Arhiwler boýunça netije: 2026-06

Balkan welaýatynda uly dabaralara beslenen Medeniýet hepdeligi özünde örän baý, ruhy taýdan galkyndyryjy täsirleri galdyrdy. Birnäçe günüň dowamynda belent owazly aýdym-sazlar, teatrlaryň täsirli sahna oýunlary, halk döredijiliginiň nepis nusgalary kalplara egsilmez şatlyk paýlady. Bu hepdelik diňe bir medeni çäreleriň toplumy bolman, halkymyzyň agzybirliginiň, milli medeniýetimize we sungatymyza belent sarpasynyň aýdyň beýany boldy. Balkan welaýatynyň «Türkmeniň ak öýi» binasynda Medeniýet hepdeliginiň dabaraly açylyşy boldy. Bu ýerde guralan sergilerdäki amaly-haşam sungatynyň eserleri, keramiki we heýkeltaraşlyk, kitap we neşir önümleri, nakgaşlaryň, halk senetçileriniň işleri, halylar we kilimdir keçeler, şaý-sepleriň dürli görnüşleri, saz gurallary dabara gatnaşyjylaryň ünsüni özüne çekdi. Dabarada Medeniýet hepdeligine gatnaşýanlara Türkmenistanyň Prezidenti Serdar Berdimuhamedowyň iberen Gutlagy okaldy. Dabara ýurdumyzyň dürli sebitleriniň aýdymçylarynyň, döredijilik toparlarynyň ýerine ýetiren aýdym-sazly kompozisiýasy bilen dowam etdi. Açylyş dabarasy «Küştdepdi» tansy bilen tamamlandy. Medeniýet hepdeliginiň dowamynda welaýatyň Gyzylarbat etrabynyň medeniýet merkezinde «Hatyrasy belent halypalar» atly aýdym-sazly döredijilik duşuşygy geçirildi. Duşuşykda Balkan welaýatynda ýaşap geçen Baýram şahyr, Türkmenistanyň halk artistleri Sary Garryýew, Giçgeldi Amanow, Türkmenistanyň at gazanan bagşysy Baýramgeldi Aýjanow dagy uly hormat bilen ýatlanyldy. Duşuşykda ussat halypalaryň ömri we döredijiligi barada olaryň şägirtleriniň beren gürrüňleri has-da täsirli boldy. Balkan welaýat kitaphanasynda geçirilen «Garaşsyzlykdan galkynýan medeniýet» atly döredijilik bäsleşiginiň jemini jemlemek dabarasy, şeýle hem ýurdumyzyň halypa we ýaş şahyrlarynyň «Ylham joşguny» atly edebiýat agşamy ýokary guramaçylyga beslenýän Medeniýet hepdeliginiň täsirliligini has-da artdyrdy.  Balkan hem-de Daşoguz welaýatlarynyň medeniýet we sungat ussatlarynyň Balkanabat şäherindäki Nebitçileriň medeniýet köşgünde geçirilen konserti Medeniýet hepdeliginiň dabaraly çäreleriniň üstüni ýetirdi. Welaýatyň döwlet drama teatrynda «Bedew rowaýaty» atly sahna oýnunyň görkezilişi boldy. «Awaza» milli syýahatçylyk zolagynda Medeniýet hepdeligine gatnaşýan döredijilik işgärleriniň Hazar deňzinde gezelenji örän täsirli boldy. Döredijilik işgärleri, ilki bilen, Türkmenbaşy Halkara deňiz portuna gezelenç etdiler. Bu ýerde ýurdumyzyň medeniýet we sungat ussatlarynyň uly joşgun bilen ýerine ýetiren aýdym-sazlary, döredijilik toparlarynyň tanslary dabara gatnaşyjylara ruhy lezzet paýlady. Dana şahyrymyz Magtymguly Pyragynyň baý many-mazmunly şygyrlarynyň okalmagy gezelenjiň mazmunyny has-da baýlaşdyrdy. «Türkmennebit» döwlet konserniniň Nebiti gaýtadan işleýän zawodlar toplumynyň Türkmenbaşy şäherindäki medeni-sport toplumynda Balkan welaýatynyň çagalar döredijilik toparlarynyň «Bagtyýar nesilleriň owazy» atly aýdym-sazly çykyşlary, şeýle hem halypa sungat ussatlarynyň ýaş nesiller bilen döredijilik duşuşygy Medeniýet hepdeliginiň ýakymly, ýatda galyjy çäreleriniň birine öwrüldi.  Medeniýet hepdeliginiň çäklerinde Türkmenbaşy etrap medeniýet merkezinde «Arkadagly Watanymyz — dillerde dessanymyz» atly döredijilik duşuşygy şatlykly pursatlara beslendi. Duşuşykda täze taryhy döwrümizde mähriban Watanymyzyň bedew batly ösüşleri barada giňişleýin söhbet edildi. Şonuň ýaly-da etrabyň Belek şäherçesiniň medeniýet öýünde geçirilen «Ol şirwan perdäňe galsana, bagşy!» atly konsert uly ruhubelentlige beslendi. Balkan welaýat kitaphanasynda ýurdumyzyň hem-de ýurdumyzda işleýän daşary ýurtlaryň köpçülikleýin habar beriş serişdeleriniň wekilleriniň gatnaşmagynda geçirilen brifing baý mazmunly çäreleriň biri boldy. Onda häzirki döwürde internet ulgamynyň barha rowaçlanýandygy, bu babatda žurnalistikada hem döwrebap ösüş-özgerişleriň ýaýbaňlanýandygy buýsanç bilen bellendi. Medeniýet we sungat işgärleriniň hem-de Magtymguly Pyragynyň şygryýet güni mynasybetli Balkan welaýat kitaphanasynda nusgawy edebiýatymyzyň ägirtleriniň döredijiliginde milli buýsanjymyz bolan bedewlerimiziň waspyna bagyşlanan edebi duşuşyk örän täsirli boldy. Boýdan-başa ýokary ruhubelentlige beslenen Medeniýet hepdeliginiň ýapylyş dabarasy bu goşa baýramçylygyň çäreleri bilen utgaşyp, ýatda galyjy pursada öwrüldi. Balkanabat şäherinde ýerleşýän Magtymguly Pyragynyň nurana ýadygärligine ter gül desseleri goýlup, akyldar şahyrymyzyň döredijiligine belent sarpa hökmünde tagzym edildi. Soňra «Türkmeniň ak öýi» binasynda giň gerime eýe bolan dabaralar dowam etdi. Ilki bilen, bu ýerde dabara gatnaşyjylar guralan sergä syn etdiler. Dabaranyň geçýän ýerinde Arkadagly Gahryman Serdarymyzyň Medeniýet we sungat işgärleriniň hem-de Magtymguly Pyragynyň şygryýet güni mynasybetli halkymyza iberen Gutlagy okaldy. Soňra ýurdumyzyň medeniýet we sungat ussatlarynyň joşgunly çykyşlaryna uly orun berildi. Türkmenistanyň Prezidentiniň 2027-nji ýylda Medeniýet hepdeliginiň Daşoguz welaýatynda geçirilýändigi baradaky Karary okaldy. Bu babatda Daşoguz welaýatynyň wekillerine Göçme kubok gowşuryldy. Dabaraly konsert oňa gatnaşyjylaryň bilelikde ýerine ýetiren «Size şöhrat, size şan, Gahryman Arkadagymyz, Arkadagly Gahryman Serdarymyz!» atly aýdymy bilen jemlendi. Soňra dabara gatnaşyjylar hormatly Prezidentimiziň adyna Ýüzlenme kabul etdiler.

Daşoguz welaýat Taryhy we ülkäni öwreniş muzeýiniň mejlisler zalynda Medeniýet hepdeligine bagyşlanyp, muzeýiň TKA-nyň Daşoguz welaýat birleşmesi bilen bilelikde guramagynda «Muzeý gymmatlyklarynyň we taryhy-medeni ýadygärlikleriň öwrenilmegi, goralyp saklanylmagy hem-de ýetilen sepgitler» atly ylmy-amaly maslahat geçirildi. Maslahatyň ahyrynda muzeýiň wagtlaýyn sergiler zalynda guralan baýramçylyk sergisine syn edildi.

Türkmenistanyň Demokratik partiýasynyň Daşoguz welaýatynyň Daşoguz şäher komitetiniň, şäher häkimliginiň, welaýat Taryhy we ülkäni öwreniş muzeýiniň bilelikde guramagynda Medeniýet we sungat işgärleriniň hem-de Magtymguly Pyragynyň şygryýet güni mynasybetli «Medeniýet — jemgyýetiň ruhy baýlygy» atly aýdym-sazly baýramçylyk maslahaty geçirildi. Muzeýiň mejlisler zalynda geçirilen maslahata Daşoguzyň Magtymguly Garlyýew adyndaky ýörite sungat mekdebiniň mugallymy Bahar Hojaýewa, muzeýiň ylmy işgäri Batyr Uzakberdiýew, welaýat maliýe we ykdysady orta hünär okuw mekdebiniň mugallymy Begmyrat Mýatdurdyýew, Türkmen oba hojalyk institutynyň kafedra müdiri Begenç Daňatarow, «Daşoguz habarlary» gazetiniň işgärleri gatnaşdylar.

Medeniýet we sungat işgärleriniň hem-de Magtymguly Pyragynyň şygryýet güni mynasybetli «Daşoguz habarlary» gazetiniň redaksiýasy tarapyndan guralan döredijilik çäresi belent ruhy öwüşginlere beslendi. Daşoguz welaýatynyň Daşoguz şäheriniň gözel künjeginde ýerleşýän Magtymguly meýdançasynda, beýik Pyragynyň heýkeliniň öňünde geçirilen baýramçylyk dabarasyna redaksiýanyň döredijilik işgärleri, žurnalistler gatnaşdylar. Çäräniň dowamynda çykyş edenler Berkarar döwletiň täze eýýamynyň Galkynyşy döwründe türkmen medeniýetini we sungatyny, edebiýatyny ösdürmäge döwlet derejesinde berilýän ünsi aýratyn nygtadylar. Edebiýatymyzyň kämil nusgasy, dünýä edebiýatynda öçmejek yz galdyran Magtymguly Pyragynyň baý edebi mirasyny öwrenmekde we wagyz etmekde, şeýle hem welaýatyň medeni durmuşyny giňden açyp görkezmekde «Daşoguz habarlary» gazetiniň redaksiýasynyň alyp barýan işleri barada täsirli gürrüň edildi. Redaksiýanyň işgärleri gazetiň sahypalarynda welaýatyň baý medeni mirasyny, halk döredijiligini, aýdym-saz sungatyny we taryhy ýadygärliklerini giňden beýan etmek boýunça alnyp barylýan işleri, täze döredijilik gözlegleri barada durup geçdiler. Dabaranyň iň täsirli pursatlarynyň biri hem Magtymguly Pyragynyň pelsepewi garaýyşlaryna, watançylyk we ynsanperwer ýörelgelerine bagyşlanan täze goşgularyň okalmagy boldy. Bu döredijilik çäresi metbugat işgärleriniň agzybirligini, medeni mirasa bolan belent sarpasyny ýene-de bir gezek aýdyň görkezdi.

Berkarar döwletiň täze eýýamynyň Galkynyşy döwrüniň «Garaşsyz, baky Bitarap Türkmenistan — bedew batly at-myradyň mekany» ýylynda hormatly Prezidentimiziň ýurdumyzyň oba hojalyk pudagyny ösdürmek barada öňde goýýan wezipelerinden ugur alyp hem-de çäksiz goldawlaryndan önjeýli peýdalanyp, yhlasly zähmet çeken Daşoguz welaýatynyň  Görogly etrabynyň gallaçy daýhanlary Watan harmanyna bugdaý tabşyrmak baradaky ýyllyk meýilnamalaryny welaýatda ilkinji bolup üstünlikli ýerine ýetirmek bilen, uly abraýa eýe boldular. Olar şonda 15,5 müň gektar meýdandan 29450 tonnadan gowrak ýokary hilli, dokmaňyz däne öndürmegiň hötdesinden geldiler. Munuň özi olaryň geçen ýylyň güýzünden bäri öz galla meýdanlarynda çeken ýadawsyz zähmetleriniň guwandyryjy netijeleri berendigini aňladýar. Gazanylan bu uly zähmet ýeňşine etrabyň H.Myradow adyndaky, «Ýagtylyk», Magtymguly adyndaky, «Aksaraý» B.Öwezow adyndaky we beýleki daýhan birleşikleriniň gallaçy kärendeçileri öz ýyllyk meýilnamalaryny öňdäkileriň hatarynda ýerine ýetirip, uly goşant goşdular. Etrabyň gallaçylary hasylyň galan bölegini çalt hem-de ýitgisiz ýygnap almak ugrundaky işleri ýokary depginde dowam etdirýärler. Bu bolsa olaryň galla harmanlarynyň has-da belent boljakdygyna şaýatlyk edýär.

Ruhy galkynyşyň baýramy Her ýylyň 27-nji iýunynda Medeniýet we sungat işgärleriniň hem-de Magtymguly Pyragynyň şygryýet güni uly dabaralar bilen bellenilýär. Bu goşa baýramyň bilelikde bellenilmeginde çuňňur many bar. Bu baýram diňe bir hünär baýramy däl-de, eýsem, bütin bir halkyň ruhy baýlygynyň, taryhy kökleriniň, geljege bolan ynamynyň dabaralanmasydyr. Döredijiligi umumadamzat ähli tarapyndan ykrar edilen beýik akyldar Magtymguly Pyragynyň şygryýeti asyrlarboýy medeniýetimiziň we sungatymyzyň bitewi bir sütünidir. Şahyryň her bir setiri, nesihaty we pelsepesi döwürleriň synagyndan geçip, biziň ruhy şamçyragymyza öwrüldi. Şonuň üçin hem şu günki medeniýet we sungat işgärleri — bagşy-sazandalar, suratkeşler, teatr we kino ussatlary, ýazyjydyr şahyrlar öz ylhamyny, ilki bilen, Magtymguly Pyragynyň umman ýaly çuňňur döredijiliginden alýarlar. Medeniýet we sungat ynsanyň kalbyny terbiýeleýän, oňa gözellik we ynsanperwerlik duýgularyny eçilýän mukaddes güýçdür. Döwrüň dabaraly owazy bolup ýaňlanýan täze aýdymlar, sahna eserleri, milli medeniýetimiz we sungatymyz beýik akyldaryň arzuw eden agzybirlik we garaşsyzlyk ugrundaky garaýyşlary bilen sazlaşykly ösýär. Şu günki günde ýurdumyzyň medeniýet we sungat wekilleriniň öňünde uly we jogapkärli wezipeler dur. Olar milli mirasymyzy aýap saklamak, ony dünýä ýüzüne ýaýmak, bütin adamzat medeniýetiniň genji-hazynasyna goşant goşmak ugrunda tutanýerli zähmet çekýärler. Baýramçylyk günlerinde geçirilýän döredijilik duşuşyklary, sergiler, dabaraly çäreler munuň aýdyň beýanydyr. Geçmişiň beýik şahyranalyk mirasy bilen şu günüň döwrebap sungatyny utgaşdyrmak halkymyzyň kalbynda täze ruhy galkynyşlary we döredijilik üstünliklerine ymtylyşy oýarmakdyr. Magtymguly Pyragynyň şygryýet güni şahyryň ynsanperwerlik pelsepelerini, watançylyk duýgularyny geljekki nesilleriň kalbyna guýmakdyr. Şahyryň kämil setirleri häzirki zaman sungatymyzyň üsti bilen täze öwüşginde ýaňlanýar we hemmämizi täze döredijilik gözleglerine ruhlandyrýar.  Her bir halkyň taryhynda onuň medeniýeti we sungaty şol milletiň ýüzüni, kalbyny we dünýägaraýşyny görkezýän kämil aýnadyr. Türkmen halky asyrlarboýy özüniň ajaýyp aýdym-sazlary, nepis halylary, şahyrana döredijiligi we gadymy däp-dessurlary bilen dünýä medeniýetine uly goşant goşup gelýär. Häzirki bagtyýarlyk döwrümizde bolsa bu galkynyş täze belentliklere göterilýär.  Döwletimizde medeniýet we sungat işgärlerine uly sarpa goýulýar, olaryň öndümli zähmet çekmekleri üçin ähli şertler döredilýär. Ýurdumyzyň çar künjünde açylyp ulanmaga berilýän kaşaň medeniýet öýleri, teatrlar, muzeýler, kitaphanalar munuň aýdyň subutnamasydyr. Halkyň döredijilik dünýäsini baýlaşdyrmakda bagşy-sazandalaryň, teatr artistleriniň, suratkeşleriň, ýazyjydyr şahyrlaryň, žurnalistleriň bitirýän hyzmaty örän uludyr. Olaryň çekýän zähmeti döwlet sylaglary, hormatly atlar bilen yzygiderli ykrar edilýär. Sungat adamyna goýulýan sarpa, hakykatda, halkyň öz-özüne, öz taryhy köklerine, milli medeniýetine we mirasyna goýýan sarpasydyr. Baýramyňyz gutly bolsun, ylhamyňyz hemişe joşgunly bolsun, medeniýet we sungat ussatlary!

Şu günler oba hojalykçylar üçin örän jogapkärli möwsüm dowam edýär. Daşoguz welaýatynyň Köneürgenç  etrabynyň «Täze güýç» daýhan birleşiginiň pagtaçy kärendeçileri şu ýyl 1750 gektar ýerde gowaça ekişini geçirip, oňat gögeriş gazandylar. Häzirki wagtda olar hatarara bejergi işlerini ýokary depginlerde alyp barýarlar. Bu çärelerde daýhan birleşiginiň hem-de etrap «Obahyzmat» önümçilik kärhanasynyň tehnikalarynyň jemi 8-si işledilýär. Göreldeli mehanizatorlardan Teňňilbaý Berdişow, Kuwwat Annaýew, Kadyr Agamedow, Kabul Meredow dagyny görkezmek bolar. Ähli işleriň sazlaşykly alnyp barylmagy netijesinde her gün daýhan birleşiginde 80—90 gektar ýerde hatarara bejergi işleri talabalaýyk geçirilýär. Eziz Saparow, Maksat Meredow, Zybagözel Atajanowa, Selbi Baýrambaýewa ýaly tejribeli kärendeçileriň gowaça meýdanlaryny synlanyňda, bereketli altyn güýzde bol hasylyň kemala geljekdigine berk ynam döreýär. Möwsümleýin meýdan işleriniň öz wagtynda, talabalaýyk ýerine ýetirilmegi netijesinde gowaçalar kadaly boý alýarlar.

Berkarar döwletiň täze eýýamynyň Galkynyşy döwrüniň «Garaşsyz, baky Bitarap Türkmenistan — bedew batly at-myradyň mekany» ýylynda 145 müň gektar meýdanda bereketli galla hasylyny kemala getiren Daşoguz welaýatynyň zähmetsöýer gallaçy daýhanlary şonça ýerden Watan harmanyna 265 müň tonna ýokary hilli, dokmaňyz däne goşmagy maksat edinip, häzirki günlerde orak möwsümini ýokary depginlerde alyp barýarlar. Şonuň netijesinde gallaçylaryň, kombaýnçylaryň ýadawsyz zähmetleri bilen her günde kabul ediş bölümlerine müňlerçe tonna galla hasyly tabşyrylyp, göz öňünde tutulan belent sepgide tarap ynamly gadam goýulýar. Welaýatda şu ýylyň bugdaý oragy möwsümine badalga berlen gününden bu gaýragoýulmasyz çäräni amala aşyrmaklyga ähli gujur-gaýratlaryny gönükdiren gallaçy daýhanlaryň, daýhan birleşikleriniň köp sanlysynyň döwlet harmanyna däne tabşyrmak baradaky ýyllyk meýilnamalaryny irki möhletlerde, öňdäkileriň hatarynda üstünlikli berjaý etmekleri olaryň agzybirlikli zähmetleriniň netijesi boldy. Şeýlelikde, mukaddes Garaşsyzlygymyzyň şanly 35 ýyllyk baýramynyň giňden bellenilýän ýylymyzyň ajaýyp zähmet üstünliklerine beslenmegine mynasyp goşant goşmagy kalbynda beslän gallaçylaryň gazanýan bu üstünlikleri hemmeleri örän guwandyrýar. Uly üstünliklere eýe bolan hojalyklaryň hatarynda Akdepe etrabynyň «Pagtaçylyk», Mollanepes adyndaky, «Nowruz», Saparmyrat Türkmenbaşy etrabynyň «Şamahy», «27-nji oktýabr», «Ýeňiş», Görogly etrabynyň H.Myradow adyndaky, «Ýagtylyk», Magtymguly adyndaky, Gubadag etrabynyň «Amyderýa», «Döwletli», «Türkmenistan» daýhan birleşikleri, Şabat etrabynyň «Bossan», Biruni adyndaky daýhan birleşikleri, S.Rozmetow adyndaky oba hojalyk paýdarlar jemgyýeti, Köneürgenç etrabynyň «Bereket», Boldumsaz etrabynyň «Guýanagyz», «Agzybirlik», Garaşsyzlyk etrabynyň N.Andalyp adyndaky daýhan birleşikleri bar. Bellenilip geçilişi ýaly, olaryň sanynyň barha artýandygyny hem aýtmak zerurdyr. Elbetde, şeýle şöhratly ýylda aýry-aýry kärendeçi daýhanlaryň gazanan üstünlikleri köplere görelde bolarlykdyr. Mysal üçin, Akdepe etrabynyň «Pagtaçylyk» daýhan birleşiginden Meret Nuryýew 4,2 gektar meýdanyň her gektaryndan 77, Şabat etrabynyň S.Rozmetow adyndaky oba hojalyk paýdarlar jemgyýetinden Leýla Döwletowa 2,5 gektar kärende ýeriniň her gektaryndan 66, Reşit Abdyreýimow 3 gektar meýdanynyň her gektaryndan 63 sentner bugdaý hasylyny ýygnamagy başardylar. Ussat daýhanlaryň kemala getiren bereketli galla hasylynyň öz wagtynda hem-de ýitgisiz ýygnalmagyna Daşoguz welaýat «Obahyzmat» önümçilik birleşiginiň etraplardaky önümçilik kärhanalarynyň ezber kombaýnçylarynyň ýakyndan ýardam berýändiklerini hem belläp geçmek ýerliklidir. Häzirki wagtda welaýatyň galla meýdanlarynda ýokary öndürijilikli kombaýnlaryň 340-a golaýynyň güýjünden peýdalanylýar. Olara erk edýän kombaýnçylaryň her biriniň bu ugurda ýeterlik iş tejribesiniň bolmagy gündelik tabşyryklaryň doly ýerine ýetirilmegine şert döredýär. Galla oragyna gatnaşdyrylýan tehnikalara meýdan şertlerinde tehniki hem-de ýangyç guýmak hyzmatlarynyň ýola goýulmagy olaryň bökdençsiz hereket etmeklerine mümkinçilik berýär. Galla meýdanlarynda yhlasly zähmet çekýän kärendeçi daýhanlara, kombaýnçylara iş üstünde medeni-durmuş hyzmatlaryny guramak barada welaýatyň jemgyýetçilik guramalarynyň, degişli edaralarynyň işgärleriniň edýän derwaýys aladalary hem oňat netijeleri berýär. Şonda günorta arakesme wagtynda olaryň arasynda geçirilýän aýdym-sazly medeni çäreler uly şatlyk-şagalaňa beslenip, gallaçylaryň göwünlerini galkyndyrýar. Şeýlelikde, şu günler welaýatyň ähli künjeklerindäki bugdaý meýdanlarynda başarjaň gallaçy daýhanlaryň, kombaýnçylaryň, ýygnalan hasyly harmana daşaýan ulag sürüjileriniň joşgunly zähmetlerine şaýat bolýarsyň. Olaryň esasy maksatlarynyň ene topraga yhlas siňdirilip kemala getirilen ak bugdaýy — zer dänelerini isripsiz ýygnap, Watan harmanyna goşmak bilen, onuň has-da beýgelmegine ýardam bermekden ybaratdygyna göz ýetirmek kyn däl. Bu hem edermen gallaçylaryň şu şöhratly ýylda guwandyryjy zähmet ýeňşini gazanjakdyklaryndan alamat bolup durýar.

24-nji iýunda Balkan welaýatynda geçirilýän Medeniýet hepdeliginiň çäklerinde sungatyň, çeper döredijiligiň dürli görnüşlerini öz içine alýan köp sanly medeni çäreler ýaýbaňlandyryldy. Şol gün ir bilen Medeniýet hepdeligine gatnaşýan döredijilik işgärleri Hazar deňzinde gämili gezelenç etdiler. Munuň özi soňky ýyllarda tanalmaz derejede özgeren “Awaza” milli syýahatçylyk zolagynyň gözel görnüşini we bu künjegiň tebigy aýratynlyklaryny, gojaman deňziň giňişliklerini synlamak üçin ajaýyp mümkinçilik boldy. Medeniýet hepdeliginiň köpöwüşginli çäreleri welaýatyň Taryhy we ülkäni öwreniş muzeýinde dowam etdi. Bu ýerde ýurdumyzyň suratkeşleriniň “Sungat gözelligi — ylham çeşmesi” atly şekillendiriş we amaly-haşam sungatynyň eserleriniň sergisi ýaýbaňlandyryldy. Ýurdumyzyň suratkeşleriniň dürli ugurlar boýunça döreden eserleri bu ýerde guralan serginiň täsirli pursatlara baý bolmagyny şertlendirdi. “Türkmennebit” döwlet konserniniň nebiti gaýtadan işleýän zawodlar toplumynyň Türkmenbaşydaky medeni-sport toplumynda çagalar döredijilik toparlarynyň çykyşlary guraldy. Balkan welaýatynyň çagalar döredijilik toparlarynyň “Bagtyýar nesilleriň owazy” atly aýdym-sazly çykyşlary çärä gatnaşyjylarda ýatdan çykmajak täsirleri galdyrdy. Şeýle hem bu ýerde medeniýet we sungat ulgamy boýunça baý tejribe toplan sungat ussatlarynyň ýaş nesiller bilen duşuşygy geçirildi. Sungat ussatlary körpe artistlere özleriniň iş we durmuş tejribeleri barada gürrüň berdiler. Medeniýet hepdeliginiň nobatdaky güni dürli ugurlary öz içine alýan medeni-köpçülikleýin çärelere baý boldy. Hepdeligiň maksatnamasynda duşuşyklara we beýleki çärelere giň orun berildi. Ýurdumyzyň şahyrlarynyň deňziň kenarynda aýdyşyk görnüşindäki çykyşlary has-da täsirli boldy. Türkmenbaşy etrabynyň Belek şäherçesindäki Medeniýet öýünde ýurdumyzyň bagşy-sazandalarynyň “Ol şirwan perdäňe galsana, bagşy!” atly konserti hepdeligiň esasy wakalarynyň birine öwrüldi. Bu ýerde türkmen halkynyň taryhyň dowamynda we häzirki döwürde hem netijeli ulanylýan milli saz gurallarynyň sergisi guraldy. Medeniýet hepdeliginiň çäklerinde ýurdumyzyň halk teatrlarynyň arasynda guralan “Şadyýan şahandazlar” atly döredijilik bäsleşiginiň jeminiň jemlenmegi taryhy pursatlaryň üstüni ýetirdi. Balkan welaýatynyň Beýik Saparmyrat Türkmenbaşy adyndaky döwlet drama teatrynda halk teatrlarynyň arasynda geçirilen döredijilik bäsleşiginiň ýeňijileri sylaglanyldy. Bäsleşigiň jemini jemlemek we ýeňijileri sylaglamak dabarasy tamamlanandan soňra, bu ýerde “Ene wesýeti” atly sahna oýny görkezildi. Türkmenbaşy etrap medeniýet merkezinde ýurdumyzyň Garaşsyzlygynyň 35 ýyllygy hem-de 2026-njy ýylyň “Garaşsyz, baky Bitarap Türkmenistan — bedew batly at-myradyň mekany” ýyly diýlip yglan edilmegi mynasybetli “Arkadagly Watanymyz — dillerde dessanymyz” atly döredijilik duşuşygy geçirildi. Oňa gatnaşyjylar häzirki döwürde milli medeniýetiň, çeper döredijiligiň hemmetaraplaýyn ösdürilmegi ugrunda edilýän aladalaryň netijesinde, milli döredijilik ulgamynyň ösüşiň täze derejesine çykarylýandygyny bellediler. Netijeli we işjeň ýagdaýda geçen duşuşygyň dowamynda türkmen edebiýatynyň görnükli wekilleri we döwürdeş ýazyjylaryň hem-de şahyrlaryň döredijilik işi barada pikir alyşmalar boldy. Medeniýet hepdeligi Balkanabat şäherindäki Nebitçiler medeniýet köşgünde Lebap we Mary welaýatlarynyň medeniýet we sungat ussatlarynyň baýramçylyk konserti bilen dowam etdi. Konsert Medeniýet hepdeliginiň üçünji gününiň özboluşly jemlenmesine öwrüldi. Joşgunly aýdym-sazly çykyşlarda ösüşleriň belentliklerine tarap ynamly gadam urýan ýurdumyzyň ýeten derejesiniň, halkymyzyň bagtyýar durmuşynyň we Gahryman Arkadagymyzyň başyny başlan giň gerimli özgertmeleriniň Arkadagly Gahryman Serdarymyzyň baştutanlygynda üstünlikli durmuşa geçirilmegi netijesinde gazanylýan üstünlikleriň waspy ýetirildi.

Balkan welaýatynda Medeniýet hepdeligi üstünlikli dowam edýär. Giň gerimli forumyň dördünji güni hem medeni ähmiýetli çärelere baý bolup, olaryň guramaçylykly geçirilmegi hepdeligiň esasy maksadyna laýyk gelýär. 25-nji iýunda,  Medeniýet hepdeliginiň dördünji gününiň çäklerinde irden “Gadymy Dehistan” döwlet taryhy-medeni goraghanasynda “Taryhy-medeni ýadygärlikleriň öwrenilmeginiň we rejelenmeginiň häzirki zaman usullary” atly meýdan şertlerindäki ylmy-usulyýet maslahaty geçirildi. Döredijilik forumyna gatnaşyjylar Watanymyzyň geçmişini taryhy-medeni ýadygärlikleriň üsti bilen öwrenmekde arheologiýa ylmynyň ähmiýetiniň uludygyny belläp, bu barada alym Arkadagymyzyň: «Arheologiýa bizde ylmyň ösüşi üçin geljegi has uly bolan pudaklaryň biridir. Munda geljek nesilleriň, janypkeş barlagçylaryň öňünde ylmy açyşlar etmäge döredijiligiň giň meýdany açylýar» diýen jümlelerine ýüzlendiler. Giň gerimli işleriň çäklerinde halkara ähmiýetli milli medeni mirasymyzy öwrenmek, wagyz etmek üçin döwlet tarapyndan ähli mümkinçilikler döredilýär. Bu ugurda Türkmenistanyň Taryhy we medeni ýadygärlikleri goramak, öwrenmek hem-de rejelemek baradaky milli müdirliginiň garamagynda hereket edýän taryhy-medeni goraghanalar tarapyndan ylmy-arheologik barlag işleri alnyp barylýar. Hünärmenleriň toplan täze ylmy maglumatlary, tejribeleri barada maslahatlar guralýar. Medeniýet hepdeliginiň çäginde “Gadymy Dehistan” döwlet taryhy-medeni goraghanasynda meýdan şertlerinde guralan “Taryhy-medeni ýadygärlikleriň öwrenilmeginiň we rejelenmeginiň häzirki zaman usullary” atly ylmy-usulyýet maslahatyny muňa mysal hökmünde görkezmek bolar. Onuň dowamynda türkmen arheologlary tarapyndan gadymy Balkan topragynda saklanyp galan arheologik, binagärlik ýadygärliklerinde ýerine ýetirilen işler hem-de öňde durýan wezipeler barada pikir alşyldy. Hepdeligiň dördünji gününde Balkan welaýat kitaphanasynda täze neşir edilen we sesli kitaplaryň, täze döredilen elektron kitaplaryň saýtynyň tanyşdyrylyş dabarasy geçirildi. Oňa gatnaşyjylar kitabyň ähmiýeti barada aýratyn durup geçdiler. “Garaşsyz, baky Bitarap Türkmenistan — bedew batly at-myradyň mekany” ýylynyň belent maksatlaryny amal etmekde-de kitabyň hyzmatyna, kitaphana işgärleriniň alyp barýan işlerine möhüm orun degişlidir. Diýarymyzda öňdebaryjy tehnologiýalara, iň gowy dünýä tejribesine esaslanýan ýörelgelere laýyklykda, sesli kitaplar, täze döredilen elektron kitaplaryň saýty halk köpçüligine ýetirildi. Dabaranyň dowamynda oňa gatnaşyjylar olar bilen giňişleýin tanyşdyryldy. Hepdeligiň dördünji gününiň maksatnamasyndaky çäreler Balkanabat şäherindäki Nebitçiler medeniýet köşgünde dowam etdi. Bu ýerde Balkan welaýat ýörite sungat mekdebiniň aýdym-saz we döredijilik toparlarynyň konserti boldy. Onda ýaş zehinler çeper döredijilige, milli sungata bolan höwesini görkezdiler. Günüň ikinji ýarymynda Balkan welaýat kitaphanasynda köpçülikleýin habar beriş serişdeleriniň wekilleriniň, žurnalistleriň, şol sanda ýurdumyzda işleýän daşary ýurtlaryň köpçülikleýin habar beriş serişdeleriniň wekilleriniň gatnaşmagynda brifing geçirildi. Brifingiň başynda ilkinji gezek emeli aň esasynda taýýarlanylan hem-de saz we ses serişdeleri bilen bezelen wideorolik görkezildi. “Emeli aňyň ösýän şertlerinde media ulgamynda täze mümkinçilikler” diýlip atlandyrylyp, utgaşykly görnüşde geçirilen brifingde çykyş edenler Arkadagly Gahryman Serdarymyzyň başda durmagynda halkymyzyň durmuşyna döwrebap innowasiýalaryň yzygiderli ornaşdyrylýandygyny nygtadylar. Daşary ýurtlaryň köpçülikleýin habar beriş serişdeleriniň wekilleri çykyşlarynda türkmen kärdeşlerine Medeniýet hepdeliginiň üstünlikli geçýändigi mynasybetli gutlaglaryny beýan etdiler hem-de onuň çäklerinde geçirilýän çäreleriň ähmiýetine ünsi çekdiler. Bellenilişi ýaly, häzirki wagtda ýurdumyzda döwrebap maglumat-aragatnaşyk tehnologiýalaryny, emeli aňyň mümkinçiliklerini ykdysadyýetiň pudaklaryna, şol sanda ýaşaýyş-durmuşymyzyň dürli ugurlaryna giňden ornaşdyrmak, maglumat howpsuzlygyny üpjün etmek boýunça giň gerimli işler amala aşyrylýar. Umuman, brifing işjeň we netijeli häsiýetde geçip, Medeniýet hepdeliginiň çäklerinde guralan çäreleriň hatarynda mynasyp orna eýe boldy. Giň gerimli döredijilik forumynyň dördünji gününiň medeni çäreleri Türkmenbaşydaky nebiti gaýtadan işleýän zawodlar toplumynyň medeni-sport toplumynda jemlendi. Bu ýerde kino sungatynyň ussatlary bilen duşuşyk geçirildi, şeýle hem Türkmenistanyň Telewideniýe, radiogepleşikler we kinematografiýa baradaky döwlet komitetiniň Oguz han adyndaky “Türkmenfilm” birleşigi tarapyndan surata düşürilen filmiň görkezilişi boldy. Duşuşyga gatnaşyjylar milli kino eserleriniň kämil derejä ýetirilmegi we onuň halkara giňişlikde ykrar edilmegi ugrunda yzygiderli tagalla edilýändigi üçin hormatly Prezidentimize we Gahryman Arkadagymyza tüýs ýürekden hoşallyk bildirdiler. Soňra bu ýerde Oguz han adyndaky “Türkmenfilm” birleşigi tarapyndan taýýarlanylan filmiň görkezilişi boldy. Ol medeni çäräniň täsirliligini has-da artdyrdy. Şeýlelikde, Balkan welaýatynda geçirilýän Medeniýet hepdeliginiň dördünji güni hem gyzykly we özüne çekiji wakalary bilen olara gatnaşyjylarda ýakymly täsirleri galdyrdy.