmenistanyň Gyzyl kitabynyň 4-nji neşiriniň çapdan çykmagy bolsa «Pähim-paýhas ummany Magtymguly Pyragy» ýylynda bu ugurdaky möhüm işleriň biri boldy. Türkmenistanyň Gyzyl kitaby ozal 1985, 1999, 2011-nji ýyllarda neşir edilip, olara ýabany ösümlikleriň, haýwanlaryň seýrek duş gelýän, sany kemelýän, ýitip gitmek howpy abanýan görnüşleri girizilipdi. Täze neşiriň hem bu ýörelgelerden, olary has kämilleşdirmekden ugur alnyp, bu baradaky dünýä tejribeleri içgin öwrenilip taýýarlanylandygy bellenilýär. Munuň özi kitaba girizilen ösümlikleri, haýwanlary goramak, köpeltmek boýunça iş geçirmekde has giň mümkinçilikleri açýar. Berilýän maglumatlara görä, biziň ýurdumyzyň tebigatynyň ösümlik, haýwanat dünýäsi örän baýdyr. Başgaça aýdylanda, onuň çäklerinde oňurgasyz haýwanlaryň 12 müňden, oňurgaly haýwanlaryň 700-den gowragy gabat gelýär. Ösümlikler barada aýdylanda, diňe Garagum çölüniň ösümlik örtüginiň 6 müňden gowrak görnüşden ybaratdygyny bellemek gerek. Olaryň onlarçasy Türkmenistanyň Gyzyl kitabynyň ozalky we häzirki neşirlerine girizilendir. Daşoguz welaýatynyň sähra-çöllerinde hem bu kitapda hasaba alnan haýwanlaryň, ösümlikleriň köp sanlysy duşýar. Olaryň hatarynda oňurgaly haýwanlardan keýik, Üstýurt aýragy, gulan, saýgak, itaýy, garagulak, manul, köwük, Bobrinskiniň hem-de Blanfordyň atýalmanlary, oňurgasyz haýwanlardan wažžyldawuk antiýa tomzagy, buýnuz ganat empuza we beýlekiler bar. Şonuň ýaly-da, şu ýerde ösýän çägemik, hywa şorasy ýaly ösümlikler hem bu kitapda orun alandyr. Häzirki wagtda Türkmenistanyň Gyzyl kitabyna girizilen şu we beýleki haýwanlary, guşlary, ösümlikleri goramaklyga, köpeltmeklige aýratyn uly üns berilýär.

Häzirki wagtda Daşoguz welaýatynyň ähli künjeklerinde gowaça göwnejaý ideg etmeklige gönükdirilen çäreleriň depgini barha giň gerime eýe bolýar. Özleri barada döredilýän şertlerden ýerlikli peýdalanyp, «Pähim-paýhas ummany Magtymguly Pyragy» ýylyny guwandyryjy üstünliklere beslemegi maksat edinýän pagtaçy daýhanlar giň meýdanlarda ir ertirden giç agşama çenli öndürijilikli zähmet çekýärler. Şonuň netijesinde-de günsaýyn boý alyp, gül-gunçalara basyrynýan gowaçalar atyzlara bezeg berýär. Munuň şeýledigini welaýatyň Görogly etrabynyň çäklerinde hem görmek mümkin. Etrabyň Magtymguly adyndaky daýhan birleşiginiň pagtaçy kärendeçileriniň hem bu babatdaky derwaýys işleri guramaçylykly alyp barýandyklaryny bellemek bolar. Olar şu ýylyň baharynda jemi 1600 gektar meýdana gowaça ekip, kadaly gögeriş gazanmak bilen, onuň ideg çärelerine-de öz wagtynda girişipdirler. Şu geçen döwürde gowaçalary ýekelemek, haşal otlardan arassalamak, iýmitlendirmek boýunça işler ýokary hilli ýerine ýetirilipdir. Şu günlerde bolsa olara ösüş suwuny tutmaklygy talabalaýyk amala aşyrmak ugrunda ähli çäreler görülýär. Şeýlelikde, daýhan birleşiginiň ähli kärendeçiler toparlarynda gowaçalara ideg etmek işleri utgaşykly alnyp barylýar hem-de bu babatda oňat netijeler gazanylýar. Bu barada aýdylanda, Batyr Kuwwadowyň, Jumageldi Baýryýewiň, Tirkeş Kullyýewiň ýolbaşçylyk edýän kärendeçiler toparlarynyň agzalarynyň has-da tapawutlanýandyklaryny aýtmak bolar. Olaryň agzybirlikli zähmeti köplere görelde bolýar. Şu ýerde ady agzalan Batyr Kuwwadowyň ýolbaşçylygyndaky 14-nji kärendeçiler toparynyň zähmetsöýer daýhanlary şu ýyl 113 gektar meýdana gowaça ekipdirler. Häzirki wagtda olar gowaça bejergisine ähli gujur-gaýratlaryny gönükdirýärler. Bu babatda toparyň işeňňir agzalary hasaplanylýan Aşyrdurdy Işangulyýewiň, Mähriban Annaberdiýewanyň, Ýagmyr Galanowyň we beýlekileriň gowaçalara ideg etmekde bitirýän hyzmatlary aýratyn bellärliklidir. Çünki olar bu babatdaky zerur çäreleri öňdäkileriň hatarynda, birkemsiz berjaý edip, hasyla hasyl goşulýan häzirki döwürde öz başarjaňlyklaryny görkezýärler. Gowaça bejergisinde daýhan birleşigine degişli traktorlaryň 15-e golaýynyň, şeýle hem etrap «Obahyzmat» önümçilik kärhanasynyň tehnikalarynyň ençemesiniň güýjünden peýdalanylýar. Olara erk edip, bellenilen çäreleri göwnejaý ýerine ýetirmekde başarjaň mehanizatorlar Aýmyrat Otuzow, Geldibaý Artykgulyýew, Maksat Kuwwadow dagy işjeňlik görkezýärler. Şeýle janypkeş mehanizatorlaryň yhlasy bilen gowaçalaryň hatar arasyny ýumşatmak, joýa çekmek ýaly işleriň ýokary hilli berjaý edilmegi gazanylýar. Häzirki wagtda esasy aladalaryň biri gowaçalara ösüş suwuny bermekden ybarat bolup durýar. Daýhan birleşiginde onuň diňe bir öndürijilikli bolmagyna däl, eýsem, agrotehniki görkezmelere laýyklykda amala aşyrylmagyna hem aýratyn üns berilýär. Sebäbi suwuň tygşytly ulanylmagy onuň bisarpa harçlanylmagynyň öňüni almak bilen birlikde, gowaçalaryň kadaly ösmegine-de oňaýly täsirini ýetirýär. Muňa oňat düşünýän kärendeçiler, degişli hünärmenler derwaýys işleri durmuşa geçirýärler. Hawa, akyldar şahyrymyzyň hormatynyň has belende galdyrylýan şanly ýylynda onuň adyny göterýän bu daýhan birleşiginiň pagtaçylary joşgunly zähmet çekýärler. Olaryň «ak altynyň» saldamly harmanyny döretmegiň binýady bolan gowaçalara ideg etmekde tomus paslynyň häzirki günleriniň her bir pursadynyň ähmiýetiniň örän uludygyna göz ýetirmek bilen, amala aşyrýan çäreleri guwandyryjy üstünlikleriň gözbaşy bolup durýar.

Ýurdumyzda ähli ugurlar bilen bir hatarda telekeçiligi ösdürmäge, dünýä ülňülerine laýyk gelýän önümleri öndürmäge, telekeçiligiň dürli ugurlary bilen meşgullanmaga giň mümkinçilikler döredilýär. Şeýle başlangyçlaryň guramaçylykly durmuşa geçirilmegi bolsa ýurdumyzyň ykdysady taýdan kuwwatly döwlete öwrülmeginde, ýokary hilli önümleri öndürip, dünýäniň döwletlerine eksport edilmeginde möhüm orny eýeleýär. Ýurdumyzda telekeçilik ulgamynyň ösüşiniň gerimiň has-da giňelmegi, täze görnüşleri öz içine almagy, öndürilýän önümleriň hiliniň bäsdeşlige ukyplydygy, kärhanalarda zähmet çekýänleriň köpüsiniň ýaşlardygy örän guwandyryjy netijedir. Etraplarda gurlan ýyladyşhanalarda ýylyň ähli paslynda dürli gök-bakja önümleriniň ýetişdirilmeginiň ýola goýulmagy, olaryň oňat hilli ätiýaçlyk goruny saklamak maksadynda sowadyjylar bilen üpjün edilen ammarlaryň döredilmegi, bazarlarymyzyň hemişe azyk önümleri bilen dolup durmagy, bahalaryň elýeterli bolmagy ýurdumyzda adam hakynda edilýän aladalaryň aýdyň görkezijileridir. Özleri babatda döredilýän şertlerdir mümkinçiliklerden  ruhlanýan telekeçiler diňe bir ýa-da iki ugur bilen hem çäklenmän, ulgamyň işini kämilleşdirmek maksadynda süýji-köke önümlerini, çagalaryň isleg bildirýän doňdurmalarynyň köp görnüşlerini öndürmegi ýola goýdular. Şeýle hem telekeçiligiň giň rowaçlanmagy ýurdumyzda diňe azyk bolçulygyny döretmekde däl, eýsem, dürli gurluşyk harytlaryny, ýaşaýyş jaýlarymyzyň bezegleri bolan mebelleriň köp görnüşlerini, egin-eşikleri, aýakgaplary öndürmek hem giň gerime eýe bolýar. Türkmen telekeçileriniň öndürýän önümleri diňe bir öz bazarlarymyzda däl, daşary ýurtlaryň bazarlarynda hem uly isleg bildirilýän harytlara öwrülýär. Dünýäniň köp ýurtlarynyň bazarlarynda «Türkmenistanda öndürilen» diýlen ýazgyly harytlaryň görnüşleriniň köpelýändigi, bu harytlara bolan islegleriň artýandygy ýurdumyzda telekeçilik işlerinde, ýokary hilli önüm öndürmekde, daşary ýurtlara eksport etmekde gazanylýan üstünlikleriň netijeleridir. Ýurdumyzyň telekeçilik ulgamynda işleriň döwletimiziň, halkymyzyň bähbitleri nazara alnyp guralýandygy aýratyn bellenilmäge mynasypdyr. Çünki onda daşary ýurtlardan getirilýän önümleriň ornuny tutýan ýokary hilli önümleriň öndürilmegi milli ykdysadyýetimiziň ösüşine uly goşant bolýar. Şonuň bilen birlikde-de, ol täze iş orunlarynyň döredilmegine, şeýlelikde, ýaşlaryň olara has köp çekilmegine şert döredýär.

Daşoguz welaýatynyň dürli künjeklerinde bugdaýdyr gowaçadan başga-da ýeralmanyň, gök-bakja önümleriniň bol hasylyny ýetişdirmek ugrunda giň gerimli işler amala aşyrylýar. Bu babatda welaýatyň Akdepe etrabynyň «Şabat» daýhan birleşiginiň kärendeçileriniň durmuşa geçirýän işleri hem-de gazanýan guwandyryjy netijeleri bellenilmäge mynasypdyr. Türkmenistanyň Prezidentiniň halkymyzy öz topragymyzda öndürilen ýeralma, gök-bakja önümleri bilen ýeterlik üpjün etmek barada öňde goýýan wezipeleriniň, berýän tabşyryklarynyň üstünlikli ýerine ýetirilmegine goşant goşmak üçin birleşigiň kärendeçi daýhanlarynyň ýylyň-ýylyna yhlasly zähmet çekýändikleri örän guwandyrýar. Olaryň «Pähim-paýhas ummany Magtymguly Pyragy» ýylynda bu ugurda alyp barýan işleri hem oňat netijeleri berýär. Muny zähmetsöýer ekerançylaryň şu günlerde ýetişdirilen ýeralma hasylyny ýygnamakda, gök-bakja ekinlerine ideg etmekde bitirýän işleri-de aýdyň tassyklaýar. Sanlara salgylanyp aýdylanda, şu ýylyň baharynda daýhan birleşigiň ekin meýdanlarynyň 450 gektaryna ýeralma, 350 gektaryna sogan, 30 gektaryna bakja ekinleri, 30 gektaryna käşir, 10 gektaryna pomidor, 10 gektaryna hem kelem ekildi. Şeýlelikde, kärendeçiler jemi 900 gektar meýdanda ekerançylygyň ata-babalarymyzyň tejribelerine eýerip hem-de häzirki döwrüň mümkinçilikleriniň esasynda şol ekinlere göwnejaý idegi ýola goýdular. Bu bolsa olaryň kadaly ösmegini, hasyl toplamagyny şertlendirdi. Daýhan birleşiginde kärendeçileriň 850-den gowragy ýeralma, gök-bakja ekinlerini ýetişdirmek bilen meşgullanýarlar. Şonda olaryň köp sanlysynyň bu ekinleri ýetişdirmekde uly iş tejribeleriniň bardygyny-da aýtmak gerek. Bu hem kärendeçileriň öz eýeçiligindäki meýdanlarda her bir çäräni talabalaýyk amala aşyryp, ekinlere ýokary hilli ideg etmeklerine ýardam berýär. Bu barada gürrüň edilende, şu ýyl ýeralma hasylyny ýetişdiren kärendeçileriň çekýän yhlasly zähmetleri barada ilki bilen durup geçmek ýerlikli bolar. Sebäbi olar öz ekin meýdanlarynda agrotehniki talaplara laýyklykda iş geçirip, bol hasyl ýetişdirdiler hem-de häzirki wagtda ony ýygnap almagy guramaçylykly dowam etdirýärler. Jumabaý Haýdarjanowyň 3, Serdar Şeripbaýewiň 2,4, Fatima Jumabaýewanyň 2, Kahraman Jumanyýazowyň 1,5 gektar kärende meýdanlaryndan alan ýeralma hasyllarynyň has-da ýokary bolandygyny nygtamak örän ýakymlydyr. Çünki bu olaryň ene topraga siňdiren yhlaslarynyň ýerine düşendigini aňladýar. Şeýlelikde, şu ýyl birleşikde ýeralma ýetişdirmek bilen meşgullanan 300-den gowrak kärendeçileriň köpüsiniň guwandyryjy üstünliklere eýe boljakdyklaryna ynam bar. Ýeri gelende, daýhan birleşiginde gök-bakja ekinleriniň bereketli hasylyny ýetişdirmek ugrunda gaýratlylyk görkezýän kärendeçileriň hem käbiriniň atlaryny agzap geçmek gerek. Olardan Arif Duşemow, Roza Maşeripowa, Maksatbek Rozmetow, Jorabek Hudikow we beýlekiler sogana, gawun-garpyza ideg etmekde has-da tapawutlanýarlar. Şeýle başarjaň daýhanlar hem ýakyn wagtlarda öz öndüren önümlerini ýygnap, il-günümiziň saçagyna ýetirerler.

Garaşsyz ýurdumyzda hususy telekeçiligi ösdürmek, bu ugurda zähmet çekýän adamlar üçin zerur şertleri döretmek babatdaky döredilýän şertlerden ýerlikli peýdalanyp, netijeli hereket edýän önümçilik kärhanalary Daşoguz welaýatynda hem az däl. Olaryň biri-de welaýatyň Boldumsaz etrabynyň Gubadag şäheriniň senagat zolagynda ýerleşýän, azyk we iýmit önümlerini öndürýän «Sadaja» toplumydyr. Toplumyň ýolbaşçysy, Türkmenistanyň Senagatçylar we telekeçiler birleşmesiniň agzasy Gadam Orazdurdyýewiň aýtmagyna görä, bu kärhana halkymyzy gündelik isleg bildirilýän azyk önümleri bilen ýeterlik üpjün etmek maksady bilen 2020-nji ýylda işe girizilipdir. Şondan bäri geçen döwrüň dowamynda bu ýerde alnyp barylýan işleriň netijeliligini ýokarlandyrmak, öndürilýän önümleriň görnüşlerini artdyrmak, hilini gowulandyrmak boýunça degerli çäreler durmuşa geçirilýär. Şeýlelikde, häzirki wagtda toplumyň bölümlerinde çörek we çörek önümleriniň, konditer önümleriniň 20-ä golaý, süýt önümleriniň ençeme görnüşleri öndürilip, ilata ýetirilýär. Şonuň bilen birlikde, olaryň diňe bir Daşoguz welaýatynyň däl, eýsem, Lebap welaýatynyň söwda nokatlaryna hem ugradylýandygyny we ilatyň uly islegine mynasyp bolýandygyny aýtmak gerek. Toplumda öndürilýän çörek we çörek, konditer önümleriniň hatarynda tamdyr hem-de galyply çörekler, ak, gülýaka, bally kökeler, birnäçe görnüşli keksler, biskwitler, ruletler, epmeler bar. Önümler dürli ölçeglerde, oňat bezelen gaplara salnyp, söwda nokatlaryna goýberilýär. Munuň özi hyrydarlar üçin örän oňaýly hem-de ünsi çekiji bolup, olaryň islegleriniň ýokary derejede kanagatlandyrylmagyna şert döredýär. Ýaňy-ýakynda toplumda süýt önümlerini öndürýän täze bölüm gurlup, işe girizildi. Häzirki wagtda onda gatyk, gaýmak, aýran ýaly önümleri öndürmeklik ýola goýuldy. Ýakyn günlerde bu ýerde beýleki süýt önümlerini, şol sanda, peýniriň dürli görnüşlerini öndürmek boýunça iş alnyp barylýar. Munuň üçin zerur enjamlar getirilip, bölümde ornaşdyryldy. Toplumda ilatyň köp isleg bildirýän, ýokary hilli çörek we çörek, konditer önümlerini, süýt önümlerini öndürmek boýunça ýola goýlan işler barha rowaçlanýar. Munuň şeýledigini häzirki günlerde olardan birkemsiz ýüküni tutan ulaglaryň ençemesiniň çar tarapa, ýagny söwda nokatlaryna tarap ugur alýandygy hem anyk tassyklaýar. Şunlukda, olaryň kömegi bilen täze hem-de ýokary hilli azyk önümleri ildeşlerimiziň bereketli saçaklarynyň üstüni ýetirýär.