Daşoguz welaýatynyň Köneürgenç etrabynyň «Pagtaçy» daýhan birleşiginiň zähmetsöýer kärendeçileri gyş paslynyň höküm sürýän häzirki döwründe her bir güni netijeli peýdalanyp, bugdaýlaryň möwsümleýin idegini ýetirmekde görelde görkezýärler. Hojalygyň kärendeçileri geçen ýylyň güýzünde 900 gektar ýerde bugdaý ekişini geçirdiler. Ekilen bugdaý meýdanlarynda oňat, tekiz gögeriş alyndy. Şu günler hojalygyň kärendeçiler toparlarynda ak ekinler ýerli dökünler bilen iýmitlendirilýär. Şu wagta çenli kärendeçiler ýerli dökünleriň 2547 tonnasyny taýýarladylar. Gündelik taýýarlanylýan ders çüýrüntgileri 35 — 40 tonnadan geçýär. Taýýarlanylan dökünleri ekin meýdanlaryna daşamakda tehnikalaryň dördüsi bökdençsiz işledilýär. Möwsümleýin ideg çärelerini amal etmegiň kadalaryna laýyklykda kärendeçi daýhanlar her gektara 200 kilogram fosfor, 100 kilogram karbamid dökünlerini günde 30 — 35 gektar ýere berip, bu işde tutanýerlilik görkezýärler. Şonuň ýaly-da kärendeçiler bugdaýly meýdanlaryň gyralaryny guran çöplerden arassalamak, ululy-kiçili akabalary gyrçamak ýaly möhüm işleri-de utgaşykly alyp barýarlar. Ak ekinlere ideg etmekde Atamyrat Saryýew, Kakamyrat Tuwakow, Baýramdurdy Gaýypow dagynyň ýolbaşçylyk edýän 2, 4, 6-njy kärendeçiler toparlarynyň agzalarynyň bitirýän işleri öwgä mynasypdyr.

Halkara parahatçylyk we ynanyşmak ýylyna belent maksatlar, ýagşy niýetler bilen gadam basan Daşoguz welaýatynyň oba hojalyk işgärleriniň, kärendeçi daýhanlarynyň iş depginleri barha ýokarlanýar. Munuň şeýledigini häzirki günlerde ýaz ekişi möwsümine taýýarlyk görmek boýunça alnyp barylýan giň gerimli işler hem aýdyň tassyklaýar. Bu babatda Boldumsaz etrabynyň pagtaçy daýhanlarynyň hem derwaýys işleri ýaýbaňlandyrýandyklaryny aýtmak bolar. Etrapda öňdebaryjy hojalyklaryň biri hasaplanylýan «Türkmenistan» daýhan birleşiginde öňde duran ekiş möwsümine ykjam taýýarlyk bilen barmaklyga gönükdirilen çäreler muňa mysal bolup biler. Daýhan birleşiginiň baş agronomy Kakabaý Täjowyň nygtaýşy ýaly, şu ýylyň baharynda hojalykda jemi 1200 gektar meýdana tohum atmak meýilleşdirilýär. Şonda olaryň ählisi 700-e golaý kärendeçi daýhanyň gözegçiligine berlendigini, olaryň aglabasynyň öz işinde ýeterlik tejribesi bolan, ene toprakdan bereketli hasyl almagy başarýan adamlardygyny hem bellemek gerek.  Birleşigiň pagtaçy daýhanlary şu ýylyň hasyly ugrundaky aladalara has öňräkden, uly yhlas bilen girişdiler. Türkmenistanyň Prezidentiniň Karary bilen, geçen ýylyň hasylyndan başlap pagtanyň döwlet satyn alyş nyrhlarynyň ýokary göterilmegi olaryň göwünlerini galkyndyryp, şol ýylyň netijeleri boýunça oňat girdeji gazanmaklaryna şert döretdi. Şunlukda kärendeçileriň her biriniň özüne berkidilen meýdanda şüdügär sürüminiň öz wagtynda geçirilmegine, onuň talabalaýyk tekizlenilmegine gyzyklanmasy artdy. Bu hem oňat netijeleri berip, gowaça ekmek göz öňünde tutulýan meýdanlarda sürüm işleri bellenilen möhletlerde geçirildi. Şonuň bilen birlikde-de häzirki döwre çenli birleşikde 400 gektara golaý meýdan tekizlenilip, 300 gektardan gowrak ýere çil çekildi. Bu hem olaryň gyş suwuny tutmaga doly taýýardygyny aňladýar. Kärendeçi daýhanlar öz ýerlerinde şüdügär sürüminden öň olary gurplandyrmaklyga aýratyn üns berdiler. Şeýlelikde sol döwürde her gektara 150 — 200 kilogram fosfor, 50 — 100 kilogram kaliý dökünleri sepildi. Elbetde, bu dökünleriň meýdanlara öňünden berilmeginiň has netijeli bolýandygy bellenilmäge mynasyp. Häzirki günlerde bolsa kärendeçi daýhanlar ýerli dökünleri taýýarlamak boýunça hem iş alyp barýarlar. Ýaz ekişine taýýarlyk görmekde birleşigiň Meýlis Geldiýew, Akmyrat Nazarow, Tirkeş Agamyradow dagynyň ýolbaşçylyk edýän 1, 2, 3-nji kärendeçiler toparlarynyň agzalarynyň has-da öňe saýlanýandyklary bellenilmäge mynasypdyr. Bu hakda aýdylanda, tejribeli kärendeçiler Goçbaý Ýoldaşowyň, Gurban Berdiýewiň, Agamyrat Agamyradowyň we beýlekileriň atlaryny tutmak ýerlikli bolar. Häzirki döwürde ýerleri tekizlemekde, olara çil çekmekde birleşigiň tejribeli mehanizatorlarynyň ençemesiniň ýokary işjeňlik görkezýändikleri hem örän guwandyryjydyr. Olaryň hatarynda Berdimyrat Güýzekow, Batyr Baýramow, Hemra Allakow, Gurbanberdi Mättaganow dagynyň bitirýän işleri köpleriň hoşallygyna mynasyp bolýar. Elbetde, daýhan adamlar üçin şu günleriň her bir pursadynyň aýratyn gadyr-gymmaty bar. Sebäbi ýerleriň öňde duran möhüm möwsümlere birkemsiz taýýar edilmegi, tutuş ýylyň üstünlikli bolmagy şu günleriň möhüm aladalaryndan, agrotehnikanyň talaplaryna laýyklykda geçirilýän möwsümleýin işlerden gözbaş alýar. Bu daýhan birleşiginiň pagtaçylarynyň hem wagtdan ýerlikli peýdalanmagy başarýandyklary anyk görünýär.

Berkarar döwletiň täze eýýamynyň Galkynyşy döwründe Türkmenistanyň  Prezidentiniň ýurdumyzyň ykdysadyýetiniň möhüm ugurlarynyň biri bolan telekeçilik ulgamyny ösdürmek babatdaky taýsyz tagallalarynyň netijesinde döredilýän şertlerden ýerlikli peýdalanyp, ýokary talaplaryň derejesinde iş alyp barýan telekeçiler, hususy kärhanalar, hojalyk jemgyýetleri Daşoguz welaýatynda-da az däl. Olaryň hatarynda Daşoguz şäherinde hereket edýän, Türkmenistanyň Senagatçylar we telekeçiler birleşmesiniň agzasy bolan «Galkynan ykbal» hususy kärhanasy hem bar. 2012-nji ýylda işe girizilen bu kärhananyň önümçiligi esasan gurluşyk pudagynda peýdalanylýan serişdeleri, ýagny boýaglary, bezegleri, ýelimli garyndylary öndürmeklige gönükdirilen bolup, baş maksat olaryň häzirki döwürdäki ösen islegleri kanagatlandyrmagyny gazanmakdan ybarat. Şeýlelikde, bu ýerde hereket edýän önümçilik bölümlerinde olaryň dürli görnüşlerini öndürmek ýola goýlupdyr. Olaryň arasynda «Ganat», «Elteks» boýaglary, «Erkfix» ýelimli garyndy we beýleki serişdeler bar. Olaryň her biri dürli ölçeglerdäki plastik gaplara gaplanylyp, alyjylara hödürlenilýär. Kärhananyň önümçilik bölüminiň müdiri Bagtyýar Rejepowyň aýtmagyna görä, häzirki döwürde bu önümler ýurdumyzyň dürli künjeklerine ugradylýar. Olaryň şol ýerlerde uly isleglerden peýdalanýandygyny gelip gowşan habarlar, ýörite buýurmalar aýdyň tassyklaýar. Munuň özi kärhanada öndürilýän önümleriň hili barada aýratyn alada edilýändigi bilen baglanyşyklydyr. — Häzirki döwürde şeýle önümleri öndürýän kärhanalar örän kän — diýip, Bagtyýar gürrüň berýär: — Munuň guwançly tarapy, bu ýagdaý alyjylaryň olary saýlap almagyna şert döredýär. Şonuň bilen birlikde-de, ol öz işimize has-da jogapkärli çemeleşmegi, önümçilikde hiç bir säwlige ýol bermezligi talap edýär. Biz hem ony ödemäge çalyşýarys. Şoňa görä-de önümlerimize bolan islegiň barha artýandygy hemmämizi begendirýär. Kärhanada öndürilýän önümleriň hiliniň oňat bolmagynda bu ýerde döwrebap enjamlaryň peýdalanylmagy bilen birlikde olara erk edýän, öz işini birkemsiz ele alan, tejribeli hünärmenleriň hem uly goşantlary bar diýsek has dogry bolar. Olardan Şöhrat Pirjanow, Atabek Şaripow, Azamat Abdyrimow, Hemra Usmanow dagynyň atlaryny agzamak zerurdyr. Çünki bu ýigitler kärhanada ençeme ýyllardan bäri zähmet çekmek bilen, öz üstlerine ýüklenilýän borçlara oňat göz ýetirýärler. Ýeri gelende bellesek, bu kärhananyň öndürýän önümleriniň müşderileriň göwünlerine ýaraýandygyny onuň garamagyndaky «Hilkent» diýlip atlandyrylan söwda merkezine gelýän alyjylaryň köplügi-de tassyklaýar. Bu söwda merkeziniň tekjelerindäki bezemen önümleri synlaýan ýa-da ondan möhümini bitirip, hoşal bolup çykyp barýan ildeşlerimiz bir ýa iki däl. Elbetde, häzirki döwürde ýurdumyzyň, şol sanda welaýatymyzyň obadyr şäherlerini bezeýän kaşaň binalar, ýaşaýyş jaýlary giň gerimde gurulýar. Ajaýyp döwrümiziň guwandyryjy alamatlaryna öwrülen şol ymaratlaryň şeýle bezemen görnüşlere eýe bolmagynda şu kärhananyň işçi-hünärmenleriniň hem uly goşantlarynyň bardygyny bellemek gerek.

Bugdaý ekişini öz wagtynda geçirip, ýaş maýsalara ideg etmäge öňdäkileriň hatarynda girişen daýhan birleşikleri, kärendeçi daýhanlar Daşoguz welaýatynda-da sanardan köp. Olara mysal hökmünde Şabat etrabynyň Sadylla Rozmetow adyndaky oba hojalyk paýdarlar jemgyýetini, Boldumsaz etrabynyň «27-nji oktýabr», Görogly etrabynyň «Ýagtylyk», Akdepe etrabynyň R.Ataýew adyndaky, Köneürgenç etrabynyň «Pagtaçy», Saparmyrat Türkmenbaşy etrabynyň «27-nji oktýabr», Ruhubelent etrabynyň «Aşyk Aýdyň» daýhan birleşiklerini görkezmek bolar. Güýzki ekiş möwsüminde Şabat etrabynyň Sadylla Rozmetow adyndaky oba hojalyk paýdarlar jemgyýetiniň gallaçy kärendeçileri 2400 gektardan gowrak meýdana bugdaý ekip, kadaly gögeriş aldylar. Şunlukda, ýokarda nygtap geçişimiz ýaly, bu ýerde ýaş maýsalara ideg etmeklige hem irki möhletlerde badalga berildi. Häzirki wagtda bu ugurdaky işleriň ýokary öndürijilikde dowam etdirilýändigini bellemelidiris. Golaýda bu hakda gürrüňdeş bolanymyzda, paýdarlar jemgyýetiniň kärendeçiler toparynyň ýolbaşçysy, Türkmenistanyň «Watana bolan söýgüsi üçin» medalynyň eýesi, tejribeli daýhan Bahram Täjimuradow şeýle diýdi: — Geçen möwsümde toparymyzyň galla meýdanlarynda bugdaý ekişi öz wagtynda ýerine ýetirilip, kadaly gögeriş alynmagy bilen ideg işlerine hem aýratyn üns berdik. Şonuň netijesinde şu mahala çenli ýaş maýsalarymyzy ýerli hem-de mineral dökünler bilen iýmitlendirip, ilkinji suwuny berdik. Bu babatda Azim Nurmetow, Dilaram Rozmetowa ýaly kärendeçilerimiz has-da tapawutlanyp zähmet çekýärler. Şeýle aladalar bilen gurşalan ýaşyl maýsalar bolsa göreniň göwnüni göterýär. Boldumsaz etrabynyň «Döwletli» daýhan birleşiginiň gallaçy kärendeçisi, Türkmenistanyň «Watana bolan söýgüsi üçin» medalynyň eýesi Garrybaý Ataşow hem şu günlerde özüniň 6,5 gektardan ybarat kärende meýdanyndaky bugdaý maýsalaryna göwnejaý ideg etmeklige çalyşýandygyny, olary iýmitlendirmek barada aýratyn alada edýändigini aýdyp, bu ýylda hem bereketli hasyly ýetişdirjekdigine ynamynyň bardygyny nygtady. Görnüşi ýaly, häzirki günlerde welaýatymyzyň haýsy künjegine barsaň, ýaşyl öwüsýän bugdaýly meýdanlara, ene topraga yhlas siňdirip, şu ýylyň bol hasyly üçin gaýratyny gaýgyrman zähmet çekýän gallaçy kärendeçilere, başarjaň mehanizatorlara gabat gelýärsiň. Olar şu günki aladalaryň Watan harmanynyň belent bolmagyna mynasyp goşant goşmakda uly ähmiýete eýe bolup durýandygyna oňat düşünmek bilen, işleriň depginini barha güýçlendirýärler. Hormatly Prezidentimiziň ýurdumyzyň oba hojalyk pudagyny ösdürmek, dürli görnüşli ekinleriň, şol sanda bugdaýyň bol hasylyny ýetişdirmek barada öňde goýan wezipeleriniň üstünlikli ýerine ýetirilmegine, bu babatda berilýän çäksiz goldawlardan peýdalanyp, ýokary sepgitlere ýetilmegine gönükdirilen agzybirlikli zähmet, belent hyjuw öz netijesini berýär.

Asmandan nur ýagsa... Asmandan nur bolup, ýagyş-gar bolup düşýän ygallar ýaşaýşa dowam berýän tebigy sazlaşykdyr. Zemin içre ýaşaýşa dowam ösümliklerdir daragtlara kuwwat berýän ygallar dürli görnüşde düşýär. Ýagyş, gar, buz, jyza, gyraw, ümür, jybar tebigatda suw aýlanyşygyny emele getirip, olaryň hersiniň asmandan ýere düşüş aýratynlygy bardyr. Mälim bolşy ýaly, ýylyň ähli paslynda düşýän ygal ýagyşdyr. Ýagyşdan beýik depeleriň üstündäki, ýapylardaky sözen, sazak, borjak we beýleki görnüşli agaçdyr ösümlikler ýeterlik suwlanyp bilmeýär. Şolar ýaly çöl ösümlikleriniň hem suw bilen ýeterlik üpjün bolmagy ygalyň jyza görnüşine baglydyr. Ol, esasan, güýzüň soňunda, gyş aýlary gijelerine we daňdana golaý düşýär. Jyza düşende agaçlaryň, ösümlikleriň başy ýukajyk buz tozgajyklary bilen örtülýär. Sähra, ýaýlalarda howanyň arassa günleri jyza düşen meýdanlar Günüň nury düşüp säher çagy has gözel görke beslenýär. Günüň ýokary galmagy bilen jyza pür-şahalardan agaçlaryň düýbüne gaçýar. Gün günorta bolup, howanyň maýlamagy bilen agaçlaryň düýbüne gaçan jyza ereýär. Şonuň netijesinde agaçlaryň kökleri suwlanýar. Bu bolsa olaryň ýazda gowy gögermegi, birkemsiz güllemegi üçin özboluşly suwaryş ulgamydyr. Bizi gurşap alan tebigatda akylyňy haýrana goýýan sazlaşyklar sanardan kän. Gumda, belent gerişleriň üstünde gögerýän gyrymsy agaçlaryň, ösümlikleriň suwlanmagyny üpjün edýän ygalyň bir görnüşi bolan jyza hem şol sansyz tebigy sazlaşyklaryň biridir.

Berkarar döwletiň täze eýýamynyň Galkynyşy döwründe ata-babalarymyzdan dowam edip gelýän milli daýhançylyk däpleri mynasyp dowam etdirilýär. Oba ýerinde märekelerde, toý-tomaşalarda ýa-da bäş-atly adamyň üýşen ýerinde ekilen ýer boş çykmasyn diýilmesi häli-şindi gulagymyza degýär. Öňki döwürlerde adamlar miweli agaçlary, gök-bakja, däneli ekinleri ösdürip ýetişdiripdirler. Daýhanlar halal zähmet siňdirilip ýetişdirilen oba hojalyk ekinleriniň bitginli hasylyny ýygnap, däne saklanýan jaýlarda, şeýle-de ýörite niýetlenen ýerlerde saklapdyrlar. Käbir ýyllarda güýz aýlarynda ekinleri sowugyň ir urmagy, ýaz paslynyň salkyn, ýagyşly bolmagy ýa-da ýaz paslynyň daýhançylyk üçin amatsyz gelmegi netijesinde ekin ýerleriniň hasylynyň pes bolmagyna, şonuň ýaly-da, ýere harçlanan tohum-çigidiňem ödelmedik mahalynda daýhanlaryň hasyl bolmady diýen manyda boş çykdyk diýäýmesi bar. Daýhanlar ekiniň başy hem soňy mäş diýipdirler, olar ýaşuly adamlaryň, ekerançylaryň, daýhançylykdan oňat baş çykarýan adamlaryň maslahatyna eýerip, ýerleri taýýarlap ekipdirler. Oba adamlary mäş, künji, dary ýaly giçki ekinleri ekip, hasyl alypdyrlar. Hasyly kem bolan ýyly adamlar goňşy obadan, daýhan bazarlaryndan we alysdan gelýän söwdagär kerwenlerden bugdaý, mäş, künji, jöwen, dary ýaly däne-düwür hem-de dürli görnüşli gök-bakja, miwe we bakja önümleri satyn alyp, alyş-çalyş edipdirler. Berkarar döwletiň täze eýýamynyň Galkynyşy döwründe dünýä hojalyk ulgamyna işjeň goşulyşýan ata Watanymyzyň ykdysadyýeti bedew bady bilen ösýär. Ýurdumyzyň ykdysadyýetiniň diwersifikasiýa ýoly bilen ösdürilýän döwründe oba hojalygyny ösdürmäge hem uly ähmiýet berilýär. Ýurdumyzyň oba hojalygynda ykdysadyýetiň beýleki pudaklarynda bolşy ýaly özgertmeleriň giň toplumy alnyp barylýar. Amala aşyrylýan şeýle özgertmeleriň gözbaşynda daýhany ýeriň hakyky eýesi etmek we milli ykdysadyýetimiziň bu pudagyny has-da ösdürmek wezipesi bar. Bu wezipäniň üstünlikli çözülmegi bolsa, ahyrky netijede, halkymyzyň oba hojalyk önümleri bilen doly üpjün edilmegine we ady agzalan pudakda zähmet çekýän ynsanlaryň durmuş şertleriniň ýokarlandyrylmagyna oňyn täsir edýär. Durmuşa geçirilýän işler ilatymyzyň ýaşaýyş-durmuş derejesiniň has-da gowulanmagyna, şeýle hem bazarlarymyzyň öz önümlerimiz bilen dolup durmagyna saldamly goşant goşýar.

Halkara Bitaraplyk baýramynyň öňüsyrasynda Daşoguz şäherinde «Kamaz» okuw-hyzmat ediş merkeziniň açylyş dabarasy boldy. Bu döwrebap merkez welaýat merkezinden halkara howa menziline barýan ýoluň ugrunda, täze iri ýaşaýyş jaý we desgalar toplumynyň ýanynda bina edildi. Mälim bolşy ýaly, dünýä meşhur kompaniýanyň nobatdaky tehniki hyzmat ediş merkeziniň gurlup ulanmaga berilmegi berkarar döwletimiziň dost-doganlyk döwletler bilen ykdysady-syýasy hyzmatdaşlygy ilerledýändiginiň nobatdaky subutnamasydyr. Täze okuw-hyzmat ediş merkezi esasy dolandyryş binasy bilen birlikde, ammar binasyny we abatlaýyş bölümini öz içine alyp, döwrebap tehniki toplumy emele getirýär. Açylyş dabarasy mynasybetli bu ýerde çykyş edenler ýurdumyzyň halkara hyzmatdaşlygyny berkitmekde netijeli işleri alyp barýandygyny uly buýsanç bilen bellediler. Çykyş eden myhmanlaryň belleýşi ýaly, şeýle okuw-hyzmat ediş merkezleri ýurdumyzyň ähli welaýatlarynda bina edilýär. Şeýle hem dabaranyň dowamynda merkeziň gurluşygynda zähmet çeken gurluşykçylara hormatly Prezidentimiziň adyndan sowgatlar gowşuryldy. Aýdym-sazyň hoş owazy bilen al-asmana uçurylan şarlar dabaranyň şowhunyny has-da arşa göterdi. Soňra myhmanlar merkezde döredilen şertler bilen ýakyndan tanyşdylar. Merkeziň gurluşygyny «Ysmaýyl gurluşyk hyzmatlary» hususy kärhanasynyň işçileri bina etdiler. 1 gektar meýdany eýeleýän merkeziň çäginde Kamaz awtoulaglaryny abatlamak, olara tehniki hyzmat etmek üçin ähli şertler döredilendir.

Daşoguz welaýatynda ýaşaýyş jaý we desgalar toplumy açylyp ulanmaga berildi Berkarar döwletiň täze eýýamynyň Galkynyşy döwründe ýurdumyzda adam hakyndaky alada döwlet syýasatynyň ileri tutulýan möhüm ugurlarynyň biridir. «Pähim-paýhas ummany Magtymguly Pyragy» ýylynda giňden bellenilýän Halkara Bitaraplyk gününiň öňüsyrasynda Daşoguz şäherinde täze ýaşaýyş jaý we desgalar toplumynyň açylyş dabarasy uly ruhubelentlige beslendi. Türkmenistanyň Prezidentiniň 2019-njy ýylyň 27-nji maýyndaky degişli Kararyna laýyklykda, Daşoguz şäheriniň çäginde 1496 hojalyga niýetlenen ýaşaýyş jaý we desgalar toplumy bina edildi. Onuň çäginde 70 sany 4 gatly ähli amatlyklary bolan ýaşaýyş jaýlary, orta mekdep, çagalar bagy, saglyk, söwda merkezleri ýerleşýär. Şäheriň günorta böleginde bina edilen ýaşaýyş jaýlarynda müňlerçe maşgalanyň bagtyýar we abadan durmuşda ýaşamagy üçin ähli şertler döredilipdir. Toplumyň çäginde çagalar oýun meýdançalary, awtoduralgalar hem ýerleşdirilipdir. Şanly toýuň — Halkara Bitaraplyk gününiň giňden bellenýän günlerinde täze ýaşaýyş jaý we desgalar toplumynyň ulanmaga berilmegi şäheriň ýaşaýjylary üçin ajaýyp toý sowgadyna öwrüldi. Dabara gatnaşyjylar, ilki bilen, bu ýerde aýdym-sazly çykyşlara tomaşa etdiler. Soňra bu ýerde gutlag sözi bilen Daşoguz şäheriniň häkimi Nurnazar Handurdyýew, Türkmenistanyň Hormatly il ýaşulusy Baýrammyrat Allanazarow, mährem ene Ogulboldy Amanýazowa we täze jaýlara eýe bolan bagtyýar raýatlar çykyş etdiler. Çykyş edenleriň belleýşi ýaly, şanly ýylymyzyň taryhy wakalarynyň birine öwrülen bu täze toplum halkymyzyň bagtyýar we abadan durmuşyny üpjün etmekde möhüm ähmiýete eýedir. Bu günki ýaşaýyş jaý we desgalar toplumy hormatly Prezidentimiziň «Watan diňe halky bilen Watandyr! Döwlet diňe halky bilen döwletdir!» diýen ajaýyp şygarynyň durmuş hakykatyna öwrülýändiginiň aýdyň nyşany boldy.  Şeýle hem bu ýerde täze jaýlaryň açarlaryna eýe bolan ildeşlerimiz özleriniň ýürek buýsançlaryny beýan etdiler. Ýaşaýyş jaý we desgalar toplumynyň gurluşygynda yhlasly zähmet çeken gurluşykçylara hormatly Prezidentimiziň adyndan sowgatlar gowşuryldy. Al-asmana uçurylan dürli reňkli şarlar halkymyzyň kalbyndaky alkyşlar deýin gyşyň ak asmanyny bezedi. Soňra dabara gatnaşyjylar täze ýaşaýyş jaý toplumyna aýlanyp gördüler. Ýeri gelende bellesek, açylyş dabaralary mynasybetli bu ýerde türkmen toýlary ýaýbaňlandyryldy. Täze ýaşaýyş jaý toplumynyň çäginde gelin toýy, saç toýy ýaly milli toýlarymyz aýdym-sazly çykyşlar bilen ajaýyp sazlaşygy emele getirdi. Milli däplerimiz esasynda ýaýbaňlandyrylan çykyşlarda ajaýyp döwrümiziň, ata Watanymyzyň beýik ösüşlerine bolan buýsanç joşgunly beýan edildi. Toplumyň çäginde çagalar üçin niýetlenen oýun meýdançalarynda bagtyýar nesilleriň oýun oýnaýan pursatlary toý şatlygyny has-da belende göterdi. Dabara gatnaşyjylar hormatly Prezidentimiziň halkymyza toý sowgady bolan ähli amatlyklary bolan döwrebap öýleriň birine baryp gördüler. Milli däplerimiz esasynda garşylanan myhmanlar öý eýelerini täze jaýlary bilen gutladylar. Döwrebap ýaşaýyş jaýynyň eýesi bu ýerde döredilen amatlyklar bilen myhmanlary tanyşdyrdy. Ýaşaýyş jaýlary 3 we 4 otagly bolup, olarda çagalar we ulular üçin ähli şertler göz öňünde tutulandyr. Giň we ýagty otaglarynyň bezemen keşbi bilen gözleri dokundyrýan jaýlaryň aşhanalarynda taýýarlanylýan milli tagamlar myhmanlara hödür edildi. Soňra bu ýerde täze orta mekdebiň hem-de çagalar bagynyň açylyş dabaralary boldy. 160 orunlyk çagalar bagynda körpeleriň terbiýelenmegi üçin ähli şertler döredilipdir. Bu ýerdäki oýun meýdançalary, çagalar bagynyň döwrebap enjamlar bilen enjamlaşdyrylan okuw we dynç alyş otaglary myhmanlarda aýratyn uly täsir galdyrdy. Çagalar bakja-bagynyň çäginde şadyýan çagajyklaryň gülki sesleri bilen sazlaşýan aýdym-sazly çykyşlarda ajaýyp döwrümiz, bagtyýar çagalyk joşgunly wasp edildi. Bagtyýar körpeler özlerine şeýle döwrebap çagalar bagyny sowgat berendigi üçin Gahryman Arkadagymyza we hormatly Prezidentimize alkyş sözlerini aýtdylar. Soňra toplumyň çäginde ýerleşýän 600 orunlyk orta mekdep myhmanlary aýdym-sazly çykyşlar bilen garşylady. Myhmanlar mekdebiň çäginde bina edilen desgalar bilen ýakyndan tanyşdylar. Okuw otaglary kompýuter we multimedia enjamlary bilen doly üpjün edilipdir. Şeýle hem mekdebiň çäginde sport zaly, naharhana, sport meýdançalary we beýleki kömekçi desgalar bina edilipdir. Ýaşaýyş we desgalar toplumynyň çäginde ýerleşýän saglyk merkezi hem ýurdumyzda adam saglygy hakyndaky aladanyň döwletimiziň ileri tutulýan möhüm ugurlarynyň biri bolup durýandygyny ýene-de bir gezek aýdyň görkezdi. Saglyk merkezinde hem halkymyza ýokary hilli lukmançylyk hyzmatlaryny ýerine ýetirmek üçin amatly şertler döredilipdir. Saglyk merkezinde rentgen, barlaghana, hirurgiýa, dogrum, fiziobejergi, antenatal, sanjym otaglary we beýleki lukmançylyk otaglary ýerleşip, olar döwrebap lukmançylyk enjamlary bilen üpjün edilipdir. Ýeri gelende bellesek, bu saglyk merkezinde Italiýa döwletinde öndürilen «Italraý» kompaniýasynyň mammograf enjamy welaýatymyz boýunça onkologiýa hassahanasynda hem-de şu saglyk merkezinde ýerleşdirilendir. Toplumyň çäginde ýerleşdirilen söwda merkezinde ilata söwda hyzmatlaryny ýerine ýetirmek üçin ähli mümkinçilikler bar. Bu ýerde ýerleşdirilen söwda nokatlarynda halkyň sarp edýän önümleri, hojalyk harytlary we beýleki durmuş hyzmatlary göz öňünde tutulandyr. Täze ýaşaýyş jaý toplumynda ýaşamak, işlemek bagty miýesser eden ildeşlerimiz şeýle ajaýyp toý sowgady üçin Gahryman Arkadagymyza we hormatly Prezidentimize alkyş sözlerini beýan edýärler. Dabaralar tamamlanandan soňra «Bagt köşgi» toý-dabaralar merkezinde toý sadakasy berlip, onda türkmen halkynyň Milli Lideri Gahryman Arkadagymyzyň we Arkadagly Gahryman Serdarymyzyň durmuşa geçirýän beýik işleriniň rowaçlyklara beslenmegi dileg edildi. Il alkyşy bolsa döwlet berkararlygynyň, ýurt abadançylygynyň kepilidir.

«Pähim-paýhas ummany Magtymguly Pyragy» ýylynda Daşoguz welaýatynyň  şalyçylary 8 müň 100 gektar ýerde şaly ekişini geçirip, Watan harmanyna 35 müň tonnadan gowrak şaly hasylyny tabşyrdylar we  şertnamalaýyn borçnamalaryny abraý bilen berjaý etdiler. Öndürilen şalynyň agramly bölegi Saparmyrat Türkmenbaşy etrabynyň şalyçylyga ýöriteleşdirilen S.A.Nyýazow adyndaky hem-de «27-nji oktýabr» daýhan birleşikleriniň edermen şalyçy kärendeçileri tarapyndan ýetişdirildi. Şu ýyl şalynyň bereketli hasylyny ýetişdirmekde Saparmyrat Türkmenbaşy etrabynyň çägindäki «Ykbal açary» hojalyk jemgyýetiniň işgärleriniň hem öz mynasyp goşantlaryny goşandygy bellärliklidir. Olar şaly hasylyny ilkinji gezek ýetişdirýändiklerine garamazdan, 500 gektar ýerden 2 müň tonnadan gowrak «sary altynyň» hasylyny ýygnamagyň hötdesinden geldiler. Şalyçylarymyzyň zähmet üstünligini gazanmagyna ýokary öndürijilikli tehnikalara erk edýän mehanizatorlaryň, «Obahyzmat» önümçilik kärhanasynyň, şeýle hem daýhan birleşikleriň ussahanalarynyň ussalarynyň, pudaga degişli hünärmenleriň aýratyn goşantlarynyň bardygyny bellemek gerek.

Garaşsyz, baky Bitarap ýurdumyzda yhlasly zähmet çekip, halal gazanç eden adamyň azaby ýerine düşüp, bolelin durmuşda ýaşamagy üçin ähli mümkinçilikler bar. Hormatly Prezidentimiziň Türkmenistanyň Ministrler Kabinetiniň mejlislerinde, iş maslahatlarynda kärendeçi daýhanlaryň, daýhan hojalyklarynyň agzalarynyň döwlete tabşyran önümleri üçin hasaplaşyklaryň öz wagtynda geçirilmegi hakynda berýän görkezmeleri-de şu maksada gönükdirilendir. Şondan ugur almak bilen, Daşoguz welaýatynda hem banklar tarapyndan döwlet harmanyna tabşyrylan pagta, şaly hasyly üçin kärendeçiler bilen hasaplaşyklar geçirilýär. Daýhanlaryň öz halal gazançlaryny bankomatlaryň üsti bilen almaklaryna doly mümkinçilik döredilýär.  Gazananyňyz toýlaryňyza ýarasyn, edermen daýhanlar!