Daşoguz welaýatynyň Saparmyrat Türkmenbaşy etrabynyň «Şirwan» pagta arassalaýjy kärhanasynda şu ýylyň ýazky ekiş möwsümi üçin tohumlyk gowaça çigidini taýýarlamak işleri barha ýokary depgine eýe bolýar. Şu möwsümde bu ýerde tohumlyk çigidiň 2048 tonnasyny öndürmek, pagtaçy daýhanlara bökdençsiz ýetirmek bellenilip, derwaýys çäreleriň amala aşyrylmagy netijesinde, her günde 45 — 50 tonna ýokary hilli tohum taýýarlanylýar. Işleriň şeýle göwnejaý alnyp barylmagynda Annageldi Ataýew, Döwlet Haldurdyýew, Geldimyrat Meredow ýaly tejribeli işgärleriň mynasyp paýlary bar. Tohum taýýarlaýjylaryň yhlasly zähmeti öňde goýlan wezipeleriň öz wagtynda berjaý ediljekdigine güwä geçýär.

Daşoguz welaýatynyň Garaşsyzlyk etrabynyň ekerançylary «Garaşsyz, baky Bitarap Türkmenistan — bedew batly at-myradyň mekany» ýylyny uly üstünliklere beslemegi maksat edinip, şu günler meýdanlary ýaz ekişine taýýarlamaklygy guramaçylykly alyp barýarlar. Şeýlelikde, olarda geçirilýän çäreleriň ýokary hilli bolmagy üpjün edilýär. Munuň özi şu ýyl etrap boýunça göz öňünde tutulýan 2995 gektar meýdanda ýeralmanyň, 550 gektarda soganyň, 180 gektar ýerde pomidoryň, 150 gektar ýerde käşiriň, 50 gektarda kelemiň, 340 gektar meýdanda bakja ekinleriniň ekişiniň öz wagtynda geçirilmegine hem-de olaryň bol hasylynyň kemala getirilmegine şert döredýär.

Türkmenistanyň Senagatçylar we telekeçiler birleşmesiniň agzasy bolan «Atalyk gurluşyk» hususy kärhanasynyň zähmetsöýer gurluşykçylary indi ençeme ýyllardan bäri Daşoguz welaýatynyň dürli künjeklerinde medeni-durmuş maksatly binalary, ýaşaýyş jaýlaryny gurup, öz wagtynda ulanmaga bermek bilen, guwandyryjy netijeleri gazanyp gelýärler. Häzirki wagtda hem olar Daşoguz şäheriniň Zaman köçesiniň ugrunda döwrebap ýaşaýyş jaýlarynyň gurluşyk işlerini alyp barýarlar. Mälim bolşy ýaly, meýilnama boýunça bu ýerde ýaşaýyş jaýlarynyň 12 sanysyny gurmak göz öňünde tutulypdyr. Kärhananyň ezber elli gurluşykçylarynyň yhlasly zähmeti bilen olaryň birnäçesiniň boýy ýetirildi, galanlarynda hem gurluşyk işleri öndürijilikli dowam etdirilýär. Bu babatda işçi-hünärmenleriň ençemesiniň has-da tapawutlanýandyklaryny bellemek bolar.

Gyş döwründe maldarlaryň aladasynyň has-da artýandygy mälimdir. Çünki şu günlerde mallary ýyly saklap, wagtynda iýmitlendirip, önümliligini peseltmezlik şol gaýragoýulmasyz işlere bagly bolýar. Şoňa görä, welaýatymyzyň maldarlary-da häzirki wagtda bu ugra ähli gujur-gaýratlaryny gönükdirýärler. Munuň şeýledigini Daşoguz welaýatynyň Görogly etrabynyň kärendeçi maldarlarynyň durmuşa geçirýän çäreleriniň mysalynda hem görmek mümkin. Olar hormatly Prezidentimiziň halkymyzy maldarçylyk önümleri bilen ýeterlik üpjün etmek barada öňde goýýan wezipeleriniň üstünlikli ýerine ýetirilmegine mynasyp goşant goşmaga çalşyp, öz işlerini ýokary derejede alyp barýarlar. Bu babatda aýdylanda, etrabyň Magtymguly adyndaky, «Bereket», «Aksaraý» we beýleki daýhan birleşikleriniň kärendeçi maldarlarynyň aýratyn tapawutlanýandyklaryny bellemek gerek. Zähmetsöýer maldarlaryň gowy netijeleri gazanmaklary olaryň gyş döwrüne has öňünden, ýokary derejede taýýarlyk işlerini amala aşyrmaklary bilen baglanyşyklydyr. Belläp geçişimiz ýaly, etrabyň Magtymguly adyndaky daýhan birleşiginiň kärendeçi maldarlary mallary ýyly hem-de dok gyşlatmakda oňat görelde görkezýärler. Olardan Annamyrat Bekiýewiň, Baýramgeldi Nurgeldiýewiň, Pälwan Bugraýewiň atlaryny agzamak bolar. Ýeri gelende aýtsak, häzirki wagtda bu daýhan birleşiginde iri şahly mallaryň 400-den gowragy kärendeçilik usulynda idedilýär. Şeýlelikde, bu ýerde mallardan bol önüm almak ugrunda ähli zerur tagallalar edilýär. Bu daýhan birleşiginiň tejribeli kärendeçi maldarlarynyň biri-de, ýaňy hem agzap geçişimiz ýaly, Pälwan Bugraýew bolmaly. Bu zähmetsöýer maldaryň öz garamagyndaky mallary talabalaýyk idetmek boýunça berjaý edýän işleri aýratyn bellenilmäge mynasypdyr. Maldarçylykda 20 ýyla golaý iş tejribesi bolan bu ýigidiň mal idetmegiň ýol-ýodalaryny birkemsiz ele alandygy mälim. Çünki onuň mal ýatagynda saklanylýan tohum öküzleriň, ene sygyrlaryň, göleleriň ideginiň ýetirilýändigi şeýle seredeniňde bildirip dur. Kärendeçi maldarlaryň aýtmagyna görä, ol mallar üçin ot-iýmlik ekinleri ýetişdirmek üçin bölünip berlen 20 gektar meýdandan geçen ýyl hem bol ýorunja bedesiniň, mekgejöweniň, arpanyň ýokary hasylyny öndüripdir. Şonuň ýaly-da, şol döwürde iri baldakly meýdan otlarynyň, bugdaý samanynyň köp mukdaryny ýygnapdyr. Bu bolsa oňa häzirki günlerde mallary göwnejaý iýmitlendirmäge mümkinçilik berýär. Etrabyň «Aksaraý» daýhan birleşiginiň kärendeçi maldary Toýly Baýramdurdyýewiň hem häzirki wagtda öz gözegçilik edýän 50-den gowrak iri şahly mallaryny gyşdan gurat, ýokary önümli ýagdaýynda alyp çykmak ugrunda gaýratly zähmet çekýändigini bellemek ýerliklidir. Munuň şeýledigini onuň kärendeçiligindäki mallardan alynýan önümleriň gündelik mukdary hem anyk tassyklaýar. Bu babatda kärendeçi maldaryň hem geçen ýylda bol ot-iým ätiýaçlygyny döretmeginiň, şu günlerde ondan rejeli peýdalanmagynyň ähmiýeti uly bolýar. Görnüşi ýaly, etrabyň maldarlary ýurdumyzda maldarçylyk pudagyny ösdürmek baradaky tagallalardan ugur alyp, şeýle netijeli işleri amala aşyrýarlar. Munuň özi olaryň şu ýyl hem uly üstünliklere eýe bolmaklaryna mümkinçilik döredýär.

Belent tutumlardan beýgelýän taryhy döwrümize şan berjek «Garaşsyz, baky Bitarap Türkmenistan — bedew batly at-myradyň mekany» ýylynyň ýene-de bir şanly senesi — 18-nji fewralda Türkmenistanyň diplomatik işgärleriniň güni giňden bellenip geçildi. Bu baýram döwletimiziň alyp barýan oňyn Bitaraplyk ýörelgesine hem-de «Açyk gapylar» syýasatyna esaslanýan daşary syýasy strategiýasyna laýyklykda gazanylýan üstünlikleri, türkmen diplomatiýasynyň bu ugurdaky mynasyp goşandyny dabaralandyrýar. Garaşsyz döwletimiz ilkinji günlerden halkara gatnaşyklar ulgamynda ösüşiň üpjün edilmegine, ýurdumyzyň dünýä derejesindäki ornunyň pugtalanmagyna aýratyn ähmiýet berdi. Türkmenistanyň hemişelik Bitaraplygynyň Milletler Bileleşigi tarapyndan ýörite Kararnama esasynda ykrar edilmegi bilen, ýurdumyz dünýä gatnaşyklaryndaky işjeňligini has-da artdyrdy. Parahatçylyk söýüjilik, ynsanperwerlik, hoşniýetlilik, bir-biregi goldamak ýaly asylly ýörelgelere esaslanýan daşary syýasatymyzyň üstünlikleri ýurdumyzyň halkara derejesindäki abraýyny has-da ýokarlandyrdy. Bu bolsa türkmen diplomatiýasynyň gazanan ýokary netijeleridir. Häzirki wagtda Garaşsyz, baky Bitarap Türkmenistan 160-a golaý döwlet bilen diplomatik gatnaşyklary ýola goýdy, daşary ýurtlarda diplomatik wekilhanalaryň we konsullyk edaralarynyň 40-dan gowragy, şol sanda biziň döwletimizde hem şonçasy, halkara guramalaryň onlarça wekilhanalary hereket edýär. Döwletimiz halkara guramalaryň 50-den gowragynyň agzasy bolup durýar we dürli ugurlar boýunça halkara şertnamalaryňdyr konwensiýalaryň 200-e golaýyna gatnaşýar. Munuň özi ýurdumyzyň diplomatik işiniň geriminiň näderejededigini görkezýär. Şonuň bilen baglylykda, Bitarap döwletimiz Birleşen Milletler Guramasy we onuň düzüm birlikleri bilen işjeň hyzmatdaşlyk gatnaşyklaryny durmuşa geçirýär. BMG-niň Bilim, ylym we medeniýet meseleleri boýunça guramasy, Çagalar gaznasy, Ösüş maksatnamasy, Senagat ösüşi boýunça guramasy, Bütindünýä Saglygy Goraýyş Guramasy, Bosgunlaryň işi baradaky Ýokary komissarynyň müdirligi, Ykdysady we Durmuş geňeşi, Terrorçylyga garşy göreşmek baradaky müdirligi ýaly ýöriteleşdirilen düzümleridir beýleki birnäçe komitetleri bilen işjeň hyzmatdaşlyk döwletimiziň halkara derejesindäki abraýyny artdyrýar, ornuny pugtalandyrýar. Ýurdumyzyň diplomatik gatnaşyklarynyň geografiýasy dünýäniň yklym we sebit döwletlerini öz içine alýar. Şeýle hem BMG, Ýewropa Bileleşigi, Ýewropada Howpsuzlyk we Hyzmatdaşlyk Guramasy, Yslam Hyzmatdaşlyk Guramasy, Ykdysady Hyzmatdaşlyk Guramasy, Garaşsyz Döwletleriň Arkalaşygy, Şanhaý Hyzmatdaşlyk Guramasy ýaly halkara düzümler bilen alnyp barylýan hyzmatdaşlyk gatnaşyklary ýurdumyzyň ikitaraplaýyn hem-de köptaraplaýyn görnüşdäki işjeňliginiň barha giňeýändigini açyp görkezýär. Hormatly Prezidentimiz: «Biz köp ýyllaryň dowamynda Türkmenistanyň diplomatik gullugynyň işiniň kämilleşdirilmegi, onuň maliýe we maddy-tehniki üpjünçiliginiň berkidilmegi, diplomatlaryň hünär ussatlygynyň ýokarlandyrylmagy ugrunda tagalla edýäris» diýip, uly buýsanç bilen belleýär. Gullugyň işgärleriniň durmuş-ýaşaýyş şertlerini gowulandyrmak boýunça edilýän aladalar, gullugyň maddy-enjamlaýyn binýadyny kämilleşdirmek, işgärleriniň we maşgala agzalarynyň ýaşaýyş-durmuş we beýleki hukuklaryny kanun arkaly goramak babatda durmuşa geçirilýän beýik tutumlar diplomatik gullugyň işgärleriniň şeýle aladalara özleriniň mynasyp işleri bilen jogap bermek baradaky maksatlaryny hem borçlaryny has-da artdyrýar.

Berkarar döwletiň täze eýýamynyň Galkynyşy döwründe hormatly Prezidentimiziň taýsyz tagallalary bilen, ýurdumyzyň beýleki ugurlary bilen bir hatarda, dokma senagaty pudagy hem ýokary depginler bilen ösýär. Pudagyň birleşiklerinde, önümçilik kärhanalarynda öndürilýän önümler ýokary hilliligi, bäsdeşlige ukyplylygy bilen tapawutlanyp, diňe bir içerki däl, eýsem daşarky bazarlarda hem uly isleg-talapdan peýdalanýar. Munuň özi ata Watanymyzyň ykdysady ösüşiniň barha belende göterilmegine, kuwwatynyň artmagyna möhüm goldaw berýär. Milli ykdysadyýetimiziň bu pudagynyň şeýle ýokary sepgitlere ýetmegine saldamly goşant goşýan önümçilik kärhanalarynyň ençemesi biziň welaýatymyzda-da iş alyp barýar. Olaryň biri hem Türkmenistanyň Dokma senagaty ministrliginiň Daşoguz şäherindäki «Serdar» pagta egriji fabrigidir. Bu kärhanada işleriň döwrebap şertlerde amala aşyrylmagynyň üpjün edilmegi onuň öňdebaryjylaryň hatarynda bolmagyna mümkinçilik berýär. Mälim bolşy ýaly, fabrikde ýurdumyzyň çäklerinde öndürilen pagta süýüminden birnäçe görnüşli önümler, ýagny ýörite belgili ýüplükler, mebel pamygy, arassalanan pagta galyndysy taýýarlanylýar. Bu iş kärhanada hereket edýän 3 sany önümçilik bölüminde alnyp barylýar. Olaryň her birinde öz kärinde uly iş tejribesi bolan hünärmenleriň, işçileriň ençemesi zähmet çekip, öndürilýän önümleriň ýokary hilli bolmagyny gazanýarlar. Ýeri gelende aýdanymyzda, geçen ýyl bu kärhananyň işçi-hünärmenleri üçin hem üstünlikli boldy. Has anygy, olar şol ýylda jemi 1600 tonnadan gowrak önüm öndürmegiň hötdesinden geldiler. Şeýle hem şol ýylda öndürilen önümleri ýerlemek boýunça möhüm işler ýerine ýetirildi. Berlen maglumatlara görä, olaryň esasy bölegi Russiýa, Türkiýe ýaly ýurtlara ugradylypdyr. Kärhanada jemi 240-dan gowrak adam zähmet çekip, olaryň 200-e golaýy gös-göni önümçilik işine gatnaşýar. Olaryň arasynda öz gujur-gaýraty, gazanýan netijeleri bilen köplere görelde bolýan işçi-hünärmenler az däl. Şeýle zähmetsöýer işgärlerden Çemen Kuwwatnyýazowa, Farangiz Mätkerimowa, Aşyr Bekmyradow, Enegül Ilmyradowa, Jeren Sapargylyjowa dagynyň atlaryny tutmak ýerlikli bolar. Kärhananyň işçi-hünärmenleriniň öndürijilikli zähmet çekmeklerinde olar üçin oňaýly iş, dynç alyş şertleriniň döredilmeginiň ähmiýeti uly bolýar. Şonuň üçin hem bu barada yzygiderli alada edilip, derwaýys çäreler guralýar.        Şu ýylyň «Garaşsyz, baky Bitarap Türkmenistan — bedew batly at-myradyň mekany» diýlip atlandyrylmagy  kärhananyň işçi-hünärmenlerini hem täze üstünliklere ruhlandyrýar. Şonuň netijesinde olar häzirki günlerde has-da yhlasly zähmet çekýärler. Bu bolsa kärhanada şu ýylyň ilkinji aýynyň meýilnamalarynyň hem üstünlikli ýerine ýetirilmegine şert döredýär. Elbetde, başda-da belleýşimiz ýaly, kärhananyň işçi-hünärmenleri hormatly Prezidentimiziň giň gerimli goldawlarynyň netijesinde barha belent sepgitlere ýetýän ýurdumyzyň dokma senagatynyň ösüşine has-da uly goşant goşmak maksady bilen zähmet çekip, uly üstünliklere eýe bolýarlar. Bu bolsa olaryň barha rowaçlanýan ýyly tutuşlygyna guwandyryjy netijelere beslejekdiklerini alamatlandyrýar.

Daşoguz welaýat «Azyk» önümçilik birleşiginiň Köneürgenç etrabyndaky ýyladyşhana toplumynda pomidoryň bol hasyly ýetişdirilýär. Şu ýyl ýyladyşhanada pomidoryň «Pink Сhampion F1» görnüşi öndürilýär. Ýyladyşhananyň umumy meýdany 10 gektar bolup, bu ýerdäki 4 bölümde işgärleriň 100-den gowragy zähmet çekýär. Olaryň her biri özüne berkidilen işi ýokary hil derejesinde ýerine ýetirýär. Ýyladyşhanada ähli işler awtomatik usulda, ýagny ekinleri suwarmak, iýmitlendirmek, ýylylyk, çyglylyk ýagdaýyny kadaly saklamak täze tehnologiýalaryň kömegi bilen amala aşyrylýar. Göreldeli işgärlerden Gülşat Mamedowa, Zöhre Kutlymyradowa, Leýla Agabaýewa, Merjen Atajykowa dagyny görkezmek bolar. Häzirki wagtda ýyladyşhananyň agzybir işgärleri hasyl ýygnamaga girişdiler. Ýygnalan hasyl terligine ak bazarlarda ilata elýeterli bahalardan ýetirilýär. Munuň özi ýurdumyzda ekologiýa taýdan arassa, ter gök önümler bilen ilaty ýylyň ähli döwründe ygtybarly üpjün etmek boýunça öňde goýlan wezipeleriň iş ýüzünde durmuşa geçirilýändigini tassyklaýar.

Daşoguz şäherindäki «Çeper» tikin fabriginde zähmet çekýän gelin-gyzlaryň yhlasy bilen öndürilýän tikin önümlerine halkymyzyň arasynda uly isleg bildirilýär. Belli bolşy ýaly, kärhanada ýurdumyzyň dürli pudaklarynyň işçi-hünärmenleri üçin ýörite egin-eşikler, şeýle hem saglygy goraýyş işgärleri, mekdep okuwçylary üçin lybaslar, hassahanalar, esger ýatakhanalary üçin ýorgan-düşekler, jemlenilip alnanda 100-den hem köp görnüşdäki tikin önümleri öndürilýär. Bu önümler ýokary hilliligi, berkligi bilen tapawutlanyp, hyrydarlarynyň barha artmagyna getirýär. Kärhananyň tikinçi-hünärmenleri geçen Halkara parahatçylyk we ynanyşmak ýylynda hem guwandyryjy netijelere eýe boldular. Olar şonda 21 million manatlyga golaý önüm öndürmegiň hötdesinden geldiler. Munuň özi bellenilen meýilnamalaryň üstünlikli ýerine ýetirilmegi ugrunda agzybir zähmet çekilendigini aňladýar. Şeýle öňegidişlikleriň gazanylmagynda kärhananyň eli çeper tikinçi gelin-gyzlarynyň ençemesiniň mynasyp goşantlary bar.

Daşoguz welaýatynyň Saparmyrat Türkmenbaşy etrabynyň pagtaçy kärendeçileri her ýyl «ak altynyň» bereketli hasylyny ýetişdirip, oňat netijeleri gazanýarlar. Etrabyň kärendeçi daýhanlarynyň şu ýyl hem gadamlary batly. «Garaşsyz, baky Bitarap Türkmenistan — bedew batly at-myradyň mekany» ýylynda etrabyň babadaýhanlary 30 600 gektarda gowaça ekişini geçirmegi göz öňünde tutýarlar. Sürüm,tekizleme, çil çekmek, dürli dökünler bilen ýerleri gurplandyrmak, ýuwuş suwuny tutmak ýaly möhüm agrotehniki çäreler giň gerimde dowam edýär. Şeýle hem häzirki günlerde ýerleri ýaz ekişine taýýarlamak bilen birlikde, ekiş möwsüminde ulanyljak tehnikalary, olaryň tirkeg gurallaryny abatlamak işleri-de guramaçylykly alnyp barylýar. Şu ýylyň ekiş möwsümde etrap boýunça ekijileriň 137,boronalaryň 2065, malalaryň 258 sanysynyň ulanylmagy göz öňünde tutulýar. Her bir güni ýokary netijeler bilen jemleýän etrap «Obahyzmat» önümçilik kärhanasynyň işçi-hünärmenleri, tejribeli ussalary abatlaýyş işlerini ýokary hil derejesinde ýerine ýetirýärler. Bu babatda kärhananyň göreldeli ussalaryndan Kerimulla Sarykulow, Baýmyrat Satlykow, Döwran Töräýew dagynyň atlaryny agzamak bolar. Işleriň öz wagtynda, talabalaýyk amala aşyrylmagy şu ýylda hem pagtaçy kärendeçileriň uly zähmet ýeňişlerini gazanmaklaryna mümkinçilik berer.

Türkmenistanyň Senagat we gurluşyk önümçiligi ministrliginiň Daşoguz welaýatynyň Daşoguz şäherindäki «Polimer önümleri» zawody dürli maksatly suw gurluşygynda ulanylýan turbalary we beýleki serişdeleri taýýarlamakda derwaýys işleri alyp barýar. Ýyllyk kuwwaty 920 tonna polietilen hem-de polipropilen turbalary öndürmeklige barabar bolan kärhananyň işçi-hünärmenleri gaýratly zähmet çekmek bilen, oňat netijeleri gazanýarlar. Munuň şeýledigini geçen ýylda ýetilen sepgitler hem aýdyň tassyklaýar. Şol döwürde kärhanada dürli ölçegdäki turbalaryň 20-den gowrak görnüşi öndürilip, şertnama esasynda degişli ýerlere yzygiderli ýetirildi. Şeýle netijeler bilen ruhlanan kärhananyň zähmetsöýer agzalary «Garaşsyz, baky Bitarap Türkmenistan — bedew batly at-myradyň mekany» ýylyna hem täze üstünliklere eýe bolmak hyjuwy bilen gadam goýup, özleriniň iş depginlerini barha ýokarlandyrýarlar. Bu ýerde öndürilýän ýokary hilli önümlere bolan islegiň barha artýandygyny-da bellemek bolar.