Milli ýörelgeleriň dabaralanmasy Milli senenamada möhüm orun eýeleýän 27-nji iýun senesinde Medeniýet we sungat işgärleriniň hem-de Magtymguly Pyragynyň şygryýet gününiň utgaşdyrylyp dabaralandyrylmagynda özboluşly many-mazmun bar. Türkmen halkynyň Milli Lideri Gahryman Arkadagymyzyň «Medeniýet halkyň kalbydyr» diýip belleýşi ýaly, halkyň ruhy dünýäsi, milli özboluşlylygy onuň medeniýetinde şöhlelenýär. Magtymgulynyň ajaýyp şygryýeti bolsa halkymyzyň akyl-paýhas kämilliginiň, ruhy binýadynyň gymmaty egsilmeýän edebi ýadygärligidir. Türkmeniň ruhy ýasawyna, milli ýörelgelerine akyl ýetirmek üçin beýik şahyryň halkyň ruhy akabasynyň çuňluklaryna kök uran edebi mirasyna düşünmek zerur. Şu hakda pikir edeniňde, hormatly Prezidentimiziň «Magtymguly —dünýäniň akyldary» atly kitabyndaky ajaýyp setirler hakydaňda janlanýar: «Magtymguly Pyragynyň eserlerine çuňňur düşünmegiň ýene bir açary il-günüňe, halkyňa bolan hormat-sylag, mähir-söýgi bilen berk baglanyşyklydyr. Çünki aryf şahyrymyzyň goşgularynda türkmen ruhy ýaşaýar». Halkymyzyň hakydasyna ornan ajaýyp aýdymdaky «Bu türkmeniň goşa-goşa täji bar, Biri Magtymguly, biri goşa tar» diýen ajaýyp setirler hem beýik şahyrymyzyň nusgawy döredijiliginiň halkymyzyň medeni mirasyna, edebi gymmatlygyna öwrülendiginiň aýdyň güwäsidir. Hut şonuň üçin-de milli medeniýetimiziň ösüşi Magtymguly Pyragynyň halkymyzyň ruhyýetini, akyl-paýhasyny baýlaşdyrmakda uly ähmiýete eýe bolan edebi gymmatlygy bilen berk baglanyşyklydyr. Medeniýet we sungat işgärleriniň hem-de Magtymguly Pyragynyň şygryýet güni mynasybetli uly toý tutumy bilen dabaralandyrylýan Medeniýet hepdeliginiň ýurdumyzyň welaýatlarynda we Aşgabat hem-de Arkadag şäherlerinde geçirilmegi ajaýyp döwürde asylly däbe öwrüldi. Bu toý halkymyzyň ruhy baýramy bolup, milli medeniýetimiziň we sungatymyzyň gadymylygyny, umumadamzat medeniýetiniň ösüşindäki ähmiýetini we täze taryhy döwürdäki milli galkynyşyny alamatlandyrýar. Berkarar döwletiň täze eýýamynyň Galkynyşy döwründe aýdym-saz, teatr, kino, amaly-haşam we şekillendiriş sungatyny, edebiýaty hem-de çeper döredijiligi ösdürmeklige aýratyn ähmiýet berilýär. Medeniýet hepdeliginiň çäginde guralýan baý many-mazmuna eýe medeni çärelerde bu ugurlarda gazanylýan üstünlikler aýdyň şöhlelenýär. Medeniýet, sungat we edebiýat halkyň edebi-ruhy gymmatlygy bolup, bagtyýar raýatlarymyzy täze taryhy döwürde gazanylýan belent ösüşlere mynasyp goşant goşmaga, kämil jemgyýeti kemala getirmäge ruhlandyrýar. Baky Bitaraplygymyzyň şanly 30 ýyllygy uly dabara beslenýän Halkara parahatçylyk we ynanyşmak ýylynda Ahal welaýatynda ýaýbaňlandyryljak Medeniýet hepdeligi täze taryhy döwürde sözüň doly manysyndaky medeniýet baýramçylygy bolup, oňa gatnaşyjylaryň her biriniň kalbynda, ýadynda täsirli wakalary, ajaýyp pursatlary bilen ömürbaky möhürlener.

Gadymy sungatyň ýaş zehinleri Nurmuhammet Andalyp adyndaky döwlet sazly drama teatrynda ýaýbaňlandyrylan «Çalsana, bagşy!» atly bäsleşigiň Daşoguz welaýat tapgyry uly ruhubelentlige beslenip, taryhy kökleri müňýyllyklardan gözbaş alýan milli aýdym-saz sungatymyzyň täze taryhy döwürde bagtyýar ýaşlarymyz tarapyndan mynasyp dowam etdirilýändigini alamatlandyrdy. Her ýyl Türkmenistanyň Prezidentiniň «Türkmeniň Altyn asyry» atly bäsleşiginiň çäginde geçirilmegi asylly däbe öwrülen bu bäsleşigiň ençeme ýaş, zehinli bagşy-sazandalaryň aýratyn ukyp-başarnyklarynyň ýüze çykarylmagynda, sungat äleminde kämilleşmeginde uly ähmiýete eýedir. «Çalsana, bagşy!» bäsleşiginiň esasy maksady milli aýdym-saz sungatymyzyň ussat halypa bagşy-sazandalaryň asyrlaryň dowamynda sünnäläp, kämillik derejesine ýetiren gymmatly mirasyny ýaş nesilleriň arasynda wagyz etmekden, umumadamzat ähmiýetli medeni gymmatlyklarymyzy dünýäde dabaralandyrmakdan ybaratdyr. Daşoguz welaýatynyň etrapdyr şäherlerinde geçen bäsleşigiň deslapky tapgyrlarynda tapawutlanmagy başaran ýaş dutarçy bagşy-sazandalar pederlerimizden miras galan ajaýyp mukamlary, halk aýdymlaryny ýerine ýetirip, özara bäsleşdiler. Eminler bäsleşige gatnaşyjylaryñ dutarda ýerine ýetirijilik we bagşyçylyk ussatlygyna, sahna medeniýetine ukyp-başarnygyna baha berdiler. Ýerine ýetirijilik ussatlygy bilen has tapawutlanyp, üstünlikli çykyş eden, Magtymguly Garlyýew adyndaky ýörite sungat mekdebiniň talyplary Sahy Täçmedow bilen Gurbanbibi Hudaýberdiýewa dagy dutarda saz çalmak ugry boýunça, Boldumsaz etrabynyň Jeýhun geňeşliginiň Gatyoý oba medeniýet öýüniň sazandasy Pälwan Tagyýew bilen Magtymguly Garlyýew adyndaky ýörite sungat mekdebiniň mugallymy Laçyn Mätgeldiýewa dagy bagşyçylyk ugry boýunça bäsleşigiň welaýat tapgyrynyň ýeňijileri diýlip yglan edildi. Ýeňijiler bäsleşigiň döwlet tapgyryna gatnaşmaga hukuk gazandylar. Ýeňiş gazanan we aýratyn tapawutlanmagy başaran zehinli bagşy-sazandalara Hormat hatlary, baýraklar gowşuryldy.

Berkarar döwletiň täze eýýamynyň Galkynyşy döwründe milli medeniýetimizi, sungatymyzy galkyndyrmak babatda ägirt uly işler amala aşyrylýar. Türkmen halkynyň Milli Lideri Gahryman Arkadagymyzyň milli medeniýeti halkyň kalbyna deňemeginde ägirt uly many bar. Köpöwüşginli, baý many-mazmuna eýe medeniýetimizde halkyň ruhy dünýäsi, durmuş pelsepesi şöhlelenýär. Halkymyzyň müňýyllyklaryň dowamynda kemala getiren medeniýetini ösdürmek we gözelligiň, nepisligiň nusgasy bolan milli sungatymyzy ýaýbaňlandyrmak, olary bütin dünýäde wagyz etmek babatda ägirt uly işler durmuşa geçirilýär. Ýurdumyzyň ähli künjeklerinde döwrebap teatrlaryň, muzeýleriň, kitaphanalaryň, medeniýet öýleriniň, döredijilik merkezleriniň gurlup ulanmaga berilmegi hem munuň aýdyň subutnamasydyr. Milli mirasymyzyň, medeni-ruhy gymmatlyklarymyzyň umumadamzat medeniýetiniň galkynyşyna itergi berendigini bu gün bütin dünýä ykrar edýär. Häzirki wagtda täze galkynyşy, beýik ösüşi başdan geçirýän milli medeniýetimiz, sungatymyz we edebiýatymyz täze taryhy döwrüň ruhy joşguny bolup, halkymyzy ata Watanymyzyň ösüşlerine mynasyp goşant goşmaga, täze zähmet üstünliklerine ruhlandyrýar. Ýeri gelende Medeniýet hepdeliginiň çäklerinde Medeniýet we sungat işgärleriniň hem-de Magtymguly Pyragynyň şygryýet gününiň uly dabara bilen bellenilýändigini buýsanç bilen aýtmak bolar. Halkara parahatçylyk we ynanyşmak ýylynda Ahal welaýatynda ýaýbaňlandyryljak Medeniýet hepdeligi milli medeniýetimiziň we sungatymyzyň häzirki döwürdäki ösüşini bütin dünýäde dabaralandyrjak şanly wakalara beslener. 2013-nji ýylda ilkinji gezek «Awaza» milli syýahatçylyk zolagynda badalga alan Medeniýet hepdeligini soňlugy bilen ýurdumyzyň welaýatlarynda dowamly geçirmek asylly däbe öwrüldi. Her ýyl dabaraly bellenilýän Medeniýet we sungat işgärleriniň hem-de Magtymguly Pyragynyň şygryýet gününe gabatlanylyp geçirilýän giň gerimli çäreler türkmen halkynyň medeni mirasyny, däp-dessurlaryny aýawly saklamaga, çuňňur öwrenmäge we wagyz etmäge, milli medeniýetimizi ösdürmäge hem-de täze zehinleri ýüze çykarmaga gönükdirilendir.

Ajap döwrüň joşguny hoş owazlarda Daşoguz welaýatynyň Daşoguz şäheriniň «Bagtyýar zaman» medeniýet öýünde ýaýbaňlandyrylan «Ýaňlan, Diýarym!» telebäsleşiginiň Daşoguz şäher tapgyry uly ruhy joşguna beslendi. Türkmenistanyň Prezidentiniň «Türkmeniň Altyn asyry» atly bäsleşiginiň çäginde geçirilýän aýdym-sazly, şowhunly bäsleşigiň şäher tapgyryna zehinli höwesjeň aýdymçylar gatnaşdylar. Olaryň ýerine ýetiren aýdymlarynda ýaşlyk joşguny, ýaşlaryň bagtyýar döwrümize bolan buýsanjy öz beýanyny tapdy. Asyrlaryň dowamynda ussat bagşy-sazandalarymyz tarapyndan sünnälenen halk aýdymlarynyň ussatlyk bilen ýerine ýetirilmegi milli aýdym-saz sungatymyzyň Berkarar döwletiň täze eýýamynyň Galkynyşy döwründe mynasyp dowam etdirilýändiginiň aýdyň güwäsine öwrüldi. Baky Bitaraplygymyzyň şanly 30 ýyllygy bellenilýän Halkara parahatçylyk we ynanyşmak ýylynda geçirilen bu aýdym-sazly bäsleşigiň esasy maksady zehinli ýaşlary ýüze çykarmakdan, döredijilige ruhlandyrmakdan ybaratdyr. Bäsleşige gatnaşýan ýaş aýdymçylar nusgawy estrada aýdymlaryny, halk we häzirki zaman aýdymlaryny ýerine ýetirip, öz ukyp-başarnyklaryny görkezdiler. Eminler topary bäsleşige gatnaşyjylaryñ ussatlygyna hem-de döredijilikli çemeleşmesine, sahnada özüni alyp barşyna, ukyp-başarnygyna baha berdi. Netijede, welaýat medeniýet müdirliginiň «Dostluk çemeni» tans toparynyň artisti Humaý Batyrowa, Daşoguz agrosenagat orta hünär okuw mekdebiniň talyby Röwşen Gurbannazarow, Daşoguz şäher medeniýet merkeziniň höwesjeň aýdymçysy Eziz Sabyrow dagy üstünlikli çykyş edip, bäsleşigiň welaýat tapgyryna gatnaşmaga hukuk gazandylar.

Berkarar döwletiň täze eýýamynyň Galkynyşy döwründe medeniýetimiziň we sungatymyzyň şöhraty dünýä ýaýylýar. Muny golaýda Özbegistan Respublikasynyň Hywa şäherinde geçirilen türki dünýäniň medeni forumynyň çäklerinde guralan IV halkara bagşyçylyk sungaty festiwalyna Türkmenistanyň halk artisti, Daşoguz şäheriniň 2-nji çagalar sungat mekdebiniň mugallymy Almagül Nazarowanyň gatnaşyp, birinji orny eýelemegi-de tassyklaýar. Ýokary derejede geçirilen festiwalda dünýäniň akyldary, türkmeniň beýik şahyry Magtymguly Pyragynyň döredijiligine ýüzlenilmegi, ýagny şahyryň ömür beýanyna we döredijiligine bagyşlanan «Magtymguly» kinofilminden bir parçanyň görkezilmegi, şeýle hem özbek sungat ussatlarynyň şahyryň «Boýlaryňa» atly şygryna döredilen aýdymy ýerine ýetirmegi milli edebiýatymyza, sungatymyza goýulýan belent sarpanyň beýanyna öwrüldi. Almagül Nazarowa festiwalyň özünde galdyran täsirleri barada şeýle gürrüň berdi: —Sazanda ýigitler Aşyr Nazarow, Wepa Nurmuhammedow dagy bilen festiwalda çykyş etmek üçin «Saýatly-Hemra» dessanyndan bir parçany taýýarladyk. Aýdymlaryň, kyssanyň ýerine ýetiriliş usullaryny kämilleşdirmek üçin halypa dessançy bagşylar Magtymguly Garlyýewiň, Ýolly Täjibaýewiň, Täçmyrat Taýjykowyň, öz kakam Kakabaý Nazarowyň we beýleki birnäçe bagşylaryň ýazgylaryny diňläp, olaryň ýerine ýetirijilik özboluşlylygyny, inçe tilsimlerini öwrendik. Bilşiňiz ýaly, yhlasymyz ýerine düşdi. Häzirki döwürde halkara medeni gatnaşyklara giň ýol açylyp, ata-babalarymyzyň asylly däpleri mynasyp derejede dowam etdirilýär. Maňa Azerbaýjan, Russiýa, Fransiýa, Türkiýe, Täjigistan, Hytaý ýaly ýurtlarda türkmen bagşyçylyk sungatynyň dessançylyk ýoly boýunça üstünlikli çykyşlarym bilen ajaýyp milli sungatymyzyň şan-şöhratyny, Watanymyzyň beýik ösüşlerini wasp etmek miýesser etdi. Men «Görogly» şadessanynyň şahalaryny, şeýle hem «Şasenem we Garyp», «Nejep Oglan», «Hüýrlukga-Hemra», «Ýusup-Ahmet», «Saýatly-Hemra» ýaly dessanlary ýerine ýetirýärin. Şeýle hem bagtyýarlyk döwrümizi wasp edýän şahyr, Türkmenistanyň Prezidentiniň «Türkmeniň Altyn asyry» bäsleşiginiň ýeňijisi Göwher Ahmedowanyň «Bagtyýarlyk» dessanyny aýdýaryn. Bilşimiz ýaly, Dutar ýasamak senetçiligi, dutarda saz çalmak we bagşyçylyk sungaty ÝUNESKO-nyň Adamzadyň maddy däl medeni mirasynyň görnükli nusgalarynyň sanawyna girizildi. Bagşylar milli baýramçylyklaryň bezegi, bagşyçylyk sungaty bolsa türkmen halkynyň ruhy ýoldaşydyr. Häzirki wagtda türkmen medeniýeti we sungaty halkymyzy birleşdirip, ruhy galkynyşy başdan geçirýär. Berkarar döwletiň täze eýýamynyň Galkynyşy döwründe milli medeniýetimizi we sungatymyzy ösdürmek, ýaş bagşy-sazandalary ýüze çykarmak we goldamak üçin uly işler alnyp barylýar. Türkmen sungatynyň şöhraty dünýä ýaýylsyn!

Özbegistan Respublikasynyň Hywa şäherinde geçirilen IV halkara bagşyçylyk sungaty festiwalynda Daşoguz welaýatynyň medeniýet we sungat işgärleriniň gazanan üstünligi ýurdumyzyň parahatçylyk söýüjilik syýasatynyň bütin dünýäde dabaralandyrylýan şanly ýylyň mazmuny bilen özboluşly sazlaşygy emele getirdi. Daşoguz şäherindäki 2-nji çagalar sungat mekdebiniň mugallymy, Türkmenistanyň halk artisti Almagül Nazarowanyň Aşyr Nazarowyň hem-de Wepa Nurmuhammedowyň sazandarlyk etmeginde «Saýatly-Hemra» dessanyndan ýerine ýetiren parçalarydyr halk aýdymlary dünýäniň kyrkdan gowrak ýurdundan iki ýüze golaý bagşy-sazandalary bir ýere jemlän festiwala gatnaşyjylarda uly täsir galdyrdy. Ýurdumyzyň bagşylar topary bu halkara bäsleşikde birinji orna mynasyp bolup, pul baýragy bilen sylaglanyldy. Ýurdumyzyň medeniýet we sungat ussatlarynyň halkara sungat festiwalynda gazanan bu üstünliginde milli aýdym-saz sungatymyzyň umumadamzat medeniýetiniň aýrylmaz bölegidigi hakyndaky hakykatyň güwäsi bolmak bilen, täze taryhy döwürde parahatçylygyň sazyna, dost-doganlygyň mukamyna öwrülýändigi aýdyň şöhlelendi. Her iki ýyldan bir gezek geçirilýän halkara bagşyçylyk sungaty festiwalynda dürli ýyllarda medeniýet we sungat ussatlarymyz Kerwen Ýowbasarowyň hem-de Garýagdy Saryýewiň birinji orna mynasyp bolandyklaryny hem aýratyn nygtamak zerur. Ýurdumyzyň wekiliýeti festiwalyň çäginde geçirilen Türki dünýäniň ikinji medeni forumyna hem-de «Täze Özbegistanda bagşyçylyk sungaty, häzirki zaman barlaglary we geljekki mümkinçilikler» atly halkara ylmy-amaly maslahata hem işjeň gatnaşdylar.

Goýny Aşyk Aýdyň pirli Daşoguz topragy hem aýdym-saz sungatynyň pajarlap ösen mekany hasaplanylýar. Bu babatda Daşoguz şäher medeniýet merkezi tarapyndan amala aşyrylýan işler bellärliklidir. Merkezde hereket edýän aýdym-saz, çagalar we ýetginjekler tans toparlarynyň hatarynda «Oguzabat» folklor tans toparynyň çykyşlary  hem öz milliligi bilen tapawutlanýar. 2000-nji ýyldan bäri «Oguzabat» ady bilen tanalýan biziň folklor tans toparymyzyň düzümi sekiz oglan, sekiz gyzdan ybarat bolup, tansçy gyzlarymyz milli däp-dessurlarymyz bilen bagly bolan ümäni, läleleri hem-de monjugatdylary ezberlik bilen ýerine ýetirýärler. Häzirki wagtda bolsa ösen döwrümiziň öwüşginleri çaýylan monjugatdy bentleri folklor tans toparlarymyzyň döredijilikli oýunlarynda özüniň çuň beýanyny tapýar. Şunlukda, milli däp-dessurlarymyz bilen baglanyşykly monjugatdy Nowruz baýramynda we beýleki dabaralarda folklor tans toparymyz tarapyndan iň bir şowhunly, täsirli ýerine ýetirilýän oýunlaryň biridir. Aýsoltan Atabaýewa gözellikde dünýä meşhur «Arkadag» şäheriniň açylyşynda birleşen tans topary bilen bilelikde çykyş etdi. Şeýle hem bu gyzymyz geçen ýylda Özbegistan Respublikasynyň Horezm welaýatynyň Hywa şäherinde geçirilen Halkara «lezgi» tans festiwalyna hem gatnaşdy. Toparyň tans goýujysy Döwletnazar Gurbannazarow hem öz işini talabalaýyk alyp barýan, sungata jany-teni bilen berlen agzalarymyzyň biri.

Milli bahar baýramy mynasybetli Türkmenistanyň Magtymguly adyndaky Ýaşlar guramasynyň Merkezi geňeşiniň hem-de Bilim ministrliginiň bilelikde ýurdumyzyň umumybilim berýän orta mekdepleriniň 2 — 4-nji synplarynda okaýan okuwçy gyzlaryň arasynda yglan eden «Iň eýjejik gyzjagaz» atly şadyýan bäsleşiginiň golaýda döwlet tapgyry geçirildi. Onda ildeşimiz, Daşoguz şäherindäki daşary ýurt dillerine ýöriteleşdirilen 7-nji orta mekdebiň 4-nji synp okuwçysy Aýnäzli Jepbarowa üstünlikli çykyş edip, 1-nji orna mynasyp boldy. Ýeňiji gyzjagazyň ýürek buýsanjyny okyjylara ýetirýäris. — Şadyýan bäsleşigiň döwlet tapgyryna gatnaşyp, onda deň-duş joralarymyň hatarynda çykyş etmek, üstünlik gazanmak meniň üçin iň bagtly pursatlaryň biri boldy. Berkarar döwletiň täze eýýamynyň Galkynyşy döwründe bize döwrebap bilim almaga, ukyp-başarnygymyzy açyp görkezmäge uly mümkinçilikler döredilýär. Şu bäsleşikde ýeňişli orna mynasyp bolmagymda hem onuň uly ähmiýeti boldy. Bäsleşigiň şertleri boýunça ýerine ýetiren çykyşlarym baýrakly orna mynasyp görüldi. Bu bäsleşik şadyýanlygy we täsirliligi bilen hemişelik ýadymda galdy hem-de birek-birek bilen dostlaşmak üçin uly mümkinçilik boldy. Hormatly orna mynasyp bolmagym meni mundan beýläk hem uly yhlas bilen okamaga, köpçülik çärelerine işjeň gatnaşmaga ruhlandyrdy. Gahryman Arkadagymyzyň hem-de Arkadagly Gahryman Serdarymyzyň bize bildirýän ynamyna wepaly bolup, gowy bahalar bilen okap, kämil bolup ýetişjekdigime tüýs ýürekden ynandyrýaryn.

Çagalar ata Watanymyzyň buýsanjydyr. Olaryň şadyýan gülkileri, hoş owazly aýdymlary parahatçylygyň, abadançylygyň hem-de bagtyýarlygyň kepilidir. Halkara parahatçylyk we ynanyşmak ýylynyň ilkinji günleriniň şatlykly pursatlary aýdym-sazyň muşdagy Nurjemal Ýusupowa üçin hem aýratyn ähmiýetli boldy. Şu ýylyň 4-nji ýanwarynda paýtagtymyzdaky Söwda-senagat edarasynda Türkmenistanyň Magtymguly adyndaky Ýaşlar guramasynyň Merkezi geňeşiniň Gulbaba adyndaky Çagalar baýragyna mynasyp bolmak bagtyýar nesilleriň ençemesine miýesser etdi. Şolaryň hatarynda Daşoguz şäherindäki daşary ýurt dillerine ýöriteleşdirilen 10-njy orta mekdebiň 10-njy synp okuwçysy Nurjemal Ýusupowa hem bar. Nurjemal 2009-njy ýylda Daşoguz şäherinde dünýä inýär. Ol çagalar bagyna gatnaýan döwürleri aýdym-saza teşne bolýar. Maşgalada iň uly gyz perzendiniň aýdym-saza höweslidigini heniz çagaka  ejesi Selbi Babaýewa duýýar. Nurjemal Daşoguz şäherindäki 36-njy çagalar bakja-bagynda geçirilýän dürli çärelerde birnäçe aýdymlary ýerine ýetirýär. Nurjemal Daşoguz şäherindäki daşary ýurt dillerine ýöriteleşdirilen 10-njy orta mekdebiň 5-nji synpynda okaýarka «Garaşsyzlygyň merjen däneleri» atly bäsleşigiň Daşoguz şäher tapgyrynyň ýeňijisi bolýar. Bu bolsa Nurjemalyň aýdym aýtmaga bolan höwesini has-da artdyrýar. Häzirki wagtda ol welaýatymyzda geçirilýän çärelerde hem yzygiderli çykyş edýär. Nurjemalyň «Arkadagly Serdarymyz», «Janelek», «Çalsana, bagşy!» ýaly aýdymlary höwes bilen ýerine ýetirýändigini bellemek möhümdir. Çagasynyň zehinini goldamak, oňa buýsanmak ata-ene üçin uly bagtdyr. Nurjemalyň kakasy Serdar, ejesi Selbi gyzynyň zehinine diýseň buýsanýarlar. Ata-enesiniň gürrüň bermegine görä, Nurjemal beýleki doganlaryndan tapawutlylykda, aýdym-saza, sungata uly höwes bildirýär. Onuň diňe bir aýdym-saza däl, eýsem, daşary ýurt dillerini öwrenmäge hem höweslidigini bellemeli. Nurjemal öz öňünde belent maksatlary goýýar. Ol özüniň dil öwrenmekde ukyp-başarnygyny kämilleşdirmegi maksat edinýär. Berkarar döwletiň täze eýýamynyň Galkynyşy döwründe ýaş nesilleriň ukyp-başarnyklaryny, zehinini ýüze çykarmak üçin ähli mümkinçilikler döredilendir. Nurjemal Ýusupowa hem berkarar döwletimiziň bagtyýar nesilleriniň biri. Ol özüniň zehinini açmaga, ýaş nesilleriň döwrebap bilim-terbiýe almagyna ähli şertleri döredip berýän hormatly Prezidentimize alkyş aýdýar.

«Pähim-paýhas ummany Magtymguly Pyragy» ýylynda ýurdumyzda medeniýeti, sungaty, edebiýaty ösdürmäge aýratyn uly üns berilýär. Daşoguz şäheriniň «Bagtyýar zaman» medeniýet merkezinde geçirilen döredijilik duşuşygy halypa şahyr Mämmetnazar Babanazarowyň doglan gününiň 70 ýyllygyna bagyşlandy. Duşuşyga döredijilik, bilim işgärleri, şahyryň maşgala agzalary gatnaşdylar.   Döredijilik duşuşygynda çykyş edenler Mämmetnazar Babanazarowyň döwrümizi, durmuşy, gözel tebigaty wasp edýän ajaýyp goşgulary barada täsirli gürrüň etdiler. Şahyryň döredijiliginiň esasy aýratynlyklary, täzeçe garaýyşlary hakynda aýratyn durlup geçildi. Mämmetnazar Babanazarowyň maşgala agzalarynyň çykyşlarynda şahyryň durmuşyna degişli täsirli wakalar beýan edildi. Duşuşygyň dowamynda medeniýet we sungat işgärleriniň ýerine ýetiren aýdym-sazly çykyşlary dabaranyň şowhunyny artdyrdy. Halypa şahyryň döredijilik mirasyna bagyşlanan bu dabara şanly ýylymyzyň baý mazmunly çäreleri bilen utgaşyp, ajaýyp sazlaşygy emele getirdi.